میں کُدّن لگا جے

اک پاگل بندہ عمارت دی چھت تے چڑھ گیا تے چیکن لگا میں کُدّن لگا جے۔ لوک اکٹھے ہو گئے’ پولیس والے آ گئے۔ ایمبولینس وی اپڑ گئی۔ پولیس والا سپیکر وچ زور نال بولیا تھلے آ جا’ ڈگ جائیں گا’ میں ایتھے کوئی امب لین نہیں آیا’ کُدن لئی آیا واں۔ پچھے پچھے ہٹ جائو’ میں کدن لگا جے’ اوہ پاگل بولیا پر توں کیوں کُدن لگا ایں؟ پولیس والے نے کہیا۔ مینوں بادشاہ بنا دیو نہیں تے میں کُدن لگا جے۔ پاگل نے دھمکی لائی۔ ٹھیک اے بادشاہ سلامت’ تھلے تشریف لے آئو۔ رعایا استقبال دی منتظر اے۔ پولیس والا کسے وی طرح اوہنوں تھلے لاہنا چاہندا سی اوہنے مجمعے ول خفیف جیہا اشارا کیتا لوکاں شور مچا دتا ساڈا بادشاہ زندہ باد… ساڈا بادشاہ زندہ باد۔ میں تھلے نہیں آ سکدا’ میں کدن لگا جے… پاگل فیر اڑ گیا پر کیوں… ہن تے تسیں بادشاہ سلامت وی بن گئے او۔ پولیس والے نے پریشان ہو کے ادب نال کہیا جو قوم پاگلاں نوں بادشاہ بنا لوے’ میں اوہناں وچ نہیں رہ سکدا میں کدن لگا جے۔
جو انگریز افسران ہندوستان وچ ملازمت کرن مگروں واپس انگلینڈ جاندے تے اوہناں نوں اوتھے پبلک پوسٹ دی ذمہ داری نہیں سی دتی جاندی دلیل ایہ سی کہ تسیں اک غلام قوم تے حکومت کرکے آئے او۔ جہدے نال تہاڈے اطوار تے رویے وچ تبدیلی آ گئی اے ایتھے جے ایس طرح دی کوئی ذمہ داری تہانوں دتی جاوے گی تے تسیں آزاد انگریز قوم نوں وی اوسے طرح ڈیل کرو گے۔ ایس مختصر تعارف دے نال تھلے دتے جا رہے واقعے نوں پڑھو۔
اک انگریز خاتون جہدا شوہر برطانوی دور وچ پاک و ہند وچ سول سروس دا افسر سی۔ خاتون نے زندگی دے کئی سال ہندوستان دے وکھووکھ علاقیاں وچ گزارے۔ واپسی تے اوہنے اپنی یادداشتاں تے مبنی بڑی ای خوبصورت کتاب لکھی۔ خاتون نے لکھیا کہ میرا شوہر جدوں اک ضلع دا ڈپٹی کمشنر سی اوس ویلے میرا بیٹا تقریباً چار ورھے دا تے دھی اک ورھے دی سی۔ ڈپٹی کمشنر نوں ملن والی کئی ایکڑ تے پھیلی رہائش گاہ تے وچ اسیں رہندے سی۔ ڈی سی صاحب دے گھر تے خاندان دی خدمت گزاری تے کئی سو بندے مامور سن۔ روز پارٹیاں ہوندیاں’ شکار دے پروگرام بن دے ضلع دے وڈے وڈے زمین دار ساڈے کول آنا باعث فخر سمجھدے تے جہدے کول اسیں ٹر جاندے اوہ اپنی عزت افزائی سمجھدا ساڈے ٹھاٹھ ایسے سن کہ برطانیہ وچ ملکہ تے شاہی خاندان نوں وی مشکل نال ای ملدے سن۔ ٹرین دے سفر دوران نوابی ٹھاٹھ نال آراستہ اک عالیشان ڈبہ ڈپٹی کمشنر صاحب دی فیملی لئی مخصوص ہوندا سی اسیں ٹرین وچ بہندے تے سفید لباس وچ ملبوس ڈرائیور ساڈے سامنے دوویں ہتھ بنھ کے کھڑا ہو جاندا تے سفر دے آغاز دی اجازت منگدا۔ اجازت ملن تے ای ٹرین چلنا شروع ہوندی۔
اک واری انج ہویا کہ اسیں سفر لئی ٹرین وچ بیٹھے تے روایت دے مطابق ڈرائیور نے حاضر ہو کے اجازت منگی ایس توں پہلاں کہ میں بولدی میرا بیٹا بول اٹھیا جہدا موڈ کسے وجہ نال خراب سی اوہنے ڈرائیور نوں کہیا کہ ٹرین نہیں چلانی ڈرائیور نے حکم من دے ہوئے کہیا کہ جو حکم چھوٹے صاحب کجھ دیر بعد صورتحال ایہہ سی کہ سٹیشن ماسٹر سنے پورا عملہ اکٹھا ہو کے میرے چار سالہ بیٹے اگے درخواست کر رہیا سی پر بیٹا ٹرین چلان دی اجازت دین نوں تیار نہ ہویا آخر بڑی مشکل نال میں کئی چاکلیٹس دین دے وعدے تے بیٹے توں ٹرین چلوان دی اجازت دوائی تے سفر دا آغاز ہویا۔ کجھ مہینے بعد میں دوستاں تے رشتے داراں نوں ملن واپس برطانیہ آئی۔ اسیں بذریعہ بحری جہاز لندن اپڑے۔ ساڈی منزل ویلز دی اک کانٹی سی جہدے لئی اسیں ٹرین دا سفر کرنا سی۔ دھی تے پُتر نوں سٹیشن دے اک بنچ تے بٹھا کے میں ٹکٹ لین چلی گئی۔ قطار لمی ہون دی وجہ نال واہوا دیر ہو گئی جہدے تے بیٹے دا موڈ بڑا خراب ہو گیا۔ جدوں اسیں ٹرین وچ بیٹھے تے عالیشان کمپانڈ دی تھاں فرسٹ کلاس دیاں سیٹاں ویکھ کے بیٹا اک واری فیر ناراضگی دا اظہار کرن لگا۔ وقت تے ٹرین نے سیٹی دے کے سفر شروع کیتا تے بیٹے نے باقاعدہ چیخنا شروع کر دتا اوہ زور زور نال کہہ رہیا سی ایہ کیسا الو دا پٹھا ڈرائیور اے’ ساڈے توں اجازت لئے بناں ای اوہنے ٹرین چلانا شروع کر دتی اے۔ میں پاپا نوں کہہ کے ایہنوں جتیاں مراواں گا۔ میرے لئی اوہنوں سمجھانا مشکل ہو گیا کہ ایہ اوہدے باپ دا ضلع نہیں اک آزاد ملک اے۔ ایتھے ڈپٹی کمشنر ورگے تیسرے درجے دے سرکاری ملازم تے کیہ وزیراعظم تے بادشاہ نوں وی ایہ اختیار حاصل نہیں کہ اپنی انا دی تسکین لئی لوکاں نوں خوار کر سکے۔
اج ایہ واضح اے کہ اسیں انگریز نوں ضرور کڈھیا اے پر غلامی نوں دیس چوں نہیں کڈھ سکے۔ ایتھے اج وی کئی ڈپٹی کمشنرز’ ایس پیز’ وزرائ’ مشیران’ سیاستدان’ جرنیل صرف اپنی انا دی تسکین لئی لوکاں نوں گھنٹوں سڑکاں تے ذلیل و خوار کردے نیں۔ ایس غلامی توں نجات دی واحد صورت ایہو اے کہ ہر طرح دے تعصبات تے عقیدتاں نوں کنڈ پچھے رکھ کے ہر پروٹوکول لین والے دی مخالفت کرنی چاہیدی اے۔ تسیں یقین کرو ملک دی سیاسی’ معاشرتی’ اخلاقی تے غریب دی حالت ویکھن دے بعد کُدن نوں دل کردا اے۔ ٭٭