حسنِ اخلاق، انسانیت دا زیور

اج کل ٹرانس جینڈربل نوں لے کے سماجی رابطیاں اتے بہت ساری گلاں آکھی جا رہیاں نیں۔ انج لگدا اے کہ حکمراناں تے دوجے طاقتور لوکاں نوں موت یاد نہیں اے کہ اوہ اپنی نوکری پکی کرن دے چکر وچ ایس ملک دے عوام دی زندگیاں نوں مشکل توں مشکل تر بنائے جا رہے نیں لیکن کیہ ای چنگا ہووے کہ ملک دا دانشور طبقہ اگے ودھے تے ایس معاملے اتے لوکاں دی رہنمائی دا کم کرے۔ ایس ویلے گل بات دی لوڑ اے کہ کیویں کیویں دشمنان دین مسلماناں دے اخلاق نال کھلواڑ کیتے جا رہے نیں۔ لوکاں نال گل بات کرن دی لوڑ اے کہ چنگے اخلاق نال معاشرے وچ کیہ تبدیلیاں آ سکدیاں نیں۔ لوکاں نوں دسنا ہووے گا کہ معاشرتی تے اجتماعی زدنگی دے بنان تے سنوارن وچ اخلاق نوں نمایاں حیثیت حاصل اے۔ بحیثیت قوم سانوں ایہہ نقطہ سمجھنا ہووے گا کہ معاشرت دی پہلی بنیاد اخلاق حسنہ ای اے۔ حسن اخلاق دے بغیر انسان انسان نہیں رہندا’ بلکہ درندگی و بہیمت اتے اتر آندا اے۔
انسانیت د ا زیور حسن اخلاق اے۔ کہیا جاندا اے کہ جہڑے ویلے اللہ پاک نے اپنے آخری نبی حضرت محمدۖ نوں ایس دنیا وچ لوکاں دی ہدایت لئی بھیجیا اوس ویلے دنیا اخلاقی اعتبار توں کنگال تے دیوالیہ ہو چکی سی۔انسانیت تے شرافت دی بنیاداں ہل چکیاں سن۔ تہذیب و تمدن دے گہواریاں وچ خود سری’ بے راہ روی تے اخلاقی پستی دا دور دورہ سی۔ شراب عرباں دی گھٹی وچ پئی سی۔ سودی لین دین’ کمزوراں دا استحصال تے ایس سلسلے وچ بے رحمی تے سخت گیری عام سی۔ بے شرمی تے بے حیائی’ رہزنی تے قزاقی معمولی گل تصورکیتی جاندی سی۔ جنگ جوئی تے سفاکی کھبے ہتھ دا کھیڈ بن گیا سی۔ بے جا انتقام تے تعصب دا شمار قوماں دی خصوصیتاں وچ شمار ہوندا سی۔ ایسے اخلاق سوز تے غیر انسانی ماحول وچ اسلام نے جو عمدہ اخلاقی نظام پیش کیتا اوہ ساری انسانیت لئی اکسیر ثابت ہویا۔ اسلام نے اپنے منن والیاں نوں جھوٹ تے بہتان طرازی’ ظلم و ستم’ بدسلوکی تے بے رحمی’ فریب تے دھوکہ دہی’ شراب نوشی تے جوابازی’ زناکاری تے بے حیائی’ جنگ و جدل وغیرہ توں دور رہن دا حکم دتا جد کہ ایہدے بالمقابل عمدہ اخلاق دی تربیت یعنی والدین دے نال حسن سلوک و خدمت گزاری دی تعلیم دتی۔ فیر بھراں بھیناں تے رشتہ داراں دے نال احسان تے صلہ رحمی دا حکم دتا۔ بیوی بچیاں دے نال محبت شفقت تے چنگے رویے دی تاکید کیتی۔ فیر اک فلاحی معاشرے دی تشکیل لئی پڑوسیاں’ رشتہ داراں’ دوستاں’ مسافراں تے فیر عام لوکاں دے نال بغیر رنگ و نسل تے مذہب دی تمیز کیتے انسانی بنیاداں اتے بہترین سلوک تے احترام دا سبق دتا گیا۔ سارے مسلماناں دے نال ہمدردی تے خیر خواہی تے سارے انساناں دے نال ہر حال وچ عدل و انصاف’ رواداری تے مساوات دا برائو اصل وچ اسلام دا ای خاصہ اے۔ لوکاں نوں ایہہ نقطہ سمجھانا ہووے گا کہ اسیں دھڑے دے نال نہیں بلکہ حق دے نال کھڑا ہونا اے۔ اسلام نے باہمی معاملات نوں مطلب پرستی تے خودغرضی نہیں بلکہ ہمدردی تے خیر خواہی دے جذبہ نال انجام دین دی تعلیم دتی۔ اسلام دی اخلاقی تعلیمات دی روح ہمدردی تے خیر خواہی’ عدل و انصاف تے مساوات و احترام نفس اے۔ اسلام دی خصوصیت ایہہ اے کہ نہ صرف اعلیٰ اخلاقی اصول وضع کیتے بلکہ پیغمبر اسلام حضرت محمدۖ نے عملی طور تے چنگے اخلاق دا مظاہرہ کر کے وکھایا۔
صاحبو!خلق انسان دے ایس نفسانی ملکہ نوں آکھیا جاندا اے جہڑا ایس گل دا کارن بندا اے کہ انسان بعیر فکروتامل تے غوروخوض دے خاص افعال انجام دیوے یعنی نفسانی کنٹرول دے ذریعہ بہترین کم انجام دین نوں خلق آکھیا جاندا اے۔ جدوں کدی ایہہ کہیا جاوے کہ فلاں شخص دا
اخلاق بہت بہتر اے تے اوہدے معنی ایہہ نیں کہ اوہ انسان نفسانی اعتبار نال صفات حسنہ (بہتر صفات) دا مالک اے۔ انسان دے سارے اعمال’ نفسیاتی خصوصیات اتے موقوف نیں۔ اج سانوں سمجھن دی لوڑ اے کہ ساڈا معاشرہ کہڑے پاسے جا رہیا اے تے کیوں ساڈے اندرون انسانیت ختم ہوندی جا رہی اے۔ کیوں ہر کوئی دوجے توں پریشان نظر آندا اے۔ کیوں ماواں بھیناں دی عزتاں محفوظ نہیں نیں کیوں اسیں سب کجھ ہون دے باوجود اک بھکاری ملک دی پہچان رکھنے آں کیوں ساڈے حکمران ہر ویلے بیرونی قرض اتے مجبور نیں۔ کیوں ساڈے نوجوان اپنے مستقبل توں پریشان رہندے نیں تے کیوں ساڈے لوک دونمبری تے چور بازاری توں دولت مند بنن دی کوشش وچ رہندے نیں۔ آخری گل ایہو کہواں گا کہ جے دنیا وچ مقام بنانا اے تے سانوں اپنے اخلاق چنگے بنانے ہون گے۔ دھڑے بندیاں توں نکل کے انصاف دے نال فیصلے کرن دی عادت اپنانی ہووے گی کیوں جے جدوں انسان دا اخلاق چنگا تے نیک ہووے گا تے اوہدے اعمال وی چنگے ہون گے تے جہدا عمل چنگا ہووے اوہنوں دنیا وچ کدھرے شکست نہیں ہو سکدی اے بلکہ دنیا اوہدے سامنے سرنگوں ہوندی چلی جاندی اے۔ اسیں عقیدے نال تے اسلام دی ساری گلاں نوں تسلیم کر لینے آں لیکن جدوں عمل دی واری آوے تے حیلے بہانے نال کم چلان دی کوشش کرنے آں مگر اسلام دی تریخ گواہ اے کہ قرآن دے صرف اک حکم نال کہ شراب گندگی تے شیطانی عمل اے مسلماناں نے گھراں وچ رکھی شراب مدینہ دی گلیاں وچ بہاد تی۔