تینوں ڈھوکاں یاد کریندیاں ہِن،ہِک واری مُڑ آویں ہا رائے نتھو دیااحمد خاناں

پنجاب دے انکھی سپُتّر تے جیدار سُورمے ”رائے احمد خان کھرل شہید” دے شہیدی دیہاڑ (21ستمبر) نوں ”پنجاب قومی ستھ” تے ”پنجابی زبان تحریک” دی سانجھ نال اک بہت وڈا ”رائے احمد خان کھرل شہید سیمینار” گورنمنٹ بوائز ڈگری کالج شیخوپورا وچ کروایا گیا۔ ایس ”سیمینار ” دا مقصد سی پنجاب تے قابض انگریزی سامراج خلاف 1857ء دی جنگ آزادی دے وڈے سُورمے ”رائے احمد خان کھرل شہید” نوں ”سلامی پیش کرنا تے اج دی نویں نسل نوں ایہ دسنا کہ اصل وچ ”رائے احمد خان کھرل ” کون سی؟ تے اوس وڈے پنجابی سُورمے نوںکیوں شہید کر دتا گیا؟۔
گورنمنٹ بوائز ڈگری کالج شیخوپورا وچ ہون والے ”رائے احمد خان کھرل شہید سیمینار” دی صدارت قائد ”پنجابی زبان تحریک” وڈے پنجابی کہانیکار، وڈے پنجابی کھوج کار، پنج پنجابی اداریاں دے مالک تے کئی سینکڑے کتاباں دے لکھاری محترم جناب چودھری الیاس گھمن صاحب نے کیتی۔
اُچیچے پروہنیاں وچ پنجابی کھوج کار ، وارث شاہ عالمی ایوارڈ جتن والے محترم جناب ڈاکٹر انوار احمد اعجاز صاحب(گوجرانوالا)، اُچ کوٹی دے شاعر تے نقاد محترم جناب ڈاکٹر بشیر فیض اسدی صاحب(تاندلیاں والا) ، ریڈیو پاکستان دے ”پنجابی دربار” پروگرام دے اینکر پرسن، ودھیا شاعر، کھوج کار ، دو شعری پراگیاں دے خالق، وارث شاہ عالمی ایوارڈ جتن والے محترم جناب محمد منیر شیر وانی (کڑیال کلاں)، ”پکیاں تھاواں” تے ”ہُن تینوں کیہ” دے خالق ، جگ دُھمے پنجابی شاعر، ”پنجابی چونترہ (صفدر آباد) دے پردھان محترم جناب ندیم افضل ندیم تے تِن شعری پراگیاں دی خالق ، نویں نسل دی نمائندا شاعراتے کئی ادبی تنظیماں دی ممبر محترما نرگس نور صاحبا شامل سن۔
گورنمنٹ بوائز ڈگری کالج شیخوپورا وچ کروائے گے۔ ”رائے احمد خان کھرل شہید سیمینار” وچ مجمانی دی ذمے واری محترم جناب پروفیسر خرم عباس ورک تے پی ایچ ڈی ڈاکٹر محترم جناب پروفیسر ا قبال حسین( صدر شعبہ پنجابی) نے نبھائی ۔ جدوں کہ روایت موجب ادبی تنظیم ”پنجاب قومی ستھ” دے چیئرمین ، ودھیا شاعر، تِن شعری پراگیاں دے خالق، ادبی رسالا مہیناوار ”پنچھی انٹرنیشنل” دے چیف ایگزیکٹو تے ”وارث شاہ عالمی ایوارڈ” جتن والے جاوید پنچھی نے سٹیج سیکرٹری دی ذمے واری نبھائی۔
”رائے احمد خان کھرل شہید سیمینار” دا آغاز اللہ تعالیٰ دے پاک کلام توں ہویا جہدی سعادت کالج پڑھیار ………….. نے حاصل کیتی۔
رسول کائنات، احمد مجتبیٰ ، کوثر دے والی، شافعی محشر حضرت محمد مصطفی ۖ دی بارگاہِ اقدس وچ ہدیہ نعت کالج پڑھیار …………… نے پیش کیتا۔
ایہ کسراں ہو سکدا اے کہ جتھے اللہ تے اللہ دے رسول ۖ دا ذکر ہووے اوتھے اوہدے ولیاں دا ذکر نہ ہووے؟ ۔ ایہ کسراں ہو سکدا اے کہ کوئی وی پنجابی اکٹھ ہووے تے پنجابی صوفی شاعراں دا کلام نہ پڑھیا جاوے؟
سو ایس ریت نوں نبھاندیاں ہویاں کالج دے تِن پڑھیاراں ……………. نے صوفیانا کلام پیش کر کے سیمینار دے رلتیاں توں داد کھٹی۔
ایس توں بعد سٹیج سیکرٹری جا وید پنچھی نے پنجاب دے وڈے تے جیدار سُورمے ”رائے احمد خان کھرل شہید”دا تعارف کراندیاں دسیا کہ :
”رائے احمد خان کھرل ضلع ساہیوال دے اک پنڈ جھامرے وچ 1776ء نوں سردار نتھو خان کھرل دے گھر جمیا۔ رائے احمد خان کھرل دا ساہیوال تے اوہدے آل دوالے سارے ضلعیاں وچ بڑا چوکھا اثر رسوخ سی۔
اوہ اپنے علاقے دیاں کھُلیاں جوہاں دا آپ مالک سی۔ اوہ بار دیاں رونقاں نوں گھٹدا ہویا نہیں سی ویکھ سکدا۔ اوہ پنجابی سُورما اپنے علاقے دے سماجی کماں کاراں وچ ودھ چڑھ کے حصا لیندا سی۔ جدوں انگریزی سامراج نبے پنجاب وچ اپنے پنجے گڈ کے پنجاب واسیاں تے ظلم کرنے شروع کیتے اوس ویلے رائے احمد خان کھرل توں چُپ نہ رہیا گیا تے نتیجا ایہ ہویا کہ اوہ انگریزی سامراج خلاف اُٹھ کھلوتا۔ انگریزی سامراج خلاف یُدھ وچ رائے احمد خان کھرل کلا نہیں سی سگوں اوہدے نال ساندل بار دے کجھ ہور جوان وی رلتی سن۔جہناں نے انگریزی سامراج دا نک مونہ بند کر دتا۔ جے کجھ مقامی لوک غداری نہ کردے تے رائے احمد خان کھرل تے اوہدے سنگیاں سامنے انگریزی سامراج نوں اپنے پیر جمانے اوکھے ہو جاندے۔
21ستمبر 1857ء نوں گشکوریاں دے کول ”نورے کی ڈل” تے 82ورھیاں دی عمر وچ رائے احمد خان کھرل نے اپنی جوانمردی تے ہمت دے ڈھیر سارے جوہر وکھائے۔ اوس دیہاڑے اوہ وڈا تے جیدار پنجابی سُورماں سویر توں شاماں تیکر لڑدا رہیا پر کسے وی انگریزی کُتے نوں اوہدے نیڑے آئون دی جرأت نہ ہوئی۔ پر ہوندا اوہ اے جو قدرت نوں منظور ہوندا اے۔
اللہ تعالیٰ دا فرمان اے : ”کُلُّ نَفْسٍ ذَائِقَةُ الْمَوْت” (ہر چیز نے موت دا ذائقہ چکھنا اے)۔
پنجابی صوفی شاعر سید وارث شاہ رحمة اللہ علیہ لکھدے نیں:
”جو کوئی جمیا مرے گا سبھ کوئی
گھڑیا بھجسی واہ سبھ ویہن گے وے
کُل چیز فنا ہو خاک رلسی
ثابت والی اللہ دے رہن گے وے”
ایہ اوہ سچائی اے جہنوں جھٹلایا نہیں جا سکداتے ٹالیا نہیں جا سکدا۔ رائے احمد خان کھرل جدوں ڈیگر ویلے اپنے خالق حقیقی دے دربار خاص وچ نماز عصر پڑھن لئی سجدا ریز ہویا تے بے رحم انگریزی سامراج نے اوہنوں گولی مار کے شہید کر دتا۔ رائے احمد خان کھرل دی شہادت توں بعد اوہد ا سِر لاہ کے گوگیرہ جیل دے بوہے تے نمائش لئی ٹنگ دتا گیا۔ ایہ سِر اوہدے وڈکیاں دے قبرستان وچ 90ورھے دھڑ توں وکھرا دفن رہیا۔ اوس علاقے وچ ڈھولے کہن والا اک بندا کہندا اے:
”تینوں ڈھوکاں یاد کریندیاں ہِن
ہِک واری مُڑ آویں ہا رائے نتھو دیاا حمد خاناں”
اس توں بعد گورنمنٹ بوائز ڈگری کالج شیخوپورا دے پروفیسر خرم عباس ورک ہوراں نے گل بات کردیاں آکھیا:
”جس قوم دی پچھان ختم کرنی ہووے اوہدے خلاف جنگ کرن دی کوئی لوڑ نہیں ، اوہدے خلاف کوئی ایٹم بم چلائون دی لوڑ نہیں۔ بس اوہدے ہیرو بدل دیو تے قوم دی تاریخ ، جغرافیہ، تے پچھان سب کجھ اپنے آپ ختم ہو جائے گا۔
کالج وچ شعبا پنجابی دے انچارج پروفیسر ڈاکٹر اقبال حسین نے ”سیمینار” دے رلتیاں نوں ”جی آیاں نوں ”آکھیا تے اپنی گل بات وچ آکھیا:
”ساڈے کالج دی ساری تاریخ وچ اج پہلی وار کوئی ”پنجابی سیمینار” ہو رہیا اے۔ ایہدے پچھے ساری کوشش ”پنجاب قومی ستھ” دے چیئرمین جاوید پنچھی تے ”پنجابی زبان تحریک” دے قائد محترم جناب چودھری الیاس گھمن دی اے ۔ میں ایہناں دوواںتنظیماں دا شکر گزار ہاں کہ ایہناں نے ساڈے کالج دے پڑھیاراں نوں ”پنجابی زبان، ادب، رہتل تے خاص طور تے پنجاب دے تاریخی تے اصل سورمیاں بارے جانکاری دین دا پربندھ کیتا اے۔ اسیں اُمید کردے ہاں کہ ایہ دو تنظیماں آئندا وی ساڈے کالج وچ ایہو جہے ”پنجابی سیمینار” کرواندیاں رہن گیاں جہناں پاروں ساڈے کالج دے پڑھیاراں نوں ”پنجاب دی تاریخ ، پنجابی سورمیاں تے پنجابی صوفی شاعراں بارے جانکاری ملے گی”۔
ایس توں بعد لاہور توں آئی ہوئی پنجابی شاعرا محترما نرگس نور نے پنجابی سورمیاں نوں خراج عقیدت پیش کرن لئی اپنی نویں نظم پڑھی جہڑی کجھ انج اے:
تسی انکھی پُت پنجاب دے
تسی شیراں وانگ دلیر
جد دھرتی واجاں ماردی
تسی جھٹ نہیں لاندے دیر
تسی عشق نمازاں نیتیاں
لکھ تلوار دے گھیر
تسی کھڑدے سینا تان کے
تسی دشمن کیتے زیر
نہیں غیراں اگے جھُکدے
تسی انکھی پُت جوان
نہ کرو قبول غلامیاں
نہ چھڈے تسی میدان
تسی غیرت والے سُورمے
تسی دھرتی ماں دا مان
تُساں بارے غیر وی آکھدے
ایہ گبھرو شیر جوان
ایہ دین سِراں تے چُنیاں
ایہ بھیناں دی نیں شان
ایہ عزتاں رکھن سانجھیاں
کوئی اپنا اے یا غیر
کوئی مندی جھاتی ماردا
فِر اُس دی نہیں جے خیر
تسی اُچے انبریں اُڈدے
تسی ازلاں توں شہباز
تسی سُچے خواب اقبال دے
تسی قائد دے فرمان
تسی سرحد دے رکھوالڑے
تسی پاک وطن دی شان
تسی ماواں دے او لاڈلے
تسی بُڈھے پیو دی جان
تسی مر کے لجاں پالدے
نہیں بھُلدے قول قرار
سِر دیون توں نہیں جھکدے
تسی انکھاں دے سردار
فر دھرتی منگے سورمے
کوئی احمد کھرل جوان
کوئی دُلے بھٹی وانگراں
ماں جمے فیر جوان
کوئی بھگت سنگھ جہیا سُورما
جہڑا دھرتی دیوے چھان
تے کنبے دُشمن ویکھ کے
جہدے ہتھ دے وچ کرپان
کوئی آوے رڑک خان وی
جو توڑے ہر زنجیر
جہڑی اپنے پیریں بنھ کے
اسی شاہوں ہوئے فقیر
اساں ماں بولی نوں چھڈیا
انج کیتا ظلم اخیر
سانوں کون سناوے آن کے
ہُن وارث شاہ دی ہیر
کوئی ربا بھیج فرشتا
میری مُکے فیر اُڈیک
اِس دھرتی دے نال جوڑ دے
اس دھرتی دے وسنیک
ایس توں بعد ( کوآرڈینیٹرپاکستان پاک برٹش آرٹس) محترم جناب ڈاکٹر ایم ایچ بابر نے اپنی مشہور نظم ”بول پنجابی او سجناں بول پنجابی” جہڑی کہ دھمال دے انگ وچ گائی گئی اے ۔ کالج دے پڑھیاراں نوں سنا کے بہت چوکھی داد کھٹی۔
ایس توں بعد نوجوان شاعر ، چار کتاباں دے خالق ندیم افضل ندیم نے اپنی اک نظم ”رائے احمد خان کھرل شہید ” وی نذر کیتی۔
پنجاب بھر وچ صوفی گائیکی دے حوالے نال ”بابا گروپ” کسے تعارف دا محتاج نہیں ۔ بابا گروپ دے اک سنگی محترم جناب محمد اسلم باہو صاحب نے صوفی شاعر حضرت سید وارث شاہ ہوراں دا کلام سنا کے سیمینار دے رلتیاں تے جسراں جادو کر دتا سی۔
ایس توں بعد ریڈیو پاکستان دے بلار محترم جناب محمد منیر شیر وانی ہوراں نے ”رائے احمد خان کھرل شہید ” دی حیاتی ، خاندانی پس منظر تے اوہناں دے سنگیاں بارے بہت جانکاری بھریا پرچا پڑھیا جہڑا ایس رپورٹ وچ مکمل الیکیا نہیں جا سکدا۔ اوہ فر کدے سہی۔
جتھے پنجابی تواریخ دی گل ہووے ایہ کسراں ہو سکدا اے کہ اوتھے ڈاکٹر انوار احمد اعجاز دا ناں کسے پکھوں پچھے رہ جائے۔ ڈاکٹر انوار احمد اعجازرہندے تے گوجرانوالا وچ نیں پر پورے پنجاب وچ کھلرے پنجابی ادب ، تواریخ، پنجابی صوفیاء تے پنجابی سورمیاں بارے بھرویں جانکاری رکھدے نیں۔ ڈاکٹر انوار احمد اعجاز نے وی بہت جانکاری بھریا پرچا پڑھیا جہڑا اگلی قسط وچ چھاپاں گے ۔ ان شاء اللہ۔
میں ذاتی طور تے سمجھناں کہ”رائے احمد خان کھرل شہید” نوں اوس ویلے تائیںپرسِدھ سلامی پیش نہیں کیتی جا سکدی جدوں تک اوہناں دی اپنی جوہ، اپنی ماں دھرتی دا جایا کوئی سُورما سیمینار وچ موجود نہ ہووے۔ سو ایس کمی نوں پورن لئی محترم جناب ڈاکٹر بشیر فیض اسدی صاحب نوں تاندلیاں والا توں سدیا گیا، اوہناں وی ساڈے سدے نوں کھڑے متھے قبول کیتا تے شیخوپورا پہنچ گئے۔
ڈاکٹر بشیر فیض اسدی صاحب نے راوی دے کنڈھے تے رہن والے شیر جواناں بارے اک نظم پیش کیتی جہدے وچ ”رائے احمد خان کھرل شہید” نوں خراج عقیدت پیش کیتا گیا سی۔نظم دے کجھ بول انج نیں:
میں بولنا سن ستونجا تے اج دینی اے گل نکھیڑ
کویں گھتیا نال انگریز دے راوی دیاں راٹھاں بھیڑ
اسیں راکھے دیس پنجاب دے ساڈی گھٹی وچ وفا
ساڈی پگ دے ولاں اُلیکیا ایہ راوی دا دریا
اسیں سُورمے پُت پنجاب دے تے راوی ساڈی شان
ساڈی دھرتی غیرت منداں دی اسیں انکھاں دے سُلطان
ایتھے مامند، نتھو، کاٹھیا، ایتھے جھلّا تے مراد
ایتھے نادر شاہ ہے وسدا اس جوہ دا والی داد
ایتھے رحم وٹو دا کوٹ وی جہڑا سِریاں دا لجپال
اس دھرتی سُورما جمیا اوہ موکھا ویہنیوال
اسیں انکھی جیون جیوندے سانوں اُچ پُنے دی مت
اسیں پانی وانگ لڑھاوندے جے غیرت منگ لئے رت
نک پرنے کیتا دیس نوں انگریز دے کالے راج
مُڑ جاگے سُورمے دیس دے جد ویلے ماری واج
ڈنگ پرتے ساندل بار دے راوی دی ودھ گئی شان
جد رائے نتھو خان دا پُت اُٹھیا احمد خان
ہاسو راوی پاک کراونی اس کیتا اوہدا آہر
اُس ماریا سد وراگ دا جہڑا اپڑیا آر تے پار
راء احمد خان ہا منگدا ہِک منگ آزادی دی
تاہیں چھیڑی نال انگریز دے اُس جنگ آزادی دی۔
آخر تے قائد ”پنجابی زبان تحریک” محترم جناب چودھری الیاس گھمن ہوراں نے صدارتی خطاب وچ آکھیا کہ :
”ضلع تاندلیاں والا دے ڈپٹی کمشنر (برکلے) نوں ”رائے احمد خان کھرل ” تے پہلوں ای بہت چوکھا غصا سی۔ کیوں جے اوہ پنجاب تے مسلماناں دے حقاں واسطے لڑ رہیا سی۔
”شروع دن توں پنجاب وچ گھوڑی ، عورت تے زمین غیرت دی نشانی سمجھی جاندی اے۔ ”رائے احمد خان کھرل شہید ” دی گھوڑی جہدا ناں ”ساوی” سی ۔ اوہ بہت اعلیٰ نسل دی گھوڑی سی۔ اوہ گھوڑی ویکھ کے اوتھوں دے ڈپٹی کمشنر دی نیّت بدل گئی تے اوہنے ساندل بار دے چودھری، وڈی جاگیر دے مالک ، جیدار سُورمے ”رائے احمد خان کھرل ” نوں آکھیا : ایہ گھوڑی مینوں دے دے ۔ ” رائے احمد خان کھرل ” نے اگوں جواب وچ آکھیا: ”اسیں غیرت مند پنجابی ہاں ،عورت،گھوڑی تے بھوئیں کسے نوں نہیں دیندے”۔
بس فیر اوس ڈپٹی کمشنر (برکلے )نے ”رائے احمد خان کھرل ” نال جنگ چھیڑ دتی ۔ اوس جنگ دا نتیجا ایہ نکلیا کہ ”رائے احمد خان کھرل ” انگریزی سامراج خلاف لڑدا ہویا شہید ہو گیا۔
”رائے احمد خان کھرل شہید” دے سنگیاں نے اگلے دن ای 24گھنٹیاں دے وچ برکلے نوں مار کے ”رائے احمد خان کھرل شہید” دا بدلا لے لیا۔
”سیمینار دے اخیر تے پروفیسر خرم عباس ورک تے پروفیسر ڈاکٹر قبال حسین نے سارے پروہنیاں دا شکریا ادا کرن دے نال نال ودھیا کھانا وی دتا۔