کامران افضل دے تبادلے مگروںپنجاب دی بیوروکریسی وچ اکھاڑ پچھاڑ

Faisl Adress But

پچھلے چیف سیکرٹری ڈاکٹر کامران افضل دی رخصتی مگروں اوہناں دے پسندیدہ افسراں نوں پرکشش عہدیاں توں ہٹایا جا رہیا اے۔ جدوں تک کامران افضل موجود سن اوہدوں تک پنجاب دے افسر تذبذب دا شکار سن۔ ڈاکٹر کامران افضل دے قول و فعل وچ واضح تضاد سی۔ سفارشی کلچر دے خلاف سن مگر خود ملک دی اک طاقتور شخصیت دے قریبی عزیز دی سفارش تے بطور چیف سیکرٹری پنجاب تعینات ہوئے سن۔ ایس کاوش دے عوض پنجاب وچ ای ایس شخصیت نوں اوٹ آف دی وے پوسٹیڈ وی کروایا۔ شہریار سلطان جہناں دی بیورو کریسی دے حلقیاں وچ چنگی شہرت نہیں سمجھی جاندی اوہناں نوں پنجاب وچ اہم ترین عہدیاں اتے لاندے رہے۔ علی سرفراز نوں کجھ دناں وچ داخلہ چیئرمین پی اینڈ ڈی زراعت جئی وڈی سیٹاں اتے بدلدے رہے۔ زاہد زمان نوں سینئر ممبر بورڈ آف ریونیو لایا۔ صائمہ سعید نوں سیکرٹری ایکسائز لایا۔ اپنی منشا دے خلاف لگن والے سیکرٹری سروسز مسعود مختار اتے اپنے آفس دی غلطی پا کے چلدا کیتا تے اپنے منظور نظر سیکرٹری آئی اینڈ سی نوں سیکرٹری سروسز تعینات کیتا۔ اصل وچ اوہ وزیراعلیٰ پنجاب چودھری پرویزالٰہی دے خلاف ڈھنڈورا تے پیٹدے رہے کہ اوہ اپنے نااہل تے کرپٹ افسراں نوں میرے ذریعے پوسٹیڈ کروانا چاہندے نیں مگر ایس آڑ وچ اوہ اپنے منظور نظر نااہل افسران نوں نوازدے رہے۔چودھری پرویزالٰہی دا اعلیٰ ظرف سی کہ اوہ پنجاب اسمبلی واقع مگروں وی ڈاکٹر صاحب نال کسی قسم دی رنجش نہ رکھے ہوئے سن۔ ڈاکٹر کامران افضل دے جان مگروں عبداللہ سنبل دی تعیناتی توں پنجاب بیورو کریسی وچ سکون دی فضا قائم ہو گئی اے۔ بیورو کریسی تے حکومت وچ احسن تے آئیڈیل ورکنگ ریلیشن شپ وی نظر آن لگی اے۔ عبداللہ سنبل غیر متنازعہ غیر جانبدار تے پروفیشنل افسر نیں۔ ندیم سرور نوں ڈی جی اینٹی کرپشن تعینات کیتا گیا اے۔ ندیم سرور انتہائی قابل افسر نیں۔ اوہ وی ڈاکٹر کامران افضل دے تعصب دی بھینٹ چڑھے سن کیوں جے اوہناں دا قصور ایہہ سی کہ اوہ پی اے ایس گروپ نال نہ تے تعلق رکھدے سن بلکہ ڈاکٹر کامران افضل دے خوشامدیاں وچوں وی نہیں سن۔ اسٹیبلشمنٹ ڈویژن نے سی سی پی او لہور غلام محمود ڈوگر دا تبادلہ کر کے امن ول پنجاب توں اک واری فیر شرارت کرن دی کوشش کیتی اے کہ اوہ چیف سیکرٹری وزیراعلیٰ لڑائی دے ڈراپ سین مگروں وزیراعلیٰ آئی جی پنجاب لڑائی کروان دی کوشش کیتی اے مگر وزیراعلیٰ پرویزالٰہی نے اپنی اخلاقیات رواداری توں آئی جی پولیس فیصل شاہکار نوں اپنی شفقت دا یقین دوایا اے تے وفاق دی ایس سازش نوں نکام بنا دتا اے۔ فیصل شاہکار وی سلجھے ہوئے افسر تے صلح جو شخصیت دے مالک نیں ایس لئی اسٹیبلشمنٹ دی ایہہ سازش وی نکام ہووے گی۔ سی سی پی او لہور اک اعلیٰ کمانڈر دے طور تے جانے جاندے نیں۔ ایس واری اوہناں نے وی اپنے باس فیصل شاہکار نال الجھن دے بجائے چنگے طریقے نال مسئلے نوں حل کیتا اے۔ چودھری پرویزالٰہی نے اوہناں نوں جھپی مار کے شاباش دتی اے جہدے غلام محمود ڈوگر مستحق وی سن۔ غلام محمود ڈوگر اپنی قابلیت تے تجربہ کاری پاروں تعیناتیاں لیندے آئے نیں اوہناں دی ایمانداری’ رواداری’ اخلاقیات ہمیشہ اوہناں دی پوسٹاں وچ آڑے ائے نیں۔ ایس واری وی اوہ کسی غیر قنونی غیر آئینی فعل وچ ملوث نہیں۔ اوہناں اتے الزام اے کہ طاقتور تے قنون دے مطابق عملدرآمد کیوں کروایا۔ میں سمجھنا واں کہ وزیراعظم میاں شہباز شریف نوں ایسے افسراں دی قدر کرنی چاہیدی اے تے اوہناں دے خلاف متحرک وفاقی مشینری نوں شٹ اپ کال دینی چاہیدی اے تاں جے ہور افسراں لئی وی غلام محمود ڈوگر دا اقدام طاقتور تے بے سہارا لئی یکساں قنون مشعل راہ ہووے۔ پچھلے دور وچ جہنی تیزی نال تقرر تے تبادلے ہوئے اوہدے وچ کئی بے سہارا افسراں دی وی چاندی ہو گئی مگر کئی افسر ایس بہتی گنگا وچ وی ہتھ دھون توں محروم رہے۔اصل وچ بیورو کریسی دے پیس تے پی بیمایس پی تے پی سی ایس گروپ وچ وی گروپنگ ہوندی اے جہدی مثال میرے اک دوست بیوروکریٹ جہناں دا تعلق پی اے ایس گروپ نال تے ہے مگر اپنی بے پناہ قابلیت تے ٹیلنٹ دے باوجود اپنے ای ساتھیاں دے عناد دا شکار نیں کیوں جے اوہ وی میرے وانگوں خوشامد جئے بیش قدر ہیرے توں ناآشنا نیں ایس لئی اج کل بہی کسی غیر معروف نیم مردہ توں محکمے دے ایم ڈی لگے ہوئے نیں۔ اوس دوست جہناں دا نام شان الحق اے تے میری اوہناں نال کوئی روبرو ملاقات نہیں اے نہ ای مواصلاتی رابطہ اے۔ میرے انتہائی قریبی دوست ڈاکٹر فیصل ظہور اوہناں دے فین نیں۔ اوہ مینوں اوہناں دے خیالات توں آگاہ کردے نیں تے میں اوہناں دے خیالات توں متفق ہون تے اپنے کالم دی زینت بنا لینا واں۔ ای واری شان الحق دا تجزیہ بیورو کریسی بارے انتہائی دلچسپ اے۔ اوہ کہندے نیں عام طور تے بیوروکریسی دے دو دھڑیاں وچ مستقل جنگ جاری رہندی اے یا گھٹ توں گھٹ ایسی مسلسل جنگ دا تاثر دتا جاندا اے۔ لوک اوہنوں پی اے ایس تے پی ایم ایس وچ جنگ سمجھدے نیں جد کہ حقائق ایہدے بالکل برعکس نیں۔ پی ایم ایس تے پی اے ایس وچ دو دھڑے پائے جاندے نیں۔ ایہناں دھڑیاں دے ماخذ مقصد تے معیار نوں آسانی نال جے سمجھنا اے تے تسیں ایہنوں پی اے ایس (برہمن) تے پی اے ایس(شودر) سمجھ لوو۔ ایسے طرح پی ایم ایس وچ وی برہمن تے شودر دھڑے نیں۔ ہن برہمناں نے تے ہمیشہ اتے ای رہنا اے تے سب توں اتے پی اے ایس (برہمن) تے اوہدے مگروں پی ایم ایس (برہمن) بہت تھلے پی اے ایس تے پی ایم ایس دے شودر دھڑے آندے نیں۔ شودر دھڑیاں لئی دیر وی اے تے انھیر وی اے۔ محمد خان بھٹی صاحب دے پرنسپل سیکرٹری لگن نال شودر دھڑیاں وچ خوشی تے اطمینان دا اظہار کیتا گیا اے۔ شودراں دا کہنا اے کہ ایہہ پوسٹ تے ویسے وی برہمناں لئی مختص سی۔ شودراں نوں تے کدی ملنی وی نہیں سی۔خوشی ایس گل دی اے کہ برہمناں دے ہتھوں وی گئی کیوں جے جہڑی پوسٹ اتے میں جانا نہیں اوس پوسٹ دے چلے جان دا غم میں کیوں مناواں۔ اک شودر افسر نے ایہہ وی آکھیا کہ تسیں ماضی وچ جھانک کے ویکھو۔ جدوں جدوں پی اے ایس تے پی ایم ایس وچ جنگ دے کسی رائونڈ دا اختتام ہویا اے تے اوہدے مگروں دونویں سروسز دے برہمناں نوں نوازیا گیا اے تے اوہناں نوں چنگی پوسٹنگاں ملیاں نیں۔ شودر ہمیشہ تکدے رہ گئے۔ اوہناں نوں دونویں سروسز دے برہمن استعمال کردے رہے نیں۔

اپنا تبصرہ گھلو