سجری ہوا دا جھونکا

پنج اگست: اُوس دن ہر اک دی زبان تے سی کہ اج سپریم کورٹ دے بنچ ون وچ چیف جسٹس عمرعطا بندیال’ جسٹس قاضی فائز عیسیٰ تے جسٹس منصورعلی شاہ تے مشتمل بنچ کیساں دی سماعت کرے گا۔ کجھ عرصے توں مخصوص ججاں تے مشتمل بنچ بن رہے سن۔ کہیا جاندا اے کہ انج ججاں دے درمیان اختلاف دی وجہ نال سی۔ بہرحال کجھ نہ کجھ ہے سی پر ہن نہیں رہیا۔ ایہ وی کہیا جا رہیا سی کہ ججاں دے آپس وچ تعلقات ٹھیک نہیں۔ ججاں دے اختلافات اوس ویلے سامنے آئے جدوں جوڈیشل کمیشن دا اجلاس ہویا جہدے وچ ججاں نوں سلیکٹ کرنا سی۔ اختلاف دی وجہ نال ججاں دیاں خالی اسامیاں پُر نہیں ہو سکیاں۔ ایہناں حالات وچ جسٹس قاضی فائز عیسیٰ دے نال بنچ ون دا بننا ساریاں لئی حیران کن تے نیک شگون سی۔ ایہ گل جنگل وچ اگ وانگوں پورے سپریم کورٹ وچ پھیلی۔ وکیل اوس دن اک دوجے توں خبر دی تصدیق کردے ہوئے وکھائی دتے۔ راقم وی ساتھی وکیلاں دے نال بنچ ون وچ خبر دی تصدیق لئی گیا۔ جے کہیا جاوے کہ اوس دن بہت سارے وکیل ایہو ویکھن آئے سی تے غلط نہیں ہووے گا۔ راقم جدوں داخل ہویا تے بنچ نوں ویکھ کے دل بڑا خوش ہویا۔ ایہ سجری ہوا دا جھونکا محسوس ہویا۔
سماعت دوران کئی واری تناں ججاں نوں خوشگوار موڈ وچ اک دوجے نال مشورے کردے وی ویکھیا گیا۔ فیر ایہو بنچ پنج دن تک اکٹھے کم کردا رہیا۔ جنہے وی بنچ نوں ویکھیا خوشگوار تبدیلی تے خوش ہویا۔ ہن امید ہو چلی اے کہ ججز انصاف دی راہ وچ موجود رکاوٹاں دے خاتمے لئی سرگرم رہن گے۔ ایس ویلے انصاف دی راہ وچ سب توں وڈی رکاوٹ چھیتی انصاف دا نہ ہونا اے۔ روز جنے کیس ختم ہوندے نیں اوس توں کئی ودھ دائر ہو جاندے نیں۔ ہائیکورٹ تے سپریم کورٹ وچ خالی اسامیاں ہون نال انصاف سست روی دا شکار اے۔ انصاف چھیتی نہ دین دی وڈی وجہ ججاں دی عدالتاں وچ کمی اے۔ جہدے نال لوکاں نوں انصاف ملن وچ چِر لگ رہیا اے۔ سیاستداناں دے کیس ہونی اں دوجے کیس ساریاں نوں آئین تے قنون دے مطابق سن کے جے ریلیف بن دا اے تے دیو جے جیل جانا بن دا اے تے جیل وچ سٹو پر جو وی کرو ورھیاں’ مہینیاں وچ نہیں ہفتیاں وچ ہونا چاہیدا اے۔ انج ہون نال عوام سکھ دا ساہ لین گے۔ شہری قنون دا احترام کرن گے۔ ایس ویلے کیساں دا چھیتی فیصلہ نہ ہون پاروں شہری پریشان نیں۔ عام شہری ہووے یاں وڈی شخصیات قنون دا احترام کردے وکھائی نہیں دے رہے۔
چیف جسٹس صاحب آپ ایس ویلے بنچ بنان وچ خوشگوار تبدیلی لے کے آئے نیں۔ ہن تہاڈے نال امیداں جڑ چکیاں نیں۔ انشاء اللہ ایس تبدیلی دے چنگے نتیجے ویکھن نوں ملن گے۔ سانوں نہیں پتہ بار ایسوسی ایشن تے بار کونسلاں دا ایس خوشگوار تبدیلی تے کیہ ردعمل دین گئیاں پر سارے وکیل تے سماج نے خوشی دا اظہار کیتا اے۔ ایہ ٹھیک اے کہ قومی ترقی تے امن وچ ہمیشہ عدلیہ دا اہم رول ہویا اے جے کیس قنون تے آئین دے مطابق سنن گے تے چھیتی فیصلے دین گے تے انصاف دا بول بالا ہووے گا۔ جو جج اپنے فیصلے دنیا وچ قنون دے مطابق کردے نیں۔ اوہناں دا ناں تریخ وچ ہمیشہ زندہ رہندا اے۔ بابا کرمو کہندا اے جے ججز خدا نال اپنی لو لگا لیا کرن فیصلہ کردے ہوئے کسے دباء وچ نہ آن’ صرف اللہ توں ڈرن تے چنگے فیصلے آ سکدے نیں۔ جوڈیشری دا ناں روشن ہو سکدا اے۔ ایہ جو دسیا جاندا اے کہ جج نوکری پیشہ ہوندے نیں۔ نوکری پیشہ ہونا کوئی برائی نہیں برائی جرم اوس ویلے جنم لیندی اے جدوں فیصلے قنون توں ہٹ کے کیتے جان۔ جے کوئی نوکری دے نال انصاف نہیں کر سکدا تے اجہے بندے نوں منصب چھڈ کے گھر ٹر جانا چاہیدا اے۔ چنگی تنخواہ دے نال چنگی مراعات عزت مل رہی اے تے ججاں نوں وی چاہیدا اے دوجیاں لئی آسانیاں پیدا کرن ‘ کم دے نال انصاف کرن ایہدے لئی اللہ توں ڈرنا ہووے گا۔
بابا کرمو دا ایہ وی کہنا سی کہ چیف جسٹس صاحب تے فیصلے لکھن توں علاوہ وی بہت ساریاں ذمہ داریاں نیں جیویں ججاں دیاں خالی اسامیاں نوں پُر کرانا’ نویں ججاں دی سلیکشن کرانا۔ بابا کرمو کہندا ے چیف جسٹس صاحب اپنے ساتھی ججاں اگے ایہ گزارشات جے کر دین تے اسیں بڑے احسان مند تے شکرگزار ہوواں گے کہ اپنی سروس دوران کیس سن دے ہوئے تحمل دا مظاہرہ کیتا کرن’ وکیلاں نوں بولن دیا کرن۔ امید اے چیف جسٹس صاحب دوجے ججاں نوں وی پابند کرن گے ججاں دی سلیکشن دا معیار بہتر کرن’ سلیکشن دے طریقہ کار وچ تبدیلی لیان’ ججاں دی سلیکشن دا معیار بہتر کرن لئی ایف پی ایس سی ورگے امتحانات لئے جان۔ ایجنسیاں توں اوہناں دا کریکٹر’ کلیئرنس سرٹیفکیٹ لیا جاوے۔ سب توں اہم اوہناں دیاں تعلیمی ڈگریاں دی جانچ پڑتال اے۔ تجربہ کار لاء افسراں تے لوئر جوڈیشری توں وی چنگے نتیجے مل سکدے نیں۔ کیساں دے پہاڑ ختم کرن لئی ہنگامی بنیاداں تے اقدام اٹھان دی ضرورت اے ایہدے لئی ججاں دی گنتی وچ وادھا کرن پر خالی اسامیاں نوں چھیتی پُر کرن۔ امید اے تہاڈی موجودگی وچ سجری ہوا دے جھونکے آندے رہن گے۔ ملاقات دے بوہے کھلے رہن گے انشاء اللہ٭