کیہ عمران رابن ہڈ تے راجا پورس بن سکے گا؟

عمران خان نے لوکاں نوں جس طرح متحرک کیتا اے ایہدے توں کجھ حلقیاں دی رائے اے کہ عمران ہجوم نوں قوم بنان وچ کامیاب ہو چکے نیں۔ کافی حد تک لوک اکمٹھ ہو کے عمران خان دے جہاد دا حصہ بن چکے نیں۔ میں ایہدے نال اتفاق نہیں کردا۔ عمران خان دا ساتھ لوکاں ولوں ضرور دتا جا رہیا اے پر انج وی نہیں ایہدے نال کایا پلٹ جاوے یاں انقلاب آ جاوے۔ لوک جذباتی ہو جاندے نیں جنون دا اظہار کردے نیں پر ایہ وقتی ابالاں توں ودھ نہیں۔ حالیہ دناں سیلاب نے کیہ کیہ تباہی مچائی’ بربادی کیتی’ پانی مکاناں تے رُکھاں توں اُچا ہو کے ہر چیز نوں دھوڑ وانگوں اڑا کے لے گیا پر لہہ گیا اوہدا بہائو مستقل نہیں رہیا۔ ایہو صورتحال ساڈی جذباتی قوم دی اے۔ فطرتاً اسیں مقابلہ گریز قوم آں۔ ایس خطے تے بیرونی حملہ آور آسانی نال تسلط حاصل کردے رہے جے مقابلہ کسے نے کیتا تے اوہ راجہ پورس سی جت اوہ وی نہ سکیا پر لڑیا تے ضرور سی۔ باقیاں نے بناں لڑے اپنے آپ نوں بیرونی قذاقاں دے رحم و کرم تے چھڈ دتا سی۔
اسیں لوک بنیادی طور تے تے عمومی طور تے تماشائی آں۔ اج وی تماشا ویکھ رہے آں’ کدی اک لیڈر دے تھیٹر وچ چلے جانے آں کدی دوجے لیڈر دے سرکس وچ بیٹھے ہونے آں پر ہاں گنتی تے گل ہو سکدی اے اج عمران خان دی پذیرائی عروج اُتے اے۔ تماشائیاں دی موجودگی دا جادو سر چڑھ کے بول رہیا اے۔ جہنوں جذبہ و جنون داناں دیندے ہوئے امید کیتی جا رہی اے کہ قوم عمران دے پچھے چل پئی اے۔ انج اج دے معروضی حالات وچ الیکشن ہو جان تے عمران دی جت یقینی اے۔ اج حکمران تے طاقت دا مرکز ایسے لئی انتخاب توں راہ فرار اختیار کر رہے نیں اوہناں نوں چنگی طرح پتہ اے کہ عمران خان کتھے اے۔ اوہدی مقبولیت کنی اے تے ایہ آپ کنے پانی وچ نیں۔ ساریاں نوں اندازہ اے جدوں وی الیکشن ہوئے ے کون تے کنی اکثریت نال حکومت وچ آوے گا۔ ایس لئی عمران خان دے حوالے ہن پاکستان کرن دی تیاری کیتی جا رہی اے کہ اوہ سر پٹدا رہ جاوے۔ قرض کتھوں دا کتھے اپڑ گیا۔ 11سو ارب دے کیس ختم کر دتے گئے۔ سیلاب دی تباہ کاریاں وچ 50 ارب ڈالر دا نقصان ہویا۔ 17 لکھ گھر مٹی دا ڈھیر بن گئے۔ پنج کروڑ لوکاں نوں چھت تے خوراک دے نال نال اپنے اپنے کاروبار بنان دی وی ضرورت اے۔ آئی ایم ایف نے چھ ورھیاں وچ صرف چھ ارب ڈالر دتے نیں۔ ورھے وچ سوا ارب ڈالر توں وی گھٹ۔ عمران دا تکیہ اوورسیز پاکستانیاں تے رہیا اے۔ تن ٹیلی تھون وچ 15 ارب روپیے اکٹھے ہوئے۔ سیلاب نال نقصان پنجاہ ارب ڈالر ہویا۔ اوورسیز پاکستانی ایس نقصان نوں پورا نہیں کر سکدے معیشت جتھے اے اوتھے سٹیبل ہو جاوے تے ایہنوں سانبھنا کسے حد تک ممکن ہووے گا پر جدو ںایہ سوچ ہووے کہ ایہنوں تحت السری تک لے جانا اے تے جو اوہدی حالت ہووے گی اوہ واضح اے۔ اوورسیز پاکستانی وی اک حد تک مدد کر سکدے نیں۔ اوہ اپنے کاروبار’ دکاناں تے جائیداد ویچ کے تے عمران خان تے نچھاور نہیں کرن گے؟ جے ویچ دین فیر وی جو نقصان تے گھاٹا اے اوہ پورا نہیں ہو سکدا۔ عمران خان نے پہلے معیشت سنبھالی سی اوہناں نوں ایس دوران تجربہ وی نہیں۔ کرونا نال جس طرح نبڑیا اوہدے تے پوری دنیا توں پذیرائی ملی۔ جے عمران خان حکومت وچ آ کے معاملات نوں سنبھال لیندے نیں تے اوہ جدید دور دے رابن ہڈ تے ٹارزن ہون گے۔
دوستو! ایہ اک کڑوا سچ اے کہ آزادی دی تقسیم توں پہلاں تے بعد وچ وی ایس خطے نوں بیرونی طالع آزما تے لشکرکشی کرن والیاں نے اپنا تختہ مشق بنائی رکھیا۔ جنہے جدوں چاہیا ایس خطے نوں اپنی گزرگاہ بنایا تے ایہدے لوک بے بسی نال ایہ سارا اپنی اکھاں دے سامنے ویکھدے رہے۔ ایہ کہنا شاید ٹھیک ہووے گا کہ ایس خطے وچ مزاحمت تے انقلاب صدیاں بعد جنم لیندا اے تے ایہ وی حقیقت اے کہ ایس خطے نے دلابھٹی’ رائے احمد خاں کھرل’ ملنگی’ نظام لوہار تے بھگت سنگھ ورگے مزاحمتی ہیرو وی پیدا کیتے نیں۔ پر ایہ وی کڑوا سچ اے ایسے خطے نے سینکڑوں غدار قوم تے غدار وطن پیدا کیتے نیں پر ہن ایہ دھرتی کسے خاموش آتش فشاں وانگوں کئی عشریاں توں سلگ رہی اے پر ایہدے چوں انقلاب نہیں پھٹ رہیا۔ پر ہن عمران خان دی جدوجہد’ عزم تے ولولہ ویکھ کے اندازہ لایا جا سکدا اے کہ دھرتی دے سینے تے جوالامکھی پھٹن والا اے ایہ کسے انقلاب دا ثبوت ہوندا اے۔
دوستو! حکومت بھاویں چاہے یاں نہ چاہے تے عمران خان دے نال کوئی کھڑا ہووے یاں چھڈ جاوے پر میریاں نظراں ایہ ویکھ رہیاں نیں کہ ہن انقلاب دا راہ روکنا شاید عمران خان لئی وی مشکل ہووے گا تے اگلے دس ورھے سیلاب تے قدرتی آفت نال متاثرہ پاکستان نوں فیر توں بنان وچ لگ جان گے۔ ایس لئی عمران خان یاں کسے ہور توں لمی لمی توقعات تے خواب اکھاں تے سجا لینا خودفریبی دے مترادف ہووے گا پر ایہ وی اک روشن حقیقت اے کہ بناں خواباں تے عزم دے اگے نہیں ودھیا جا سکدا۔ ایہدے لئی پوری قوم نوں اکمٹھ ہو کے انقلاب دی صدا دین والے ایس عمران خان دا ساتھ دینا ہووے گا۔ شاید ایہ عمران خان ای ہووے گا جو ساڈا رابن ہڈ’ راجاپورس تے رائے احمد خاں کھرل بن سکے؟۔٭٭