آپ بڑا وڈا دہشت گرد اے

جے تسیں ایس ملک وچ سیاستدان بننا اے تے تہانوں چوری’ بے ایمانی’ ڈاکہ زنی’ راہزنی’ جھوٹ’ کرپشن’ رسہ گیری’ قبضہ گیری’ اغوا برائے تاوان’ منشیات فروشی وچ وسیع تجربہ ہونا چاہیدا اے۔ ایہدے بعد تہانوں امریکہ دی غلامی وچ ہر اوہ حربہ آنا چاہیدا اے جو امریکہ چاہوے گا۔ جناب ایس سلسلے وچ تسیں دو مثالاں ملاحظہ فرمائو تے حالات حاضرہ تے غور کرو۔
کرنل صاحب نے یونٹ دی وزٹ دوران صوبیدار میجر صاحب نوں لے کے میس دا وزٹ کیتا تے پچھیا کہ اج میس وچ کیہ پکیا اے صوبیدار میجر صاحب بولے۔ سر اج کریلے پکے نیں کرنل صاحب بولے واہ اج بڑی چنگی سبزی پکی اے مینو ںبڑی پسند اے صوبیدار میجر صاحب کہن لگے سر مینوں وی بڑی پسند اے جس دن ایہ سبزی پکے میں صرف کریلے ای کھانا واں نال روٹی نہیں کھاندا کرنل صاحب گھر گئے تے اوتھے وی کریلے پکے سن الغرض کرنل صاحب نوں دو دن لگاتار کریلے کھانے پئے تے چڑ گئے۔ اگلے وزٹ تے جدوں کرنل صاحب میس گئے تے پچھیا کیہ پکایا اے تے صوبیدار میجر صاحب جوش نال بولے سر کریلے پکے نیں۔ کرنل صاحب نوں غصہ آ گیا کہن لگے ایہ واہیات سبزی اج فیر پکائی ہوئی اے۔ صوبیدار میجر صاحب بولے سر اللہ سمجھائے ایہناں میس والیاں نوں مینوں ذرا وی چنگی نہیں لگدی کرنل صاحب حیران ہو کے بولے صاحب اوس دن تے تسیں کہہ رہے سی مینوں بڑے چنگے لگدے نیں صوبیدار میجر نے کس کے سلیوٹ کیتا تے بولے سر اسیں نوکری تہاڈے نال کرنی اے کریلیاں دے نال نہیں۔
رفیق ڈوگر صاحب کالم نگار دوست نیں۔لمے عرصے توں وکھووکھ اخبارات وچ کالم لکھدے نیں تے ماشاء اللہ چنگا لکھدے نیں۔ اوہ اپنی کتاب دید شنید وچ لکھدے نیں اک مراثی اک نواز انگریز افسر دے دربار وچ نوکری لئی حاضر ہویا تیرا ناں؟ ملازم نواز نے پچھیا نورعلی ملازمت پسند نے جواب دتا۔ باپ دا ناں؟ دادا قائم علی قوم’ میرزادے مذہب’ جوگاں دے چوہدری صاحب دا اے میراثی نے جواب دتا۔ انگریز جوہرشناس سی۔ میرزادے نوں نوکری مل گئی۔ سال چھ مہینے بعد اوس افسر نوں واپس جانا پیا۔ جاندی واری اوہنے نویں افسر دے کول میرزادے دیاں صلاحیتاں دی بڑی تعریف کیتی۔ دوجے دن اوہنے میرزادے نوں سدیا تے فیر توں انٹرویو لینا شروع کیتا۔
تیرا ناں: ابن سرکار میراثی نے جواب دتا۔
باپ دا ناں؟ موتیاں والی سرکار
قوم: میراثی نے ہتھ بنھدے ہوئے جواب دتا کوئی نہیں
افسر نے حیران ہو کے پچھیا’ ایہ کیہ گل ہوئی؟
بندہ پرور سرکار دی کوئی قوم نہیں ہوندی کدی اوہ کسے قوم نال ہوندی اے تے کدی کسے نال’ ایس لئی ابن سرکار دی وی کوئی مستقل قوم نہیں ہو سکدی۔ میراثی نے جواب دتا تے فیر قوم دے خانے وچ کیہ لکھاں؟ افسر نے پچھیا قوم دے خانے وچ نسل لکھ لوو حضور میراثی نے ہتھ بنھ کے جواب دتا۔
کیہ نسل لکھاں؟ سرکاری نسل میراثی نے اک واری فیر ہتھ بنھ دتے تے افسر نے خانہ پری شروع کر دتی۔ مذہب: اسیں سرکار دی امت آں میراثی نے جواب دتا۔کہندے نیں اوس میرزادے نے بڑی لمی ملازمتی عمر پائی تے جدوں اوہ چلن پھرن دے قابل نہ رہیا تے حکومت نے اوہنوں جاگیر عطا کر دتی۔
دوستو! اسیں امریکہ دے نال رہنا اے تے نوکری وی امریکہ دی کرنی اے۔ امریکہ جے سانوں کہے رات اے تے سانوں رات کہنی پوے گی۔ ساڈی کیہ جرأت کہ اسیں کہہ دیئے کہ دن اے۔ ساڈی کیہ مجال کہ جوبائیڈن نوں اوہدی گل دا جواب دے سکیے۔ ساڈے وچ تے اینی جرأت نہیں کہ اسیں امریکہ نوں صرف ایناں کہہ دیئے کہ توں بذات خود یعنی امریکہ دنیا بھر دا دہشت گرد ملک اے۔ کتھے کتھے امریکہ نے اپنے خطرناک ہتھیار استعمال نہیں کیتے۔ جاپان دے شہر ناگاساکی توں لے کے عراق تے کشمیر تک اوہدی مداخلت رہی اے حالاں کہ نائن الیون دے واقعے وچ امریکہ آپ شامل سی تے نائن الیون دا حادثہ امریکہ دا اپنا گھڑیا واقعہ اے۔ ساڈیاں حکومتاں تے سرکار دیاں حکومتاں نیں سانوں نسل در نسل اوہناں دا غلام کرن تے تلیاں ہوئیاں نیں تے آپ جاگیراں سمیٹن تے لگیاں نیں۔ ایہناں عقل دے انھیاں نوں ایناں نظر نہیں آندا کہ امریکہ آپ بہت وڈا دہشت گردا اے۔٭