پِلاک ولوںنامور شاعر تے ادیب ڈاکٹر اختر شمار دا تعزیتی ریفرنس

پنجاب انسٹیٹیوٹ آف لینگوئج’ آرٹ اینڈ کلچر (پلاک)’ محکمہ اطلاعات و ثقافت پنجاب دے پربندھ ہیٹھ منے پرمنے شاعر تے ادیب ڈاکٹر اختر شمار دی یاد وچ اک تعزیتی ریفرنس دا آہر کیتا گیا جہدے وچ دانشوراں’ ادیباں تے شاعراں نے اوہناں دے نال بیتے ہوئے شب و روز نوں یاد کر کے اوہناں دی شخصیت تے فن نوں خراج تحسین و عقیدت پیش کیتا۔ اظہار خیال کرن والیاں وچ ڈاکٹر نجیب جمال، مدثر اقبال بٹ، شفیق خان، فرحت عباس شاہ، صوفیہ بیدار، زاہد حسن، ڈاکٹر خاقان حیدر غازی تے ڈاکٹر صغرا صدف شامل سن۔
ڈاکٹر نبیل جمال نے آکھیا کہ اوہناں دی تحریراں خاص طور تے شاعری توں انج لگدا سی کہ اوہ کسے گواچی ہوئی منزل دی تلاش وچ نیں جہڑی کہ اوہناں نے حیاتی دے آخری دناں وچ درویشی دی صورت وچ حاصل کر لیتی سی۔ ڈاکٹر صغرا صدف نے آکھیا کہ اوہ اپنے دوستاں دے دل دے اینے قریب سن کہ میں اوہناں دی موت اتے ہر اکھ نوں اشکبار ویکھیا۔ ڈاکٹر اختر شمار دے اندر اک ہلچل برپا سی جو کہ انسان نوں سوچن تے مجبور کردی اے کہ اوہدی حیاتی دا مقصد کیہ اے؟ اسیں مشاہدہ کیتا کہ ایس دنیا توں رخصت ہون توں پہلاں اوہ مقصد حیات حاصل کر چکے سن جتھے پہنچ کے فنا تے بقا کوئی معنی نہیں رکھدی۔
شفیق خان نے آکھیا کہ اختر شمار اک انتہائی مخلص دوست جو کہ دوجیاں دی کامیابی اتے خوش ہون والے ہر کم جہنوں اپنے لئی چنگا سمجھدے’ دوستاں نوں وی اوہدی ترغیب دیندے۔ جدوں پی ایچ ڈی کرن لگے تے آکھیا کہ اسیں دونویں رل کے ای پی ایچ ڈی وچ داخلہ لواں گے۔ فرحت عباس شاہ نے آکھیا کہ اختر شمار انتہائی متحرک تے ادب دوست انسان سن۔ اوہناں دی ساری حیاتی ادب دی خدمت کردے ہوئے لنگھی۔ اوہناں نے ادب دی ساری جہتاں اتے کم کیتا تے ہر اک وچ اپنے فن دا لوہا منوایا۔ شاعری وچ اوہناں دا رجحان غزل ول بوہتا سی۔ زاہد حسن نے آکھیاکہ شروع وچ اوہناں دا رجحان پنجابی ول نہیں سی لیکن جدوں صوفیا نوں پڑھنا شروع کیتا تے ایس قدر متاثر ہوئے کہ خود نوں وی اوسے رنگ وچ رنگ لیتا تے درویشانہ زندگی اختیار کر لیتی۔
مدثر اقبال بٹ نے آکھیا کہ جامعة الازہر چلے گئے تے میرا دفتر اوہناں دے بغیر سُونا ہو گیا۔ فیر وی اوتھوں اپنی تحریراں بھلیکھا تے ناگ منی لئی بھیجدے رہے۔اوہناں دے مکتوب نوں کتابی شکل دے دتی جاوے تے اوہ ادب دے اندر انمول وادھا ہووے گا۔
صوفیہ بیدارنے آکھیا کہ انسان اک دم نہیں مردا جدوں ساڈا کوئی قریبی مردا اے تے اسیں اوہنوں یاد کر کے خود موت دی آغوش وچ چلے جانے آں۔ غماں نوں برداشت کردے کردے اک دن دوجیاں نوں غم وچ مبتلا کر کے خود اوہناں کولوں چھٹکارا حاصل کر لینے آں۔ ڈاکٹر خاقان حیدر غازی نے آکھیا کہ اختر شمار دے نال پلاک دے آخری پروگرام وچ اسیں مشاہدہ کیتا کہ اوہ اپنی حیاتی دے لنگھے لمحیاں دا خلاصہ بیان کر رہے سن۔ اگرچہ اوہناں دی گل بات بے ربط لیکن معنی خیز سی۔ اوہناں دے اندر بہت سارے نکات سن جہڑے انسان نوں سوچن تے مجبور کردے نیں کہ انسان دا مقصد حیات کیہ اے؟