سیاست دا نواں موڑ

17جولائی مگروں 16اکتوبر دے ضمنی الیکشن نے پاکستانی سیاست نوں اک نویں موڑ تے کھڑا کر دتا اے۔ سیاست دے ایس مشکل ترین موڑ تے گل کرن توں پہلاں تھوڑا جیہا جائزہ لے لیے کہ آخر انج کیوں ہویا؟ ستاراں جولائی نوں پنجاب اسمبلی دیاں 20 سیٹاں تے الیکشن ہویا سی اوس الیکشن وچ دھونس دھاندلی دے سارے حربے استعمال کرن دے باوجود پی ڈی ایم تن سیٹاں جتن وچ کامیاب ہوئی سی تے اوہناں تن سیٹاں وچوں وی دو تے چنگا بھلا رولا پیا سی۔ مظفرگڑھ دی صوبائی سیٹ دے حوالے نال پریذائیڈنگ افسر نے جو بیان دتا سی اوہ ای کافی اے۔ راولپنڈی وچ کہوٹہ کلرسیداں والی سیٹ تے ضد بنی رہی تے کسے ضد پاروں جتدے ہوئے کرنل شبیراعوان دے رزلٹ روک کے راجہ صغیر نوں جتوا دتا گیا۔ راجہ صغیر نے انتخابی مہم دوران مبینہ طور تے کھلے عام پیسے ونڈے پر پتہ نہیں کیوں الیکشن کمیشن نے چپ وٹی رکھی۔ پر ہاں لودھراں توں اک آزاد امیدوار جت کے ن لیگ دا حصہ بن گیا سی۔ ایس طرح سارے حربیاں دے باوجود پی ڈی ایم نکام ہو گئی سی تے تحریک انصاف نے سولاں سیٹاں حاصل کیتیاں سن۔
ہن جدوں 16 اکتوبر دا ضمنی الیکشن ہویا اے تے قومی اسمبلی دیاں اٹھ وچوں چھ سیٹاں پی ٹی آئی دے حصے وچ آئیاں نیں جد کہ پی ڈی ایم دے پلیٹ فارم توں پیپلزپارٹی دو سیٹاں لے اڑی اے۔ عمران خان نے نواں ریکارڈ قائم کیتا اے اوہ اک ای وقت وچ چھ سیٹاں توں جتے نیں۔ ایس توں پہلاں اوہ 2018ء دے الیکشن وچ پنج سیٹاں توں جتے سن۔ ذوالفقار علی بھٹو نے وی 1970ء وچ پنج سیٹاں تے الیکشن لڑیا سی پر اوہ چار سیٹاں جت سکے سن۔ اک سیٹ تے بھٹو ڈیرہ اسماعیل خان توں مفتی محمود توں ہر گئے سن۔ کافی چر بعد بھٹو دی دھی بینظیر بھٹو نے وی اک توں ودھ سیٹاں توں الیکشن لڑیا تے پشاور توں حاجی غلام احمد بلور نے بینظیر بھٹو نوں ہرا دتا سی۔ اک توں ودھ سیٹاں توں الیکشن لڑن دا شوق میاں نوازشریف نوں وی سی۔ جدوں اوہناں نے الیکشن لڑیا تے ملتان توں یوسف رضا گیلانی نے نوازشریف نوں ہرا دتا سی۔
ہن اسیں 16 اکتوبر نوں ہون والے ضمنی الیکشن دا جائزہ لینے آں۔ بینظیر بھٹو نوں ہران والے غلام احمد بلور دا مقابلہ عمران خان نال سی۔ پشاور دا ایہ حلقہ پرانے شہر تے مشتمل اے قصہ خوانی’ نمک منڈی’ ہشت نگری تے گل بہاریہ اوہ علاقے نیں جتھے پشاوری بولی جاندی اے یعنی ہندکو’ ایہناں علاقیاں وچ رہن والے پشاوری نیں ایہناں دا پختوناں توں رہن سہن تھوڑا وکھرا ضرور اے۔ خیر حاجی غلام احمد بلور نے الیکشن لڑیا پوری پی ڈی ایم اوہناں دے نال سی پر اوہ عمران خان توں اک وڈے مارجن توں ہر گئے۔ چارسدہ وچ پی ڈی ایم دے امیدوار اے این پی دے ایمل ولی سن۔ ایہ ایمل ولی دا آبائی حلقہ اے ایمل ولی لئی اوہدے والد نے اڈی چوٹی دا زور لایا ماضی دے سب توں وڈے مخالف مولانا فضل الرحمن نے وی ایمل ولی دی حمایت وچ جلسے کیتے پر ایہ سب کجھ ایمل ولی نوں نہ بچا سکیا تے اوہ عمران خان توں ہر گئے۔ مردان توں سابق ایم این اے مولانا قاسم نوں عمران خان دے مقابلے وچ اتاریا گیا سی اوہناں نوں اے این پی’ پیپلزپارٹی تے مسلم لیگ ن توں علاوہ شیرپائو تے دوجیاں دی حمایت وی سی پر مولانا قاسم عمران خان توں ہر گئے۔ ننکانہ صاحب وچ عمران خان دے مقابلے وچ پی ڈی ایم نے ن لیگ دی ڈاکٹر شذرہ منصب نوں اتاریا سی ڈاکٹر شذرہ دے والد رائے منصب لماں عرصہ ایم این اے رہے۔ ایہ علاقہ ن لیگ دا سمجھیا جاندا اے۔ ڈاکٹر شذرہ منصب ہر گئیاں۔ فیصل آباد توں عمران خان دا مقابلہ عابدشیرعلی کر رہے سن۔ تن واری ایم این اے رہن والے عابدشیرعلی وزیر وی رہے اوہناں دے والد چوہدری شیرعلی ایم این اے توں علاوہ فیصل آباد دے میئر رہے۔ نوازشریف دے قریبی رشتے دار ہون دی وجہ نال پارٹی وچ واہوا مقبول نیں۔ رانا ثناء اللہ وی اوہناں دی حمایت لئی فیصل آباد وچ گھمدے رہے پر رانا ثناء اللہ ذاتی یونین کونسل وی ہار گئے تے عابدشیرعلی دی ذاتی یوسی وی ہار توں نہ بچ سکی۔ ایتھوں وی عمران خان جت گئے۔
ملتان توں علی موسیٰ گیلانی پیپلزپارٹی ولوں پی ڈی ایم دے امیدوار سن اوہناں دے مقابلے وچ مہربانو قریشی پی ٹی آئی ولوں الیکشن لڑ رہیاں سن۔ ایتھوں علی موسیٰ گیلانی جت گئے تے مہربانو قریشی ہر گئیاں۔ علی موسیٰ گیلانی یوسف رضا گیلانی دے سب توں پسندیدہ بیٹے نیں۔ آپ یوسف رضا گیلانی وزیراعظم رہے’ سپیکر قومی اسمبلی رہے۔ ضلع کونسل دے چیئرمین وی رہے ایسے لئی اوہناں دے دیہی علاقیاں وچ بڑے رابطے نیں ایتھے پی ڈی ایم دے سربراہ مولانا فضل الرحمن وی جلسے لئی آئے۔ یاد رہوے کہ مولانا فضل الرحمن ملتان وچ پڑھدے رہے نیں۔ ایس حلقے توں ن لیگ دے سابق ایم این اے غفار ڈوگر نوں وزیراعظم دا معاون خصوصی بنا کے کہیا گیا کہ علی موسیٰ گیلانی نوں جتوانا اے۔ ایس حلقے دے پرانے ایم این اے جاوید ہاشمی بڑھاپے تے بیماری دے باوجود علی موسیٰ گیلانی دی مہم چلاندے رہے۔ موسیٰ گیلانی نے لوکاں دے بجلی دے بل وی جمع کروائے فیر بینظیر انکم سپورٹ پروگرام توں وی لوکاں نوں خوب نوازیا۔ مہربانو قریشی بھاویں شاہ محمود قریشی دی صاحبزادی نیں پر اوہ کراچی وچ رہندیاں نیں۔ مخالفین ولوں ایس پراپیگنڈے توں علاوہ ایہ وی کہیا گیا کہ مہربانو جتے گی تے استعفیٰ دیوے گی تے موسیٰ جتے گا تے وزیر بنے گا۔
حالیہ نتیجیاں نے پی ڈی ایم دیاں باقی جماعتاں دی سیاست تے ختم کر دتی اے پر اک سوال اوہناں دے سامنے رکھ دتا اے کہ پیپلزپارٹی نوں کدھروں محبت تے حاصل نہیں؟ پی ٹی آئی دی وڈی فتح نے سیاست نوں نویں تے مشکل موڑ تے کھڑا کر دتا اے جتھے ساریاں لئی سوال ای سوال نیں۔٭