پنجاب دا طاقتور ترین ڈی ایس پی۔۔۔۔۔؟

سرکس اک ایسا ڈرامہ ہوندا اے جہدے وچ کھیڈ تماشے دے نال نال کرتب وی وکھائے جاندے نیں تے کدی کوئی جوکر لوکاں دی توجہ حاصل کرن لئی اُوٹ پٹانگ حرکتاں کردے وی نظر آندے نیں۔ ایس کھیڈ وچ بازی گر اک سرے توں دُوجے سرے تک جمپ لاندے نظر آندے نیں۔ کدی اک دا ہتھ چھڈ کے دُوجے دا پھڑ اپنی مہارت دا ثبوت دیندے نیں۔ فیر اوہ ماہر بازی گر اچانک تھلے ڈِگدا ہویا نظر آندا اے تے ویکھن والیاں دا ساہ حلق وچ اٹک جاندا اے کہ ایہہ تے گیا مگر اچانک پتہ چلدا اے کہ تھلے اک ہور جال وی موجود اے جہڑا اوہناں نوں نہ ڈِگن دیوے گا تے نہ ای نقصان پہنچن دے گا۔ پاکستان دا سیاسی منظر نامہ وی کجھ ایسا ای وکھائی دیندا اے جہدے وچ اک پارٹی حکومت وچ آندی اے تے اوہدے اقتدار دے پہلے دن توں ای اپوزیشن ایہدے توں اک اک منٹ تے اک اک گھنٹے دی کارکردگی دا حساب منگدے ہوئے اقتدار چھڈن دا مطالبہ شروع کر دیندی اے۔
احتساب غلط چیز نہیں بلکہ ہووے تے ہونا چاہیدا اے مگر ساڈے ہاں احتساب دے نعرے دا مطلب حکومت وچ موجود لوکاں دی شہرت خراب کر کے اوہناں نوں اقتدار توں کڈنا تے خود مستند اقتدار اتے بیٹھنا ہوندا اے۔ ایس کھنچا تانی وچ کدی کدی کامیابی وی مل جاندی اے بلکہ پاکستان دی سیاسی تریخ اتے نظر پائی جاوے تے ایتھے اپوزیشن دی کامیابیاں دا تناسب ضرورت توں کجھ ودھ ای نظر آندا اے ایہدی وجوہات حکومت دی ناقص کارکردگی ہو سکدی اے یا فیر بااثر تے مقتدر حلقیاں دی پسند تے ناپسند وی کم کر جاندی اے۔
پاکستان وچ 2007 مگروں ایہہ سلسلہ کجھ زیادہ شدت نال جاری اے۔ حال ای وچ اسیں ویکھیا کہ پی ٹی آئی دی وفاقی حکومت دے خلاف تحریک عدم اعتماد کامیاب ہو گئی فیر پنجاب وچ بزدار حکومت نوں وی چلدا کیتا گیا مگر کجھ دناں بعد ای حمزہ حکومت ن لیگ وی فارغ ہو گئی فیر پرویزالٰہی وزیراعلیٰ پنجاب بن گئے۔ اج کل اوہناں دا تخت فیر ڈول رہیا اے۔ اقتدار دی ایس رسہ کشی وچ پنجاب دے عوام اتے جو گزری سو گزری مگر بیورو کریسی دا وی برا حال کردتا گیا۔ ایہدے نال اک فٹ بال وانگوں کھیڈیا گیا۔ ویسے تے بزدار حکومت دے ساڈے تن سال دے دوران چیف سیکرٹری تے آئی جی توں لے کے کمشنرز ڈپٹی کمشنرز تے محکمانہ سیکرٹریز دے علاوہ ایتھے تک کہ تھانیاں دے ایس ایچ او زنے وی یومیہ بنیاداں اتے ڈیوٹی کیتی۔
بیورو کریسی دی ایس اکھاڑ پچھاڑ تے بے یقینی صورتحال وچ روزمرہ دے کماں نوں وی مہینیاں التوا دا شکار کیتا۔ بیورو کریسی دے نال ہون والے ایس سلوک اتے نظر پائی جاوے تے ایہہ سلسلہ 2007 وچ چیف سیکرٹری جاوید محمود نے متعارف کروایا جدوں اک مہینے وچ اوہناں نے ڈھائی ہزار تقرر و تبادلے کر کے من پسند افسراں نوں نوازیا تے مخالفاں دا استحصال کیتا فیر 2018 وچ آن والی حکومت نے تے بعض افسراں دا بھرکس کڈ دِتا بعض پابند سلاسل کر دِتے گئے تے بعض برخاست۔ بچے کھچے افسران نیب دے ریڈار اتے چڑھادتے فیر تے ایہہ ریت پے گئی۔ کسے نے اپنے چار دن دی حکومت وچ مخالف حکومت وچ تعیناتیاں لین والیاں نوں نشان عبرت بنان لئی شکنجے کسے ای سن کہ اوہ حکومت ای گوا بیٹھے۔ اک واری فیر تبادلیاں دا ریلا شروع ہو گیا۔ ایس ویلے صوبے وچ تن چار پاور کوریڈور سمجھے جا رہے نیں۔ ایس دور وچ تے حد ای ہو گئی۔ افسران تن ٹیماں وچ فٹبال بن گئے۔ اک افسر سیکرٹری لگیا تے اگلے دن کمشنر اوتھوں ہٹایا تے فیر سیکرٹری تے فیر او ایس ڈی۔ حالات ایہہ ہو گئے کہ سفارشی افسران دی تے چاندی ہو گئی مگر اہل افسران ذلیل ہو گئے۔ نالائق ٹولا پنجاب اتے براجمان ہو گیا قابل افسران سفارشی۔ بابوواں دے بوٹ پالش نہ کرن دی پاداش وچ سائیڈ لائن ہو گئے۔ چیف سیکرٹری کامران افضل نے وی ا یس سسٹم توں جان چھڈان وچ ای عافیت جانی۔ ہن رہ گئے آئی جی پنجاب فیصل شاہکار جہڑے انتہائی پروفیشنل آفیسر نیں شاندار کیرئیر دے حامل رہے نیں تے اوہناں نے لہور توں ای نوکری دا آغاز کیتا۔ اپنی محنت لگن کارن ایس ویلے دے انتہائی اعلیٰ شخصیت دے مالک پلس افسر جاوید نور نے فیصل شاہکار نوں اوہناں دے کیرئیر دے آغاز وچ ای اپنے داماد لئی چنیا۔ فیصل شاہکار تے سی سی پی او لہور غلام محمد ڈوگر دا کڑا امتحان اے کہ سفارشیاں دے بے دریغ بپھرے سمندر دی ٹھاٹھاں ماردی لہراں توں اپنے آپ نوں کیویں محفوظ بنائی رکھدے نیں۔چودھری پرویزالٰہی نوں غلام محمود ڈوگر تے فیصل شاہکار نوں اعتماد وچ لینا چاہیدا اے تاں
جے اوہ اپنی کارکردگی ہور مستحخم کر سکن۔ اوہناں دی کارکردگی دے ذریعے لہور نوں اک سیاسی جماعت دا قلعہ ہون توں کڈ کے غلام محمود ڈوگر چودھری پرویزالٰہی دی جھولی وچ پا سکدے۔ انتہائی ایماندار اخلاقیات اقدار دے حامل پی ایم ایس افسر نوں ڈی جی ایل ڈے اے تے لا دتا گیا مگر عامر احمد خان نوں قبضہ گروپ مافیاز جھنجھوڑن دے در تے اے۔ عامر اک ینگ سمارٹ تے خوب صورت افسر اے۔ اپنی پوری لگن نال سولہ سولہ گھنٹے کم کردا اے مگر اک پاسے خون خار بھیڑیے جہناں دے ناجائز کماں نوں بریک لگ چکی اے۔ ایل ڈی اے وچ میرٹ دے بول بالا تے مافیاز دے خاتمے دی کوششاں اتے وزرا تے بااثر افراد دے ذریعے عامر دے لہو دے پیاسے نظر آندے نیں۔ دُوجے پاسے پیس گروپ وی ایس افسر دے خلاف اے کہ اوہنے ساڈی اک اہم سیٹ نوں یرغمال بنا رکھیا اے۔
لمحہ فکریہ ہے کہ حالات ایس قدر نازک ہو چکے نیں کہ ڈی ایس پی سبزہ زار لہور نے میری موجودگی وچ اک پچھلے سیکرٹری
گریڈ 21نوں کہیا کہ تہاڈی پوسٹنگ کیوں نہیں ہو رہی تے سیکرٹری صاحب نے دَسیا چودھری مونس الٰہی پچھلی پوسٹنگ دے دوران میرے کولوں خفا ہو گئے سن تے ڈی ایس پی جہناں د انام ذوالفقار وریا اے نے ہسدے ہوئے کہیا تسیں تیاری کرو مونس دا کوئی مسئلہ نہیں اوہ من جاوے گا۔ جمعے نوں میری ملاقات اے میں مونس نوں سمجھا دیاں گا۔ مینوں ڈی ایس پی صاحب دی گل سن کے شاک لگیا فیر میں سنبھل کے پچھیا کہ ذوالفقار صاحب لہور وچ تعینات اک اعلیٰ افسر نے مینوںد سیا سی کہ میں منڈی بہائوالدین پوسٹڈ رہیا سی ۔ محمد
خان بھٹی نال میرا چنگا تعلق سی۔ ایس لئی مینوں ایہہ پوسٹنگ ملی اے تے تہاڈا تعلق وی محمد خان بھٹی نال اے تے اوہ فخریہ انداز وچ ہتھ چک کے بولے نہیں
بٹ صاحب نہیں حضور میں گجرات وچ ایس ایچ او رہیا واں۔ میرا تعلق مونس تے پرویز نال اے تے اپنی کہی گئی گل وچ ہور وزن پیدا کرن لئی وریا صاحب نے آکھیا میرا کجھ دناں پہلاں ایتھوں تبادلہ ہو گیا سی۔ میں ناراضگی وچ چارج چھڈن ای والا سی کہ مونس نوں میرے ولوں بھجوائے گئے پیغام مگروں سی سی پی لہور نے مینوں کال کیتی تے بلا کے کہیا تہاڈا تبادلہ آئی جی صاحب دی نہیں بلکہ رجسٹرار دی غلطی دی وجہ نال ہویا اے۔ اج آرڈر کینسل ہو جان گے۔ تسیں چارج نہ چھڈو۔ جے ذوالفقار وریا صاحب ایس ڈی پی او سبزہ زار لہور وی ایس گورکھ دھندے دا حصہ نیں تے افسران اپنی ذلالت دا سامان پیدا کرن دی بجائے بطور او ایس ڈی ای کجھ ویلا گزار کے مناسب ویلے دا انتظار کرن۔ سیاسی حکومتاں دے آن جان دا سلسلہ وی آئینی طریقہ کار تے ویلے دے مطابق ای چنگا لگدا اے۔ اسیں ایہنوں نہیں روک سکدے۔ تاہم انتظامی مشینری نوں ایس یقین دے نال تعینات کرنا چاہیدا اے کہ اوہناں نے قلیل مدتی تے طویل مدتی پالیسیاں وضع کرنی تے اوہناں اتے عملدرآمد کرنا اے تے انتظام نوں چلائے رکھنا اے تے جے اسیں ایڈہاک ازم دا ایہہ سلسلہ جاری رکھاں گے تے ساڈا پورا سسٹم زمین بوس ہو سکدا اے۔