ولیم ویلس تے ٹیپو سلطان دیاں تلواراں

ایبرڈین شمال ول برطانیہ دا آخری وڈا شہر اے۔ بھاویں ایہدے بعد اُتلی سمت کئی چھوٹے چھوٹے شہر تے قصبے موجود نیں پر اوہ شہر والی گل نہیں۔ برطانیہ وچ شمال ول جاندے جائو ٹھنڈ ودھدی جاندی اے۔ ایڈنبرا توں ڈنڈی تے فیر اوتھوں ایبرڈین ول جاندے ہوئے ٹھنڈ ودھدی گئی۔ ایبرڈین توں واپسی تے میں نصراقبال دے اصرار دے باوجود باں رکے گلاسگو جانا چاہندا سی پر نصراقبال نے بڑے ٹیکنیکل طریقے نال مینوں ڈنڈی شہر دے وچکاروں گزرن تے قائل کر لیا۔ اسیں شہر دے اندروں جدوں ساحل سمندر نال جڑی سڑک توں گزر رہے تے نصراقبال نے کھبے پاسے کھڑے اک قدیم بادبانی جہاز ول اشارا کردے ہوئے دسیا کہ ایہ ڈسکوری اے۔ تن بادبانی مستولاں تے مشتمل لکڑی دا ایہ روایتی جہاز برطانیہ وچ بنن والا اپنی نوعیت دا آخری جہاز اے۔ 1900ء وچ برطانوی حکومت نے ایہنوں دنیا دے دوجے سرے توں جنوبی سمندر (بحرانٹارکٹکا) وچ سائنسی تحقیق لئی اپنی تحویل وچ لے لیا۔ ایہ ایس سلسلے وچ اپنی نوعیت دا پہلا رائل ریسرچ شپ قرار پایا۔ ایہ جہاز دو ورھے تک انٹارکٹا وچ سائنسی تحقیق دے سلسلے وچ جس مہم تے گیا سی اوہنوں Discovery Expendition دا ناں دتا گیا سی۔ ہن ایہ جہاز تے ایہدے سامنے موجود ایہدا عجایب گھر لوکاں دی دلچسپی دا مرکز اے۔
ڈنڈی توں گلاسگو جاندے ہوئے گلاسگو توں تھوڑا پہلے سڑک توں تھوڑا ہٹ کے مشہور و معروف سڑلنگ کاسل اے میں کجھ ورھے پہلاں ایس قلعے نوں ویکھ چکیا سی۔ ایہ قلعہ سکاٹ لینڈ دی آزادی دی جدوجہد وچ بڑا اہم مقام رکھدا اے۔ ایس قلعے تے نظر پئی تے سرولیم ویلس دا خیال آیا۔ سکاٹ لینڈ دی جنگ آزادی دا ہیرو تے اپنے مقصد نال وابستگی دا اک ناقابل فراموش کردار 1270ء وچ سکاٹ لینڈ وچ پیدا ہون والے ولیم ویلس نوں صرف پینتی ورھے دی عمر وچ 23اگست 1305ء نوں لندن وچ سمتھ فیلڈ وچ پھاہے لا دتا گیا۔ اوہنوں پہلے پھاہے لایا گیا فیر اوہدے مردانہ اعضاء وڈھ کے وکھرے کیتے گئے تے ساڑے گئے’ اوہدا ڈھڈ پاڑیا گیا’ بعد وچ اہودا سر کٹن دے بعد اوہدے باقی جسم نوں چار حصیاں وچ کٹیا گیا۔ اوہدے سر نوں تارکول مَل کے لندن برج تے لمکا دتا گیا تے اوہدے جسم دے چار حصیاں دی نیوکاسل پرتھ بروک تے سٹرلنگ وچ نمائش کیتی گئی تاں جے لوکاں نوں عبرت حاصل ہووے۔
ولیم ویلس نوں اصل شہرت سٹرلنگ برج والی جنگ توں حاصل ہوئی۔ 11ستمبر 1297ء نوں ہون والی ایس جنگ وچ سکاٹش فوج دی قیادت ولیم ویلس تے اینڈریو مورے کر رہے سن جد کہ انگلینڈ دی فوج دی قیادت جان وارن کر رہیا سی۔ ایس جنگ وچ سکاٹ لینڈ دی فوج دی گنتی چھ ہزار دے نیڑے جد کہ انگلینڈ دی فوج دی گنتی باراں’ تیراں ہزار سی۔ ایس جنگ وچ انگلینڈ دی فوج نوں بری طرح شکست ہوئی تے اوہدے تقریباً پنج ہزار فوجی مارے گئے۔ جنگ توں پہلاں ولیم ویلس نے اپنی فوج نال خطاب کردے ہوئے کہیا کہ اسیں ایتھے امن قائم کرن لئی نہیں سگوں جنگ لڑن آئے آں اپنے دفاع دی جنگ تے اپنی مملکت نوں آزاد کروان دی جنگ’ ایس جنگ دے بعد ولیم ویلس نوں گارڈین آف دی کنگڈم آف سکاٹ لینڈ دا عہدہ دتا گیا۔ ایہ عہدہ اوہنوں سکاٹ لینڈ دے بادشاہ جان بیلیول نے دتا۔
24,23 جون 1314ء نوں ہون والے معرکہ بانوک برن نے سکاٹ لینڈ دی آزادی تے مہر لا دتی۔ اک پاسے رابرٹ دی بروس دی قیادت وچ اٹھ ہزار جنگجو سن تے دوجے پاسے ایڈورڈ دوم دی قیادت وچ انگلینڈ دے ویہہ ہزار فوجی سن۔ ایس جنگ وچ سکاٹ لینڈ دی فوج دا جانی نقصان اک سو دے نیڑے دسیا جاندا اے جد کہ دوجے پاسے انگلینڈ دے ست سو نائٹس یعنی زرہ بکتر والے جنگجو تے یاراں ہزار سپاہی مارے گئے جد کہ پنج ہزار فوجی قیدی بنے۔ دو دن تک جاری رہن والی ایس جنگ نے انگلینڈ دی عسکری طاقت دا لک بھن دتا۔ اگلے اک ورھے وچ رابرٹ دی بروس نے ڈنبار جیڈبرگ بوتھ ویل تے دوجے قلعے وی فتح کر لئے۔ ایہناں فتوحات وچ رابرٹ نے انگلینڈ دے درجناں معززین نوں قیدی بنا لیا۔ اوہناں دے تبادلے وچ انگلینڈ دے بادشاہ ایڈورڈ دوم نے رابرٹ دی بروس دی بیوی الزبتھ’ بھین میری بروس’ دھی مارجوری بروس تے بشپ آف گلاسگو نوں اوہناں دی اٹھ سالہ قید دے بعد واپس کیتا۔
جس طرح سکاٹ لینڈ دی آزادی دے ہیرو ولیم ویلس دے مجسمے’ فوٹواں تے ہتھیار وغیرہ سارے سکاٹ لینڈ وچ تھاں تھاں وکھائی دیندے نیں اوسے طرح برصغیر پاک و ہند تے برطانوی قبضے دے خلاف مزاحمت دی آخری نشانی ٹیپو سلطان دیاں ذاتی شیواں برطانیہ بھر دے ریاستی تے نجی عجایب گھراں وچ کھلریاں پئیاں نیں۔ انگلینڈ’ سکاٹ لینڈ تے ویلز وچ درجن بھر توں ودھ عجایب گھراں وچ لوکاں دی ذاتی ملکیت وچ ٹیپو سلطان دیاں تلواراں’ خنجر’ بکتر’ توپاں’ ریاستی مونو گرام شیر نال وابستہ چیزاں تے دوجیاں درجناں شیواں عجایب گھراں وچ موجود نیں۔ ایہناں وچوں کئی تلواراںتے دوجیاں شیواں نوادرات دے شوقین حضرات نے نیلامی وچ خرید لئیاں نیں۔ تقریباً دو عشرے پہلاں ایڈنبرا دے تریخی قلعے وچ ٹیپو سلطان دیاں پنج عدد تلواراں ہوندیاں سن جو ہن اوتھے موجود نہیں۔ میرے اک کول فوٹو پئی اے جہدے وچ اوس شوکیس دے نال کھڑا واں جہدے وچ ایہ پنج تلواراں موجو دنیں۔ میرے کول ہن صرف ایہ فوٹو اے تے ایہناں تلواراں دیاں یاداں نیں۔٭٭