رائے احمد خان کھرل شہید ،حریت تے نابری دا وَڈا ناں

اج 21ستمبر اے، عظیم ہیرو تے قوم دے محسن رائے احمد خان شہید دی شہادت دا دن، جس دن رائے احمد خان نے انگریزاں دے پنجاب تے مل مارن دے خلاف نابری دی تحریک دی قیادت کردیاں جامِ شہادت نوش کیتا۔ایہ ساڈا مزاج بن چکا ہے پئی اسیں اپنے محسناں تے ہیروز نوں بڑی چھیتی بھلا دینے ہاں۔ سانوں ساری قوم نوں غلامی کجھ اجہی بھا گئی ہے پئی انگریزاں توں آزادی ملن دے تہتر ورھے مگروں وی اسیں ذہنی تے فکری طور
تے آزادنہیں ہو سکے ہور تے ہور، ساڈے ہڈاں وچ غلامی دا سواد اجہیا رچ وس چکا ہے پئی اسیں اج وی شخصیات دی غلامی تے شخصیت پرستی تے مان کرکے خش ہونے ہاں۔ بہت سارے ناں دے دانشور پنجاب تے پنجابیاں نوں ایہ طعنا مار دے رہے ہین پئی اوہ دھاڑویاں نوں جی آئیاںنوں آکھدے رہے ہین۔اجہے دانشورپنجاب دی نابری دی تاریخ نوں ان سونہویں ہین۔ ایہ کہناغلط نہ ہو سی پئی اوہناں نوں جان بجھ کے، ان جانو تے ان سونہواں رکھیا گیا،کیوں جے پنجاب دا نابری دا کردار اج کل دی گل نہیں سگوں صدیاں توں، دراو ڑاں ویلے توں ہی نابری اوہناں دی گڑھتی وچ رلی ہوئی ہے۔ایہ دراوڑ ہی سن جہناںآریاں نوں پنجاب دی دھرتی تے ٹکن نہیں دتا سگوں اوہناں نوں گنگا، جمناوادی ول دھک کے ساہ لیا۔
اعتزاز احسن ہوراں اپنی کتاب سندھ ساگر وچ جان ہیرس دے حوالے نال لکھیا ہے پئی،پنجاب ہمیشا توں ای وکھرے سبھا دا رہیاہے، ایتھوں
دے قبیلے مردانگی تے شجاعت پاروں دوجیاں توں وکھرے تے جنگجوسبھا دے سن، انگریزاں نوں ایتھے سخت مزا ہمت داسا سامنا کرنا پیا ، پنجاب دے ایس مزاہمتی کردار نوں جان بجھ کے لوکائی دیاں نظراں توں اولھے رکھیا گیاتے پنجاب واسیاں نوں اجہی تاریخ پڑھائی گئی جیہدے وچ نابری دی تھاں خشامدی کردار دی وڈیائی کیتی گئی ہے، تاں جے لوکائی اصل حقیقت نوں نہ جان سکے۔ ایہدے وچ ساڈے تعلیمی نظام سمیت ، ساڈے ساریاں دا ہی قصور ہے پئی اسیں کسے موقعے تے وی اپنی تاریخ نوں آپ پڑھن تے گھوکن دی لوڑ ای محسوس نہیں کیتی،نہ ہی اسیں پرنٹ تے الیکٹرک میڈیا راہیں ایس نوں اجاگر کرن دا کوئی سربندھ ہی کیتا۔اسیں آپ وی تے اپنی نویں پیڑھی نوں وی حکمراناں دے قصیدے ای سنانا پسند کر دے رہے ہاں۔تاں جے حکمراناں نوں ظلم زیادتیاں توں ہٹکن ہوڑن والا کوئی جی پیدا ہی نہ ہو سکے۔پر رب دی اپنی حکمت ہے، اوہ ویلے کویلے اجہے منکھ دنیا تے گھلدا رہندا ہے جو ایہناں ظلمیاں دا نہ صرف ہتھ ڈکدے ہین سگوں قوماں دے نجات دہندا بن کے اوہناں نوں ظالماں توں نجات دواندے رہے ہین، ایسے طرح پنجاب دی دھرتی نے وی کئی سورمے پیدا کیتے ہین، جہناں نے ایہناں ظلمیاں دا، ہک ڈاہ کے مقابلا کیتا تے تاریخ دے پنیاں تے اپنا ناں نہ مٹن والی روشنائی نال لکھوایاہے، ایہناں وچوں شیخا گکھڑ، جیسرت، سارنگ خان تے رائے احمد خان کھرل پنجاب دے متھے دا ٹکا ہین۔
انگریزاں مارچ 1849 وچ، ملتان دے ہندو راجے مول راج نوں بھانج دے کے نہ صرف ملتان سگوںاوس ویلے دے سارے سانجھے پنجاب تے مل مار لئی تے پنجاب دا انتظام اک چیف کمشنر دے سپرد کر دتا ۔جس تے پنجاب واسی نابری کردیاں انگریز نوں سدھے ہو گئے۔ راویوں پار جھامرا آباد ہے، جتھوں دے رائے احمد خان کھرل علاقے وچ وڈی مانتا والے، بڑے جی دار تے اپنے قبیلے دے سردار سن۔ اوہناں نابری دی ایس تحریک دی اگوائی کیتی۔ رائے شروع دن توں ہی انگریز دے پنجاب تے قبضے نوں پسند نہیں سن کردے کیوں جے اوہ انگریز نوں غاصب سمجھدے سن۔ علاقے دے دوجے سردار تے گبھرو وی رائے وانگ انگریز نوں نا پسند کردے سن۔ انگریزاں نے پنجاب دے کئی ہور وڈے وڈے جاگیرداراں وانگ، رائے احمد خان کھرل نوں وی اپنے نال رلان لئی بڑے جتن کیتے ۔ اوہناں نوں کئی طرح دے لالچ دتے پر رائے کھرل اوہناں دی اک نہ منی۔اوہناں بارے طالب جتوئی آکھدے ہن،
بڑا لجپال سی اوہ ایس مٹی دے بلپے دا
فرنگی دا کویں بن دا بھلا احمد کھرل بیلی
جدوں احمد خان کھرل فرنگیاں دی اک نہ منی تے اوہناں رائے دی گرفتاری لئی بہانا گھڑنے شروع کر دتے، اوس ویلے دے انگریز اسسٹنٹ کمشنر برکلے اوہناں نوں سد کے، اوہناں دی لڈکی گھوڑی مورنیدی منگ کیتی، جس تے رائے آکھیا،
انگریز برکلی آہندااے، رائے احمد دیو گھوڑیاں،
تیری نندنوں (لندنوں)لکھ لیاوساں نیک نامی
رائے احمد آہندا اے،
رناں، بھوئیںتے گھوڑیاں، ونڈ کسے نہ دتیاں
ہوندیاں بِت دے وچ ساہ سلامی
پنجاب تے قبضے دے کجھ سال پچھوں ہی پنجاب دے غیرت وند سپوتاں نے مزاہمت دا راہ اپنایا، ایس مزاہمت نوں کچلن کیتے انگریز نے عوام تے ظلم دے پہاڑ توڑنے شروع کر دتے ۔جس نے بلدی تے تیل دا کم کیتاتے انگریزاں توں آزادی دی لہر تیزی نال ودھن لگ پئی۔ فوجیاں دے(گاں تے سور دی چربی لگے) کارتوس چلان توں انکار تے کئی چھاونیاں وچ فوجیاں توں اسلحا واپس لین پاروں حریت دی اگ ہور بھڑک پئی ۔مئی نوں دلی میرٹھ تے کجھ ہور علاقیاں وچ لوکی باہر نکل آئے، ایدھر 80 ورھیاںدی عمردے ،رائے احمد کھرل نے اپنے
علاقے دے سرداراں نوں انگریز توں آزادی لئی پر یریا۔ انگریزاں رائے دے منصوبے نوں ناکام کرن لئی ، معاملا نہ دین دا بہانا بنا کے مقامی قبیلیاں دے کئی بندے پھڑ لئے، رائے ڈپٹی کمشنر نوں اوہناں دی رہائی دا آکھیا،قیدی جیل توڑ کے باہر آگئے، جس تے انگریزاں قیدیاں نوں بھڑکان تے شہ دین دے الزام تے رائے نوں پھڑن دے جتن کیتے گئے،رائے اوہناں دے ہتھے نہ چڑھے۔ ستمبر نوں رائے نے راوی دے راٹھاںدا اک اکٹھ کمالیے سدیاتے اوہناں نوں رل کے انگریز توں آزادی حاصل کرن دا سجھا دتا،پر مخبری ہون کر کے رائے اپنے منصوبے وچ کامیاب نہ ہو سکے، اوہناں انگریز سرکار خلاف چھاپا مار گوریلا کاروائیاںتیز کردتیاں تے اوہنوں مالی تے جانی نقصان پہنچاندے رہے۔ ستمبر نوں رائے پنڈ گشکوری لاگے، انگریز سرکار نوں سدھے ہو گئے، لڑدیاں لڑدیاںعصر دا ویلا ہو گیا، رائے نماز پڑھن لگ پئے ، انگریزاں ایس دوران اوہناں نوں شہید کر دتاتے سر لاہ کے گوگیرا جیل دی کندھ تے ٹنگ دتا۔مجاہداں پہلاں سر دے بغیر دھڑ نوں جھامرے لے جا کے دفن کر دتا۔ رات نوںرائے دا اک جانثار ساتھی قلعے دی کندح تے چڑھ کے سر لاہ لیایا تے اوہنوںجھامرے دھڑ نال جوڑ کے دفن کر دتا۔ ایس شہادت مگروں جواب وچ مجاہداں اسسٹنٹ کمشنر برکلے نوں مار کے بدلا چکایا۔مقامی شاعراں ڈھولیاں راہیں ، اک پاسے رائے احمد کھرل دی بہادری دے جس گائے تے دوجے پاسے اوس ویلے دی نابری دی تاریخ دی سانبھ سنبھال کیتی۔
چڑھیا انگریز برکلی، جنگ دی کر تیاری
مراد آہندا اے ، کنڈ دے دوڑ نہ جاویں انگریز برکلی
جھکائی سانگ ، پوتر دلیل دے، ٹوپ انگریز دا کھلا ای ڈھالی
ڈھاندے نوں ماریاں ڈانگاں، سوجھے بھدروں
مارے انگریز برکلی دی، لندن چٹھی اپڑ گئی کالھی
میں اوہنوں انکھی نہیں سمجھدا
جہڑا احمد خان دا دکھ وسارے