لاقانونیت انصاف دی ضد اے

ایہ کہانی شروع ہوندی اے 23مارچ 1944ء توں جدوں دوجی جنگ عظیم دوران امریکی ریاست سائوتھ کیرولینا وچ دو سفید فام بچیاں اپنی سائیکل تے گھر توں اک خاص پھُل دی تلاش وچ نکلیاں۔ راہ وچ اوہناں بچیاں نے دو سیاہ فام منڈیاں توں اوس خاص پھُل بارے پچھیا کہ ایہ پھُل کتھوں ملن گے جہناں تے اوہناں سیاہ فام منڈیاں نے جواب دتا کہ اسیں ایہناں پھُلاں دے بارے کجھ نہیں جان دے۔ اوہدے بعد سفید فام بچیاں اپنے سائیکل تے اگے چل پئیاں۔ ایتھے گل ختم نہیں ہوئی… پر رات نوں ایہ سفید فام بچیاں اپنے گھر نہیں پرتیاں۔ جدوںگھر والے تے اہل علاقہ بچیاں دی تلاش وچ نکلے تے ہزار فٹ دور اک کھائی وچ بچیاں دیاں لاشاں ملیاں۔
بچیاں کیوں جے سفید فام سن ایس لئی اہل علاقہ وچ کہرام مچ گیا۔ قاتل نوں چھیتی توں چھیتی پھڑن دا مطالبہ تیز کیہ تیز تر ہو گیا جد کہ پولیس دے کول نہ تے کوئی گواہ سی تے نہ ای آلہ قتل برآمد ہویا۔ لوکاں دے پریشر دی وجہ نال پولیس کیس نوں داخل دفتر وی نہیں سی کر سکدی تے نہ ای کسے سفید فام نوں بناں کسے پکے ثبوت دے پھڑ سکدی سی۔ فیر پولیس نے پاکستانی پولیس وانگوں سوکھا شکار پھڑن دا فیصلہ کیتا۔ پولیس نوں اک بندے نے دسیا قتل ہون والی سفید فام کڑیاں نے اک چودہ سالہ جارج سٹینی تے اوہدی ست سالہ بھین ایمی نال کوئی گل کیتی سی۔ بس ایس ثبوت تے جارج دے گھر چھاپا ماریا چودہ سال دے جارج سٹینی نوں پھڑ لیا گیا تے اوہدی بھین نوں کم عمری دی وجہ نال چھڈ دتا۔ گرفتاری دے بعد پاکستانی پولیس وانگوں خوب چھترول کر کے اوہدے توں گناہ قبول کروا لیا۔ جارج نوںگرفتاری دوران شہبازگل وانگوں نہ تے گھر والیاں نال ملن دتا تے نہ ای وکیل نال ملاقات دی اجازت دتی۔ چودہ سال دے جارج دے قتل دا ٹرائل کسے جج یاں عدالت نے نہیں سی کرنا سگوں اوس ویلے دے قنون دے مطابق اہل علاقہ دی پنچایت نے کرنا سی۔ پنچایت وچ سارے لوک وی سفیدفام سن کیوں جے اوس ویلے جنوبی ریاست امریکہ دے اوس حصے تے جمکرو لاء نافذ سی ایس لاء دے مطابق سیاہ فام اک کم حیثیت لوک نیں۔ اوہناں دیاں عبادت گاہواں’ ریسٹورنٹ’ سکول’ سفر تے دوجیاں بہت ساریاں چیزاں سفیدفام توں وکھ ہون گئیاں۔ سیاہ فام لوک سفید فام لوکاں نال ہتھ نہیں سی ملا سکدے تے سیاہ فام حکومت دی وڈے عہدیاں فائز وی نہیں سی ہو سکدے ایس لئی کوئی سیاہ فام جج یاں پنچایت دا حصہ نہیں سی بن سکدا۔ چودہ سال دے جارج دا ٹرائل شروع ہویا گواہ پیش ہوئے سارے گواہواں نے ایہ گواہی دتی کہ سفید فام کڑیاں نے جارج نال گل کیتی سی پر کسے نے جارج نوں قتل کردے نہیں سی ویکھیا۔ پولیس رپورٹ پیش ہوئی جہڑی بڑی متضاد سی۔ پولیس رپورٹ دے مطابق کڑیاں نے جارج تے حملہ کیتا تے جارج نے سیلف ڈیفنس وچ اوہناں کڑیاں نوں قتل کیتا۔ جارج دا وڈی کڑی تے دل آ گیا سی اوہ اوہدے نال بدفعلی کرنا چاہندا سی ایس لئی اوہنے دوہاں نوں قتل کرکے اوہناں نوں ہزار فٹ دور کھائی وچ لے گیا تے جدوں زنا کرن لگا تے کڑی دا جسم ٹھنڈا ہو چکیا سی ایس لئی ایہ چھڈ کے اوتھوں آ گیا تے آلہ قتل وی نیڑے لکا دتا جو اجے تک پولیس نوں نہیں ملیا۔بدقسمتی نال جارج نوں جہڑا وکیل دتا گیا اوہ وی سفیدفام سی تے الیکشن تے کھڑا سی۔ اوہنے جارج دے حق وچ کوئی گواہ پیش نہیں کیتا تے نہ ای جارج دے خلاف پیش ہون والے گواہ تے پولیس تے کوئی جرح کیتی کیوں جے اوہ سفیدفام نوں رنج کرکے اپنے ووٹ خراب نہیں سی کرنا چاہندا۔
تن گھنٹے توں گھٹ وقت وچ ٹرائل مکمل ہو گیا تے پنچایت نے ٹرائل ختم ہون دے دس منٹ بعد جارج سٹینی نوں سزائے موت دی سزا سنا دتی۔ ایس واقعے دے بعد سفیدفام دا غصہ سیاہ فام تے ہور تیز ہو گیا۔ جارج دے گھر والے علاقہ چھڈ کے کدھرے لُک گئے۔ ہن چودہ سال دا جارج اکلا انھیری کال کوٹھڑی وچ اپنی زندگی دے باقی دن گزار رہیا سی تے ایس دوران اوہنوں اپنے گھر والیاں نوں ملن دی اجازت وی نہیں سی۔ جارج دے گھروالیاں نے گورنر نوں درخواست دتی۔ ایس طرح دے اک کیس وچ سفیدفام نوں ویہہ ورھے دی سزا ہوئی اے ایس لئی جارج دی سزائے موت ختم کرکے عمرقید وچ بدلی جاوے پر گورنر وی سینٹ دا الیکشن لڑ رہیا سی تے اوہ سفیدفام نوں رنج نہیں سی کرنا چاہندا ایس طرح گورنر نے اپنی سینٹ دی سیٹ بچا کے انصاف دا قتل کر دتا تے درخواست خارج کر دتی۔ سفیدفام بچیاں دیاں لاشاں ملن دے 83 دن بعد 16 جون 1944ء نوں شام 7 وج کے 30 منٹ تے جارج نوں بجلی والی کرسی تے بٹھا کے موت دے حوالے کر دتا۔
جارج 20 ویں صدی وچ سزائے موت پان والا سب توں گھٹ عمر انسان سی۔ جارج دے خاندان نے 70 سال بعد25اکتوبر 2013ء نوں دوبارہ اپیل کیتی۔ جارج نوں صاف شفاف ٹرائل نہیں ملیا۔ اپیل دو دن دی سماعت دے بعد منظور ہوئی تے جج Carmen T Mullen دی عدالت وچ مقدمہ دی سماعت ہوئی جہدے وچ جارج دی بھین تے بھائی نے گواہی دتی کہ واردات دے وقت اوہناں دا بھائی اوہناں دے نال سی تے اوہنوں صاف ٹرائل نہیں ملیا۔ سفیدفام قتل ہون والیاں کڑیاں دے گھر والیاں دے بیانات ریکارڈ کرن’ پولیس رپورٹ نوں ملاحظہ کرن تے 1944ء دے گواہواں دے بیان حلفی نوں ویکھن دے بعد ست مہینے بعد 17 دسمبر 2014ء نوں عدالت نے جارج سٹینی نوں ایہناں وجوہات دی بناء تے بے گناہ قرار دتا۔ آلہ قتل نہیں ملیا جارج دے خلاف کوئی گواہ نہیں دو لاشاں نوں اک ہزار فٹ تک دھرو کے لے جانا چودہ سال دے جارج لئی ناممکن سی۔ جارج گھٹ عمر سی تحریری اعترافی بیان موجود نہیں’ پولیس کسٹڈی وچ اعترافی بیان دی کوئی حیثیت نہیں۔ ٹرائل تے سزا وچ جلدی کیتی گئی۔ جج صاحبہ نے ہور ریمارکس دیندے ہوئے آکھیا کہ ریاست شفاف ٹرائل دین وچ مکمل طور تے نکام رہی سی۔
اج پاکستان دی سیاسی تے عدالتی صورتحال بالکل ایس واقعے ورگی اے جدوں لیڈر اپنے ووٹ تے اپنی کرسی بچان لئی انصاف دی ترکڑی وچ بے انصافی دے وٹے پاندے رہن گے قوماں ناانصافی دے ڈھائے چڑھدیاں رہن گئیاں تے لاقانونیت جنم لیندی رہوے گی۔ ٭