وزیراعظم دا جنرل اسمبلی نال خطاب

Rabia Rehman

وزیراعظم شہباز شریف نے 23ستمبر نوں اقوام متحدہ دی جنرل اسمبلی دے 77ویں سالانہ اجلاس نال خطاب کیتا۔ اقوام متحدہ دی جنرل اسمبلی اقوام عالم دا سب توں وڈا فورم اے تے دنیا دا ہر ملک ایہدا کارکن اے۔ جنرل اسمبلی دا سالانہ اجلاس ہر سال ستمبر دے مہینے وچ ہوندا اے جہدے وچ رکن ملکاں دے سربراہان یا اوہناں دے نمائندے رلت کردے نیں۔ پچھلے تن سال دے دوران کورونا دی وبا دی وجہ نال جنرل اسمبلی دے اجلاس کیمرہ دے ذریعے منعقد کیتے گئے جہناں نال مختلف سربراہان نے خطاب وی ویڈیو لنک دے ذریعے ای کیتا۔ ایس وجہ نال ایس سال دا اجلاس ایس لئی وی اہمیت دا حامل سی کہ ایہہ تن سال مگروں اپنی اصلی حالت وچ ہو رہیا
اے۔ اج دنیا نوں بہت سارے چیلنجاں دا سامنا اے تے ہر ملک دا اوہناں بارے اپنا نقطہ نظر اے۔ روس تے یوکرائن دی جنگ نے وی حالات نوں یکسر بدرل دتا اے تے اوہدے اثرات ہن دنیا محسوس کر رہی اے۔ایسے طرحاں موسمی تبدیلی نے وی دنیا نوں جھنجھوڑ کے رکھ دتا اے تے ہن اوہنوں اک حقیقی مسئلے دے طور تے ویکھیا جا رہیا اے۔ ایسے طرحاں اقوام متحدہ دے ایجنڈے اتے موجود کشمیر تے فلسطین جئے دہائیاں پرانے تنازعے وی اجے تک حل طلب نیں۔ ایہناں سارے حالات وچ تے بالخصوص پاکستان وچ سیلاب دی تباہ کاریاں پاروں رونما ہون والے انسانی المیے دے تناظر وچ وزیراعظم پاکستان دا جنرل اسمبلی دے ایس اہم سالانہ اجلاس نال خطاب بہت اہمیت دا حامل سمجھیا جا رہیا سی تے ہر کوئی ایس خطاب دا منتظر سی۔ اپنے 28منٹ دے خطاب وچ وزیراعظم نے پاکستان تے دنیا نوں درپیش مسائل تے خطرات دا بھرواں انداز وچ احاطہ کیتا۔ اوہناں دے خطاب دا سب توں بنیادی تے مرکزی نقطہ موسمیاتی تبدیلیاں دے
نتیجے وچ پاکستان وچ آن والے تباہ کن سیلاب بارے سی۔ وزیراعظم نے ایس سلسلہ وچ پاکستان دا مقدمہ دنیا دے سامنے بھرواں تے موثر انداز وچ پیش کیتا۔ اوہناں دا کہنا سی کہ گرین ہائوس گیسز دے اخراج وچ پاکستان دا حصہ 10فیصد توں وی گھٹ اے مگر اوہناں دا نشانہ اج اسیں بن رہے آں۔ ساڈے نال جو رہیا اے اوہدی وجوہات وچ ساڈا کوئی کردار نہیں۔ اج جے اسیں آں تے کل کوئی ہور وی ہو سکدا اے تے انج ہووے گا۔ مسئلہ کشمیر جو پچھلے ست دہائیاں توں اقوام متحدہ تے سلامتی کونسل دے ایجنڈے اتے موجود اے تے سلامتی کونسل دی قرارداداں دے باوجود اجے تک حل نہیں ہویا۔ ہندوستان دی ہٹ دھرمی ایس مسئلے دے حل لئی سب توں وڈی رکاوٹ اے۔ اگست 2019 وچ ہندوستان نے مقبوضہ کشمیر دی مسلمہ حیثیت نوں تبدیل کردتا جو اقوام متحدہ دی سلامتی کونسل دی قرارداد دی صریحاً خلاف ورزی اے۔ ایہدے علاوہ ہندوستان دی حکومت مقبوضہ کشمیر وچ آبادی دے تناسب نوں تبدیل کرن دی کوشش کر رہیا اے تاں جے مسلمان اکثریت تے ہندو اقلیت دا غلبہ یقینی بنایا جا سکے۔ وزیراعظم نے دو ٹوک لفظاں وچ پاکستان دے موقف دا اعادہ کیتا کہ جدوں تک کشمیر دا مسئلہ اقوام متحدہ دی قرارداداں تے کشمیری عوام دی آزادانہ رائے دے مطابق حل نہیں ہوندا اوس ویلے تک جنوبی ایشیا وچ پائیدار امن قائم نہیں ہو سکدا۔ اوہناں نے واضح طور تے دنیا نوں باور کرایا کہ پاکستان برابری دی بنیاد تے ہندوستان نال چنگے تعلقات چاہندا اے مگر ہندوستان دے توسیع پسندانہ تے انتہا پسندانہ عزائم ایہدی راہ وچ سب توں وڈی رکاوٹ نیں۔ اوہناں نے ہندوستان وچ انتہا پسندی دے ودھدے رجحان تے مسلم اقلیت دے نال روا رکھی جان والے ناروا سلوک اتے وی دنیا دی توجہ دوائی۔ مشرق وسطیٰ وچ جاری کشیدگی تے دہائیاں توں حل طلب فلسطین اسرائیل تنازعے اتے وی وزیراعظم نے کھل کے اظہار خیال کیتا تے پاکستان دے اصولی موقف دا بھرواں اعادہ کیتا کہ جدوں تک اک آزاد فلسطینی ریاست دا قیام عمل وچ نہیں آندا جہدا دارالحکومت القدس الشریف ہووے اوس ویلے تک مشرق وسطیٰ وچ امن قائم نہیں ہو سکدا تے ایہہ تنازعہ انتہا پسندی جئے رجحانات نوں فروغ دیندا رہوے گا۔ لہٰذا عالمی برادری ایس صورتحال دا نوٹس لووے تے اپنی ذمہ داریاں دا احساس کردے ہوئے اسرائیل نوں مجبور کرے کہ اوہ سلامتی کونسل دی قرارداداں اتے عمل کرے۔ مقبوضہ فلسطین وچ عورتاں’ بچیاں تے نہتے شہریاں دے خلاف اسرائیلی فوج
دے جاری ظلماں دا وی ذکر کیتا تے بھرواں مذمت کیتی۔ وزیراعظم نے یمن تے شام دی جنگ دا وی ذکر کیتا تے ایہناں تنازعیاں دے پرامن حل اتے زور دتا۔ افغانستان دے مسئلے دا ذکر کردے ہوئے وزیراعظم شہباز شریف نے عالمی برادری اتے زور دتا کہ اوہ افغان حکومت دی مدد کرے تاں جے افغانستان دے عوام نوں درپیش بے انتہا مسائل دا خاتمہ ہو سکے۔ افغانستان دے منجمد شدہ اکائونٹ بحال کیتے جان تاں جے اوتھے دی معیشت اپنے پیراں اتے کھلو سکے۔ افغانستان پاکستان دا ہمسایہ اے جہدی وجہ نال اوتھے دے اندرونی حالات دا پاکستان اتے براہ راست اثر پیندا اے۔ وزیراعظم نے اسلاموفوبیا جئے اہم مسئلے اتے وی اپنی رائے دا اظہار کیتا کہ دنیا مسلماناں نوں شدت پسند نہ سمجھے کیوں جے اسلام تے امن تے سلامتی دا سبق دیندا اے۔ ایہہ اک اہم مسئلہ اے جہنوں سمجھن تے مل بیٹھ کے حل کرن دی لوڑ اے۔ایسے طرحاں ات گردی دے خلاف جنگ تے اوہدے اثرات دا ذکر کردے ہوئے وزیراعظم نے پاکستان دی لازوال کوششاں تے قربانیاں دا ذکر کتیا تے دنیا نوں باورکرایا کہ جے دنیا نے ایس جنگ وچ کامیابی حاصل کیتی اے تے ایہہ پاکستان دی فوج تے عوام دی عظیم قربانیاں پاروں ای ممکن ہویا اے۔ وزیراعظم شہباز شریف دا اقوام متحدہ دی جنرل اسمبلی دے اہم سالانہ اجلاس نال خطاب بہت اہمیت دا حامل سی۔ اوہناں نے پاکستان دی خارجہ پالیسی دے اہم تے بنیادی اصولاں دے چانن وچ دنیا دے سامنے اپنے ملک دا نقطہ نظر اک مدلل تے پرجوش انداز وچ پیش کیتا۔ بالخصوص سیلاب دی تباہ کاریاں بارے اوہ دنیا نوں ایہہ باور کران وچ کافی حد تک کامیاب رہے نیں کہ ایہہ کنا سنگین مسئلہ اے جہدے اسیں قطعی ذمہ دار نہیں مگر نشانہ بنے آں لہٰذا دنیا سانوں بحالی نو وچ بھرواں مدد کرے۔ ایس خطاب نوں دنیا وچ سراہیا جا رہیا اے تے وزیراعظم اپنے حالیہ دوریاں’ اہم عالمی رہنماواں نال ملاقاں تے نقطہ نظر دی موثر انداز وچ بیانی دی وجہ نال صحیح معنیاں وچ اک سٹیٹس مین دے طور تے ابھر کے سامنے آئے نیں جہناں نوں دنیا وچ بھرواں پذیرائی ملی اے جہدا فیدہ یقینی طور تے پاکستان نوں ہووے گا۔

اپنا تبصرہ گھلو