ایف اے ٹی ایف۔۔ اہم ترین کامیابی

پاکستان دا ایف اے ٹی ایف دی گرے لسٹ توں نکلنا پیرس وچ ایف اے ٹی ایف دے دو روزہ اجلاس مگروں تنظیم دے صدر ولوں باضابطہ اعلان کیتا گیا اے کہ پاکستان نوں گرے توں وائٹ لسٹ وچ منتقل کیتا جا رہیا اے۔ ایہہ یقینی طور تے اک بہت وڈی کامیابی تے خوشخبری اے کیوں جے پچھلے چار سال توں ودھ عرصہ توں پاکستان بین الاقوامی سطح اتے منی لانڈرنگ دی روک تھام لئی قائم ایس اہم تنظیم دی گرے لسٹ وچ سی جہدی بنا اتے سانوں بہت ساری معاشی مشکلات دا سامنا سی۔ تنظیم دے صدر دے مطابق پاکستان نے دِتے گئے 34نکات اتے عملدرآمد کر لیا اے جہدی بنا تے اجلاس
وچ پاکستان نوں وائٹ لسٹ وچ پان دا فیصلہ کیتا گیا اے۔ ایف اے ٹی ایف نے مختلف ملکاں نوں تن طرحاں دی کیٹیگریز وچ رکھیا ہوندا اے جہڑی بلیک’ گرے تے وائٹ کہلاندیاں نیں۔ پاکستان نوں جون 2018 وچ گرے لسٹ وچ شامل کیتا گیا سی ۔ پچھلے چار سال توں ودھ عرصہ وچ پاکستان دی حکومت تے سارے متعلقہ اداریاں نے بھرویں محنت کیتی تے ایف اے ٹی ایف ولوں دتے گئے 34نکات اتے عملدرآمد نوں یقینی بنایاجہدے مگروں ہن ایہہ فیصلہ کیتاگیا اے ۔ ایف اے ٹی ایف نے اپنے جولائی دے اجلاس وچ پاکستان نوں گرے لسٹ توں کڈن دا اصولی فیصلہ تے کر لیا سی مگر اوہنوں زمینی حقائق دا جائزہ لین نال مشروط کردتا سی۔ ستمبر وچ ایف اے ٹی ایف دی اک ٹیم نے پاکستان دا چار روزہ دورہ کیتا تے ایس دوران مختلف محکمیاں تے حکام نال تفصیلی ملاقاتاں کیتیاں جہدے مگروں اپنی مفصل رپورٹ ایف اے ٹی ایف دے اعلیٰ حکام نوں بھجوائی۔ تنظیم دے دو روزہ اجلاس وچ ایس رپورٹ دا تفصیلی جائزہ لین مگروں اوہنوں تسلی بخش قرار دیندے
ہوئے فیصلہ کیتا گیا کہ پاکستان نے چونکہ بڑی محنت مگروں می لانڈرنگ تے انسداد دہشتگردی دے حوالے نال کیتے گئے 34نکات اتے عملدرآمد مکمل کر لیتا اے لہٰذا ہن اوہنوں گرے توں وائٹ لسٹ وچ منتقل کیتا جاندا اے۔ تنظیم دے صدر راجہ کمار نے آکھیا کہ پاکستان وچ ہن منی لانڈرنگ تے ات گردی دے خلاف موثر کم ہو رہیا اے تے ٹیم نے وی ایسے گل دی تصدیق کیتی اے کہ نہ صرف بہت ساری اصلاحات کیتی گئیاں نیں بلکہ حکومت تے سارے متعلقہ ادارے ایسے گل اتے پرعزم نیں کہ معاشرے وچ منی لانڈرنگ تے ات گردی دے خلاف Zero Tolerance دی پالیسی ہونی چاہیدی اے۔
ایف اے ٹی ایف منی لانڈرنگ دے خلاف دنیا وچ سب توں موثر تے بااختیار تنظیم اے جہدے ورکنگ گروپ وچ 206 ارکان ہوندے نیں جہناں دا تعلق دنیا دے مختلف مالیاتی تے انتظامی اداریاں نال ہوندا اے جہناں وچ ورلڈ بینک’ آئی ایم ایف’ اقوام متحدہ تے انٹر پول وغیرہ شامل نیں۔ پاکستان اتے مختلف حوالیاں نال منی لانڈرنگ تے ات گردی دے الزامات لگدے رہے نیں تے انج کرن وچ ہندوستان ہمیشہ پیش پیش رہیا اے تاں جے دنیا نوں پاکستان بارے شکوک و شبہات وچ مبتلا کر کے ساڈے خلاف معاشی پابندیاں لگوائی جان۔ پچھلے چار سال توں ودھ عرصے دے دوران پاکستان نے ایف اے ٹی ایف ولوں کیتے گئے 27 نکات جہناں
مگروں ودھا کے 34 کر دتا گیا نوں ایڈریس کرن لئی بہت کم کیتا۔ ایس سلسلے وچ وزارت دفاع’ خزانہ’ داخلہ تے خارجہ نے بہت زیادہ محنت کیتی۔ ایہناں نکات اتے عملدرآمد نوں یقینی بنان دی بنیادی ذمہ داری پاک فوج دے ملٹری آپریشنز ڈائریکٹوریٹ نوں سونپی گئی تے ڈی جی ایم او نوں فوکل پرسن بنایا گیا۔ ساڈے قومی اداریاں دا کردار سب توں اہم تے قابل ستائش رہیا اے۔ ایہہ یقینا اک مشکل تے تھکا دین والا کم سی تے ایہدے وچ وزارت خزانہ نے وی بہت محنت کیتی۔ چونکہ بہت سارے معاملات وچ اصلاحات نوں قنونی شکل دین لئی پارلیمنٹ توں قنون سازی ضروری سی جو کہ ملک وچ موجودہ سیاسی تقسیم تے انتشار دے کارن اک ناممکن جیا کم لگدا سی۔ ایس سلسلے وچ قومی سلامتی دے اداریاں دی محنت تے کوشش نال حزب اختلاف نے بھرواں تعاون کیتا تے اپنی سیاست نوں پس پشت رکھ کے قنون سازی وچ تعاون کیتا جس وجہ نال بہت سارے قنون بنانا تے کجھ وچ ترامیم کرنا ناممکن ہو سکیا۔ مذہبی جماعتاں دا تعاون وی قابل ستائش رہیا اے۔ ایہدے توں اک گل ثابت ہو گئی اے کہ جے اخلاص تے نیک نیتی ہووے تے کوئی کم وی ناممکن نہیں۔ایہہ صرف حکومت یا کسی اک ادارے دی کامیابی نہیں بلکہ پاکستان دی بحیثیت ریاست کامیابی اے جہدے اتے سارے متعلقہ ادارے تے حکام مبارکباد دے مستحق نیں۔ ایس سلسلے وچ پاک فوج دا کردار بالخصوص بہت اہم تے فیصلہ کن اے۔
بے شک ایہہ ساڈی اک بہت وڈی سفارتی کامیابی اے جہدے مثبت اثرات بڑی چھیتی نظر آنا شروع ہو جان گے۔ امید اے کہ ہن بہت سارے عالمی مالیاتی ادارے تے تنظیماں وی پاکستان دے نال مالی معاملات زیادہ سنجیدہ تے اطمینان نال طے کر سکن گئیاں۔ ایف اے ٹی ایف دے اعلامیہ دے مطابق سانوں ایسے طرحاں کم کردے رہن دی لوڑ اے کیوں جے مانیٹرنگ بہرحال جاری رہوے گی۔ کوئی وی حکومت ہووے اوہنوں چاہیدا اے کہ حزب اختلاف نال رل کے ملک وچ باہمی رواداری تے تعاون دا ماحول پیدا کرے۔