پنج غلط فہمیاں جہریاں دور ہویاں

ارشاد بھٹی

جے پی ڈی ایم حکومت نہ آندی’ عمران حکومت نہ جاندی تے ایہ پنج غلط فہمیاں’ غلط فہمیاں ای رہندیاں’ جو غلط فہمیاں کدی دور نہ پاندیاں۔
پہلی غلط فہمی جہڑی دور ہوئی اوہ ایہ اے کہ پی ڈی ایم والے اہل’ تجربہ کار’ لائق’ سارے مسئلیاں دا حل اوہناں دے کول’ ایہ حکومت وچ آئے’ ایہ نالائقیاں’ نااہلاں دے آئی جی نکلے’ ایہ کنفیوژن دے پہاڑ نکلے۔ ایہناں دی بدترین کارکردگی نے عمران حکومت دی بیڈگورننس تے مس مینجمنٹ بھلا دتی۔ ایہناں نے پنج مہینے وچ عمران حکومت دے سارے گناہ بخشوا دتے۔ شہباز حکومت دے سامنے عمران حکومت مسیحا لگ رہی اے’ گورننس’ پرفارمنس’ قرضے’ ڈالر’ آئی ایم ایف’ معیشت’ خارجہ پالیسی’ داخلی معاملے’ ساریاں وچ ایہ نہلے ثابت ہوئے۔ اسیں آئے تے آئی ایم ایف نال نویں سرے توں معاہدہ کراں گے۔ اسیں سستی بجلی’ گیس دیاں گے۔ اسیں مہنگائی ختم کر دیاں گے۔ ایہ آئے بجلی’ گیس ڈھیر مہنگی ہوئی’ مہنگائی دا 50 سالہ ریکارڈ ٹُٹ گیا۔ عمران حکومت نے پاکستان نوں اکلا کر دتا۔ سارے دوست رنج ہو گئے اسیں آ کے ملک دی تنہائی ختم کر دیاں گے۔ ایہ آئے تے ملک دا رہیا سہیا بھرم وی جاندا رہیا۔ حالت ایہ کہ سعودی عرب نے سٹیٹ بینک وچ پیسے رکھوائے یاں تیل ادھار دتا ایہ آرمی چیف دی وجہ نال ہویا۔ یو اے ای نے پیسے سٹیٹ بینک وچ رکھوائے یاں قطر نال گیس معاہدہ ہویا’ ایہ آرمی چیف دی وجہ نال ہویا۔ نک نال لکیراں کڈھوان دے بعد آئی ایم ایف توں پیسے ملے’ ایہدے وچ وی آرمی چیف دیاں کوششاں۔ جے فیٹف بارے چنگیاں خبراں آ رہیاں’ ایہ وی فوج دیاں کوششاں’ شہبازشریف ترکی’ یو اے ای’ سعودی عرب گئے’ کسے نے منہ نہ لایا چین آرمی چیف نوں جانا پیا’ اودوں حالات بہتر ہوئے تے ایہ پراپیگنڈا کہ عمران حکومت نے سی پیک رول بیک کر دا سی اجے مہینہ بھر پہلاں چینی قونصل جنرل نے ایہ کہہ کے ایس من گھڑت پراپیگنڈے دے غبارے چوں ہوا کڈھ دتی کہیا عمران حکومت وچ سی پیک تے کم متاثر نہیں ہویا۔ غلط معلومات پھیلائی گئی۔
دوجی غلط فہمی جہڑی دور ہوئی اوہ ایہ اے کہ ایہ ووٹ دی عزت تے یقین رکھن والے’ ایہ سویلین بالادستی تے یقین رکھن والے’ ایہ جمہوریت پسند’ بھاویں مینوں تے پہلے دن توں ایہ پتہ اے کہ ایہ سویلین ڈکٹیٹر’ جمہوریت’ ووٹ دی عزت’ سویلین بالادستی ایہناں نوں چھو کے وی نہیں گزری پر سندھ ہائوس تماشے’ علیم گروپ’ ترین گروپ نوں ملا کے حمزہ شہباز نوں وزیراعلیٰ بنوان دے بعد ووٹ نوں عزت دا بیانیہ اپنی موت آپ مریا’ ایہناں دی اصول پسندی’ اخلاقیات دا ایہ عالم کہ کل تک اک دوجے نوں غدار’ ملک دشمن کہن والے’ کل تک اک دوجے نوں چور’ ڈاکو’ لٹیرا کہن والے اج صرف اقتدار لئی گھی شکر’ ذاتی مفادات لئی اک دوجے تے واری واری جا رہے نیں۔ ہن حالت ایہہ وے کہ حکومت ہو نہیں پا رہی عوامی مسئلے’ ملکی اوکڑاں حل ہو نہیں رہیاں بس صبح و شام عمران خان تے چڑھائیاں’ عمران خان نوں بددعاواں تے عمران توں جان چھڑان دی کوشش دیاں ترکیباں۔
تریجی غلط فہمی جہڑی دور ہوئی اوہ ایہ وے کہ پی ڈی ایم والے تے ریاست بچان یاں ملک بچان یاں مہنگائی’ بیروزگاری’ غربت ختم کرن آئے ایہ سب جھوٹ’ ہن تے ایہناں نے آپ وی دس دتا ہن تے ساریاں نوں پتہ چل گیا کہ ایہناں دے آن دی تن وجوہات’ پہلی آل بچائو’ مال بچائو’ کھل بچائو’ ایس لئی آندیاں ای نیب ختم کر دتا مطلب اپنے آپ نوں این آر او دے دتا۔ دوجی وجہ الیکٹرانک ووٹنگ مشین’ اوورسیز ووٹراں توں جان چھڑانی سی اوہ چھڑا لئی’ تریجی وجہ نومبر دی تقرری’ ایہ کسے قیمت تے وی عمران خان نوں اپنی مرضی دا آرمی چیف نہیں سی لان دینا چاہندے ایہ اپنی مرضی نال آرمی چیف لانا چاہندے سن۔
چوتھی غلط فہمی جہڑی دور ہوئی اوہ ایہ ے کہ عمران خان وزیراعظم بن کے ختم ہو چکیا یاں اقتدار چھن جاوے تے مقبولیت ختم ہو جاوے’ عمران خان جو اپنے اقتدار دے آخری دناں غیرمقبولیت دی انتہا تے سی اقتدار توں نکلدے ای انج مقبول ہویا کہ بھٹو صاحب دی مقبولیت پچھے رہ گئی۔ عمران خان دی مقبولیت دا ایہ عالم’ اوہ گھر بیٹھا ہویا سی تے قوم سڑکاں تے سی’ اپنے دور اقتدار وچ اک دو چھڈ کے ضمنی انتخابات ہارن والے عمران خان نے اقتدار چوں نکل کے مسلم لیگ نوں اوہناں دے گڑھ تے گھر وچ ہرا دتا تے ایہو نہیں سگوں زرداری فارمولیاں’ ن لیگی حربیاں تے چوہدری شجاعت دی چترچالاکیاں دے باوجود عمران خان نے پنجاب فتح کر لیا تے پرویزالٰہی نے وزیراعلیٰ بنوا دتا۔
پنجویں غلط فہمی جہڑی دور ہوئی اوہ ایہ اے کہ نواز’ زرداری’ مولانا اینڈ پارٹی نے بہت کجھ سکھ لیا’ ایہ میچور ہو گئے۔ جیلاں’ حوالاتاں’ دھکیاں’ جلاوطنیاں نے ایہناں نوں بدل دتا۔ نہ بابا نہ’ حکومت ملن دی دیر سی ایہ سارے ننگے ہوئے’ اصل چہرے سامنے آ گئے۔ پتہ لگا ایہناں نے کجھ نہیں سکھیا۔ ایہناں نے اوتھوں شروع کیتا جتھوں سلسلہ ٹُٹیا سی اوہو مخالفین تے جھوٹے پرچے’ اوہو لٹ مار’ اوہو اک دوجے نوں این آر او دینا’ اوہو بڑھکاں’ اوہو ڈرامے’ سگوں ایس واری تے ایہ اک قدم ہور اگے ودھے’ اوہ انج کہ شہباز’ زرداری’ مولانا نے اپنے اپنے پُتراں نوں وی اقتدار گاہ تک اپڑا دتا۔ قصہ مختصراً ایہناں نوں سو ورھے ہور دے دیو ایہ نہیں بدلن گے۔ ٭٭