سپرسٹار دی گت

کیسا لگ رہیا اے تہانوں اج کل دی سیاست دے نویں رنگ تے نویں ڈھنگ ویکھ کے؟ پاکستان دی 75 سالہ تریخ وچ اک انوکھی سیاست دا باب رقم ہو رہیا اے۔ پاکستان دی تریخ وچ کھنگھ سیاستداناں دا پہلی واری واہ اک کھڈاری نال پیا اے۔ چھٹے ہوئے وڈیرے’ چوہدری’ خان تے سردار چکرا کے ڈگ پئے نیں جو کھڑوس سیاستدان اپنے آپ نوں پاکستان دی سیاست وچ توپ سمجھدے نیں اوہ سارے کھسیانی بلی بن کے کھمبا نوچ رہے نیں۔ اک کھڈاری نوں سیاست دے گندے تالاب وچ ڈبکی لانی چاہیدی اے یاں نہیں’ ایہ وکھری بحث اے۔ عمران خان چنگا اے’ عمران خان برا اے’ ایس گل توں ہٹ کے عمران خان دی آمد دے بعد’ اک حقیقت کھل کے سامنے آ گئی اے کہ پاکستان دے لوگ کھنگھ سیاستداناں توں کنے ناخوش’ رِنج تے بیزار نیں۔ عمران خان دے جلسے جلوساں وچ لوکاں دی گنتی تے عوام دا جوش و خروش ویکھ کے کھنگھ سیاستدان سکتے وچ آ گئے نیں۔ مینوں نہیں یاد پیندا کہ عمران خان دے آن دے بعد کسے کھنگھ سیاستدان نے عوامی جلسہ کر کے وکھایا ہووے۔ مولانا فضل الرحمن بھاویں جلسے جلوس کردے رہندے نیں پر اک ای مکتب فکر دے لوک اوہناں دے جلسیاں وچ شریک ہوندے نیں۔
ایہ گل یاد رکھو کہ کوئی وی عقیدہ تے سیاست آپس وچ گھل مل نہیں سکدے۔ بین الاقوامی سیاست وچ کئی ملک اجہے نیں جتھے کسے وی عقیدہ نوں قبول نہیں کیتا جاندا۔ دنیا دے دوجے ملک جو اللہ تعالیٰ تے ایمان رکھدے نیں اجہے ملکاں نال سیاسی طور تے جڑے ہوئے نیں۔ عقیدے تہانوں جڑے ملکاں نال کسے قسم دے رابطے رکھن دی اجازت نہیں دیندے۔ کوئی افلاطون سیاست دی گل نہیں۔ سادہ تے سدھی جہی گل اے۔ تسیں عقیدے تے سیاست نوں یک جان نہیں کر سکدے۔ ساڈا اج دا موضوع ایہ نہیں۔ میں عرض کرنا چاہنا واں کہ عمران خان دی آمد دے بعد کھنگھ تے گھسے پٹے سیاستدان عوامی جلسہ کرن دی جرأت نہیں رکھدے۔ سوائے مولانا فضل الرحمن دے’ پر اوہ میرے خیال وچ سیاستدان ہیں’ اوہ بھاویں سیاست وچ آ گئے نیں اوہناں دا کم کجھ ہور اے۔
پاکستانی سیاستداناں دی بھیڑ وچ تہانوں اجیہا اک وی سیاستدان نہیں ملے گا جنہے حیاتی وچ کدی کوئی کھیڈ کھیڈیا ہووے’ فیر اوہ کھیڈ بھاویں گلی ڈنڈا ای کیوں نہ ہووے۔ اوہناں دے رویے تے عادات و اطوار ویکھ کے لگدا اے کہ کھیڈنا دور تے اوہناں نے اج تک کسے نوں کھیڈدے ہوئے وی نہیں ویکھیا۔ ہن اوہناں دا واہ پیا اے اک کھرے تے خالص کھڈاری نال۔ میں ایہ نہیں کہندا کہ عمران ددھ وچ دھلیا اے عمران خان ساڈے ورگا ای اک انسان اے۔ ساڈیاں ورگیاں عمران خان وچ وی خامیاں نیں تے اوہدے وچ خوبیاں وی نیں۔ کوئی بندہ تہانوں انج دا نہیں ملے گا جہدے وچ صرف خوبیاں ہون تے خامیاں نہ ہون۔ پاکستان دی 75 سالہ تریخ وچ عمران خان نے ثابت کر دتا اے کہ لوک کھنگھ’ گھسے پٹے سیاستداناں توں بیزار ہو چکے نیں نہیں تے کوئی وجہ نہیں سی کہ عمران خان دے جلسیاں وچ پڑھے لکھے لوکاںدا سمندر امڈ آندا اے۔ ایہدے نال عمران خان دی اپنی بے پناہ شہرت تے ہردلعزیزی ثابت ہوندی اے پر ایہدے نال نال کھڑوس سیاستداناں توں لوکاں دی بیزاری وی ثابت ہوندی اے۔
عمران خان دیاں تقریراں دا لہجہ’ الفاظ دی چون’ کھریاں کھریاں سنان دا انداز’ تقریراں دوران کھریاں تے کھوٹیاں نوں لتاڑنا ثابت کردا اے کہ اوہ اپنی ذات وچ مکمل کھڈاری اے۔ اوہ سیاستدان نہیں’ جہڑے لوک چاہندے سن کہ عمران خان سیاست وچ آ کے ملک دی باگ ڈور سنبھالے تے اپنی بے پناہ بین الاقوامی شہرت نوں استعمال کردے ہوئے پوری دنیا وچ پاکستان دا ناں روشن کرے اوہناں سیانیاں نوں بالکل وی اندازا نہیں سی کہ بین الاقوامی شہرت رکھن والے نامور کھڈاری اپنی نجی زندگی وچ کیویں دے ہوندے نیں۔ اوہناں دا مزاج’ اوہناں دے رویے اوہناں دی سوچ کیسی ہوندی اے۔ اک گل کدی نہیں بھلنی چاہیدی کہ تسیں منے ہوئے مشہور کھڈاری نوں اپنے ماتحت نہیں بنا سکدے۔ تسیں اوہدے سامنے کجھ نہیں ہوندے۔ باکسنگ دی دنیا دے بے تاج بادشاہ محمدعلی کلے تہانوں یاد اے؟ اپنے دور دا سب توں ودھ نامور کھڈاری سی۔ لازمی دفاعی تربیت لین توں انکار کردے ہوئے محمدعلی کلے اکلے امریکی حکومت دے سامنے ڈٹ کے کھڑا ہو گیا سی۔ حکومت نے محمدعلی تے باکسنگ دے بوہے تن ورھے تک بند کر دتے سن۔ باکسنگ دے بین الاقوامی اعزاز توں اوہنوں طاقتور حکومت نے محروم کر دتا سی۔ اوکڑاں محمدعلی نوں جھکا نہ سکیاں۔ تن ورھے دی بندش دے بعد محمدعلی نے فیر توں باکسنگ دی دنیا وچ پیر رکھیا تے ویکھدے ای ویکھدے سارے اعزازات جت لئے۔ انج ہوندے نیں بین الاقوامی شہرت رکھن والے نامور کھڈاری۔
عمران خان بین الاقوامی شہرت رکھن والے کھڈاری نیں’ تے اوہ وی کرکٹ دے’ تسیں کدی نہ بھلو کہ عمران خان اپنے دور دے آل رائونڈر سراین بوتھم’ کپل دیو تے رچرڈ ہیڈلی توں وڈے آل رائونڈر سن۔ خاص طور تے فاسٹ بالنگ وچ عمران خان دا ثانی نہیں سی۔ اک زبردست فاسٹ بالر دی نفسیات نوں پاکستانی سیاست دے وڈیرے’ چوہدری’ خان’ سردار تے پیر سائیں سمجھ نہیں سکدے۔ عمران خان تہاڈا کسان’ مزارع تے مرید نہیں بن سکدا۔ اوہ تہاڈی فہم و فراست توں باہر اے۔ مینوں دکھ اے کہ گندی تے کرپٹ سیاست وچ دھک کے تسیں عمران خان نوں ضائع کر دتا اے۔٭