میابائی دی قبر تے قبضہ تے چوبرجی

بچپن توں ویکھ رہے سی مزنگ چونگی ولوں آن والی سڑک میانی صاحب قبرستان توں گزر کے ملتان روڈ نوں چھوندی تے سامنے اک خستہ حال عمارت نظر آندی۔ کالج دے دناں وچ بس اکثر ایسے ولوں ہو کے جاندی۔ کئی واری دل کردا کہ ادھے ڈگے میناراں’ کونیاں توں کھسکیاں اٹاں تے مٹدے ہوئے نقش والی چوبرجی دے اندر وڑیئے پر لوکاں نے ایہنوں عوامی بیت الخلاء بنا رکھیا سی۔ بوہے دے نال جو چبوترے توں باقی سن اوہناں تے کوئی ادھ ننگا ذہنی توازن کھو چکیا بندہ قابض ہوندا۔ مغرب ول والا حصہ بول و براز دی بدبو نال بھریا ہوندا۔ عمارت دے سامنے تھوڑی تھاں خالی پئی سی۔ محنت مزدوری کرن لئی لہور آئے بے گھر لوک رات نو ںایتھے سوں جاندے۔ ایہ چوبرجی دے اوہ پہلے نقش نیں جو دماغ و چ محفوظ ہوئے۔
چوبرجی زیب النساء بنت اورنگزیب عالمگیر دے شاندار باغ دا مرکزی بوہا دسا گیا۔ باغ والے حصے وچ پونچھ روڈ تے نواں کوٹ دی آبادیاں بس چکیا ںنیں۔ ایہناں آبادیاں وچ چوبرجی باغ تعمیر کرن والیاں تے اوہدی دیکھ بھال کرن والیاں دیاں یادگاراں نیں۔ بہت ساریاں یادگاراں ہوس زمین دی نذر ہو گئیاں جو باقی نیں اوہناں دی شناخت بدل کے کجھ لوک جھوٹ تے جعلسازی دا دھندا چلا رہے نیں۔ چوبرجی باغ وچ اک خوبصورت مقبرہ بنیا۔ اکثر لوگ ملتان روڈ تے واقع ایس مقبرے نوں زیب النساء نال منسوب کردے نیں پر مآثر عالم گیری سرسید دی آثار الصنادید ورگی کتاب وچ دسیا گیا اے کہ زیب النساء بنت اورنگزیب دہلی وچ فوت ہوئی تے دلی شہر دے کابلی دروازے دے باہر اوہدا مقبرہ بنایا گیا۔ بعد وچ ایتھوں ریل دی پٹڑی گزرن دی وجہ نال ایہ مقبرہ ڈھیہہ گیا۔ ایس بارے 1919ء وچ مولوی بشیراحمد دہلوی دی چھپن والی کتاب توں وی جانکاری مل جاندی اے۔ چوبرجی اصل وچ اک ڈیوڑھی اے۔ مغربی پاسے بوہے تے اک شعر لکھیا اے:
ساخت میابائی فخرالنساء
روضہ عالی ارم احتشام
چوبرجی دی عمارت تے کئی لکھ روپیے خرچ ہوئے۔ ایس باغ دی وسعت دا اندازہ ایہدے توں لایا جا سکدا اے ایہدی اک حد نواں کوٹ دی چاردیواری تے میانی صاحب دے نال ملدی تے دوجی حد حضرت داتا گنج بخش علی ہجویری تے پیرمکی دے مزار تک اپڑدی۔ باغ دی مغربی کندھ دے تھلے دریائے راوی وگدا۔
تقریباً ڈیڑھ سو ورھے پہلاں مولوی نور احمد چشتی نے لکھیا کہ دریا دی وجہ نال باغ دی چاردیواری تے اوہدے مکاناں دیاں بنیاداں نوں نقصان اپڑیا ہن ایہناں کندھاں تے مکاناں دا کوئی پتہ نہیں’ صرف ایہ بوہا بچ گیا اے جہنوں اسیں چوبرجی کہنے آں۔ اُتے شعر وچ جس میابائی دا ذکر اے اوہ شہزادی زیب النساء دی کنیز یاں آیا دسی جاندی اے۔ باغ دی تعمیر دوران شہزادی نے دیکھ بھال دا اختیار میابائی نوں دے رکھیا سی۔ باغ دی تکمیل تے شہزادی ملاحظہ لئی آئی تے اوہنوں پتہ لگا کہ لوک ایس باغ نوں میابائی دا باغ کہہ رہے سن۔ شہزادی نے اوس ویلے تک باغ وچ قدم نہ رکھیا جدوں تک ایہ اعلان نہ کر دتا کہ اوہ ایہ باغ میابائی دی قابلیت تے خدمات توں خوش ہو کے اوہنوں بخش رہی اے۔ بعد وچ شہزادی نے اپنے واسطے نواں باغ کجھ فاصلے تے نواں کوٹ وچ بنوایا۔ پروفیسر علم الدین ایس کہانی نوں کوڑا قرار دیندے نیں۔ اوہناں دی دلیل اے کہ جدوں باغ تعمیر ہو رہیا سی تے اوس ویلے شہزادی دی عمر اٹھ نو ورھے سی۔ محکمہ آثار قدیمہ نے زینبدہ بیگم دا کتبہ لایا۔ ایس ایم جعفر دے مطابق زینبدہ شاہجہاں دی دھی سی۔ فیر پتہ لگا کہ ایس ناں توں شاہجہاں دی کوئی دھی نہیں سی۔ محققین داخیال اے کہ ایہ باغ شاہجہاں دی دھی جہاں آراء نے تعمیر کرایا تے فیر اپنی کنیز میابائی نوں بخش دتا۔ ایس گل دی تائید نقوش لاہور نمبر وچ دتی گئی اک روایت توں ہوندی اے کہ 1646ء وچ اورنگزیب نے اپنی بھین جہاں آراء نوں لہور توں خط لکھیا۔ اوہ لکھدا اے کہ اسیں کجھ عرصہ سرکار علیا دے باغ دی سیر کیتی۔ اوہدے تالاب تے عمارتاں جو ہنے ہنے بنیاں نیں ویکھ کے بڑی خوشی ہوئی۔ ایہ تھاں تفریح لئی بڑی ودھیا اے۔
میابائی دی قبر پونچھ ہائوس دے اک گوشے وچ اے۔ دو ورھے پہلاں اک دوست نے دھیان دوایا کہ کسے نامعقول انسان نے قبر دا اوہ کتبہ پٹ دتا جہدے تے میابائی لکھیا ہویا سی۔ اوہدی تھاں مائی بخاری دے ناں نال نواں کتبہ لا دتا گیا۔ نال جو مقبرے دی عمارت اے اوہ چھوٹیاں اٹاں نال بنی اے۔ قابض بندے نے آثارقدیمہ دی ایس عمارت دے اندر سیمنٹ دا پلستر کر دتا۔ حیرت دی گل اے کہ کسے نے ایس معاملے دا نوٹس نہیں لیا نہ کوئی کاروائی ہوئی۔ ہن اوتھے گدی نشین صاحب قابض ہو گئے نیں تے اپنا دھندا چلا رہے نیں۔ میابائی دی قبر تے مائی بخاری دی شناخت لا دتی گئی اے۔ ایس سارے کم دوران پونچھ ہائوس دا سرکاری عملہ تے اوہدی عمارت دی دیکھ بھال تے لگے لوگ کیوں چپ رہے ایہدے بارے انکوائری دی ضرورت اے۔ کوئی پندراں ورھے پہلاں چوبرجی دی عمارت دے آل دوالے صفائی کر دتی گئی۔ خستہ عمارت دی مرمت ہوئی تے سامنے اک سبزہ زار بنا دتا گیا۔ بول و براز دا سلسلہ وی رک گیا پر اورنج ٹرین دی تعمیر نال اک واری فیر ایہ عمارت زیربحث آ گئی۔ اورنج ٹرین دے منصوبے لئی محکمہ آثار قدیمہ دی رپورٹ نوں اہمیت نہ دتی گئی جہدے مطابق ایہ منصوبہ چوبرجی دی عمارت نوں کمزور کر سکدا اے۔ باغ مٹ چکیا اے ہن چوبرجی ڈیوڑھی اے سمن آباد موڑ گزرو تے جہاں آراء دا مقبرہ اے تے چوبرجی دے کول پونچھ ہائوس وچ میابائی دی قبر اے جہدا کتبہ بدل دتا گیا اے۔٭٭