حفیظ تائب۔۔۔۔اک عہد ساز نعت گوشاعر

شوق و نیاز وعجز کے سانچے میں ڈھل کے آ
یہ کُوچہ حبیبۖ ہے، پلکوں سے چل کے آ
حضرت حفیظ تائب (1931 -2004ئ) اک عہد ساز تے بے مثال نعت گو شاعر سن۔ اوہناں دے علم و فضل’ فن شعر اُتے عبور تے شخصیت نے ساریاں نوں اپنا اسیر کیتا۔ اوہناں دی نعت وسعت’ تنوع تے تاثراتی گہرائی توں فیض یاب اے۔ اوہ اظہار و ابلاغ دے اسرارورموز توں آشنا سن۔ حسن قدیت توں آشنا سن۔ انداز تخلیق معجزانہ اے۔ حفیظ تائب دا اصل نام عبدالحفیظ جد کہ تخلص تائب سی۔ آپ دی پیدائش اپنے ننھیال پشاور چھائونی وچ ہوئی۔ آبائی شہر احمد نگر ضلع گوجرانوالہ سی۔ والد مشہور معلم’ ادیب تے امام و خطیب سن جہناں دا نام حاجی چراغ دین منہاس قادری سی۔ بڑے برگزیدہ بزرگ سن۔ فی سبیل اللہ امامت و تدریس کردے۔ نعت خوانی دا اہتمام خصوصی طور تے کردے۔ کہندے نیں کسی درویش نے اوہناں نوں خوشخبری دِتی کہ تہاڈا فرزند خزانہ نعت گوئی وچ بلند مقام حاصل کرے گا۔ نعت گوئی نال شغف و محبت حفیظ تائب نوں اپنے والد محترم توں ای ملی۔ حفیظ تائب نے فن نعت گوئی نوں کمال عروج تک پہنچا دتا۔ جدید نعت نوں وسعت عطا کیتی۔ نویں جہتاں نال نوازیا۔ نویں بحراں تخلیق کیتیاں۔
خواب میں در کُھلا حضوری کا
کیا وسیلہ بنا حضوری کا
اک کسک جب مجھے نصیب رہی
وہ بھی تھا مرحلہ حضوری کا
حفیظ تائب نے نعت گوئی توں پہلاں فکر سخن دا آغاز غزل توں کیتا۔ غزل وچ تصوف تے ایقان دا رنگ سی۔ مشق سخن دا اگلا زینہ نعت گوئی سی۔ فیر تاحیات ایسے چمن وچ رہے۔ نعت گوئی وچ سچے جذبے’ بے پایاں خلوص’ سچی طلب تے بے پناہ عاجزی دا بھرم رکھیا۔ ذکر حضورۖ اتے پلکاں بھِج جاندیاں۔ دل عقیدت نال بھر جاندا۔ احساس تشکر نال سرشار ہو جاندے۔ سلیقہ و قرینہ’ نیاز مندی نال ہور وی زرخیز ہو جاندا۔
خواجہ محمد زکریا دا فرمانا بجا اے ”حفیظ تائب دی نعتیہ شاعری وچ قصیدہ’ مثنوی’ ترکیب بند’ ترجیع بند’ رباعی’ مثلث’ مسدس’ سٹینزا’ سی حرفی’ دوہا’ نظم آزاد فردیات’ گیت’ لوری تے کئی جہتاں جابجا موجود نیں۔ اصناف دے ایس تنوع مگروں بحراں تے زمیناں دی نویں دنیا آباد کیتی”۔ حفیظ تائب نے الفاظ تے تراکیب وچ فطری توازن تے اعتدال رکھیا۔
اے ربِّ نوا ڈال دے دامن میں نئی نعت
معمورئہ احساس کو مہکاتی ہوئی نعت
جلوے تھے جب اُس نورِ مجسم کے ہویدا
اُس عہدِ مقدس کی ہے، تصویر گری نعت
دلاور نگر سکھیکی وچ ابتدائی تعلیم حاصل کیتی۔ مڈل احمد نگر جد کہ میٹرک زمیندار ہائی سکول گجرات توں کیتا۔ حفیظ تائب نے ایف ایس سی نان میڈیکل لئی زمیندار کالج’ گجرات وچ داخلہ لیالیکن اوہنوں خیرآباد ایس لئی کہیا کہ ریاضی وچ دلچسپی نہیں سی۔ فیر اپنے ذوق دے مطابق اردو پنجابی دی تعلیم حاصل کردے ہوئے گریجویشن مکمل کیتی۔ 1949 وچ واپڈا دی ملازمت اختیار کیتی۔ پنجاب یونیورسٹی توں 1974 وچ ماسٹرز کیتا۔ سبجیکٹ سی پنجابی 1976 توں 2003تک شعبہ پنجابی وچ درس و تدریس دا فریضہ سرانجام دتا۔ اوہ پی ایچ ڈی دے مقالات دے وی نگران سن۔
نعتیہ شاعری اتے اوہناں دے گہرے نقوش نیں۔ گل دل توں نکلی تے دلاں نوں اسیر کر گئی۔ نعت گوئی نال خصوصی لگائو تے بچپن ای توں سی۔ کدی کدی جمعہ دی نماز توں پہلاں نعت سنایا کردے۔ اوہناں دا سینہ بچپن توں ای ذکر حضورۖ دے کارن منور سی۔
لڑکپن وچ ای شاعری وَل راغب ہوئے تے نعتیہ شاعری توں متاثر سن۔ پہلی نعتیہ رباعی 18 سال دی عمر وچ کہی۔ جذب و شوق دا عالم سی۔ ذہن و دل عقیدت نال فیض یاب سی۔ عالم وارفتگی وچ جو کہیا خوب کہیا۔
کس طرح چاند نگر تک پہنچوں
آپ بلوائیں تو در تک پہنچوں
چُومتے چومتے قدموں کے نقوش
عرش کی راہِ گزر تک پہنچوں
حفیظ تائب نے عربی ادب دے نعتیہ ذخیرے توں براہ راست استادہ کیتا۔ اوہ پنجابی’ اردو’ فارسی’ عربی تے انگریزی زباناں نال بخوبی واقف سن۔ اوہناں زباناں دے ادبیات دا بہت وسیع مطالبہ سی۔ اردو نعت دی پوری تریخ وچ اوہ اپنا ثانی نہیں رَکھدے۔ اوہناں دی نعت وچ سوزوگداز’ اخلاص تے انکسار اے۔ اوہناں دا مقصد محض نعت گوئی نہیں سی بلکہ اظہار عقیدت سی۔ جذبہ و جنوں دا اوہ سمندر سن جہڑا اوہناں دے اندر موجزن سی۔ اوہناں نے رستہ پا لیا سی۔ایہو اوجہ اے اوہناں دی نعت گوئی نے اپنے عہد نوں متاثر کیتا تے اپنے کمال فن نال اوہنوں نویں جہت نال آشنا کیتا۔ اوہناں دا ایہہ نعتیہ سفر’ نعتیہ تحریک وچ ڈھل گیا۔ عشق رسولۖ نال سرشار حفیظ تائب صاحب نے اپنے ہم عصر شاعراں نوں وی نعت گوئی ول مائل کیتا۔ اوہناں دی دعوت اتے نعت کہن والے جہناں شاعراں دے نعتیہ مجموعے نظر عام اتے آئے اوہناں وچ سرفہرست احمد نعیم قاسمی وی نیں۔حفیظ تائب نعت نہیں لکھدے سن بلکہ نعت کہندے سن۔ اوہناں دے ہاں آورد نہیں آمد سی۔ اوہناں دی نعتیہ شاعر فصاحت و بلاغت توں بھرواں نیں۔ والہانہ پن’ سہل ممتنع تے اعلیٰ فنی محاسن نال ہمکنار نیں۔
لفظ کے بس میں نہ تھا عرضِ تمنا کرنا
راس آیا مجھے اشکوں کو وسیلہ کرنا
اُن کے دامن بھی مُرادوں سے وہی بھرتے ہیں
عُمر بھر جن کو نہیں آیا تھا تقاضا کرنا
احمد ندیم قاسمی اوہناں نوں پاکستان دا سب توں وڈا نعت نگار قرار دیندے نیں۔ اوہ بہار نعت دی رفعتاں دے امین سن۔ حفیظ تائب نوں جدید نعت دے بانیاں وچ شمار کیتا جاندا اے۔ تسیں صحیح معنیاں وچ عاشق رسولۖ سو۔ اوہناں دی نعت دا مرکزی موضوع حضورۖ دی ذات و متعلقات توں ارادت تے عقیدت مندی اے۔ تاہم اوہناں دے موضوعات دی وسعت کجھ ایس طرح سی کہ اوہناں نے حضورۖ دے ارشادات تے پیغامات’ مقاصد نبوت تے بعثت نبوی نوں مسلسل پیش نظر رکھیا۔ ایہو اوہناں دی جدید نعت دی بنیادی خوبی اے۔ اوہناں دی نعت گوئی اصلاحی تے مقصدی پہلو تے لئے ہوئے ای اے لیکن اوہدی وسعت تے زرخیزی کجھ ایس طرح اے۔ اوہناں نے بڑی شائستگی نال ایہدے وچ عصر حاضر دے مسائل نوں وی سمیٹیا اے۔ پاکستان تے ملت اسلامیہ نوں درپیش مسائل وی جھلکدے نیں۔ ایہہ وصف کسے ہور دے ہاںوکھائی نہیں دیندا۔ انج اوہناں نے صنف نعت نوں وسعت دتی جہدے دامن وچ مسلماناں دی زبوں حالی’ پاکستان وچ سیاسی انتشار’ اخلاقی تے مذہبی قدراں دی پامالی’ مسجد اقصیٰ دا ماتم تے سامراجی جارحیت وی سمیٹی۔ ایس نالہ و فریاد نے فن نعت گوئی نوں معراج اتے پہنچایا۔دل انج گداز ہویا روضۂ رسولۖ اتے حاضری دتی تے کجھ نعتیہ کلام دا نزول وی ہویا مگر اوہ حد ادب وچ رہے۔ انداز ایہہ اپنایا ایہناں نعتاں وچ نہ تخلص ورتیا تے نہ ای مقطع آکھیا۔ حفیظ تائب نے نعت دی معنویت تے حسن وچ گراں قدر وادھا کیتا۔ اوہناں دی نعت وچ تغزل تے نغمگی اے۔ شعری جمالیات وچ نواں انداز فکر اے۔
خیال و خواب پہ وہ آستاں ہے چھایا ہُوا
جہاں فلک بھی ادب سے جبیں، نادہ ہے
مری نگاہ میں ہے بخت کا سکندر وہ
فقیر بابِ کرم پر جو ایستادہ ہے
حفیظ تائب دی نعتاں نسخہ بصیرت نیں۔ نغمۂ حجازی دی نغمہ گر نیں۔ اوہناں دی نعت آفاقیت دی مظہر اے۔ عروض و قوافی اتے ماہرانہ دسترس رکھدے نیں۔ نعت وچ مسائل حیات نوں سمون دا سلیقہ رکھدے نیں۔ اوہناں نے نعت گوئی دے میدان وچ بامعنی پیش رفت کیتی۔
حفیظ تائب صاحب ِکردار سن۔ اوہناں وچ تکبر’ نخوت تے گھمنڈدا شائبہ تک نہیں سی۔ اپنی نعت وچ اوہناں نے جو کجھ آکھیا اوہنوں تخلیقی سطح اتے محسوس وی کیتا۔ اوہ کئی زباناں دے شناور سن۔ فنی بریکیاں توں واقف سن۔ اسلوبیاتی سطح اتے نعت نوں نویں ذائقیاں نویں رنگاں نال آشنا کیتا۔ فکری تے فنی طور تے نعت نوں نواں آہنگ دتا۔
وہ ہے خوشبو حرم کے درو بام کی
جھوک دل کی ہے، جس نے بسائی ہوئی
چانہ تارے نگاہیں جھکانے لگے
داغِ ہجراں کی جب رونمائی ہوئی
حفیظ تائب اردو تے پنجابی دے نعتیہ ادب دی پہچان نیں۔ اک منفرد ذوق اظہار دے مالک نیں۔ اوہناں دی نعت گوئی وچ توازن تے اعتدال دا سلیقہ اے۔ محبت تے مؤدت’ عقیدت و شیفنگی دا سلسلہ اے۔ نعت دی خشبو پہراں مثام جاں نوں مہکاندیاں تے تازگی عطا کردیاںنیں۔ حفیظ تائب نعت گوئی دی صف وچ اک مستند حوالہ دی حیثیت رکھدے نیں۔ اوہناں دی نعت اپنی انفرادیت دی جوت جگاندی اے۔ عشق رسولۖ دی لافانی دستاویز اے۔ اوہناں دی نعت وچ مسکرات شان تے فلسفیانہ رنگ اے۔ ایہدے باوجود آسان فہم اے۔ بلاشبہ اوہ اردو تے پنجابی دے نعتیہ ادب دی پہچان نیں۔ اوہناں دی نعت گوئی وچ احساس توازن اے۔ شعور احتیاط اے۔ افراط و تفریط نہیں۔ حفظ مراتب دا غیر معمولی اہتمام اے۔ اسلوب بیان وچ سادگی تے لطافت اے۔ عقیدت و احتیاط وچ توازن اے۔ تغزل دی حلاوت تے بیان دی سلاسلت اے۔ وسعت نظر دے مظاہر نیں۔ مضامین دا تنوع نویں جہاں آباد کردا اے۔ تازہ تراکیب دا بو قلماں چمن مہکایا اے۔ حفیظ تائب دی ایمان افروز شعری کاوش دِلاں نوں تسخیر کردی اے۔
جن کے دیدار سے ملتا ہے دلو جاں کو سکوں
وہ حرم، وہ درو دیوار دکھا دے یا رب
آرزو جس کی تصور کو بھی مہکاتی ہے
وہ حسیں شہر بس اک بار دکھا دے یا رب
٭٭
آسماں اس کی لحد پہ شبنم افشانی کرے
ممتاز نعت گو’ جناب حفیظ تائب نے 13جون 2004 نوں ایس دنیا توں پردہ کیتا۔ انج جانو ایہہ دنیا اک سچے عاشق رسولۖ توں محروم ہو گئی۔
”بلھے شاہ اساں مرنا ناہیں’ گور پیا کوئی ہور”
اُ س کے سرور پی سے نہ نکلوں تمام عمر
ایک بار ہو جو اُن کی زیارت نصیب میں
اُن دُوریوں کو رنگِ حضوری عطا کریں
ہمت سفر کی اب نہیں باقی غریب میں