بدلدے تیور تے پلس دُی دہائی

کاش اوہ وی محسوس کر جان جہناں دی بداعمالیاں دی سزا عوام بھگت رہی اے۔ اک مصیبت ختم نہیں ہوندی کہ دُوجی سر چکے تیار کھڑی ہوندی ا ے تے ایہناں مصیبتاں دا انجام کیہ ہووے گا اوہ شائد کسے دے وہم وگمان وچ وی نہیں ہو سکدا۔ اک پاسے حکومت اپنے اللے تللیاں وچ مصروف اے تے دُوجے پاسے سندھ وچ منہ زور منچھر جھیل نے 500 پنڈ صفحہ ہستی توں مٹا دِتے نیں۔ 20بچیاں سنے ہور 44بنے جاں بحق ہو گئے۔ سیہون وچ سیلاب توں جان بچا کے خیمیاں وچ پناہ لین والیاں نوں تیز انھیری نے مسل دتا۔ اندرون سندھ دے مختلف علاقیاں وچ کھلے اسمان تھلے بیٹھے ہزاراں سیلاب متاثرین بدحالی دی تصویر بن گئے نیں جہناں دے کول پیٹ بھرن نوں خوراک اے نہ علاج لئی دوائیاں۔ ہن سیلاب دا خوفناک نتیجہ قحط دی صورت وچ سامنے آن دا خدشہ سر چکن لگیا اے۔ کھیتی باڑی تے مویشی پالن دا کم تباہ ہو گیا تے دُوجے پاسے مرکزی حکومت نے 70وزیر بھرتی کر کے 240 داڈالر کردتا تے رہی سہی کسر چار ہزار فی من آٹاکر کے غریب دی ہور بربادی کردتی۔ شائد ایہو تبدیلی دا کارن بنے کیوں جے حادثات اک دم نہیں ہوندے۔ حالات سالاں ایہناں دی پرورش کردے نیں۔ اسیں بدلدی دنیا دے نال سفر نہیں کیتا بلکہ ساڈے حکمراناں سنے کجھ خانداناں نے دنیا دے ہر مقام اتے اپنی جائیداداں ضرور بنا لیئیاں نیں تے ہن شاید اسمان توں حتمی فیصلے سنائے جان دا آغاز ہو چکیا اے۔ بدلدے موسمی تیور قدرتی آفات دی صورت وچ اپنے غصہ دا اظہار کر رہے نیں۔ اللہ ہن وی ساڈے حکمراناں نوں چشم بینا دیوے تے اوہ ویکھ سکن کہ پاکستان وچ وڈے وڈیاں دی پگھ اُتردی تے اچھلدی نظر آ رہی اے۔ پسماندہ طبقیاں دے ہتھوں امرا دا استحصال صاف وکھائی دے رہیا اے۔ صبر دا پیمانہ لبریز ہون تے ان پڑھ تے بے شعور طبقہ ساری حداں توں لنگھدا نظر آ رہیا اے۔ انارکی تے افراتفری سر چک رہی اے۔ محروم تے مجبور طبقہ بالاں نوں بلکدا ویکھ کے اوہ کجھ کر گزرے گا جہدے تصور توںای روح کنب جاندی اے لیکن ساڈا سیاسی’ مذہبی تے مقتدر طبقہ اپنے اپنے مفاد تے خرمسیتاں دے سوا کجھ ویکھن سوچن لئی آمادہ نہیں۔ کورونا وائرس نے پوری دنیا نوں ہلا کے رکھ دتا سی۔ معیشت بری طرح متاثر ہوئی۔مہنگائی دا سارے عالم وچ ایسا طوفان آیا کہ معاشرت دے خدوخال ای بدل گئے۔ ترقی یافتہ امیر ملکاں نے تے فیر وی اپنی عوام نوں ریلیف فراہم کیتا لیکن ساڈا استحصالی نظام چاروں شانے چت ہو گیا۔ غریب تے محنت کش طبقہ بھیک دے انداز وچ ادھار منگدے زمین وچ گڑدا جا رہیا اے۔ مڈل کلاس دا حال تے سب توں برا اے لیکن ایس عظیم مصیبت وچ اثرو رسوخ رکھن والے سیاسی تے غیر سیاسی طاقتور طبقے نے اپنا بے انتہا فیدہ چک لیا اے بلیک مارکیٹنگ تے بنیادی ضروری اشیائے خورونوش دی اسمگلنگ تے غریب اپنے لئی آن والی بیرونی امداد توں وی محروم رہوے ملک دے کرتا دھرتاواں نے ہر طرح دے ناجائز ہتھکنڈیاں نال اپنی تجوریاں بھر لئیاں نیں مگر ہن بس ہونا چاہیدا اے کدھرے انج نہ ہووے کہ بلکدا سسکدا طبقہ درندیاں دی صورت نہ اختیار کر لووے۔ جے اک واری ہجوم تے ٹولیاں دی صورت وچ پوش علاقیاں اتے حملے شروع ہوئے تے بے شعور ہجوم دے ہتھوں امرا دی عزتاں دے علاوہ نہ جانے کیہ کجھ برباد ہو جاوے گا۔ روس دے یوکرین اتے حملے نے وی حالات دی سنگینی دی گھنٹی وجا دتی اے۔ کدھروں وی اٹھن والا شور پوری دنیا نوںلپیٹ وچ لے سکدااے۔ دنیا واقعی ساڈے اپنے ہتھی بنائے گئے ظلم تے جبر تے استحصالی نظام توں تباہی دے دہانے اتے پہنچ چکی اے۔ ہن لوڑ ایس امر دی ا ے کہ اسیں توبہ و استغفار دے نال نال شعور وی بیدار کرئیے تے موجودہ دور دے فرقہ پرست علما ڈھونگی پیراں تے ظالم حکمراناں کولوں نہ صرف اپنی جان چھڈائیاں بلکہ خود اپنے ضمیر وچ جھانک کے اصلاح ول متوجہ ہو جائیے۔ ہن اک پلس والے محمد عرفان دی فریاد وی پڑھ لوو جہڑا کہندے اے کہ پچھلے دناں آئی جی پولیس پنجاب نے آکھیا سی کہ پلس ملازماں نوں اوہناں دے متعلقہ تھانہ جات وچ لایا جاوے گا تاں جے اوہ چنگے طریقے نال اپنی ڈیوٹی ادا کر سکن لیکن اجے تک تے آئی جی صاحب دی ایہہ گل صرف بیانات تک ای محسوس ہو رہی اے بلکہ سب کجھ اوہدے الٹ ہو رہیا اے۔ ایس ویلے لہور پلس دے لاتعداد ملازماں دے تبادلہ جات اوہناں دے گھراں توں گھٹ توں گھٹ 30 توں 60 کلومیٹر دور کر دتے گئے نیں۔ پہلے ساڈا 2دن وچ اک لیٹر پٹرول لگدا سی ہن اوتھے 5 توں 6 لیٹر پٹرول لگنا شروع ہو گیا اے تے جے تھانے وچ پٹرولنگ کرنی اے تے اپنی موٹرسائیکل اتے کرنی اے تے پٹرول اپنی جیب توں پوانا پیندا اے۔ ہر دن تن ویلے دی روٹی خود کھانی ا ے تے اپنے گھر والیاں نوں وی کھوانی اے۔ ڈیوٹی وی گھٹ توں گھٹ 12گھنٹے کرنی اے تے افسران کہندے نیں کہ اسیں تہاڈی
ویلفیئر لئی دن رات کوشاں آں۔ کیہ ایہہ ای ساڈی ویلفیئر ہورہی اے کہ دن رات دی ڈیوٹی مگروں اسیں ملازمین بے چارے ذہنی مریض بن رہے آں تے نال نال اسیں اپنے بچیاں دی پڑھائی’ روٹی تے خواہشاں نوں دفن کر کے افسراں دی SOP دی بھینٹ چڑھ رہے آں۔ میں اج اپنی موٹرسائیکل وچ 700 روپے دا پٹرول پوایا تے سارا دن ڈیوٹی کردا رہیا جد کہ گھر پہنچیا تے ٹینکی خالی سی۔ میری ایس تحریر دا مقصد سیاست کرنا نہیں اے تے نہ ای اپنے افسراں نوں برا کہنا مقصود اے بلکہ چاہنا واں کہ خدارا ساڈے بارے وی سوچو۔ اسیں وی ایس معاشرے دا حصہ آں۔اسیں پلس والے اپنے اپنے گھر دے کول رہ کے بوہتی چنگی ڈیوٹی کر سکنے آں۔ میرے پتر دی سالگرہ سی میں اوہدے نال وعدہ کر رکھیا سی کہ پتر میں تہانوں گفٹ دیاں گا تے اسیں سارے باہر کھانا کھان جاواں گے لیکن میں اپنے پتر دے اگے اَج ہار گیا کیوں جے مینوں اینی دور تبادلہ ہون دی وجہ نال مالی تے ذہنی پریشانی دا سامنا کرنا پیا۔ اک شرمندگی اے جہڑی ہمیشہ نال رہوے گی تے تہانوں لکھن دا مقصد صرف ایہہ اے کہ شاید ارباب اختیار پڑھ کے ساڈے بارے وی کجھ سوچن۔ بچے تے بچے ہوندے نیں تے اوہناں دی خواہشاں نوں پورا کرنا ہر والدین دی دلی خواہش ہوندی اے۔ اوہ آئی جی صاحب دے ہووے یا چیف سیکرٹری دے دعا گو اک سپاہی۔ مینوں امید اے کہ ایس ویلے صوبے دے وزیراعلیٰ چودھری پرویزالٰہی جہنا پیار اپنے بالاں نال کردے نیں اوہناں ای اوہ اک ملازم دے بال نال وی کردے نیں تے اوہناں دا تے کہنا وی ایہو اے کہ اوہ ہر دن گھر وں سوچ کے آندے نیں کہ اج اوہناں نے کیہڑا چنگا کم کرنا اے تے پلس والیاں دے نال نال میری وی اوہناں نوں درخواست اے کہ اوہ آئی جی پلس نوں حکم دین کہ ہر پلس ملازم نوں اوہدے گھر دے قریبی تھانہ وچ تعینات کرن تاں جے اوہ ذہنی سکون نال اپنا کم سرانجام دے سکن۔