ابرار ندیم دے پنجابی گیت دل روندا اے دے چرچے

ابرار ندیم دی شخصیت دی کئی جہتاں نیں۔ اوہ شاعر نیں’ کالم نگار دے طور تے اپنی منفرد پہچان رکھدے نیں تے ریڈیو پاکستان نال بطور سینئر پروڈیوسر جڑے نیں۔ لوک شاعری وی مگر اوہناں دا اک اہم ادبی حوالہ اے۔ اوہناں دے لکھے گیت سماعتاں وچ ایسا رس گھولدے نیں کہ انسان بے اختیار جھومن لگدا اے۔ شاعری ابرار ندیم دا اولین حوالہ اے تے لوک گیت لکھ کے اوہناں نے اپنی اک ہور ادبی جہت دا اظہار کیتا اے۔ اوہناں دے لکھے پنجابی زبان دے گیت ”دل روندا اے” نے کجھ ای عرصہ وچ شہرت دی نویں بلندیاں نوں چھو لیا اے۔ ایس گیت نے سماجی میڈیا اتے تریخ ساز شہرت حاصل کیتی اے تے مقبولیت دے ساری ریکارڈ توڑ دتے نیں۔ ایہہ گیت پنجاب دے اک چھوٹے جئے قصبے چشتیاں دے ابھردے ہوئے نوجوان گلوکار رمضان جانی نے گایا اے جہدی مدھر آواز تے زبردست دھن نے اوہناں دے کجھ دناں وچ ہر پاسے چرچے کر دتے نیں۔ پچھلے دو ہفتیاں دے دوران سوشل میڈیا اتے اپ لوڈ ہون مگروں توں ہن تک محض ایس گیت اتے ساڈے پنج لکھ توں ودھ ٹک ٹاک ویڈیوز بن چکیاں نیں جہناں نوں کروڑاں افراد ویکھ چکے نیں۔ پچھلے اک ہفتے دے دوران یوٹیوب اتے میوزک ٹرینڈز وچ وی ایہہ گیت تیجے نمبر تے رہیا۔
منے پرمنے کالم نگار عطاالحق قاسمی دے ایہناں لفظاں توں انکارکرنا ممکن نہیں کہ انسان جے نیک نیت ہووے تے اوہنوں خدا دے نال اپنے ہنر اتے بھروسہ وی ہووے تے اک نہ اک دن اوہنوں اوہدا حق مل ای جاندا اے۔ بھاویںاوہ پبلک ریلیشن دے ہنر توں ناواقف ہووے۔ اوہنوں دنیاداری نہ آندی ہووے تے کسے نفع نقصان دی پروا کیتے بغیر اوہدے دل وچ جو کجھ ہووے اوہو اوہدی زبان اتے وی ہووے۔ عام طور تے ایسا شخص نقصان ای اٹھاندا اے۔ میں اپنی حیاتی وچ ایسے بہت سارے لوک ویکھے نیں جہناں نوں زبردست ہنر ہون دے باوجود بہت گھٹ مقبولیت ملی یا نظر انداز کیتا گیا۔ اوہدی اک مثال پنجابی اردو دا شاعر تے کالم نگار ابرار ندیم وی اے جو صف اول دا شاعر تے کالم نگار اے مگر اوہنوں اپنے ہنر دی اوہ داد یا پہچان نہیں ملی جہدا اوہ مستحق اے۔ میں اک لمے عرصے توں ابرار ندیم نوں جاننا واں’ ایہہ اک چنگا شاعر ادیب ہون دے نال اعلیٰ اخلاقی قدراں دا حامل اک نیک تے مخلص انسان اے۔ کجھ عرصہ پہلاں اوہدی اک پنجابی غزل بہت زیادہ مشہور ہوئی جہنوںساڈے دوست نامور ادیب تے سفر نامہ نگار مستنصر حسین تارڑ نے وی دوستاں دی کسے محفل وچ پڑھیا جہدی ویڈیو سوشل میڈیا اتے بہت زیادہ وائرل ہوئی۔
اتھرو تارا ہوسکدا اے
دکھ دا چارا ہوسکدا اے
اکو واری فرض تے نہیں ناں
عشق دوبارا ہوسکدا اے
لیکن مینوں بوہتی حیرت اوس ویلے ہوئی جدوں اک 20/19 سال دے منڈے رمضان جانی نے ایہدا پنجابی گیت دل روندا اے گایا۔ ابرار اد ایہہ گیت سن کے مینوں انج لگیا جیویں کسے نے اپنا دل کڈ کے کاغذ اتے رکھ دتا ہووے تے رمضان نے اپنی دلکش آواز نال ایہدے وچ جان پا دتی ہووے۔اج کل سوشل میڈیا اتے ہر پاسے ایس گیت دی دھم اے تے ایہنے جس تیز رفتاری نال مقبولیت دے ریکارڈ توڑے نیں اوہدی مثال نہیں ملدی مگر ظلم ایہہ ہے کہ ا یس گیت دے نال اوہدے شاعر ابرار ندیم تے گلوکار رمضان جانی دا نام بہت گھٹ لوکاں نوں پتہ اے۔ پچھلے دو ہفتیاں وچ جدوں دا ایہہ گیت سوشل میڈیا اتے اپ لوڈ ہویا اے ہن تک ایہدے اتے چھ لکھ توںودھ ٹک ٹاک ویڈیوز بن چکیاں نیں جہنوں کروڑہا افراد ویکھ تے شیئر کر چکے نیں۔ ایہد ے نال فیس بک تے یوٹیوب اتے وی ایس گیت دے خوب چرچے نیں بلکہ پچھلے ہفتے وچ تے یوٹیوب اتے میوزک ٹرینڈنگ وچ ایہہ گیت تیجے نمبر تے رہیا اے۔ جدوں تک تسیں میرا ایہہ کالم پڑھو گے ممکن اے ایس گیت اتے بنن والی ٹاک ٹاک ویڈیوز دی تعداد دس لکھ تک پہنچ جاوے۔ ایہہ گیت تسیں سوشل میڈیا اتے تے سن ای سکدے او لیکن تسیں جے ایہہ گیت پڑھن وچ دلچسپی رکھدے او تے ایہنوں ایتھوں پڑھ لوو۔
دل روندا اے’ کتے دور سمندروں پار کوئی’ جدوں گیت ہجر دے چھو ہندا اے’ دل روندا اے’ دل روندا تے کرلاندا اے۔
سکھ نفل نمازاں، منتاں سو، ترے ملن نوں ہاڑے پاندا اے، جدوں ہولا ہو کے ککھاں توں، چھڈ اپنی راجدھانی نوں، کوئی رانجھا تخت ہزارے دا، پوہ، ماگھ دی ٹھردیاں راتاں چ، کِتے اجڑی پجڑی جوہواں چ،نت، ہیر سیال دے درشن لئی، بن جوگی تھاں تھاں بھوندا اے ،دل روندا اے، دل روندا تے کرلاندا اے۔
لج لاہ کے آل دوا لے دی،کسے بلے وانگ نچاندا اے، کدی ساون مینہ دیاں جھڑیاں چ، ہجراں دیاں لمیاں گھڑیاں چ، کسے یاد دی بکل مار کوئی، دکھی دل دے چھیڑ کے تار کوئی، جدوں کھوہ نیناں دے جوہندا اے، دل روندا اے، دل روندا تے کرلاندا اے ۔
جیویں ہجر دے رنگلے چرخے تے، کوئی لمیاں تنداں پاندا اے ،جدوں وچھڑی کونج قطاراں توں، وکھ ہو کے گوڑیاں یاراں توں، ہن ڈار کِتے کرلاندی اے، جِند ڈکو ڈولے کھاندی اے، کوئی کلاکارا ہجراں چ، جدوں پیڑاں ہار پروندا اے، دل روندا اے، دل روندا تے کرلاندا اے،
فر عشق دی دکھدی دھونی چ، کوئی مچدے بھانبھڑ لاندا اے، کِتے دور سمندروں پار کوئی، جدوں گیت ہجر دے چھوہندا اے ،دل روندااے، دل روندا تے کرلاندا اے۔
میں جدوں ایہہ گیت کاغذ اتے اتار رہیا سی مینوں لگدا سی ایہہ اج دے کسے عاشق’ کسے شاعر دا کلام نہیں بلکہ ایہہ نسل در نسل’ سینہ بہ سینہ’ دکھاں دی اوہ لہر اے جہنے اک نواں جنم لیتا اے تے ابرار ندیم دے بطن توں ظاہرہوئی اے میں ایہہ نظم جہنی واری پڑھی اے مینوں ہر واری لگیا کہ ایہدے وچ بیان کیتے گئے دکھ اک شاعر دے ہجر دی داستان ای نہیں بلکہ ساڈے کچے گھروندیاں دی دیواراں نال ٹکران والے نوحے ای نیں۔ ایہہ نوحے ساڈی لوک شاعری دا حصہ نیں مگر جہناں نے ایہہ نوحے لکھے اوہ وی ایہناں وانگوں گمنام نیں جہناں دے حوالے نال ایہہ نوحے لکھے گئے۔ابرار ندیم ‘ اللہ تہانوں لمی حیاتی دیوے تے عزتاں نال نوازے’ ساڈا ایہہ رونا تے کرلانا تے ایہدے وچ فیر غم و اندوزہ تے جذب و مستی دی آمیزش نے پوری نظم نوں لوک شاعری وچ تہاڈے نام نال منسوب کر کے امر کردتا اے۔ تسیں بہت خوش قسمت او۔
عطاالحق قاسمی دی رائے نال اختلاف ممکن ای نہیں کیوں جے ابرار ندیم دی شاعری وچ جذب ومستی دی اوہ کیفیت موجود اے جو پنجابی لوک شاعری دا خاصہ اے۔ امید اے کہ ابرار ندیم آن والے دناں وچ وی انج ای شاعری کردے رہن گے تے لفظاں دی جادوگری نال اپنے چاہن والیاں نوں محظوظ کردے رہن گے۔ اللہ کرے زور قلم اور زیادہ!