عزمی تے قلم دے وَین

کوئی وی لکھاری دوجے انساناں توں کوئی وکھری مخلوق تے نہیں ہندا،پر رب سائیں نے اوہنوں جیہڑی”تِیجی اکھ” نال نوازیا ہندا اے،اوہ اوس نوں دوجے عام انساناں توں خاص تے وکھرا جہیا کردیندی اے۔لکھاری اِک حساس تے ڈونگھی سوچ رکھن والا انسان ہندا اے،ملنساری،پیار محبت تے ایکتا دے جذبے دی مٹھاس اپنے اکھراں وچ بھر کے سماج دے لوکاں تیک شرینی دی طرحاں ونڈن نوں حیاتی دا مقصد خیال کردا اے۔لکھاری میل ملاپ تے محبت دے جذبیاں دے دریا دی مچھی ہندا اے۔پیار محبت تے امن شانتی اوہدے چوفیرے کِھنڈدی رہوے تے اوہ پانی وچ موجاں ماردی مچھی وانگ خوش خوش حیاتی گزاردا رہندا اے۔معاشرتی کوجھاں، منافقتاں تے مکدیاں ہوئیاں قدراں نوں ویکھ کے اوہ اندروں مکن لگ پیندا اے۔توڑ بھن تے وکھ وچھوڑا اوس توں جریا نہیں جاندا۔اوہدا حال بِن پانی دے مچھی وانگوں ہوجاندا اے۔ اوہنوں کسے وی انسان،شے یاں تھاں ٹکانے دی جدائی بہت متاثر کردی اے۔لکھاری تے لغراں توں جھڑدے ہوئے پتیاں نوں ویکھ کے ہِجر خیالِیں ڈب جاندا اے،تے دل پھڑ کے بہہ جاندا اے۔تے پھر اوس توں انسان دی جدائی دا دکھ کِسراں جرن ہوسکدا اے۔اجیہے حساس تے کومل انسان نوں جدائی دا احساس لوہندا تے ساڑدا بھندا رہندا اے۔کسے انسان دا وچھوڑا تے اک پاسے، اوہنوں جغرافیائی تبدیلیاں تے منظراں دے اودھریویں تے دکھ وی مرن والا کر چھڈدے نیں۔ ایس حساسیت تے کوملتا دِیاں ایہ ساریاں صِفتاں مریدکے وسدے اردو پنجابی شاعر پروفیسر تنویر حسین عزمی دے اندر بھرویاں مِلدیاں نیں۔
پروفیسر تنویر حسین عزمی مریدکے جمے تے پھیر ایتھوں اک لمے ویلے لئی سمندری چک نمبر 50 وچ چلے گئیے اوتھے اک عرصہ رہن مگروں اک واری پھیر مریدکے پرت آئے۔ ایسراں دو تھانواں دے مشاہدے، یاداں،چیتے ،احساس تے رویے اوہناں اپنے دل دماغ وچ کِسراں کٹھے کیتے،ایدھر دیاں یاداں اودھر تے اودھر دیاں یاداں ایدھر ہو چکیاں نوں اوہناں کِسراں کٹھا کیتا۔ احساس دیاں ٹوٹے ٹوٹے ہوئیاں پاٹیاں تصویراں نوں نقش نال نقش میل کے کِسراں سِدھا تے پورا کیتا اوہ ای جان دے نیں۔تے ایہ اک وکھری جہئی اوکھت اے۔اوہناں دی کتاب”قلم دے وین”ایس ویلے میرے سامنے ویں۔ایس کتاب وچ اوہناں پنجابی تے تھوڑی جہئی اردو شاعری وی شامل کیتی اے۔بوہتیاں غزلاں تے تھوڑیاں نظماں نیں۔فہرست توں مگروں اوہناں کتاب دا مڈھ بنھ دے ہوئے”اپنی گل”دے سرناویں نال اپنے بارے کچھ تعارفی گلاں لِکھیاں نیں۔ایتھے اپنے بارے لِکھدے ہوئے اوہ ایہ آکھدینیں کہ”مریدکے جمنا تے چک نمبر 50 سمندری وچ پلنا کوئی سوکھا کم نہیں”ایتھے میں ایہ کہواں گا کہ پوری دنیا وچ کِدھرے وی جمنا اک فطری جہیا عمل اے۔حیاتی نوں اوکھتاں وچ پاون والے حیاتی دے سب مسئلے،تجربے تے مشاہدے جمن توں کِتے ورہیاں مگروں جاکے شعور سنبھالن مگروں شروع ہندے نیں۔جیہڑے انسان مشکلاں تے اوکھتاں وچ پا سکدے نیں،دکھ مصیبتاں تے ازمائشاں بال پنے توں مگروں سیانی عمرے شروع ہندیاں نیں۔جمدے سار ای تے انسان لئی کچھ وی اوکھا نہیں ہندا۔جنم لین والے انسان واستے جمنا اوکھا نہیں،اصل وچ پلنا،پالنا تے وڈے ہوکے حالات دا مقابلہ کرنا تے کِدھرے اپنا ناں مقام اچا کرنا اوکھا کم اے۔کیونکہ پلن یا پالن دے عمل وچ انسان نوں کئی اچے نِیویں تے چنگے ماڑے ویلے تے اوکڑاں دا سامنا کرنا پیندا اے۔ (جاری اے)