اساں نچ کے یار منانا اے

مطلوب وڑائچ

سیلاب وڈیاں وڈیاں عمارتاں تے بستیاں دیاں بستیاں نوں تنکیاں وانگوں روڑھدا ہویا کدھروں گزر چکیا تے کدھرے ٹھہریا ہویا سی۔ ٹھہریا ہویا توں مطلب ایہہ وے کہ کئی بستیاں پانی وچ ڈبیاں ہوئیاں نیں۔ پانی ایتھوں یاں تے کسے وی طریقے نال کڈھیا جاوے گا یاں فیر اوہدے قدرتی طور تے خشک ہون دا انتظار کیتا جاوے گا۔ پانی دے خشک ہون دا انتظار ای کیتا جاوے گا۔ ایہناں علاقیاں دے مکیناں دا کیہ بنے گا تے کیہ بن رہیا اے؟ ایہناں لوکاں دی زندگی جہنم ورگی مشکلاں دا شکار اے۔ اوہناں دی بحالی نوں اک عرصہ لگے گا۔ اجے تے اوہناں دی خوراک تے سر چھپان دا بندوبست کرن دی ضرورت اے۔ مرکزی حکومت نوں ایس حوالے نال بہت کجھ کرن دی لوڑ سی پر توقعات دے مطابق سیلاب زدگان دی مدد نہیں ہوئی۔ پنج کروڑ توں ودھ لوک متاثر ہوئے نیں۔ ہن فی الحال خطرہ وبائی امراض دے پھیلن دا وی منڈلا رہیا اے۔ مرکزی تے صوبائی حکومتاں ولوں ایس معاملے وچ جے کوئی کوتاہی کیتی جاندی اے تے ملک وچ اک بدترین انسانی المیہ جنم لے سکدا اے۔
سیلاب دے ابتدائی دیہاڑیاں وچ وزیراعظم شہبازشریف ترکی دے دورے تے سن۔ اوہ دورہ مکمل کرکے ای پرتے۔ سیلاب زدگان دے کول اوہ ضرور گئے پر زیادہ تر فوٹو سیشن ہوندے رہے۔ ایہدے بعد اوہ ازبکستان چلے گئے۔ شنگھائی تعاون تنظیم دے اجلاس وچ شرکت کرنی سی۔ تہاڈے ملک وچ آفت آئی ہوئی اے’ تسیں منتظم اعلیٰ او شنگھائی تعاون تنظیم دے اجلاس وچ کسے ہور نوں گھلیا جا سکدا سی۔ صدر پاکستان نمائندگی کر سکدے سی اوتھے وی فوٹو سیشن تے دھیان رہیا تے ایس موقعے تے شہبازشریف دا جہڑا بہترین عمل سی اوہ اوہناں ولوں لکھی ہوئی تقریر دا پڑھنا سی۔ باقی جو کجھ اوہ کردے رہے سنجیدگی توں زیادہ مضحکہ خیز سی۔ اوہناں دی تقریر وچ افغان مسئلے نوں فوکس کیتا گیا۔ ایہ اج دا اک وڈا مسئلہ ضرور اے جو پاکستان دے متعلقہ اے پر پاکستان تے ایس خطے دا سب توں وڈا مسئلہ کشمیر ایشو اے۔ شہبازشریف نے مسئلہ کشمیر تے اک لفظ وی نہیں بولیا۔ اوہناں دے نال جان والیاں وچ بلاول بھٹو وی نیں۔ پاکستان نوں خارجہ محاذ تے اک مضبوط وزیر خارجہ دی ضرورت اے۔ بلاول نوں انٹرنی دے طور تے وزیرخارجہ لا رکھیا اے۔ بھٹو وانگوں اوہناں نوں وزیراعظم بنانا اے تے تربیت وزیر خارجہ بنا کے کیتی جا رہی اے تے ایس مقصد لئی سابق وزیر خارجہ مسز حناربانی کھر نوں وزیر مملکت دا درجہ دے کے بلاول بھٹو دے نال بحیثیت ٹیوٹر مقرر کر رکھیا اے۔ اوہناں دے بیرونی دورے ای ختم نہیں ہو رہے۔
اج پاکستان وچ سیلاب نے تباہی مچا دتی اے۔ وزیراعظم دنیا اگے امداد دی اپیل کر رہے نیں۔ شنگھائی تنظیم اجلاس دے دوران تقریر کردے ہوئے وزیراعظم نے عالمی برادری اگے اپیل کیتی کہ آئو موسمیاتی تبدیلی دے نقصانات نال نبڑن لئی اک کندھ بن جائیے۔ موسمیاتی تبدیلی دے اثرات دی قیمت پاکستان نے سیلاب نال تباہ کاریاں دی صورت وچ ادا کیتی اے۔ کیہ ایہ آفت تے تباہی پاکستان لئی آخری ہووے گی یاں دوجے ملکاں نوں وی اجہی صورتحال دا سامنا کرنا ہووے گا۔ ہزاراں بندے زخمی تے کجھ لاپتہ نیں۔ چار سو بچیاں سنے چوداں سو بندے لقمہ اجل بن گئے۔ مویشی’ فصلاں’ گھر’ بستیاں تے شہر متاثر ہوئے۔ سیلاب متاثرین نوں ڈاڈھیاں اوکڑاں دا سامنا اے۔ دنیا نوں ساڈی مدد لئی اگے آنا ہووے گا۔ ساڈے درمیان موجود کجھ ملکاں نے سیلاب متاثرین دی بڑی مدد کیتی۔ اوہناں دا شکرگزار آں۔ شہبازشریف نے کئی ملکاں دے سربراہواں نال ذاتی رابطے کرکے وی امداد دی درخواست کیتی۔ تہاڈے اپنے رویے توں اظہار ہونا چاہیدا اے۔ دن وچ ادھی درجن سوٹ بدلاں گے’ مہنگے ترین ہوٹلاں وچ قیام’ لگژری گڈیاں تے جہازاں وچ سفر کراں گے تے ڈونر کیویں متاثر ہووے گا۔
مینوں ایہ واقعہ ہمیشہ یاد آندا اے جدوں ذوالفقارعلی بھٹو بھارت گئے سی۔ 93 ہزار قیدی بھارت دی قید وچ سن بھٹو صاحب بیڈ تے نہیں زمین تے رات نوں لیٹے سی۔ کجھ لوک ایہنوں ڈرامے بازی کہندے نیں۔ بھٹو صاحب دا کہنا سی کہ میرے 93 ہزار پاکستانی بھائی جیلاں وچ نیں میں کیویں آرام دہ بیڈ تے آرام و سکون نال سو جاواں۔ فیر جدوں بھارت دی وزیراعظم مسز اندراگاندھی جہڑی اوسے ہوٹل وچ ٹھہریاں سن اوہناں نوں پتہ لگا کہ ساڈا مہمان وزیراعظم بیڈ تے سون دی تھاں زمین تے لیٹیا ہویا اے تے اوہ اپنے کجھ وزیراں نوں لے کے وزیراعظم ذوالفقارعلی بھٹو دے کمرے وچ اپڑ گئیاں تے فیر بھٹو صاحب نے مسز اندراگاندھی نوں اوسے ویلے 93 ہزار قیدیاں دی رہائی تے راضی کر لیا۔ چلو ایہ اک ڈرامے بازی ای سمجھ لوو پر قوم نوں ایہدافائدہ ہویا تے بھٹو صاحب تے اوہناں دا سرکاری وفد جدوں شملہ توں پاکستان پرتیا تے اک فاتح وانگوں اوہناں دا استقبال ہویا۔ وزیراعظم شہباز شریف دے بارے کجھ لوکاں دا خیال اے کہ اوہ ڈرامے بازی کردے نیں جے کرنی اے تے فیر سیلاب متاثرین دی ودھ توں ودھ امداد لئی کرو۔ بھکاری اسیں بھکاری دی تسلسل نال گل کرنے آں۔ سوٹڈ بوٹڈ بھکاری نہیں ہوندے ڈونر ہوندے نیں۔ پاکستان وچ معیشت دے جو حالات نیں تے سیلاب نے جو تباہ کاری کیتی اے وزیراعظم دا پاکستان وچ موجود ہونا ضروری اے ۔
دوستو! جدوں مقصد نیک ہون تے اوہناں وچ ملک و قوم دی بھلائی پوشیدہ ہووے تے ہر اوہ طریقہ اختیار کرناچاہیدا اے کہ جہدے نال ملک و قوم دا بھلا ہووے۔ حضرت بابا بلھے شاہ دا کلام اے کہاساں گھنگھرو پائے پیراں وچ اسیں نچ نچ کے یار منایا اے۔٭٭