وزیراعظم دا خطاب تے عالمی تنازعے

asad ullah ghalib pic

وزیراعظم شہباز شریف نے اقوام متحدہ دی جنرل اسمبلی نال اپنے خطاب دے دوران اک مدبر لیڈر دا کردار ادا کیتا۔ اوہناں دی تقریر توں واضح ہوندا اے کہ اوہناں دی نظراں ماضی دے ورقیاں اتے وی رہیاں نیں تے مستقبل دی نقشہ گری تے اوی اوہناں دی ڈونگی نظر اے۔ اوہناں نے وڈی طاقتاں دی اکھاں وچ اکھاں پاندے ہوئے آکھیا کہ دنیا اج 21ویں صدی وچ داخل ہو چکی اے۔ ایس صدی نوں شروع ہوئے ربع صدی دا عرصہ ہون والا اے۔ کیہ ای چنگا ہووے کہ اسیں پچھلی صدی دی سر جنگاں توں چھٹکارا حاصل کر لیے تے اج دے جدید چیلنجاں دا مقابلہ کرن دی تیاری پھڑیے۔ وزیراعظم نے اپنے خطاب وچ ثابت کیتا کہ اوہ صرف ملک دا دکھڑا سنان لئی جنرل اسمبلی وچ نہیں آئے بلکہ اوہ عالمی تنازعات دا منظر و پس منظر وی جاندے نیں تے اوہناں دا حل
وی تجویز کر سکدے نیں۔ اوہناں نے مطالبہ کیتا کہ یمن تے شام دے تنازعات دا حل پرامن طور تے تلاش کیتا جاوے۔دونویں ملک بیرونی مداخلت دا شکار نیں۔ شام اتے تے عالمی طاقتاں کئی سالاں توں وحشیانہ بمباری کر رہیاں نیں اوہناں دا مقصد صرف اک اے کہ صدر بشارالاسد دی حکومت نوں ختم کیتا جاوے۔ یمن وچ بیرونی مداخلت نوں سعودی عرب اپنے لئی خطرہ سمجھدا اے ایس لئی اوہنے اپنے دفاع لئی علاقائی فورس منظم کر لیتی اے۔ دوجے پاسے شام نوں بیٹھے بٹھائے امریکہ نے اپنی عسکری یلغار دا نشانہ بنا لیتا اے تے اوہدی دیکھا دیکھی نیٹو ملکاں دی ائیر فورس شام نوں راکھ بنان اتے تلی ہوئی اے۔ شام دے اندر باقاعدہ جہادی گروپ گھس آئے نیں جہناں دی عسکری تے مالی امداد دی منظوری امریکی کانگریس ولوں دتی جاندی اے۔
ظاہر اے کہ کسی اتے بیرونی یلغار نوں پسندیدہ نظراں نال نہیں ویکھیا جا سکدا ایسے لئی وزیراعظم شہباز شریف نے نہایت مختصر الفاظ تے بلیغ انداز وچ ایہہ تجویز پیش کیتی کہ ایہناں مسئلیاں نوں طاقت دے زور تے نہیں بلکہ پرامن طور تے حل کیتا جانا چاہیدا اے۔
اصل وچ اک سپر پاور طاقت دے زور تے نیو ورلڈ آرڈر مسلط کرنا چاہندی اے۔ اوہدا مقصد ایہہ اے کہ دنیا اتے اوہدا حکم چلے تے کسی نوں اوہدے اگے چوں چاں کرن دی ہمت نہ ہووے۔ امریکہ نے پچھلے کجھ عشریاں وچ دنیائے عرب نوں پامال کر دتا اے۔ اوہنے افریقہ نوں وی نہیں بخشیا۔ صومالیہ’ سوڈان’ لیبیا’ تیونس’ عراق’ مصر’ لبنان تے شام تک اپنی مداخلت دا دائرہ پھیلا دتا۔ لیبیا وچ حکومت دی تبدیلی لئی نیٹو ملکاں دے جنگی طیاریاں نے رعونت تے فرعونیت دا مظاہرہ کردے ہوئے مرد آہن کرنل قذافی نوں اک میزائل دے ذریعے قیمہ بنا دتا۔ عراق وچ تے امریکہ نے خونی ڈرامہ کھیڈیا۔ ایس فوج کشی اتے امریکی عوام نے وی اپنی مخالفت دا مظاہرہ کیتا۔ یورپ دے لوک وی کروڑاں دی تعداد وچ سڑکاں اتے نکلے مگر امریکہ نے کسی دی اک نہ سنی تے عراق دی اٹ نال اٹ وجا دتی۔ اوہنوں اوہدوں تک چین نہ آیا جدوں تک اوہنے عراقی صدر صدام حسین نوں پھائے نہ لا دتا۔ دوجے عرب ملکاں وچ امریکہ نے پس پردہ رہ کے مداخلت کیتی تے اوہنوں عرب بہار دی تحریک دا نام دتا۔ عرب بہار دی تحریک دے جوش وچ مصری عوام نے اپنے صدر حسنی مبارک نوں معزول کر کے اک پنجرے وچ بند کردتا۔ مصری عوام نے حسنی مبارک دی تھاں اخون المسلمون نال تعلق رکھن والے صدر ڈاکٹر مرسی دا انتخاب کیتا مگر امریکہ نوں اخوان المسلمین دا اقتدار راس نہ آیا تے انج مصری فوج نے صدر ڈاکٹر مرسی دا تختہ الٹ کے مارشل لا نافذ کردتا۔
دراصل نیو ورلڈ آرڈر نو آبادیاتی نظام دی اک نویں شکل دا نام اے۔ اک زمانہ سی کہ برطانیہ’ فرانس’ ہالینڈ’ پرتگال تے سپین نے دنیا اتے اپنا اپنا نوآبادیاتی نظام رائج کیتا۔ ایس جبر دے خلاف دنیا دے مظلوم تے غلام ملک اٹھ کھڑے ہوئے تے نوآبادیاتی نظام دی زنجیراں ٹٹدی چلی گئیاں۔ ایہدے مگروں دنیا وچ دو عالمی طاقتاں دی باہمی کشمکش شروع ہو گئی۔ اک پاسے سوویت یونین’ دوجے پاسے امریکہ۔ سوویت یونین افغانستان وچ پھس کے پامال ہو گیا تے ہن دنیائے حاضر وچ یونائٹیڈ سٹیٹس آف امریکہ دا طوطی بولدا اے۔ 20ویں صدی
دا انجام ایس طرح ہویا کہ دنیا وچ ہر پاسے امریکی نقارہ وج رہیا سی۔ امریکی جبر دے ایس رویے دے الائو وچ 21ویں صدی نے اکھ کھولی۔ پچھلے دو عشریاں وچ ات گردی دے لفظ سن سن کے دنیا دے لوکاں دے کن پک گئے نیں۔ اج تیجی دنیا دے عوام بھک’ جہالت’ افلاس’ بیماریاں دا شکار نیں۔تاہم سوشل میڈیا نے ساری جغرافیائی حدود سٹ دتیاں نیں۔ لوک اپنے حقوق اتے کسی نوں ڈاکہ پان دی اجازت دین دے موڈ وچ نہیں نظر آ رہے۔ایہو اوہ تبدیلی اے جہدے ول وزیراعظم شہباز شریف نے اپنے خطاب وچ اشارہ کردے ہوئے آکھیا کہ سانوں 20ویں صدی دے ورثے نوں بھل کے 21ویں صدی دے جدید تقاضیاں نوں سمجھن دی کوشش کرنا ہووے گی۔ سانوں پرانی الجھناں توں چھٹکارا پانا چاہیدا اے۔ نویں نویں مسئلیاں نوں سلجھان لئی ساری کوششاں صرف کردینی چاہیدیاں نیں۔
وزیراعظم شہباز شریف نے فلسطین دے قضیے دا وی ذکر کیتا تے اوہدے پرامن حل لئی زور دتا۔ اوہناں نے مطالبہ کیتا کہ 1967 دی سرحداں دے مطابق فلسطین دی آزاد ریاست قائم کیتی جاوے۔ جہدا دارالحکومت القدس شریف ہووے۔ وزیراعظم شہباز شریف نے عالمی معاملات اتے جیویں تبصرہ کیتا اوہدے توں ظاہر ہوندا اے کہ اوہ غلامانہ ذہنیت توں چھٹکارا چاہندے نیں تے دنیا وچ بہرصورت آزادی دی لہر بارآور ہوندی ویکھنا چاہندے نیں۔
اسلامو فوبیا دا مرض دنیا نوں نواں نواں لاحق اے۔ کدی نعوذ باللہ قرآن پاک نوں ساڑن دی جسارت کیتی جا سکدی اے۔ کدی رسول مقبولۖ دے توہین آمیز خاکے نعوذ باللہ شائع کیتے جاندے نیں۔ کدی مسلم اقلیتاں اتے ظلم ڈھائے جاندے نیں۔ حجاب دے خلاف اک نفرت پھیلائی جا رہی اے۔ بھارت وچ 30کروڑ مسلماناں نوں اذیت دین لئی ہرحربہ استعمال کیتا جاندا اے۔ وزیراعظم نے اپنے خطاب وچ اسلاموفوبیا دے ایس مذموم رجحان دی بھرواں مذمت کیتی تے مسلماناں دے مقدس شعائر دا احترام کرن تے پزور مطالبہ کیتا۔ اوہناں نے عالمی رہنماواں نوں یاد دوایا کہ اقوام متحدہ متفقہ طور تے 15مارچ دا دن اسلاموفوبیا دے خلاف منان دی قرارداد منظورکر چکیا اے۔ وزیراعظم دا ایہہ مدلل’ فکر انگیز خطاب پاکستان دے ملکی مسائل توں لے کے عالمی معاملات تک پرمحیط اے۔ایہہ خطاب دراصل اک مدبر لیڈر دے شایان شان اے۔

اپنا تبصرہ گھلو