ارشد شریف تے غلاماں دی بستی

ارشد شریف کینیا دے شہر نیروبی دے کول گولی لگن نال شہید ہو گئے۔ واقعہ کینیا دے شہر نیروبی توں دو گھنٹے دے فاصلے اتے واقع علاقے وچ پیش آیا۔ ارشد شریف گولی لگن نال شہید ہو گئے۔ ارشد شریف اک تجربہ کار صحافی ہون دے نال پاکستان دے سب توں وڈے نیوز اینکراں وچوں اک سن۔ نجی ٹی وی دا شور پاور پلے بطور ٹی وی اینکر اوہناں دا ٹیلی ویژن اتے آخری شو سی۔ ارشد شریف جیا محب وطن صحافی محفوظ نہیں اے تے فیر یقین منو پاکستان وچ کوئی وی ایسا شخص محفوظ نہیں جہڑا پاکستان دا درد رکھدا ہووے تے پاکستانیاں دا دکھ سمجھدا ہووے۔ ارشد شریف اک بہادر فوجی دا پتر اک شہید فوجی دا بھراں سی۔ اوہدی بے لاگ رپورٹنگ تی غیر جانبدار تحقیقاتی رپورٹاں دا پورا پاکستان گرویدہ سی تے اوہناں دا پروگرام واحد پروگرام سی جہدا انتظار نہ صرف ملک وچ بلکہ ملک توں باہر وی کیتا جاندا سی۔ اوہ اک ایسے پاکستانی صحافی’ مصنف تے ٹی وی اینکر سن جہناں نوں تحقیقاتی صحافت وچ مہارت حاصل سی۔ اوہناں نے برطانیہ سنے قومی تے بین الاقوامی خبر رساں اداریاں لئی ملک وچ بہت سارے سیاسی واقعات دا احاطہ کیتا۔ 23مارچ 2019 نوں اوہناں نوں صدر علوی نے صحافت وچ اوہناں دی خدمات تے پرائیڈ آف پرفارمنس نال وی نوازیا۔ اے آر وای نیوز اتے پاور پلے دے میزبان ارشد شریف سن۔ اج کل اوہ بول نیوز نال جڑے سن۔ ارشد شریف نے اے اے جے نیوز وچ بطور نیوز ڈائریکٹر خدمات انجام دتیاں۔ دنیا ٹی وی دی نیوز ٹیم دی بطور ڈائریکٹر نیوز تے پروگرام ”کیوں” دے میزبان دی قیادت وی کردے رہے۔ ارشد شریف کراچی وچ پاک بحریہ دے اک کمانڈر محمد شریف دے ہاں پیدا ہوئے۔ اوہناں نے اپنے صحافتی کیرئیر دا آغاز 1993وچ اک فری لانس دے طور تے کیتا جدوں اوہ اجے طالبعلم سن اوہناں نے قائداعظم یونیورسٹی اسلام آباد توں پبلک ایڈمنسٹریشن وچ ماسٹر آف سائنس دی ڈگری حاصل کیتی۔ ارشد شریف دے والد کمانڈر محمد شریف دا مئی 2011 وچ آرمڈ فورسز انسٹی ٹیوٹ آف کارڈیالوجی وچ جدوں انتقال ہویا تے ارشد شریف دے چھوٹے بھراں میجر اشرف شریف والد دی نماز جنازہ وچ رلت لئی آ رہے سن تے دہشت گرداں دی فائرنگ توں اوی وہ شہید ہو گئے۔ اک ای دن کمانڈر محمد شریف تے میجر اشرف شریف پیو پتر نوں پورے فوجی اعزاز دے نال سپردخاک کردتا گیا۔ ارشد شریف آج نیوز دے ڈائریکٹر نیوز وی رہے۔ اوہناں نے 2011وچ ڈان نیوز دے بیوروچیف دے طور تے کم کیتا۔ اوہناں دی پہلی میڈیا ملازمت ہفتہ وار اشاعت پلس دے نال سی جتھے اوہناں نے 1999 وچ کالم نگار ‘ رپورٹر تے منیجنگ ایڈیٹر دے طور تے خدمات انجام دتیاں۔ ارشد شریف نے 1999وچ دی نیوز تے 2001وچ ڈیلی ڈان وچ شمولیت اختیار کیتی۔ ارشد شریف نے دفاع تے خارجہ امور وچ مہارت دے نال قبائلی علاقیاں وچ تنازعات اتے وی بہت خوبصورت رپورٹنگ کیتی۔ پاکستان توں باہر لندن’ پیرس’ اسٹراسبرگ تے کیل توں معروف پاکستانی خبر رساں اداریاں لئی رپوڑٹنگ کردے رہے ۔ ارشد شریف نے بطور اینکر پروگرام پاور پلے لئی 2016 دے انویسٹی گیٹو جرنلسٹ آف دی ائیر دا ایوارڈ وی جتیا۔ 2018 وچ ارشد شریف نے کرنٹ افیئر اینکر آف دی ائیر دا ایوارڈ جتیا۔ ارشد شریف نے 2014 وچ اے ار وائی نیوز اتے اپنا پروگرام پاور پلے شروع کیتا سی جہڑا بڑی چھیتی عوام دا سب توں مقبول پروگرام بن گیا۔ اوہناں دے پروگرام وچ ناظرین نوں بحث کرن دے بجائے نویں معلومات دین اتے توجہ دتی گئی۔ سینئر صحافی تے اینکر پرسن ارشد شریف تحقیقاتی صحافت وچ جاندار تجزیاں تے ملکی حالات اتے اپنی بے لاگ تحقیقاتی رپورٹاں دے حوالے نال جانے جاندے سن۔ ارشد شریف نے ہمیشہ نڈر تے بے باک صحافی ہون دا ثبوت دتا تے کدی کسی دھمکی توں مرعوب یا خوفزدہ نہیں ہوئے۔ اوہ تحقیقاتی صحافت وچ جاندار تجزیاں تے ملکی حالات اتے اپنی بے لاگ تحقیقاتی رپورٹاں دے حوالے نال جاندے سن اوہناں نے اے آر وائی نیوز اتے سیاستداناں دی کرپشن نوں بے نقاب کیتا۔ عسکری امور اتے وی اوہناں دی گہری نظر سی۔ا وہ فوج دے دہشت گرداں دے خلاف آپریشنز نوں موثر انداز وچ پیش کردے سن۔ ارشد شریف کینیا وچ حادثے دے نتیجے وچ شہید ہو گئے نیں۔پاکستان وچ شہید ہون والے صحافیاں بارے جے رپورٹ ملاحظہ کیتی جاوے تے 1990توں لے کے 2020تک تقریباً 2658 صحافیاں نوں قتل کیتا گیا اجے کجھ مہینے پہلے لہور پریس کلب دے سامنے حسنین شاہ نوں وی سرے عام قتل کر دتا گیا۔ اسیں اپنے صحافیاں نوں تحفظ دین وچ نکام رہے ۔ جہڑے نظام نون بدلن دی گل ارشد شریف کردا رہیا اوہ نہ بدل سکیا۔ الٹا اوہ اپنی جان توں چلا گیا ایتھے اقتدار دے حصول لئی 75 ورھیاں توں چہرے بدلدے رہے نظام نہیں بدل سکیا؟ ملک اتے 35 سال جرنیلاں تے باقی عرصہ پی پی’ مسلم لیگ تے پی ٹی آئی نے حکومتاں کیتیاں تے اسیں پاکستان نوں رہن دے قابل نہیں بنا سکے ایتھے جہنے عوام دے خون پسینے اتے ڈاکے مارن والیاں نوں بے نقاب کیتا اوتھے اوہنوں قتل دی دھمکیاں ملنا شروع ہو گئیاں۔ کجھ لوک تے پاکستان وچ مار دتے گئے تے جہڑے اپنی جان بچا کے باہر نس گئے اوہ کسی حد تک محفوظ رہے جہڑے ایتھے رہ رہے نیں اوہ اک انجانے جئے خوف وچ مبتلا نیں۔ بعض اوقات تے انج محسوس ہوندا اے کہ ملک وچ سوائے موت دے ہر چیز مہنگی ہو چکی اے حالانکہ پاکستانی قدرتی وسائل تے معدنیات نال مالا مال اے لیکن ایماندار تے صالح قیادت نہ ہون دی وجہ نال ملک دا بچہ بچہ مقروض اے۔ بعض ویلے تے انج لگدا اے کہ ملک دے سارے حکمران استعمار دے غلام نیں تے ایتھے غلاماں دی بستی اے۔ عوام دی اکثریت خط غربت توں تھلے زندگی گزارن تے مجبور اے۔ لکھاں دی تعداد وچ نوجوان ڈگریاں پھڑے بے روزگار پھر رہے نیں۔پانامہ لیکس تے پنڈورا پیپرز وچ ملوث لوکاں دا یکساں احتسا ب ہوندا تے کرپشن دا رستہ بند ہو سکدا سی تے فیر کسی نوں ملک چھڈ کے جان دی لوڑ وی نہیں پینی سی۔ حکمراناں نوں وی اک دن آخرت وچ اللہ دے سامنے جوابدہ ہونا پووے گا۔ کرپشن’ لٹ مار تے مفادات دی سیاست دی وجہ نال لوکاں دا اعتماد جمہوری نظام توں اٹھ رہیا اے۔ ایس توں پہلاں کہ دیر ہو جاوے سانوں اپنے آپ نوں بدلنا ہووے گا۔