من کجا تو کجا: یا رحمة اللعالمین صلی اللہ علیہ وسلم

سائنس دی اک منطق دے مطابق انھیرے دا کوئی وجود نہیں ۔ چانن دی عدم موجودگی نوں انھیرا آکھیا جاندا اے کیوں جے جدوں چانن آندا اے تے انھیرا ختم ہو جاندا اے جہدی مثال کجھ انج دتی گئی اے کہ جے اک حامل الوجود شے دے نال جے کوئی دوجی حامل الوجود شے رکھ دتی جاوے تے دونویں شیواں موجود رہندیاں نیں مگر جدوں انھیرا تے چانن آ جاوے تے انھیرا غائب ہو جاندا اے تے ثابت ہویا کہ انھیرے دا کوئی وجود نہیں اے مگر اہل اسلام نوں ایس امر دا علم 1445 سال پہلاں توں اے کہ جدوں سرزمین عرب اتے کفرتے الحاد دے گھٹا دھپ انھیرے چھائے ہوئے سن تے دھیاں نوں زندہ درگور کردتا جاندا سی تے اپنے ہتھیں تراشے ہوئے پتھر دے اصنام دی پوجا کیتی جاندی سی۔ اوہناں نوں نعوذ باللہ من ذالک خدا منیا جاندا سی۔ ذرا ذرا جئی گل اتے جھگڑے تے اوہناں جھگڑیاں وچ سینکڑاں قتل الغرض اوس ویلے سرزمین عرب کفر تے جہالت دے گھٹا ٹوپ انھیریاں وچ ڈبی ہوئی سی تے اللہ رب العزت نے آمنہ دے لعل رحمت اللعالمینۖ نوں انوار رحمت بنا کے گھلیا تے آپۖ نے کفرو الحاد دے انھیریاں وچ اسلام دی شمع منور کیتی تے اسلام دے نور نوں چاروں پاسے پھیلا دتا تے اوہو سرزمین عرب جتھے جہالت دا دور دورہ سی تہذیب تے شائستگی’ اخوت تے مروت’ بھائی چارہ’ انسانیت تے حسن اخلاق دا گہوارہ بن گئی۔ اوہناں دی بابرکت تے عظیم شخصیت نے یثرب دی بستی نوں مدینہ تے اپنی موجودگی کارن مدینہ نوں منورہ کیتا تے اوہ مدینہ منورہ بن گیا۔ مدینہ شریف دا اصل نام یثرب سی تے ایہہ اک قریہ سی۔ عربی زبان وچ قریہ دا مطلب پنڈ یا بستی اے تے جدوں آپۖ دے قدم مبارک اوتھے پہنچے تے یثرب دی بستی مدینہ بن گئی۔ مدینہ عربی وچ شہر نوں آکھدے نیں تے آپ دی موجودگی نے کفر تے جہالت دے انھیریاں نوں ختم کر کے مدینہ نوں مدینہ منورہ بنا دتا۔ آپۖ دی پیدائش گو کہ مکہ شریف وچ ہوئی تے مکہ وچ خدا دا گھر وی اے تے اللہ عزوجل جتھے رحیم و کریم اے اوتھے اوہ صاحب جلال وی اے جد کہ آمنہ دا لعل صاحب الجمال اے تے ایس صفت حمیدہ دے کارن آپۖ نے مدینہ ہجرت کیتی تے اج وی مکہ دے لوک طعباََ جلالی تے مدینہ دے لوک جلالی نیں۔ جدوں گل آپۖ دے حسن و جمال دی ہو رہی اے تے ایتھے حضرت مولانا کوثر نیازی دا ایہہ شعر کمال دا اے۔
نازاں ہو جس پہ حسن وہ حسن رسولۖ ہے
یہ کہکشاں تو آپ ۖ کے قدموں کی دھول ہے
حضرت مولانا کوثر نیازی دا ایہہ شعر اوہناں دی بخشش دا کارن ہووے گا کہ جس بھرویں انداز وچ رسالت مآبۖ دے حسن وجمال دی تعریف کیتی گئی اے یقینا اللہ رب العزت دی بارگاہ وچ اوہنوں شرف قبولیت بخشیا گیا ہووے گا۔کسے نے مولانا مرحوم توں استفسار کیتا کہ محبوبۖ خدا دے حسن دی تعریف تے بجا مگر کہکشاں آپۖ دے پیراں دی دھول کیویں ٹھہری تے حضرت کوثر نیازی نے فرمایا کہ حضورۖ اقدس دے قدم مبارک معراج اتے جاندے ہوئے جتھے جتھے پیندے اوہ کہکشاں بندی چلی گئی۔ ہن ذکر معراج دا ہویا ہووے تے قرآن کریم دے پندرہویں پارے وچ ایہدا ذکر کجھ انج اے کہ اللہ کریم نے اپنے محبوبۖ نوں اسماناںدی سیر کرائی تے آپۖ صاحب الاسراروالمعراج نیں۔ رب کریم نے جدوں آپۖ نوں معراج اتے بلایا تے آپۖ نے مکہ توں بیت المقدس تک دا سفر براق اتے کیتا۔
بیت المقدس توں چھیویں اسمان تک آپ نوں نور دے فرشتے لے گئے۔ اوتھوں جبرائیل علیہ السلام حضور کریمۖ نوں سدرالمنتہیٰ تک لے گئے تے اوہناں نے حضور اکرمۖ نوں فرمایا کہ ایس توں اگے میں اک بال برابر وی نہیں جا سکدا کہ تجلیات الٰہی میرے بال تے پر ساڑ دین گئیاں تے سدرالمنتہیٰ توں قاب قوسین تک آپ رف رف دے ذریعے پہنچے تے اللہ رب العزت نال ملاقات کیتی تے سارا سفر صرف اک رات وچ طے ہویا۔ ایتھے اک واقع دا ذکر وی برموقع ہووے گا کہ آپۖ نماز چاشت ویلے مکہ مکرمہ وچ بیت اللہ دے کول تشریف فرما سن تے ذکر و تسبیح وچ مشغول سن کہ دشمن خدا ابوجہل دی نظر آپۖ اتے پئی۔ خانہ کعبہ دے آسے پاسے گھم رہیا سی ‘اوہ رسول اکرمۖ دے کول آیا تے ازراہ تمسخر کہن لگیا کہ اے محمدۖ!کیہ کوئی نویں گل پیش آئی تے حضرت محمدۖ نے فرمایا کہ ہاں اج رات مینوں اسماناں دی سیر کرائی گئی تے معراج کرایا گیا۔ اوہنے قہقہہ لایا تے استہزایہ انداز وچ حیرانی دا اظہار کردے ہوئے کہیا کہ ر ات آپۖ نوں بیت المقدس دی سیرکرائی گئی’ معراج اتے لے جایا گیا تے سویرے آپۖ ساڈے سامنے او تے گویا ہویا کہ جے میں سب نوں بلاواں تے کیہ آپۖ ایہہ گل ساریاں دے سامنے کہہ دیو گے۔ آپۖ نے اثبات وچ جواب دتا تے ابوجہل خوشی خوشی ساریاں نوں اکٹھا کر کے حضورۖ دی ایہہ گل دسن لگ گیا۔ لوک تعجب دا اظہار کرن لگے تے ایس خبر نوں ناقابل یقین خیال کرن لگے۔ ایہو خبر چند لوکاں نے حضرت ابوبکر نوں دسی تاں جے اوہ رسول کریمۖ توں وَکھ ہو جان جہڑی اوہناں دی خام خیالی سی کہ صدیق اکبر ایس خبر دی تکذیب کر دین گے۔ جدوں حضرت ابوبکر نے ایہہ گل سنی تے فرمایا کہ جے ایہہ گل حضور اکرمۖ نے فرمائی اے تے فیر ایہہ سچ اے تے آکھیا کہ میں آپ اتے اترن والی وحی دی تصدیق کرنا واں تے کیہ ایس گل دی تصدیق نہیں کراں گا تے اوہ وتھے تشریف لے گئے جتھے حضورۖ پاک معراج دا واقعہ سنا رہے سن تے ابوبکر صدیق تسلسل دے نال فرما رہے سن کہ ”سچ فرمایا” ”سچ فرمایا”تے اوسے دن حضورۖ اکرم نے آپ دا نام صدیق رکھ دتا تے جہدا نام محمدۖ نے رکھیا ہووے اوہدی فضیلت کسے وضاحت دی محتاج نہیں تے فیر ہمیشہ آپ نوں حضرت ابوبکر صدیق آکھیا گیا تے آکھیا جا رہیا اے۔
لوڑ ایس امر دی اے کہ اسیں صاحب الاسراروالمعراج ‘ وجہ تخلیق کائنات تے امام الانبیا دی تعلیمات تے فرمودات نوں حرزجاں بنا کے اوہدی پیروی کرئیے جہدے توں ساڈا دین تے دنیا دونویں سنور جان گئیاں تے ایہہ اک اٹل حقیقت اے کہ جدوں تک مسلمان تعلیمات ربانی تے فرمودات مصطفیۖ اتے عمل پیرا رہے دنیا وچ حکمرانی کردے رہے تے جدوں اغیار دی سازشاں پاروں اسیں فرقیاں وچ ونڈ گئے تے دین توں دور ہوندے چلے گئے تے ایہو وجہ اے کہ اجع الم اسلام زبوں حالی دا شکار اے۔ اسیں خدا دی وحدانیت تے رسول اکرمۖ دے اتباع توں اجتناب کیتا تے رسوائیاں ساڈا مقدر ٹھہریاں۔ اج سانوں ایہدی بہت لوڑ اے کہ اسیں اسلام تے اسلام دے دَسے ہوئے رستیاں اتے چل کے دین تے دنیا دونوواں وچ سرخرو ہوہ سکنے آں۔