ارشد شریف شہید …عہد ساز شخصیت (دُوجا حصہ)

ارشد شریف دا قتل اجیہا اندوہناک واقعہ اے جہنوں سالاں تک نہیں بھلیا جا سکدا۔ ارشد شریف دے قتل مگروں پاکستان وچ اک خوف تے تشویش دی لہر پیدا ہو گئی اے۔ وڈے وڈے صحافی تے ارشد شریف دے نظریے نال متفق جرنلسٹ ایس ویلے خود نوں غیر محفوظ تصور کر رہے نیں تے بے چینی نال دوچار نیں۔ ارشد شریف دے قتل نوں پاکستانی میڈیا ای نہیں بلکہ اوہنوں عالمی سطح اتے وی ڈِسکس کیتا جا رہیا اے۔ واضح رہوے کہ اج امریکہ نے وی کینیا توں ارشد شریف دے قتل دی تحقیقات دا مطالبہ کیتا اے۔ ارشد شریف اک استاد صحافی سن جہڑے اپنی فیلڈ وچ اپنی ذمہ داری دا لوہا منوا چکے سن۔ ایسے حوالے نال میں تہانوں اپنی آپ بیتی دسنا واں کہ اوہ کیویں اپنی ذمہ داریاں سرانجام دیندے سن۔ارشد شریف دی 2011وچ سکھائی ہوئی گل میں اج تک نہیں بھلیا۔ ہویا کجھ انج کہ جدوں ارشد شریف صاحب ڈائریکٹر نیوز دنیا نیوز تعینات ہوئے تے اوہناں نے ایہہ ویکھن لئی کہ اسائمنٹ ڈیسک دا رویہ ‘ رپورٹراں تے دُوجے بندیاں دے نال کیسا اے تے اوہناں نے ڈیسک اتے موجود پی ٹی سی ایل نمبر اتے فون کیتا۔ کم دے برڈن پاروں میں اوہناں نوں لائٹ لیتا تے رف جواب دتا۔ اگلے دن اوہناں نے مینوں اپنے دفتر بلوایا تے آکھیا کہ لگدا اے کہ تہاڈے اتے کم دا بہت برڈن اے لہٰذا تسیں 10دن لئی چھٹی تے چلے جائو تے ذہنی طور تے ریلیکس ہوکے آنا۔ ایہہ سزا سی یا ریلیف جہدی مینوں اج تک سمجھ نہیں آئی۔ دس دن مگروں میں دوبارہ دفتر آیا تے اوہناں نے مینوں فیر بلوایا تے آکھیا کہ ایہہ کم بہت ذمہ داری والا اے۔ تہاڈا رسپونس تے رویہ بہت چنگا ہونا چاہیدا اے۔اگلی واری ایسی غلطی نہ کرنا۔ ایہہ ہوندا اے تجربہ کار ڈائریکٹر نیوز تے اک عام ڈائریکٹر نیوز وچ فرق۔ تجربہ کار استاد ایس سطح تک جا کے وی کم نوں چیک کردا اے۔
ارشد شریف وچ اک ہور خوبی وی سی اوہ اک ایسے صحافی سن جہڑے سنی سنائی گلاں اتے نہیں بلکہ دستاویزات تے ثبوتاں اتے یقین رکھدے سن۔ ہرخبر تے پروگرام وچ کوئی وی ایشو ڈسکس کرن توں پہلاں اوہ اوہدا مصدقہ ریکارڈ کڈواندے’ اوہدا چنگی طرحاں مطالعہ کردے’ بھرویں جانچ پڑتال مگروں اوہنوں اپنے پروگرام تے ٹویٹ دا حصہ بناندے سن۔ پاکستان وچ ارشد شریف جئے نڈر’ بے باک’ محنتی’ محب وطن تے جرات مند صحافی بہت گھٹ نیں۔ ایہہ اوہناں صحافیاں وچ شامل سن جہناں نے بہت گھٹ عرصے وچ بڑا نام کمایا۔
ارشد شریف نوں کہنے ڈرا دھمکا کے پاکستان تون باہر جان تے مجبور کیتا ایہہ اک وڈا سوال اے؟ جہدے جواب دی تلاش ہر پاکستانی نوں اے۔ ارشد شریف اتے دبائو پایا گیا تے ملک دے کئی تھانیاں وچ سنگین نوعیت دے مقدمات درج کر کے اوہناں اتے زمین نوں تنگ کیتا گیا۔ اوہناں نوں نامعلوم افراد نے دھمکیاں دتیاں۔ سچ لکھن توں منع کیتا تے اوس ویلے پاکستان وچ کسے سیاستدان نے ارشد شریف دے حق وچ آواز بلند نہیں کیتی لیکن ہن جدوں اوہ ایس دنیا توں رخصت ہو گئے تے ہر سیاست دان اپنی سیاست چمکان لئی ارشد شریف دی شہادت نوں اپنے مقاصد لئی استعمال کر رہیا اے۔
ارشد شریف دی شہادت بہت وڈا واقعہ اے ۔ گل اظہار افسوس توں اگے ودھنی چاہیدی اے۔ حکومت نوں ارشد شریف دے اصل قاتلاں تک پہنچنا چاہیدا اے لیکن حکومت بجائے انکوائری کروان دے صرف بیاناں تک محدود اے۔ جہڑا کم حکومت نوں کرنا چاہیدا سی اوہ پاک فوج کر رہی اے۔ افواج پاکستان نے ہمیشہ پاکستان نوں بحراناں’ آفتاں تے ناگہانی صورتحال توں کڈیا اے جہدی جنی وی تعریف کیتی جاوے گھٹ اے۔ پاک فوج نے غم دی ایس گھڑی وچ ارشد شریف دے پرستاراں لئی اک امید جگا دتی اے۔اج ڈی جی آئی ایس پی آر نے گل بات کردیاں ہوئیاں سینئر صحافی ارشد شریف دے قتل اتے اظہار تعزیت کیتا تے دسیا کہ ارشد شریف دے قتل اتے انکوائری کمیشن بنان لئی آئی ایس پی آر نے حکومت نون خط لکھیا اے۔ لیفٹیننٹ جنرل افتخار بابر دا کہنا سی کہ اج جی ایچ کیو ولوں حکومت پاکستان نوں درخواست کیتی گئی اے ایس معاملے دی اعلیٰ سطحی تحقیقات کیتیاں جان۔ ایس معاملے اتے قیاس آرائیاں تے الزام تراشی افسوسناک اے۔ بار بار کوئی نہ کوئی بہانہ بنا کے ادارے تے نام لا کے الزام تراشی کیتی جاندی اے۔ پاک فوج دے ایس اہم اقدام مگروں صحافی برادری پرامید اے کہ ارشد شریف دے اصل قاتلاں تک پہنچ کے اوہناں دے اہلخانہ نوں انصاف فراہم کیتا جاوے گا۔پاک فوج زندہ باد ، پاکستان پائندہ باد