بے باک صحافی دی موت داسانحہ

صحافیاں دی زندگی نوں لاحق خطریاں دا کدی مکمل طور تے خاتمہ نہیں ہویا مگر پچھلی دہائی توں خطریاں وچ خوفناک حد تک وادھا ہو گیا اے جہناں دا مقصد صحافیاں نوں پیشہ وارانہ مہارت وکھان توں باز رکھنا تے دیانت نال کم کرن توں روکنا اے۔ اک محتاط اندازے دے مطابق چالُو ورھے دے دوران ہن تک دنیا بھر وچ 57 توں ودھ صحافی جان توں ہتھ دھو بیٹھے نیں جد کہ تشدد نال زخمی ہون والے یا دُوجی نوعیت دے نقصانات نال دوچار ہون والیاں دی تعداد سینکڑیاں وچ اے۔ ایہہ قتل یا تشدد دا سلسلہ کدی ختم ہووے گا؟ ایس سوال دا جواب کسے صورت ہاں وچ دینا ممکن نہیں کیوں جے صحافی سچ دا کھوج لان دی کوشش کردے نیں تے فیر معلومات ہتھ لگدے ای شائع کردیندے نیں جہناں توں ریاستاں تے قوتاں خوفزدہ رہندیاں تے صحافیاں نوں دبائو وچ رکھن دی کوشش کردیاں نیں ایہدے لئی طاقت تے دولت دے حربے آزمائے جاندے نیں مگر دیانتدار تے نڈر صحافی سارے دبائو دے باوجود جدوں مصلحت اتے آمادہ نہیں ہوندے تے کھوج جاری رکھدے نیں تے ارشد شریف جئے المناک انجام دا امکان ودھ جاندا اے مگر ہن ایہہ سلسلہ تھم جانا چاہیدا اے جے کسے نوں سچ سامنے آن توں بدنامی یا ساکھ خراب ہون دا خوف اے تے بہتر اے زندگی قنون دی پاسداری تے ریاست دے طے کردہ قواعد و ضوابط دے مطابق گزارو تاں جے بدنامی دا احتمال ای نہ رہے۔
ارشد شریف اک اجیہا جوہر قابل سی جہنے ہمیشہ بے باکی نال تحقیقی صحافت دی پانامہ لیکس دا سکینڈل اُجاگر کرن وچ اوہناں داکلیدی کردار اے حالانکہ ملوث لوک صاحبان اقتدار ہون دی بنا تے بہت بااختیار سن مگر ایہہ اقتدار یا اختیار وی ارشد شریف دی راہ وچ رکاوٹ دا کارن نہیں بن سکیا بلکہ اوہ پانامہ لیکس دے ایسے ہور خفیہ گوشے بے نقاب کرن دا کارن اے جہدے توں دنیا اجے ناآشنا سی۔ ایسی ای صحافتی خدمات اتے 2012وچ اوہناں نوں آگاہی ایوارڈ ملیا جد کہ 2019 وچ پرائڈ آف پرفارمنس نال نوازیا گیا۔ا وہناں دی بے وقت تے ناگہانی وفات نال صحافی حلقے ای سوگوار نہیں بلکہ ہر مکتبہ فکر صدمے وچ اے۔ ہور ستم ظریفی ایہہ ہے کہ اوہناں دی موت نوں طرح طرح دے رنگ دین لئی بے سروپا قیاس آرائیاں جاری نیں جو نہ صرف ملک وچ بے چینی پھیلان دا کارن بن سکدیاں نیں بلکہ اہلخانہ دے دکھ ودھا کے غلط فہمیاں دی فضا نوں گہرا کرن دا موجب بنن دا امکان وی رد نہیں کیتا جا سکدا ۔کسے نال محبت تے الفت دا ایہہ مطلب ہر گز نہیں کہ ایس آڑ وچ کسے شخصیت یا ادارے نوں ہدف بنا کے ساکھ نال کھیڈن دی کوشش کیتی جاوے جو ایسی روش اتے گامزن نیں اوہناں نوں راہ گم کردہ مسافر تے کہہ سکدے او محب الوطن یا مثبت سوچ دا مالک نہیں کہہ سکدے لہٰذا لوڑ ایس امر دی اے کہ سچ سامنے لیان لئی آواز تے بلند کیتی جاوے لیکن من گھڑت افواہاں نوں سنجیدہ نہ لیا جاوے۔
ضرب عضب دے ذریعے ملک وچ جاری ات گردی اتے قابو پان لئی ات گرداں دے خلاف ٹھوس کارروائیاں کیتیاں گئیاں۔ ارشد شریف دی اپنے وطن نال ایہہ محبت ای سی جو اوہناں نوں خطرات دے باوجود محاذ اتے لے جان دا کارن بنی۔ ایس دوران اوہناں نے جان دی پرواہ کیتے بغیر ایسی بے مثال رپورٹنگ کیتی جہدے تھلے دتے نتائج سامنے آئے۔ عوامی حلقیاں وچ خوف و دہشت دی فضا دا خاتمہ ہویا۔ دُوجا دہشت گرداں نال برسر پیکار نوجواناں دے جوش و جذبہ وچ اودھا ہویا۔ نیز اداریاں اتے عوامی اعتماد وچ وی حد درجہ بہتری ویکھن وچ آئی۔ تیجا دہشت گرداں وچ مایوسی پھیلی۔ ایہہ ایسے نتائج سن جہدے توں ڈر تے خوف توں بے نیاز ہو کے ہر خاص و عام بے باکی نال ریاستی اداریاں دے نال نظر آیا ایس لئی ایسی قیاس آرائیاں کہ ناگہانی موت وچ کوئی ادارہ ملوث اے۔ ہر گز درست نہیں ویسے وی جہدا والد نیوی وچ کمانڈ رہیا ہووے تے بھرابری فوج وچ میجر دے عہدے اتے فائز’ اوہدے اتے ریاستی اداریاں نوں شک ہو ای نہیں سکدا لہٰذا جو لوک افواہواں پھیلان دا کارن نیں اوہ غیار دے کارندے تے ہو سکدے نیں پاک وطن دے خیر خواہ ہرگز نہیں۔
ارشد شریف دی موت اک جوہر قابل دی موت اے۔ ایہہ خاندان پچھلے کئی سالاں توں پے در پے صدمیاں دی زد وچ اے۔ والد دی وفات ای اک وڈا صدمہ سی کہ دلیر بھرا وزیرستان توں محافظاں دے بغیر آندے ہوئے رستے وچ بنوں دے کول شہید کردتی گئی۔ ایسے المناک صدمیاں دا سامنا کرن دے باوجود ارشد شریف خوفزدہ یا مایوس نہ ہووے بلکہ پیشہ وارانہ سرگرمیاں جاری رکھن۔ قدم قدم تے خطرات دا سامنا کرن دے باوجود جرات تے بے باکی نال صحافت دی اوہ بے باک صحافی تے کمال دے اینکر پرسن سن۔ اوہناں نوں بولن تے لکھن دا طریقہ تے سلیقہ آندا سی۔ ہن اوہ منی لانڈرنگ دا اک وڈا نیٹ ورک بے نقاب کرن لئی محو سفر سن۔ ایہہ تحقیقی صحافت ای اوہناں نوں مادر وطن توں دور لے گئی تے ایس دوران ای موت دی وادی وچ چلے گئے بلاشبہ ایسا جراتمند صحافی گھٹ ای ویکھن وچ آندا اے جہڑا خطریاں توں آگاہی دے باوجود ثابت قدم رہے۔
دیار غیر وچ اک منے پرمنے پاکستانی صحافی تے اینکر پرسن دی وفات نوں حکومت نے سنجیدہ لے کے اعلیٰ سطح اتے نہ صرف رابطہ کیتا اے بلکہ میت نوں پاکستان لیان دے نال محرکات تے ملوث لوکاں دے بارے تحقیقات دا مطالبہ کیتا اے۔ کینیا دے صدر نے مطالبے دے جواب وچ ہر ممکن تعاون دا یقین دوایا اے مگر ارشد شریف دے قتل دی کہانی جیویں بیان کیتی جا رہی اے اوہنوں ذہن تسلیم نہیں کردا۔ کینیا دی پلس کہندی اے ارشد شریف دے زیر استعمال گڈی جیویں ای اک گڈی وچ سوار ملزم دے تعاقب وچ سی تے نہ رکن اتے غلط فہمی وچ نشانہ بنایا اے۔ ایہہ ہر حوالے نال اک کمزور کہانی اے جہڑی کئی اک سوالات نوں جنم دیندی اے۔ مثال دے طور تے جے دنیا بھر وچ پلس کسے ملزم دے تعاقب وچ ہووے تے سب توں پہلاں ملزم نوں زندہ گرفتار کرن دی کوشش کردی اے ایہدے لئی سب توں پہلاں ہوائی فائرنگ نال ملزم نوں خوفزدہ کیتا جاندا اے جدوں گل نہ بنے تے ٹائراں نوں نشانہ بنایا جاندا اے فیر وی مطلوبہ نتائج نہ ملن تے ڈرائیونگ سیٹ اتے بیٹھے شخص نوں زخمی کرن دی کوشش کیتی جاندی اے مگر ارشد شریف دے واقعہ وچ ایسا کجھ نہیں ہویا بلکہ سدھا سادھ فائر مار کے قتل کردتا گیا اے۔ ہور ایہہ کہ جے ایہہ تصور کر لیا جاوے کہ جیویں وقوعہ بیان کیتا جاندا اے واقعہ اوسے طرحاں ای پیش آیا اے تے وی ذہن بیان کیتے گئے واقعات نوں من و عن تسلیم کرن توں قاصر اے کیوں جے انج ہون دی صورت وچ سجے یا کھبے یا فیر اگے یا پچھے توں گولی لگدی مگر تصویر وچ اک توں ودھ گولیاں سر دے اوپری حصے وچ لگی نظر آندیاں نیں۔ ایسا تے ممکن ای نہیں کہ کسے پلس مین نے گڈی دی چھت اتے بیٹھ کے ارشد شریف نوں نشانہ بنایا ہووے ایسے لئی ایہناں خیالات نوں تقویت ملدی اے کہ دسے گئے واقعات وچ سو فیصد صداقت نہیںبلکہ ایسا کجھ اے جہڑا لکایا جا رہیا اے تے سوچے سمجھے منصوبے دے تحت پاکستانی صحافی دی جان لئی گئی اے۔ ایسا سفاک کون شخص اے؟ ایہہ بے نقاب کرنا حکومت دا کم اے۔ جے حکمران سنجیدگی دا مظاہرہ کرن تے کینیا دے قنون نافذ کرن والے اداریاں دے نال رل کے ساڈے ادارے تفتیش کرن تے مذکورہ بالا سوالات دے نہ صرف جوابات حاصل کیتے جا سکدے نیں بلکہ عوام دے پسندیدہ تے دلیر صحافی دے قاتلاں نوں کیفر کردار تک پہنچانا وی ممکن ہو سکدا اے۔ سچ سامنے آن نال قیاس آرائیاں تے افواہاں دا خاتمہ ہو جاوے گا۔