شہبازشریف دے سفیدہاتھی تے سیلاب

اے عشق تری بک بک نہ گئی
گو دل بھی گیا دھک دھک نہ گئی
ہم چھوڑ کے اس کو آ بھی چکے
کانوں سے مگر بھک بھک نہ گئی
پتہ نہیں تسیں ایس کیفیت چوں گزرے او کہ نہیں پر ایس واردات نال تے ضرور واہ پیا ہووے۔ قوم دے رہنما قوم نال وعدہ کرکے بھُل جاندے نیں تے لوک ٹرک دی بتی پچھے نسدے رہندے نیں۔ اجے تے میں اپنی کتھا سناواں گا کہ ایہدا تعلق براہ راست حکومت نال اے ایہ مہنگائی دے ضمن وچ آندا اے کہ اسیں سقراط نما دوستاں دی من لئی تے سولر سسٹم چھت تے لا لیا کہ اک ای واری کوڑا گھٹ بھر لینے آں پر ایہ کڑواہٹ منہ چوں جاندی نہیں تے ایہدے وچ شدت اوس ویلے آئی کہ جدوں سولر سسٹم دے باوجود بل بائی ہزار روپیے آیا ایس توں پہلاں ویہہ ہزار روپیے آیا سی۔ ایہدے توں مینوں اپنے پیارے دوست طارق عزیز صاحب یاد آ گئے اسیں پی ٹی وی تے بیٹھے سی کسے نے آ کے خبر دتی کہ لوجی طارق عزیز اج سٹھ ورھے دے ہو گئے نیں۔ طارق صاحب ساڈے سامنے بیٹھے سی میں کہیا کمال اے اوہ لگدے صرف 59 دے نیں۔ طارق صاحب شرماندے تے مسکراندے ہوئے بولے شاباش بھئی بڑی رعایت کیتی جے ساریاں نے لطف اٹھایا تے دوستو لکھاں روپیے خرچ کرکے صرف تن ہزار روپیے دا فرق مینوں تے لگدا اے ساڈا سولر وی بجلی نال چلدا رہیا شکر اے ہن نیٹ میٹرنگ ہو گئی اے ایہ ٹھیک اے کہ مہنگائی نے غریباں دیاں چیکاں کڈھوا دتیاں نیں پر شہبازشریف مزے وچ نیں اوہناں نے خان دے مشیراں وانگوں ایہ وی نہیں سی دسیا کہ تہاڈیاں چیکاں نکل جان گئیاں۔
ہماری آنکھ میں یہ دودگی ضروری تھی
جلا تھا دل تو یہ آلودگی ضروری تھی
حکمراناں نوں کوئی پرواہ نہیں کہ شاید اوہناں نوں دس دتا گیا اے کہ تسیں اپنا کم جاری رکھو کسے وی خطرے توں بدکن دی لوڑ نہیں ایہو وجہ اے کہ اوہناں نے بجلی دی مد وچ لوکاں نوں لٹنا شروع کیتا اے اوہ کنے آرام نال آئے دن پنج روپیے یونٹ ودھا دیندے نیں۔ حساب کتاب رکھن والے دوست دسدے نیں کہ یونٹ پنجاہ روپیے دے نیڑے اپڑ چکیا یعنی ایڈجسٹمنٹ چارجز وغیرہ پا کے۔ مینوں تے ڈر لگدا اے کہ ایہ سولر ٹیکس وی لا دین گے اصل وچ پی ڈی ایم دی عموماً تے ن لیگ دیاں خاص امیداں خان دے نااہل ہون تے مدار کردیاں نیں پتہ نہیں اوہناں نوں ایہدا یقین کیوں اے تے ایس طرح اوہ لوکاں دے غصے توں وی نہیں ڈر رہے۔ انج حکومت ہووے کہ اپوزیشن کسے دا وی عمل سمجھ وچ آن والا نہیں۔ اپوزیشن دی نظر سگوں نظراں اقتدار تے نیں۔ اوہ سیلاب زدگان دے کول وی صرف دکھاوا کرن اپڑے نیں پنج ارب روپیے ہن دس ارب روپیے ہو گئے نیں جو ٹیلی تھون توں آیا اے پر لوک چلا رہے نیں آواز دو کہاں ہو؟ ہن اک نواں معاملہ شروع ہو گیا اے ایہنوں سمجھن لئی تہانوں اک مختصر جیہا واقعہ سننا پوے گا۔
میرے اک دوست جان کاشمیری نوں میں کیہا یار تن ویاہ کرن دے بعد ہن کیہ کرو گے؟ ہسن دے بعد کہن لگے یار بس ہن دل بھر گیا اے پر قسمت دا کوئی پتہ نہیں پر اوہناں دا چوتھا ویاہ وی ہو گیا۔ شہبازشریف وی ایہدے تے کیوں انکار کرن گے اوہ تے ہن پاک صاف نیں جیویں مومن حج دے بعد ہوندا اے۔ نویاں ملاقاتاں چل رہیاں نیں تے اجہی پیش رفت ہو رہی اے کہ فواد چوہدری نوں وی کنوں کن خبر نہیں ہوئی تے خان صاحب کجھ ہور ای گل کر دیندے نیں ہن اوہ جے آئی ٹی دے سامنے وی پیش ہو گئے نیں تے اوہناں دا فیصلہ وی محفوظ کر لیا گیا اے۔ خان صاحب اسلام آباد لئی کال دین گے تے بقول اوہناں دے مخالفین اوہناں نوں سنبھال نہیں سکن گے۔ ہو سکدا اے میری گل غلط ہووے پر الیکشن شاید اجے نہیں ہون گے۔ شہبازصاحب مطمئن نیں تے ہن نوازشریف تے مریم وی آرام نال نیں کہ کتھوں راہ کڈھیا جاوے شہباز پیپلزپارٹی نال وعدے نبھاندے ہوئے معاونین ودھاندے جا رہے نیں تے ایہ کسے وی سنگ دلی توں گھٹ نہیں کہ سیلاب تے بربادی دے بعد تسیں سفید ہاتھی پالدے جا رہے او مینوں تے شہبازشریف ایس مصرعے دی عملی تصویر لگدے نیں بابر بہ عیش کوش کہ عالم دوبارہ نیست۔ اسیں اپنی تھاں خاموش آں کہ ایہ کہہ کے چپ ہو گئے سی کہ:
خود غرض ہے وہ تضادات کا مارا ہوا شخص
آنکھ سے گر ہی گیا دل میں اتارا ہوا شخص
بندہ اوس ویلے کیہ کہوے کہ جدوں کسے دا یقین ای نہ ہووے کہ اوہ بھُل کے ای کدی سچ بول دیوے گا۔ ہن ایہ کنے شرم دی گل اے کہ تسیں فرما رہے او کہ آئی ایم ایف نے نک نال لکیراں کڈھوائیاں قبلہ وزیراعظم شاید تہاڈی خواہش پوری ہوئی تسیں پچھلی حکومت دیاں خلاف ورزیاں دے خمیازے دی گل کردے او ایہ سب کجھ تہاڈے علم وچ سی۔ تسیں کیوں نہیں مندے کہ تسیں اوہناں نوں ریلیف دین یاںاوہناں دی بلا اپنے سر لین لئی آئے سی ایہدا معاوضہ تہانوں کیساں دے خاتمے دی صورت وچ مل چکیا اے۔ فیر تسیںایہ فرماندے او کہ مہنگائی تے قابو پان دی کوشش کر رہے آں اوہ کیویں؟ تسیں تے لوکاں دیاں لکیراں کڈھوا رہے او ہائے ہائے ایہ ویکھ کے شرم آندی اے کہ تاجراں دا سچ کیسا اے بچیاں دے بسکٹ دا پیکٹ جہڑا 15 روپیے دا سی 30 روپیے دا ہو گیا اے بسکٹ گھٹ وی ہو گئے تے چھوٹے وی پنج روپیے دے سکے وانگوں سنیا اے 75 روپیے دا سکہ وی آ رہیا اے تسیں تے فیول ایڈجسٹمنٹ دے ناں تے ساڈے تے فیول سٹدے رہندے او سرمایہ داراں دی ذلالت ویکھو کہ اسلام آباد دے کجھ تعلیمی اداریاں وچ طلباء توں فیول ایڈجسٹمنٹ لیا جان لگا ہائے یہ ذہن رسا۔ بدمعاشی ویکھو تے فیر کوئی پچھن والا نہیں کدے جائیے سارے اک دوجے نوں لٹ رہے نیں۔ اک شعر نال اجازت:
بخت کے تحت سے جب درد کے مارے اترے
پھر تو پاتال میں سب چاند ستارے اترے