ارشد شریف شہید ۔۔۔اک عہد ساز شخصیت

ارشد شریف اک نہایت نفیس تے شفیق انسان سن۔ میں اوہناں نوں 2011توں جاننا واں۔ جدوں اوہ دنیا نیوز وچ اسلام آباد دے بیوروچیف سن۔اسائمنٹ ایڈیٹر ہون دے ناطے اوہناں نال چنگی دوستی سی۔ میں اپنا صحافتی کیرئیر 2010وچ شروع کیتا۔ 2011وچ دنیا نیوز جوائن کیتا تے اک لمے عرصے تک اوتھے اہم عہدے اتے ذمہ داریاں سرانجام دتیاں۔ کجھ عرصے مگروں ارشد شریف نوں بیوروچیف اسلام آباد توں ترقی دے کے ڈائریکٹر نیوز لاہور تعینات کردتا گیا۔ بیوروچیف اسلام آباد دے نال نال اوہ دنیا نیوز دے پروگرام ”کیوں” دے میزبان وی سن۔ لہور تعیناتی مگروں اوہناں دی پروگرام ٹیم نوں وی لہور شفٹ ہونا پیا۔ اوس ویلے اوہناں دا پروگرام ”کیوں” دی چنگی بھلی ریٹنگ سی۔
ارشد شریف نے بطور ڈائریکٹر نیوز چارج سنبھالیا تے سارے سٹاف نال تعارف وی کروایا گیا۔ کجھ لوکاں نوں اوہ پہلے توں ای جاندے سن کیوں جے خبراں دی کارڈیشن دے سلسلے وچ اوہناں نال مسلسل رابطہ رہندا تے اک دن وچ کئی واری کنورسیشن ہوندی۔ اوہناں لوکاں وچ میںوی شامل سی۔ اوہ تقریباً 8مہینے دنیا نیوز دے ڈائریکٹر نیوز رہے۔ ایسے دوران اوہناں نال دوستی ہور ڈُونگی ہو گئی بلکہ تسیں کہہ سکدے او کہ ہور کلوزنس ہوگئی۔ ارشد شریف اعلیٰ تعلیم یافتہ’ محنتی تے محب وطن انسان سن۔ اوہناں دا اک وکھرا ای سٹائل سی۔ 8مہینے مگروں اوہناں نے دنیا نیوز نوں خیرباد کہہ دتا تے اے ار وائے جوائن کر لیا جتھے اوہناں نے پاکستان ای نہیں بلکہ پوری دنیا وچ اپنی شناخت بنائی۔ مینوں رات 4وجے سوشل میڈیا توں پتہ چلیا کہ اوہناں نوں قتل کردتا گیا اے لیکن مینوں یقین نہیں آیا۔ میں اپنے اک صحافی دوست نوں فون کر کے پچھیا کہ سوشل میڈیا اتے ایسی خبراں گردش کر رہیاں نیں۔ اللہ خیر کرے۔ تھوڑی دیر مگروں مین سٹریم میڈیا اتے خبر نشر ہوئی تے یقین کرودل مردہ ہو گیا تے یقین نہیں آ رہیا سی کہ انج ہویا اے۔ دل ایس گل نوں تسلیم ای نہیں کر رہیا سی۔ بوجھل دل دے نال بستر اتے لیٹ گیا تے دل اینا اداس سی کہ نیندر ای نہیں آ رہی سی۔ دل وچ عجیب و غریب خیال آ رہے سن کہ اوہنوں کیوں قتل کیتا گیا۔ کہنے قتل کروایا۔ اک محب وطن پاکستانی نوں قتل کروان والا کون اے۔ اوہدوں دا دل خون دے آنسو رو رہیا اے۔ ارشد شریف دی آواز دبان لئی اوہنوں کنے ملک چھڈن اتے مجبور کیتا؟ کیہ حق تے سچ بولن دی اینی وڈی سزا اے؟ ارشد شریف پاکستانی قوم دی آواز سن جہنوں خموش کردتا گیا لیکن کیوں؟ ذاتی رائے ہر انسان دی ہوندی اے۔ آزادی رائے دا حق ہر شخص نوں اے۔ اختلاف رائے ساریاں دی ہوندی اے۔ اوہنے ایسا کیہ کر دتا سی کہ اوہ موت دا مستحق ٹھہریا۔ ذہن وچ ہور بہت سارے سوالاں نے جنم لیاکہ جدوں چوری دی گڈی دا معاملہ سی تے گڈی نوں روکن لئی صرف ٹائراں اتے فائرنگ کیتی جانی چاہیدی سی’ کار سواراں اتے کیوں کیتی گئی؟ گڈی روکن لئی وی ڈرائیور دے بجائے ساتھی نوں کیوں نشانہ بنایا گیا؟ پلس دا دعویٰ اے کہ نا کہ توڑیا گیا جد کہ کار چلان والے ساتھی نے بیان دتا کہ صرف کجھ پتھر پئے سن’ اہلکار موجود نہیں سن ایس لئی گڈی نہیں روکی۔ جے بیرئیر سی تے پلس اہلکار موجود سن تے کیہ ذہن ایہہ گل تسلیم کردا اے کہ ارشد شریف ناکہ توڑن دی حماقت کرے گا؟ کینیا دے اخبار دے مطابق ارشد شریف دے ساتھی نے اپنے بیان وچ آکھیا کہ اوہ تے ارشد شریف ڈویلپرز سن تے ایسے سلسلے وچ ایس علاقے وچ آئے سن۔ سب توں اہم سوال ایہہ اے کہ ارشد شریف برطانیہ جئے محفوظ علاقے نوں چھڈ کے کینیا وچ کیوں آیا؟ جد کہ اوہ چنگی طرح جاندے سن کہ کینیا دا حال پاکستان توں وی بوہتا بھیڑا اے۔ ارشد شریف یو اے ای توں برطانیہ چلے گئے سن تے ویزا ختم ہون تے اوہناں نوں واپس یو اے ای آنا پیا۔ کیوں جے یو اے ای توں ویزا چھیتی ایکسٹنڈ ہو جاندا اے مگر افسوس یو اے ای دی گورنمنٹ نے ارشد شریف نوں بلواکے آکھیا کہ سانوں پاکستان ولوں آکھیا گیا اے کہ تسیں پاکستان نوں مطلوب او’ وانٹڈ او۔ ایس لئی تہانوں پاکستان ڈی پورٹ کیتا جاوے گا لحاظہ تسیں 24گھنٹے وچ یو اے ای چھڈ دیو ورنہ تہانوں ڈی پورٹ کیتا جاوے گا۔ ہن صورتحال ایہہ سی کہ 24گھنٹے وچ کسے ہور ملک دا ویزا ملنا اوکھا سی ایس لئی اوہ کینیا چلے گئے کیوں جے کینیا دا ویزا فری اے۔ سٹوری اتے غور کرو سمجھ ای نہیں آ رہی’کینیا وچ جو ہویا اوہدے اتے وڈے وڈے سوالیہ نشان نیں۔ مینوں یقین اے کہ ارشد شریف دے فون نہیں ملن گے’ فون وچ سب کجھ اے کہ اوہ کہدے نال کیہ گل کردا سی کہدے نال رابطے وچ رہندا سی۔ مگر مینوں پتہ اے کہ اوہدے فون نہیں ملن گے۔ کہندے نیں کہ اچانک گولی چلی تے ایہہ اتفاق ہو گیا’ ایہہ اتفاق نہیں اے کہ اوہنوں دبئی توں دبائو دے تحت کڈیا گیا تے اوہدے کول ویزا نہیں اے تے قطر’ سری لنکا تے کینیا بچ جاندا اے جتھے اوہ جا سکے تے تسیں جاندے او اوہ کتھے جا سکدا سی۔ بوجھل دل تے آخری اہم گل دے نال اختتام کرنا واں کہ اسیں جاننے آں کہ پیڈ کلنگ وچ سب توں ودھ بدنام کینیا دی پلس اے۔