شورش کاشمیری تے تحریک ختم نبوت

شورش کاشمیری نوں ساڈے توں رخصت ہوئے 47ورھے دا عرصہ لنگھ چکیا اے۔ اوہناں دا تعلق کسے جاگیردار یا سرمایہ دار گھرانے نال نہیں سی۔اوہ اک غریب خاندان دے چشم و چراغ سن لیکن اپنی بے پناہ جرات’ قلم تے زبان دی بے مثال صلاحیتاں تے جابر حکمراناں دے سامنے اپنے کلمۂ حق کہن دے مسلسل جہاد دے کارن شورش کاشمیری اپنے ہم عصر صحافیاں وچ سب توں منفرد تے سب توں مختلف سن۔ قیام پاکستان توں پہلاں انگریز سامراج دے خلاف تحریک آزادی وچ شورش کاشمیری نے جہڑی بہادری تے بے خوفی دے نال اپنا کرادر ادا کیتا سی تے اوہناں نوں قیدو بند دے دوران جہناں روح فرسا مصائب تے حکومتی جبرو تشدد دا سامنا کرنا پیا۔ ایسی مثالاں جدوجہد
آزادی دی تریخ وچ گھٹ ای ہون گئیاں۔ قیام پاکستان مگروں وی ہر دور وچ شورش کاشمیری تقریراں تے تحریراں دے ذریعے سچ کہن دی اپنی روایتاں نوں برقرار رکھیا تے اوہ ایہدی پاداش وچ کئی واری قیدوبند دی آزمائشاں توں گزرے۔ اوہناں دے ہفت روزہ چٹان نوں کئی واری ضبط کیتا گیا لیکن حق گوئی تے بے باکی دے پیکر شورش کاشمیری نے اپنی جان نوں خطرے وچ پا کے وی حق و صداقت دے جھنڈے نوں اُچا رکھیا۔ جے مسئلہ ناموس رسالتۖ دے تحفظ دا ہووے یا عقیدہ ختم نبوت دی حفاظت لئی جدوجہد دا تے فیر شورش کاشمیری تیغ بدست تے کفن بردوش ہو کے میدان وچ نکل آئے سن۔ رسول پاکۖ دی محبت وچ ہر سچے مسلمان وانگوں شورش کاشمیری دا وی پوری زندگی ایہہ نصب العین رہیا کہ
نہ جب تک کٹ مروں میں خواجہ یثرب کی عزت پر
خدا شاہد ہے کامل میرا ایماں ہو نہیں سکتا
ایہہ عشق رسولۖ ای سی جہنے شورش کاشمیری نوں اوہناں دی حیاتی دے آخری ساہ تک اک جھوٹے مدعی نبوت دے پیروکار قادیانیاں دے خلاف سرگرم عمل رکھیا۔ ذوالفقار علی بھٹو دے دور وچ پارلیمنٹ دے ذریعے قادیانیاں نوں غیر مسلم اقلیت
قرار دوان وچ شورش کاشمیری دی مسلسل تے پیہم جدوجہد تحریک ختم نبوت دی تریخ دا اک روشن ترین باب اے۔ شورش کاشمیری دے نال تحریک ختم نبوت دے دوران (1974ئ) میری اکثر ملاقاتاں ہوندیاں سن۔ قادیانیاں دے آئینی طور تے غیر مسلم قرار دتے جان مگروں اوہ اپنے نال ملن والیاں نال انتہائی مسرت تے فخر نال ایہہ گل بات کیتا کردے کہ میرے وچ بہت ساری کوتاہیاں ہون گئیاں۔ میرے گناہ وی حدو شمار وچ نہیں ہون گے لیکن اللہ تعالیٰ نے مینوں تے میرے ساتھیاں نوں قادیانیات دے خلاف جہاد کرن دی جہڑی توفیق دتی۔ اوہدے انعام دے طور تے میرا یقین اے کہ ساڈا رب سانوں آخرت وچ اپنے محبوب تے آخری نبیۖ دے قدماں وچ ضرور جگہ دیوے گا۔ سچی گل وی ایہہ اے کہ عقیدہ ختم نبوت دے منکرین’ اسلام غداراں تے انگریزاں نے خود کاشتہ تے جھوٹے نبی دے گمراہ پیروکاراں دے خلاف شورش کاشمیری دا زندگی بھر دا جہاد اوہناں لئی سب توں بہتر سامان آخرت ثابت ہووے گا۔ اک ادیب دے بقول شورش کاشمیری دی زندگی دے دو ای نصب العین سن۔ اک انگریز سامراج کولوں آزادی حاصل کرنا تے دُوجا عقیدہ ختم نبوت دے منکراں نوں قرآن و سنت دے چانن وچ پارلیمنٹ دے ذریعے غیر مسلم قرار دوانا۔ اللہ تعالیٰ نے شورش کاشمیری نوں جہنی وی صلاحیتاں نال نواز رکھیا سی اوہ ساری اوہناں نے ایہناں دو مقصداں لئی وقف کر دتیاں سن۔ قدرت حق نے شورش کاشمیری نوں ایہناں دونواں ای مقصداں وچ کامیابی تے کامرانی عطا فرمائی۔
شورش کاشمیری قادیانیت دے خلاف علامہ اقبال دی تحریراں تے مضموناں توں بہت متاثر سن۔اوہناں نے عقیدہ ختم نبوت دے موضوع اتے علامہ اقبال دی ساری تحریراں نوں مرتب کر کے اک کتاب دی صورت وی شائع کیتا سی۔ علامہ اقبال نے انگریز حکمراناں کولوں وی قادیانیاں نوں غیر مسلم قرار دین دا مطالبہ کیتا سی لیکن انگریز سامراج کیوں جے خود قادیانی فتنے نوں جنم دین والے سن ایس لئی علامہ اقبال دے سو فیصد درست مطالبے نوں وی انگریز حکومت دے زمانے وچ پذیرائی حاصل نہیں ہوئی۔ شورش کاشمیری نے علامہ اقبال دے افکار و تعلیمات دے چانن وچ قادیانیت دے خلاف اپنی جدوجہد جاری رکھی۔ مسلمان مجموعی طور تے وی عقیدہ ختم نبوت دے حوالے توں بہت حساس نیں کیوں جے عقیدہ ختم نبوت اسلام دی بنیاد اے۔ 1974 وچ جدوں پورے پاکستان وچ تحریک ختم نبوت دا اک نویں جوش و جذبہ نال آغاز ہویاتے ساری اسلامی جماعتاں دے مشترکہ پلیٹ فارم توں مسلماناں دا ایمان افروز کردار لائق صد تحسین سی۔ لیکن تحریک ختم نبوت وچ کلے شورش کاشمیری دا جو حصہ سی اوہ ہمیشہ لئی اسلام دی تریخ وچ سنہرے حرفاں وچ محفوظ ہو چکیا اے۔
1974 دی تحریک ختم نبوت وچ شورش کاشمیری نے سید عطا اللہ شاہ بخاری تے مولانا ظفر علی خاں دی جانشینی دا صحیح معنیاں وچ حق ادا کردتا سی۔ اوہناں نے قادیان دے جھوٹے مدعی نبوت دی اصل حقیقت نوں بے نقاب کرن لئی ”قادیانی محاسبہ کمیٹی” دے نام توں جہڑی تنظیم قائم کیتی سی اوہدے پلیٹ فارم توں مینوں وی ضلع سیالکوٹ وچ کم کرن دا موقع میسر آیا سی ۔ شورش کاشمیری دی تحریراں تے تقریراں توں متاثر ہو کے پورے پاکستان وچ ہزاراں تے لکھاں نوجوان تحریک ختم نبوت دے جانباز تے جاں فروش سپاہی بن چکے سن۔ میں ذاتی طور تے اپنی زندگی دی آخری ساہ تک شورش کاشمیری دا احسا مند رہواں گا کہ اوہناں نے مینوں وی منکرین ختم نبوت دے خلاف عمر بھر جہاد کرن والے قافلے وچ شامل کر کے ایس قابل بنا دتا اے کہ اسیں اج وی قادیانی فتنے دے خلاف اوسے طرحاں سرگرم عمل آں جیویں 47سال پہلاں شورش کاشمیری دی قیادت وچ اسیں تحریک ختم نبوت وچ اپنے حصے دا کردار ادا کیتا سی۔
قادیانی گروہ دے پس منظر نوں صحیح طور تے سمجھن لئی اج دی نوجوان نسل نوں وی شورش کاشمیری تے اوہناں دے روحانی مرشد علامہ اقبال دی تحریراں دا مطالعہ کرنا چاہیدا اے۔ قادیانیت دے حوالے نال شورش کاشمیری دا ایہہ نقطۂ نظر سانوں اپنے دل ودماغ اتے ہمیشہ لئی نقش کر لینا چاہیدا اے کہ قادیانیت کوئی مذہب نہیں اے۔ ایہہ اک سیاسی گروہ اے جہڑا انگریز سامراج نے اپنی اک لوڑ دے تحت ایجاد کیتا سی۔ قادیانیت دا اصل بانی مرزا غلام احمد قادیانی نہیں سی بلکہ خود انگریز حکمران سن جہناں نے مسلماناں دے دِلاں توں جذبۂ جہاد ختم کرن لئی قادیانی فتنے دی بنیاد رکھی سی۔ مرزا قادیانی نے خود اپنی تحریراں وچ وی ایس حقیقت دا اعتراف کیتا اے کہ اوہ انگریزاں دا خود کاشتہ پودا اے۔ قادیانی گروہ دا اک ای مقصد سی کہ مسلماناں دی صفاں وچ انتشار پیدا کر کے گورنمنٹ برطانیہ دے ہندوستان وچ اقتدار نوں دوام تے استحکام بخشیا جاوے۔ ایہو وجہ اے کہ علامہ اقبال نے قادیانیاں نوں ملت اسلامیہ دا غدار قرار دتا سی۔
ویسے تے قادیانیاں نوں غیر مسلم اقلیت قرار دوان لئی پیر مہر علی شاہ’ سید عطااللہ شاہ بخاری ‘ علامہ اقبال تے مولانا ظفر علی خاں جئے اکابرین نے اپنے اپنے دائرے وچ تریخ ساز کردار ادا کیتا سی مگر تحریک ختم نبوت دے آخری دور وچ شورش کاشمیری دے قلم تے زبان دی آتش فشانی نے قادیانیت دے خوفناک چہرے نوں بے نقاب کرن دا حق ادا کردتا سی۔ جہدے نتیجے وچ قادیانیاں دا سیاسی خرمن راکھ دا ڈھیر بن گیا۔