پاک بمقابلہ انگلینڈ سیریز۔۔۔ میلہ اَج توں کراچی وچ سَجے گا

3مارچ 2009 نوں لہور وچ سری لنکن کرکٹ ٹیم اتے دہشتگرد حملے مگروں پاکستان وچ انٹرنیشنل کرکٹ اُتے پابندی لگن نال شائقین کرکٹ انٹرنیشنل کھیڈاریاں نوں اپنے ملک وچ کھیڈدا ویکھن لئی ترس گئے سن۔ ایس واقعے توں اگلے دس سال پاکستان دے کرکٹ گرائونڈ انٹرنیشنل ٹیماں دے دوریاں توں محروم رہے۔ 2015 وچ پاکستان سپرلیگ دا آغاز ہویا تے اوہدے لئی وی متحدہ عرب امارات دے میداناں دا انتخاب کیتاگیا تے پہلے دونویں سیزنز مکمل یو اے ای وچ کھیڈے گئے۔ پی ایس ایل سیزن تھری 2017 دا فائنل میچ لہور قذافی سٹیڈیم وچ منعقد ہونا سی جہدے وچ کھیڈن توں بہت سارے انٹرنیشنل کھیڈاریاں نے معذرت کر لئی سی۔ 2018 وچ پی ایس ایل دے چوتھے سیزن دا پلے آف مرحلہ مکمل پاکستان وچ کھیڈیا گیا جہدے وچ انٹرنیشنل کھیڈاریاں دی پچھلے سال توں کجھ بوہتی تعداد پاکستان آ کے کھیڈی۔ ایسے طرح 2019 وچ پنجویں سیزن دے آخری اَٹھ میچ پاکستان وچ کھیڈے گئے تے فیر اوہ گھڑی آن پہنچی جہدا سب نوں انتظار سی کہ پی ایس ایل دے چھیویں سیزن 2020 نوں مکمل طور تے پاکستان وچ آرگنائز کرن دا اعلان کیتا گیا تے نیوزی لینڈ’ آسٹریلیا تے انگلینڈ سنے انٹرنیشنل کھیڈاریاں نے پاکستان آ کے شائقین کرکٹ دے دل جتے۔
ایس توں پہلاں سائوتھ افریقہ دے کپتان فاف ڈوپلیسی دی قیادت وچ ورلڈ الیون نے پاکستان دا دورہ ستمبر 2017 وچ کیتا جہدے وچ تن میچاں دی ٹی ٹونٹی سیریز دا پربندھ کیتا گیا۔ 2018 وچ ویسٹ انڈیز کرکٹ ٹیم نے پاکستان دا دورہ کیتا جہدے مگروں سری لنکا نے پاکستان وچ کرکٹ دی بحالی لئی اپنا کردار ادا کردے ہوئے دس سال مگروں 2019 وچ پاکستان دا دورہ کیتا جہدی وجہ نال پاکستان وچ سکیورٹی خطرات دا بھارتی پراپیگنڈہ دم توڑ گیا۔ ہن پچھلے تن سالاں وچ بنگلہ دیش’ سائوتھ افریقہ’ ویسٹ انڈیز تے سری لنکن ٹیماں پاکستان وچ ٹی ٹونٹی’ ون ڈے تے ٹیسٹ میچز کھیڈچکیاں نیں۔ چالو ورھے آسٹریلین ٹیم تقریباً 24 سال مگروں پاکستانی گرائونڈاں اتے اِن ایکشن ہوئی تے ایہنوں کرکٹ ایکسپرٹاں نے پاکستان وچ انٹرنیشنل کرکٹ دی مکمل بحالی دی نوید قرار دتا۔ ایس دورے وچ ٹیسٹ تے ٹی ٹونٹی سیریز آسٹریلیا دے نام رہیاں تے ون ڈے سیریز وچ پاکستان دا پلڑا بھاری رہیا۔
ہن پاکستانی شائقین کرکٹ لئی اک ہور خوشی دا موقع اے کہ انگلینڈ کرکٹ ٹیم ورلڈکپ توں پہلاں 7 ٹی ٹونٹی میچاں اتے مشتمل سیریز کھیڈن پاکستان پہنچ چکی اے۔ سیریز دا پہلا میچ اَج 20ستمبر شام ست وج کے 30منٹ تے نیشنل کرکٹ سٹیڈیم کراچی جد کہ آخری میچ دو اکتوبر نوں قذافی کرکٹ سٹیڈیم لہور وچ کھیڈیا جاوے گا۔ گو کہ انگلش کھیڈاریاں دا اپنے ملک ولوں ایہہ پاکستان دا پہلا دورہ اے لیکن انگلینڈ سکواڈ وچ شامل 20وچوں گیارہ کھیڈاری پی ایس ایل وچ مختلف فرنچائزز ولوں پاکستان دے گرائونڈاں وچ کھیڈ چکے نیں۔ ڈیوڈ ملان تے فل سالٹ انگلینڈ ٹیم وچ ڈیبیو کرن توں وی پہلاں پاکستان سپر لیگ دا حصہ بنے سن۔ چالوں سال ہون والے پی ایس ایل دے اٹھویں سیزن دے چیمپئنز لہور قلندر ز دی فائنل میچ وچ فتح وچ فل سالٹ نے اہم کردار ادا کیتا سی۔ا وہناں دے علاوہ ایلکس ہیلز’ لیام ڈاسن’ نائب کپتان معین علی’ ہیری بروک’ لیوک ووڈ’ ڈیوڈ ولی’ ول جیکس’ ریس ٹاپلی تے بین ڈکٹ وی مختلف فرنچائزز لئی پاکستان سپرلیگ دا حصہ رہ چکے نیں۔
پاکستان آمد مگروں انگلش کپتان جاس بٹلر دا پریس کانفرنس وچ اظہار خیال کردے ہوئے کہنا سی کہ اینے عرصے مگروں پاکستان دی سرزمین اتے آنا اک خوشگوار لمحہ اے۔ ساڈے کافی کھیڈاری ایس توں پہلاں پی ایس ایل وچ کھیڈ چکے نیں تے اوہناں نے پاکستان بارے اپنے مثبت تجربات وی ساڈے نال شیئر کیتے نیں تے سب توں ودھ کے ایہہ کہ پاکستان وچ عوام کرکٹ دے کہنے دلدادہ نیں۔
پاکستانی سکواڈ دی گل کیتی جاوے تے پندرہ ستمبر نوں چیف سلیکٹر نے انگلینڈ سیریز تے ٹی ٹونٹی ورلڈکپ 2022 لئی دو توں تن تبدیلیاں دے علاوہ تقریباً اک جئے سکواڈ دا ای اعلان کیتا۔ ایشیا کپ وچ درمیانے درجے دی بیٹنگ پرفارمنس مگروں ٹاپ آرڈر وچ شان مسعود دی شمولیت اک خوش آئند گل ا ے جدکہ بائولنگ وچ ساڈے سب توں قابل اعتماد گیند باز شاہین آفریدی انجری کارن انگلینڈ سیریز دا حصہ نہیں ہون گے لیکن ورلڈکپ سکواڈ وچ اوہناں دا نام شامل اے۔ مڈل آرڈر وچ افتخار احمد’ خوشدل شاہ تے آصف علی اتے سلیکٹراں دا بھروسہ برقرار اے تے چیف سلیکٹر دا کہنا سی کہ اسیں جہناں کھیڈاریاں اتے انویسٹ کردے آئے آں اوہناں نوں ورلڈکپ وچ وی موقع دیاں گے تے مینوں امید اے کہ ایہہ کھیڈاری سانوں مایوس نہیں کرن گے۔ انگلینڈ سیریز وچ دو نویں چہرے آل رائونڈر عامر جمال تے بائولر ابرار احمد نوں وی پہلی واری سکواڈ دا حصہ بنایا گیا اے جہناں نوں شاید پاکستانی ٹیم دی پہلے کجھ میچاں وچ چنگی پرفارمنس توں سیریز اتے گرفت مضبوط ہون مگروں ڈیبیو دا موقع مل سکدا اے۔ بائولنگ اٹیک وچ شاہین شاہ دی غیر موجودگی دی وجہ نال نسیم شاہ’ حارث رئوف تے حسنین پہلی تن آپشناں ہون گے۔
پاکستانی پلیئنگ الیون دی گل کیتی جاوے تے ایشیا کپ فائنل وچ کھیڈن والی ٹیم وچوں فخر زمان انجری کارن موجود نہیں جہناں دی تھاں شان مسعود نوں پلیئنگ الیون دا حصہ بنایا جاوے گا جد کہ باقی دس کھیڈاری ممکنہ طور تے اوہو بابر اعظم (کپتان) محمد رضوان (وکٹ کیپر)’ افتخار احمد’ خوشدل شاہ’ محمد نواز’ شاداب خان’ آصف علی’ حارث رئوف’ نسیم شاہ تے محمد حسنین ہون گے۔ ٹاپ آرڈر وچ اوپنر محمد رضوان تے بابر اعظم دی کارکردگی پچھلے دو سالاں وچ بے مثال رہی اے۔ مسلسل اینے رنز سکور کرنا کسے وی بلے باز لئی آسان نہیں ہوندا لیکن بابراعظم تے محمد رضوان نے ثابت کیتا اے کہ ایس ویلے اوہ دنیائے کرکٹ دی سب توں بہترین اوپننگ جوڑی نیں۔ ٹی ٹونٹی انٹرنیشنل رینکنگز وچ محمد رضوان پہلے نمبر تے جد کہ بابراعظم تیجے نمبر تے نیں۔ ایشیا کپ توں پہلاں بابر اعظم مسلسل 1050 توں ودھ دن ٹی ٹونٹی رینکنگز وچ نمبر ون رہن والے بلے باز دا ریکارڈ اپنے نام کر چکے سن لیکن ایشیا کپ دے چھ میچاں وچ اک وی تھرٹی پلس سکور نہ کرن کارن اوہ اپنی پہلی پوزیشن توں ہتھ دھو بیٹھے تے ایشیاکپ وچ سب توں بوہتے رنز سکور کرن والے محمد رضوان پہلی پوزیشن اتے براجمان ہو گئے۔
ایشیا کپ وچ بابراعظم دی ناقص بلے بازی دے کارن پاکستانی شائقین افسردہ ہون دے نال نال غصہ وی کر رہے نیں تے مطالبہ کیتا جا رہیا اے کہ بابر یا رضوان نوں اوپنر دے بجائے تیجے نمبر تے بھیجیا جاوے کیوں جے دونویں اوپنرز دا سٹرائیک ریٹ گھٹ ہون دی وجہ نال ٹیم نوں نقصان ہو رہیا اے۔ ایسے طرح دا اک سوال چیف سلیکٹر محمد وسیم کولوں پچھیا گیا تے اوہناں دا کہنا سی کہ تسیں ورلڈکرکٹ دی سب توں بہترین جوڑی نوں توڑن دا سوچ وی کیویں سکدے او؟ ٹیم مینجمنٹ تے سلیکٹرز دے ایس اعتماد نوں بابر اعظم تے محمد رضوان بوہتے سٹرائیک ریٹ دے نال بیٹنگ کر کے صرف اپنے بلے توں ای درست ثابت کرسکدے نیں۔ ورلڈکپ وچ جان توں پہلاں کپتان بابراعظم دا فارم وچ واپس آنا بہت ضروری اے جد کہ محمد رضوان دی جگہ نوجوان کھیڈاری محمد حارث نوں موقع دے کے ویکھیا جا سکدا اے۔ شان مسعود تیجے نمبر تے بہتر کارکردگی دین تے مڈل آرڈر اتے پریشر وچ کمی آوے گی جہدے توں اوہناں دی پرفارمنس بہتر ہون دے چانسز موجود نیں۔ گو کہ مڈل آرڈر وچ شعیب ملک جیسے اک بلے باز دی بہت لوڑ سی جہڑا مشکل پین تے وکٹ روک سکے تے لوڑ پین تے ہارڈ ہٹنگ وی کر سکے۔ مڈل آرڈر اتے بہت سارے تحفظات دے باوجود امید کیتی جاندی اے کہ ایس ٹیم وچ اینی صلاحیت اے کہ اپنے دن اتے کسے وی وڈی ٹیم نوں دھول چٹا سکدے نیں۔ پچھلے تن سالاں وانگوں اوپنرز تے نمبر تن بیٹر دی کارکردگی بہت اہمیت رکھدی اے۔ امید اے پاکستان ٹیم انگلینڈ دے خلاف ٹی ٹونٹی سیریز جتن دے نال نال ورلڈکپ وچ وی بہترین کارکردگی وکھاوے گی۔