جدا ہو دیں سیاست سے تو رہ جاتی ہے چنگیزی

اسیں فوج نال بہت محبت کرنے آں تے خاص کر فوجی جواناں نال عقیدت اے۔ جدوں ہوش سنبھالیا تے ایہو ویکھیا کہ پنڈ دے ہر دوجے گھر وچ کوئی ریٹائر یا حاضر سروس فوجی جوان موجود اے۔ ایہہ وی ویکھن دا مشاہدہ ہویا کہ فوجی جہڑی گل کردے نیں ایہدے اتے پہرہ دیندے نیں۔ حیا والے عزت کرن والے تے کمزوراں دا احساس کرن والے خاص بندے ہوندے نیں۔ ہن توں کجھ دن پہلاں ساڈے آرمی چیف قمر جاوید باجوہ نے اکو نال دو خوشخبریاں سنائیاں نیں ۔ پہلی ایہہ کہ اوہ اپنی نوکری وچ ہور وادھا نہیں چاہندے’ اوہ اگلے کجھ ہفتیاں مگروں ریٹائر ہو جان گے تے دوجی ایہہ کہ ہن توں فوج سیاست وچ کردار ادا نہیں کرے گی۔وزارت دفاع دے ماتحت مسلح فوج ایسا محکمہ اے جہدا پاکستانی سیاست وچ شروع دن توں بہت تگڑا کردار رہیا اے۔ فوج سیاست توں کیویں دور رہوے گی ایہہ تے آن والا ویلا ای دسے گا لیکن اسیں سمجھنے آں کہ فوج دے محکمے وچ شامل ہون والا ہر فرد باصلاحیت’ باشعور تے ملک لئی جان تک قربان کرن دا جذبہ رکھدا اے۔تے جہڑے خاص افسر اپنی محنت’ قابلیت تے پیشہ وارانہ تربیت مگرون اعلیٰ ترین عہدیاں اتے پہنچدے نیں اوہناں دی کسے وی صلاحیت بارے شک کرنا گناہ وانگ اے۔ ماضی نوں ویکھو تے جہنے وی وزرااعظم یا صدراں نے اپنی مرضی دے آرمی چیف تعینات کروائے نیں کجھ ای ویلے مگروں ایہناں دو ہستیاں دی آپس وچ راہواں وکھ ہون لگیاں’ ایس لئی ہن ویلا اے کہ ساڈے سیاستدان وی کجھ دانشمندی یعنی سیاسی شعور دا مظاہرہ کرن تے اپنی مرضی دا آرمی چیف لان دی بجائے سینئر موسٹ افسر نوں ایس عہدے لئی ذمہ داریاں ادا کرن دا اک سادہ جیا قانون بنا لین ۔جو اپنی مدت پور ی کرن توں بعد آپ ای جگہ خالی کر دے۔اسیں بچپن وچ سنیا سی کہ سیاست نوں عبادت دا درجہ حاصل اے۔ سیاست دا اصل مطلب عوام لئی بہتری مقصود ہوندی اے۔ جتھے جتھے انسانی معاشرے وجود وچ آئے اوتھے دے باشعور لوکاں نے اپنے عوام لئی مسئلے گھٹ کرن تے مستقبل دی بہتری لئی اپنی خدمتاں پیش کرن دا عمل شروع کردتا۔ سندے آں کہ پرانے زمانے وچ سیاست دے میدان وچ آن والے اپنا نام’ مقام یا اقتدار لئی نہیں بلکہ صرف تے صرف اپنے آسے پاسے وسن والے لوکاں دی بہتری لئی عملی کوششاں کیتا کردے سن۔ایس مقصد دے پیش نظر اوہ لوک اکثر اپنی جیب توں ای بہت کجھ خرچ کردتا کردے۔ وقت بدلیا اقدار بدلے’ کردار بدلے تے فیر سیاست دے نام اتے ساڈے سامنے ایسے چہرے آن لگے کہ جہناں دا مقصد پیسہ’ پاور تے تعلقات رہ گیا۔ ویسے تے پاکستان دا قیام قائداعظم محمد علی جناح تے اوہناں دے ساتھیاں دی سیاسی بصیرت توں ای ممکن ہویا سی لیکن پاکستان بنن دے کجھ ای ویلے مگروں سیاستدان ہر دور وچ سخت مشکلاں دا شکار رہے نیں جہنوں جنی عوامی حمایت حاصل ہوئی اوہ اینی ای وڈی سزا دا حقدار ٹھہریا۔ ملک دے پہلے وزیراعظم خان لیاقت علی خان دا قتل’ مادر ملت دی اچانک موت’ ذوالفقار علی بھٹو نوں تختہ دار اتے لٹکایا جانا’ جونیجو جئے شریف سمجھے جان والے وزیراعظم نوں زبردستی اقتدار توں دور کرنا’ محترمہ بے نظیر بھٹو نوں اقتدار توں دور رکھن لئی آئی جے آئی دا قیام’ ایٹمی دھماکیاں مگروں نواز شریف دی جبری ملک بدری’ بے نظیر بھٹو دا قتل تے فیر جمہوری وزراعظم نوں ویلے توں پہلاں اقتدار توں دور کیتے جان دا عمل اج وی جاری اے۔ اک ایسے ویلے وچ جدوں پچھلے وزیراعظم عمران خان دے خلاف ساری سیاسی جماعتاں متحد نیں اوہناں دا اکو ویلے چھ قومی اسمبلی دے حلقیاں توں الیکشن جت جانا تے فیر اوہدے کجھ دن مگروں ای اوہناں نوں نااہل قرار دتا جانا ایس ساریاں دے پچھے کسی نہ کسی دی سیاست تے ضرور اے۔ ساڈے سیاستدان داناں دی گل کریے تے اوہناں وچ اک گل نمایاں نظر آندی اے کہ ایہہ اقتدار وچ آن مگروں اپنے لئی اپنیاں لئی تے اپنے محسناں’ یاراں’ پیاریاں لئی جائز ناجائز ذرائع توں بنا کوئی ثبوت چھڈے پیسہ جمع کردے نیں فیر ایس دولت نوں وکھرے طریقیاں نال دوجے ملکاں وچ منتقل کردے نیں۔ ہن ویلا اے کہ ساڈے سیاستدان رہنما بنن دا عمل شروع کرن تے ایہہ بیان دین کہ ہن توں اسیں ملک توں کسے وی طرحاں کوئی روپیہ پیسہ باہر ملک منتقل نہیں کراں گے۔ سیاست ہونی چاہیدی اے لیکن حکومتاں تبدیل کروان لئی نہیں بلکہ ریاست مقصد ہونا چاہیدا اے کیوں جے بقول حضرت اقبال سیاست دے بغیر تے چنگیزی ای رہ جاندی اے۔ دنیا وچ نام تے مقام بنان لئی ساڈے سیاستداناں نوں دوجے ملکاں دے سیاست داناں دی زندگیاں بارے وی جانن دی کوشش کرنا چاہیدی اے۔ صرف اپنے بالاں دا مستقبل بہتر بنان دی بجائے قوم دے بالاں دے مستقبل نوں سامنے رکھدے ہوئے اپنی اولاداں تے دولت واپس لیان دا اعلان کرنا چاہیدا اے۔ چلو رل کے دل توں اک نعرہ لانے آں۔
پاک فوج زندہ باد،پاکستان پائندہ باد