کولے ورگی کان دی زندگی

محمد ذکریا

80ورھے دے خالد حسین دے ہتھ کم کردے ہوئے کنبدے نیں پر اوہ فیر وی زندہ رہن لئی کم کرن تے مجبور اے خالدحسین چالھی ورھیاں توں لون دی کان وچ کم کردا رہیا اے ہن ایس تسلسل نوں اوہدے پتر جاری رکھے ہوئے نیں جدوں کان وچ مزدوری ملن دا کم اوہدے بڑھاپے دی وجہ نال اوہدی پہنچ توں دور ہو گیا تے اوہنے اپنا تے اپنے بچیاں دا ڈھڈ بھرن لئی کان دے مزدوراں لئی چاء دا ہوٹل بنایا۔ ایہو اوہدا روزگار سی۔ پاکستان منرل ڈویلپمنٹ کارپوریشن توں 26×16 دا پلاٹ کھلی بولی تے حاصل کیتا جہدے وچ تن دکاناں تے اک وڈا ہال سی۔ ڈیڑھ لکھ روپیے ایم ڈی سی نوں ادا کیتے پر اینی وڈی رقم دی ادائیگی دے باوجود ایس ادارے نے اوہدا روزگار کھوہ لیا۔ ایس طرح ایس دردناک حقیقت توں پردہ چاک کیتا کہ غریب جین لئی آخری ساہ تک وی محنت کرے گا تے وی اداریا ںدی بے حسی اوہدی راہ وچ رکاوٹ بنی کھلوتی ہووے گی۔
پنج بچیاں دے ایس باپ نے انصاف لئی انصاف دے ہر دعویدار دا بوہا کھڑکایا اے پر انصاف سراب ثابت ہویا ایہ کہانی اک خالد حسین دی نہیں تے نہ ای ظلمت دی داستان صرف ایناں دل دکھاندی اے ایہدے توں ہور گل وی روح نوں چھیڑ جاندی اے کہ لیاقت حسین ولد فرید’ لیاقت حسین ولد حاجی نور محمد’ محمد سلیم ولد محمد ایوب’ خلیق ولد حاجی رفیق’ محمد حسین ولد نیروز لون دی کان وچ کم کردے ہوئے موت دے منہ وچ ٹر گئے ایہناں دیاں بیویاں نوں نہ تے پنشن ملی نہ بڑھاپا الائونس تے نہ ای حکومتی امداد ایہناں دے دکھاں دا مداوا بن سکی۔ پچھلے دیہاڑے مزدوراں دی اک وڈی گنتی نے احتجاج کیتا۔ ای او بی آئی لئی 15 ورھے چاہیے’ پروڑچھہ لون وچ 40 ورھے توں کم کرن والے مزدوراں دا ای او بی آئی وچ ناں تک درج نہیں۔
کان کناں دے مطابق مائنز اوہناں نوں پین دے پانی توں لے کے رہائش تے طبی سہولتاں وی نہیں ملدیاں’ کان کناں دی انشورنس وی نہیں کیتی جاندی کیوں جے ایس خطے وچ بیروزگاری عام اے۔(جاری)