داتا دربار دے مہربان درودیوار

شہر صدیاں دے سفر مگروں خاص رنگ وچ ڈھلدے نیں۔ ایہ خاص رنگ منفی وی ہو سکدا اے تے مثبت وی۔ ایس خاص رنگ وچ دوجے کئی رنگاں دی آمیزش وی شامل ہوندی اے۔ ہولی ہولی ایہ رنگ اوس شہر دی پچھان بن جاندا اے۔ جدوں وی اوہدا تذکرہ ہووے دماغ دی سکرین تے اوہ رنگ چھا جاندا اے۔ لہور اک کرشماتی شہر اے۔ ایہدی آب و ہوا’ زمین’ رُکھ’ پرندے تے انسان طاقتور روحانی فضا دے زیراثر رہندے نیں۔ ایتھے ساہ لین والے سارے جانداراں تے ایس فضا دی گہری چھاپ اے۔ فطرتاً ایہ سب سائے’ سکھ’ رزق تے خشبو ونڈن والے نیں۔ ازل توں ایس دھرتی دے انساناں تے فطرت وچ گہری سانجھ اے۔ ہواواں وچ روحاں نوں سرشار کرن والے گیت رچے نیں۔ ایہو وجہ اے کہ سکھ ونڈن والی ایہ دھرتی امن’ محبت تے خدمت خلق دی گل کرن والے اولیاء اللہ دی پسندیدہ سرزمین رہی اے۔ برصغیر وچ اسلام دی شمع دا نور پھیلان وچ لہور وچ رہائش پذیر داتا گنج بخش دا اہم کردار اے۔ لہور شہر جہڑا نہ صرف پنجاب سگوں پاکستان دا دل اے دی دھڑکن داتا دے دربار نال بنھی اے۔ ایہ مرکز اے جہدے نال سارے جڑت رکھدے نیں۔
اکثر صوفیاء دے عرس دے موقعے تے ایہ اعتراض اٹھایا جاندا اے کہ دوجے ملکاں وچ اجہے دربار کیوں نہیں تے اوتھے انج دے عرس کیوں نہیں ہوندے۔ ایہدا جواب ایہہ وے کہ ہر ملک دی علمی’ دینی’ اخلاقی’ ثقافتی تے روحانی اقدار دی منتقلی دے اپنے جداگانہ سلسلے نیں پر ہر معاشرے وچ علم دا ونڈن والے ایہ بزرگ ہوندے نیں کدھرے سقراط’ کدھرے ملٹن’ کدھرے بھگت کبیر تے کدھرے بابا فرید۔ ایہ رب دی منشا دے مطابق کم کردے نیں۔ ایہناں دی ذمہ داری مخلوق خدا دی تربیت اے۔ اسلام دی گل کریئے تے اسیں سارے جاننے آں کہ حضرت محمد مصطفیۖ دے بعد نبوت دا سلسلہ ختم کر دتا گیا پر اولیاء دا سلسلہ جاری و ساری رکھیا گیا۔ ایہ اولیاء نبی تے رب دا پیغام لوکاں تک اپڑاندے تے اپنے عمل نال سمجھاندے نیں۔ معاشرے وچ رہن والے انسان عقل دے وکھووکھ مدارج تے فائز ہوندے نیں۔ اوہناں نوں رہنمائی دی لوڑ ہوندی اے۔ صوفی تے ولی اک استاد تے مرشد وانگوں اوہناں دی رہنمائی کردا اے۔ اوہناں نوں مادیت توں روحانیت’ شر توں خیر’ تخریب توں تعمیر تے منفی توں مثبت ول لے جاندا اے تاں جے دنیا وچ چنگیاں قدراں پروان چڑھ سکن۔ صوفی احترام آدمیت تے خدمت خلق دا پیامبر اے۔ اوہدا مقصد مخلوق خدا دی خوشنودی تے دادرسی اے کیوں جے اوہنوں خبر اے کہ ایسے وسیلے نال اوہ اللہ دی خوشنودی حاصل کر پائے گا۔ اوہ کسے نال نفرت نہیں کردا’ کسے تے فتویٰ نہیں لاندا’ کسے نوں کٹہرے وچ کھڑا نہیں کردا’ کسے تے در بند نہیں کردا۔ اوہدا در تے دسترخوان مجرم’ گنہگار تے نیکوکار ساریاں لئی کھلا رہندا اے۔ صوفی تے ولی دی کوئی گل اللہ دی رضا توں متصادم نہیں ہوندی ۔ ہر کم خدا دی منشا نال عمل وچ آندا اے دعا نوں قبولیت دی سند عطا ہوندی اے۔
داتا دربار تے کئی طرح دے خزانے تقسیم کیتے جاندے نیں۔ مادی لوڑ پوری کرن لئی لنگر تے روحانی لئی محفل حمد’ محفل نعت’ محفل سماع تے دوجیاں محفلاں جو ہر ویلے جاری رہندیاں نیں۔ قرآن پڑھیا جاندا اے درود و سلام دا ورد کیتا جاندا اے۔ مادی تے روحانی لوڑ تے رہنمائی توں علاوہ اخلاقی’ ثقافتی تے انسانی قدراں دی ترویج وچ ایس دربار دا گہرا کردار اے۔ رب کرے ایہدے کھلے صحن وچ لنگر دی تقسیم جاری رہوے۔ ایہدے برآمدے بے گھر لوکاں لئی جائے امان بنے رہن۔ ایہدے ستون مہربان موڈھے دا روپ دھارے رہن جہدے تے سر رکھ کے لوک اپنا دکھ بیان کر کے اپنا کتھارسز کر سکن’ جی بھر کے رو کن تے روحانی سرخوشی نال روح دا دامن بھر سکن۔ جہڑے لوک ایس دربار دی زیارت کردے نیں اوہناں نوں کسے ماہر نفسیات کول جان دی لوڑ نہیں پیندی کیوں جے صوفی سب توں وڈا ماہر نفسیات اے۔ ایہدا طریقہ علاج بڑا موثر اے۔ انسان ظاہری دیکھ بھال وچ الجھیا رہندا اے تے باطن وچ بچھے جالاں توں بے خبری اوہنوں نڈھال کر دیندی اے۔ صوفی اندر جمع کثافتاں ول دھیان دوا کے انسان دی تطہیر کردا اے۔ میں جدوں وی دکھی ہونی آں داتا دربار تے حاضری دینی آں اوتھے گھنٹوں بہہ کے اپنے رب نال گلاں کرنی آں۔ ایس دربار دے مہربان درو دیوار میری ڈھارس بنھاندے نیں میرے سارے اتھرو تے دکھ خود جذب کرکے مینوں روحانی دولت نال مالامال کر کے زندگی دی رہگزر تے زیادہ توانائی دے نال خدمت خلق دی ترغیب دیندے نیں۔٭