11ستمبر تے 11اگست

گیارہ ستمبر 1948 قائداعظم دا یوم وفات اے۔ ایس توں اک سال تے اک مہینے پہلاں قائداعظم نے 11 اگست 1947 نوں پاکستان دی دستور ساز اسمبلی وچ بطور گورنر جنرل پاکستان اپنی پہلی تقریر کیتی سی۔ قائداعظم تے تحریک پاکستان دے مخالفین قائداعظم دی تقریر توں ایہہ نتیجہ کڈدے نیں کہ اوہ ایس دو قومی نظریے توں دستبرادر ہو گئے سن جہدی بنیاد اتے پاکستان قائم ہویا سی تے ہن قائداعظم وطنیت دی بنیادا تے پاکستانی قومیت دے قائل ہو گئے سن۔ دُوجا نتیجہ بعض گمراہ عناصر قائداعظم دی ایس تقریر توں ایہہ کڈدے نیں کہ قائداعظم پاکستان وچ اسلا نوں بطور نظام حیات نافذ کرن دے حق وچ نہیں سن۔
قائداعظم نوں دین اسلام وچ مہارت دا کوئی دعویٰ نہیں سی۔ نہ ای اوہ خود نوں مولوی یا ملا سمجھدے سن لیکن قرآن مجید تے اسلامی قوانین دے بارے اوہناں دا مطالعہ بہت وسیع سی تے ایہدا اظہار اوہناں دی کئی تقریراں تے بیانات توں جھلکدا اے۔ اسلام یا سکیولرزم وچوں قائداعظم دا انتخاب کیہ سی؟ قائداعظم ای دے الفاظ وچ اسیں اوہناں دے نقطۂ نظر نوں سمجھن دی کوشش کردے آں۔ ”ایس عظیم الشان کتاب وچ اسلامی زندگی توں متعلق ہدایات دے باب وچ زندگی دا روحانی پہلو’ معاشرت’ سیاست’ معیشت’ غرض انسانی زندگی دا کوئی شعبہ ایسا نہیں اے جو قرآن مجید دی تعلیمات دے احاطے توں باہر ہووے۔ قرآن دی اصولی ہدایات تے سیاسی طریق کار نہ صرف مسلماناںلئی بہترین نیں بلکہ اسلامی سلطنت وچ غیر مسلماں لئی جہڑا سلوک تے آئینی حقوق نیں ایس توں بہتر دا تصور ممکن نہیں”۔
تسیں ویکھ سکدے او کہ قائداعظم دے ایس ارشاد وچ اوہناں دے نزدیک قرآن مجید دی تعلیمات معاشرت’ معیشت’ سیاست تے انسانی زندگی دے دوجے شعبیاں وچ وی ساڈی رہنمائی کردیاں نیں تے غیر مسلماں دے آئینی حقوق دے حوالے نال اسلام دی تعلیمات سب توں بہتر نیں۔ سکیولر ریاست تے سکیولر طرز فکر توں اسلا دا تصور یکسر مختلف اے تے قائداعظم نوں ایہدا پوری طرح احساس سی۔ سکیولر ریاست تے اسلامی ریاست دے فرق نوں سمجھن لئی وی آئو اسیں قائداعظم کولوں رہنمائی لینے آں۔ قائداعظم نے آکھیا ”اسلامی حکومت دے تصور دا ایہہ بنیادی امتیاز پیش نظر رہوے کہ اطاعت تے وفا کشی دا مرجع خدا دی ذات اے۔ ایس لئی تعمیل دا مرکز قرآن مجید اے احکام تے اصول نیں۔ اسلام وچ اصلاً نہ کسے بادشاہ دی اطاعت اے نہ کسے پارلیمان دی نہ کسے شخص یا ادارہ دی۔ قرآن دے احکام ای سیاست تے معاشرت وچ ساڈی آزادی تے پابندی دی حدود متعین کردے نیں۔ اسلامی حکومت دوجے لفظاں وچ قرآنی اصولاں تے احکام دی حکمرانی دا نام اے”۔
قائداعظم دے ایس فرمان توں واضح ہو جاندا اے کہ اک اسلامی سلطنت تے اسلامی حکومت دے حوالے نال قائداعظم دی سوچ’ فکر تے فہم و شعور وچ کوئی ابہام نہیں سی۔ا سلام وچ اطاعت اللہ دے احکامات دی اے جہڑے قرآن حکیم دی صورت وچ اللہ تعالیٰ نے اپنے آخری رسولۖ تے نبیۖ اتے نازل فرمائے۔ سیاست’ معاشرت تے معیشت وچ جہڑے احکامات قرآن کریم وچ موجود نیں۔ اک اسلامی حکومت اوہناں اتے عمل کرن دی پابند اے۔ نہ کوئی پارلیمنٹ تے نہ ای کوئی بادشاہ اک اسلامی سلطنت وچ اسلامی اصولاں تے اسلامی احکامات وچ ردوبدل کرسکدا اے۔ قرآنی اصولاں تے احکامات دے سامنے اسلامی حکومت وچ سب نوں سر تسلیم کرخم نا ہووے گا۔ قائداعظم کولوں جدوں پچھیا گیا کہ ہندوستان وچ اوہ سلطنت سانوں کیویں نصیب ہو سکدی اے تے قائداعظم دا جواب سی کہ مسلم لیگ دی تنظیم’ جدوجہد تے رستہ ایسے سلطنت دے قیام لئی اے۔
صوبہ سرحد دے کانگرسی لیڈراں خان عبدالغفار خان تے اوہناں دے بھرا ڈاکٹر خان صاحب نے جدوں جولائی 1947 وچ پاکستان توں وکھ پٹھاناں دی آزاد ریاست دا شوشہ چھڈیا سی تے ایہہ دعویٰ کیتا سی کہ آزاد پٹھانستان وچ ریاست دا آئین جمہوریت ‘ مساوات تے سماجی انصاف دے اسلامی نظریات دے بنیاد اتے مرتب کیتا جاوے گا۔ دوجے پاسے ہندوواں دی جماعت کانگرس وچ شامل ایہہ پختون لیڈر ایہہ بے بنیاد پراپیگنڈہ وی کر رہے سن کہ پاکستان دی ستور ساز اسمبلی جمہوریت’ مساوات تے سماجی انصاف دے اسلامی تصورات نوں نظرانداز کر دیوے گی۔ قائداعظم نے خان برادران دے ایس زہریلے تے جھوٹے پراپیگنڈہ دا جواب دیندے ہوئے آکھیا کہ ”پاکستان دی دستور ساز اسمبلی جو مسلماناں دی بھاری اکثریت اتے مشتمل اے اوہ شریعت اسلامی تے قرآنی اصولاں نوں کیویں نظرانداز کر سکدی اے” ہر باشعور انسان ایہہ وی سمجھ سکدا اے کہ خان عبدالغفار تے اوہناں دے ہم خیال لوک متحدہ ہندوستان دے علمبردار سن۔ اوہ نہرو تے گاندھی نال رل کے متحدہ ہندوستان وچ اسلامی شریعت نوں کیویں نافذ کروا سکدے سن۔
اسلامی نظریات دے مطابق جمہوری اصولاں تے سماجی انصاف اتے مبنی جے قائم کیتا جا سکدا اے تے اوہ صرف پاکستان وچ ای ممکن اے جہدی عظیم اکثریت مسلماناں اتے مشتمل اے۔ اوہ گمراہ عناصر یا سدھے رستے توں بھٹکدے ہوئے لوک جہڑے خود پاکستان وچ قرآن تے رسولۖ کریم دی تعلیمات دے مطابق اسلامی نظام حیات دے نفاذ توں خوفزدہ نیں اوہناں دا ایہہ پروپیگنڈاہ اج وی جاری اے کہ قائداعظم پاکستان وچ اسلامی نظام دی حکمرانی دے خلاف سن۔ قیام پاکستان توں پہلاں قائداعظم جدوں پاکستان دا مقدمہ مسلمان قوم تے قیام پاکستان دے مخالفاں دے سامنے پیش کردے سن تے جہناں اصولاں تے نظریات دی بنیاد اتے قائداعظم قیام پاکستان دے مطالبہ اتے زور دیندے سن اوہ بنیاد دو قومی نظریہ سی تے ایہہ اک مستقل نظریہ اے یعنی مسلمان اک وکھری قوم نیں تے اوہناں دا اک اپنا نظام حیات اے۔ ساڈی تہذیب تے تمدن’ اخلاقی ضوابط’ قنونی احکامات’ رسم و رواج’ ساڈی تریخ غیر مسلماں توں مختلف اے۔ ساڈے رجحانات’ روایات’ عزائم تے زندگی توں متعلق ساڈا زاویہ نظر قائداعظم دے ارشادات دے مطابق غیر مسلماں توں مختلف سی تے مختلف اے۔ 1945 وچ سرحد مسلم لیگ کانفرنس نال خطاب کردے ہوئے اوہناں نے فرمایا سی کہ ”مسلمان پاکستان دا مطالبہ کردے نیں جتھے اوہ خود اپنے ضابطہ حیات اپنے تہذیبی ارتقا اپنی راویات تے اسلامی قنون دے مطابق حکمرانی کر سکن۔” فیر قائداعظم نے اوسے تن روزہ کانفرنس دے تیجے دن اپنی تقریر وچ ایہناں خیالات دا اظہار فرمایا کہ ”ساڈا دین ساڈی تہذیب تے ساڈے اسلامی تصورات اوہ اصل طاقت نیں جہڑے سانوں آزادی حاصل کرن لئی متحرک کردے نیں”۔
قائداعظم دے ایہناں ارشادات دا تعلق قیام پاکستان مگروں اے ۔ اگرچہ قائداعظم دی ایہہ دونویں تقریراں نومبر1945 وچ کیتی گئیاں۔ مگر اسلامی قنون تے اسلامی ضابطہ حیات دی حکمرانی عملی طور تے قیام پاکستان مگروں ای ممکن سی۔ قائداعظم جو وی کہہ رہے سن اوہدے اتے عمل آزادی پاکستان مگروں ای ہو سکدا سی تے قائداعظم دی عظمت کردار ایہہ سی کہ اوہ صرف اوہو ارشادات فرماندے جہدے اتے اوہ عمل کرنا چاہندے سن۔قائداعظم دی گفتار تے کردار وچ کوئی تضاد نہیں سی۔ قائداعظم نے جدوں ایہہ فرمایا کہ حصول آزادی لئی سانوں متحرک ای ساڈے دین اسلام تے ساڈے اسلامی نظریات نے کیتا اے تے فیر ایہہ کیویںممکن اے کہ قیام پاکستان دے فوری مگروں قائداعظم نے دین اسلام’ اسلامی قوانین’ اسلامی تصورات تے اسلامی ضابطہ حیات نوں فراموش کردتا ہووے۔ قائداعظم جیسے بااصول’ باکردار تے دیانت دار لیڈر اتے ایسا الزام دشمن وی عائد نہیں کر سکدا کہ قیام پاکستان توں پہلاں قائداعظم دے نظریات ہور سن تے قیام پاکستان مگروں اوہناں دے تصورات مختلف سن۔
30جون 1947دے روزنامہ ڈان وچ قائداعظم دا ایہہ فرمان شائع ہویا سی کہ ”پاکستان دی دستور ساز اسمبلی شریعت دے بنیادی اصولاں تے قرآنی قوانین توں انحراف نہیںکرے گی۔ فیر قائداعظم دی11 اگست 1947 دی تقریر توں کوئی ا یسا مفہوم کڈنا کہ قائداعظم اسلامی شریعت تے قرآنی قوانین توں انحراف کرن لئی تیار ہو گئے۔ ایہہ بدنیتی تے صریحاً قائداعظم اتے بیہودہ الزام تراشی اے۔ 25جنوری 1948 نوں قائداعظم نے کراچی بار ایسوسی ایشن نال خطاب کردے ہوئے فرمایا سی کہ ”میں ایہہ سمجھن توں قاصر آں کہ لوکاں دا اک طبقہ دانستہ طور تے شرارت کردے ہوئے ایہہ پراپیگنڈہ کر رہیا اے کہ پاکستان دے دستور دی بنیاد شریعت اتے استوار نہیں کیتی جاوے گی۔ اج وی اسلامی اصولاں دا اطلاق اوسے طرح ممکن اے جیویں تیرہ سو سال پہلاں سی۔ اسلام تے اوہدے نظریات نے سانوں جمہوریت دا سبق پڑھایا اے۔ اسلام نے ہر شخص لئی مساوات ‘ عدل تے انصاف دا حکم دتا اے۔ ”قائداعظم نے اپنی ایسی تقریر وچ رسول کریمۖ دے حضور خراج عقیدت پیش کردے ہوئے کہیا سی کہ ساڈے رسول کریمۖ اک عظیم قنون دین والے’ عظیم مدبر تے حکمران سن۔ قائداعظم نے اپنی 25جنوری 1948 نوں ایس تقریر وچ ایہہ وی واضح کیتا سی کہ اسلام نہ صرف رسوم ،رواج’ روایات تے روحانی نظریات دا مجموعہ اے بلکہ اسلام ہر مسلمان لئی اک ضابطہ حیات اے جہدے وچ سیاست تے اقتصادیات دے شعبیاں لئی وی ساڈے لئی رہنما اصول موجود نیں تے ایہناں ای خیالات دا اظہار اپنے خطبیاں وچ بار بار کیتا اے۔
سمجھن دی گل ایہہ اے کہ قائداعظم نے اپنی 11 اگست 1947 دی تقریر وچ پاکستان دی غیر مسلم اقلیتاں دے مذہبی تے شہری حقوق دی جہڑی گل کیتی اوہ وی اسلامی تعلیمات دے چانن وچ ای کیتی سی تے ایہدا ثبوت تہانوں قائداعظم دی 14 اگست 1947 دی تقریر توں وی دتا جا سکدا اے۔ قائداعظم نے اپنی ایس تقریر وچ وضاحت کردتی سی کہ غیر مسلماں دے نال راواداری تے حسن سلوک دا سبق اسیں پیغمبر اسلامۖ کولوں لیااے۔ جہناں نے تیرہ سو سال پہلاں یہودیاں تے عیسائیاں دے نال رواداری دا عملی مظاہرہ کیتا سی۔ قائداعظم نے مسلمان حکمراناں دی تریخ دا حوالہ دیندے ہوئے آکھیا سی کہ مسلمان جتھے جتھے وی حکمران رہے اوہناں دی تریخ ایسے انسانیت نواز اصولاں نال وی ہوئی کہ اوہناں دے ادوار وچ غیر مسلماں نال نہایت چنگا سلوک کیتا گیا تے مسلمان حکمراناں دا ایہہ طرز حکمرانی اسوۂ رسولۖ دے چانن وچ سی۔ گیارہ ستمبر قائداعظم دے یوم وفات دے موقع تے ایہہ اوہ چند گزارشات سن جہڑیاں قائداعظم دے افکار و نظریات دے حوالے نال میں سیالکوٹ دے اک مقامی سکول وچ اپنی نوجوان نسل دے روبرو پیش کیتیاں کیوں جے نوجوان طبقے کولوں قائداعظم نوں بڑی امیداں سن۔ کاش اسیں قائداعظم دے افکار تے سیرت و کردار توں روشنی حاصل کرئیے۔