پاکستان دی معاشی صورتحال تے عوام

اک پاسے ملک وچ معاشی عدم استحکام تے بے یقینی دی صورتحال ودھدی چلی جا رہی اے۔ اک غیر سرکاری سروے دے مطابق ملک وچ 60فیصد پاکستانی بہتر مستقبل دی امید ختم کر چکے نیںجو کہ حکمراناں دی بدترین کارکردگی دی عکاسی کردی اے جد کہ دُوجے پاسے نکام معاشی پالیسیاں دے نتیجے وچ پاکستان اتے واجب الادا قرضیاں دا حجم 49ہزار 200ارب توں تجاوز کر چکیا اے۔ جون دے اختتام تے غیر ملکی قرضہ 18ہزار 160 ارب روپے سی ۔ حقیقت ایہہ ہے کہ ملکی معیشت نوں درپیش خطرات توں محفوظ بنان تے عوام نوں ریلیف فراہم کرن لئی اتحادی حکومت دے کول کوئی معاشی ایجنڈا ای نہیں۔ مہنگائی نے سارے اگلے پچھلے ریکارڈ توڑ دتے نیں۔ جے اسیں غیر جانبداری نال ویکھیے تے
مسلم لیگ’ پیپلز پارٹی تے تحریک انصاف نے عوام ولوں دتے گئے مینڈیٹ دی توہین کیتی اے تے لوکاں نوں سوائے مایوسی دے کجھ نہیں دتا۔ میڈیا دی رپورٹ دے مطابق قرضیاں وچ ہوشربا وادھے مگروں ہر پاکستانی پونے دو لکھ روپے دامقروض ہو چکیا اے۔ ہن اطلاعات آ رہیاں نیں کہ آئی ایم ایف ولوں 600 ارب روپے دے ہور ٹیکس لان دا حکم وی صادر کردتاگیا اے جہنوں فی الحال تے حکومت نے منن توں انکار کردتا مگر اسیں ایہہ گل جاننے آں کہ آئی ایم ایف اپنی گل منوا ای لیندا اے۔ المیہ ایہہ اے کہ قوم نوں گمراہ کردے ہوئے خودداری تے خودانحصاری دا بھاشن دین والیاں نے ملکی معیشت دا بیڑہ غرق کر کے رکھ دتا اے۔ پورے دا پورا معاشی نظام ای آئی ایم ایف دے کنٹرول وچ دے دتا گیا اے۔ چالوں سال25 فیصد افراط زر دی وجہ
نال جی ڈی پی دا تناسب طے شدہ سطح توں تھلے رہن دی پیش گوئی کیتی جا رہی اے جہدے مگروں اداریاں لئی متعین اہداف دا حصول وی اوکھا ہو چکیا اے۔ آئی ایم ایف دی سخت ترین شرطاں اتے پاکستانی حکمراناں ولوں من و عمل عملدرآمد نے عملاً زندگی اجیرن بنا دتی اے۔انج محسوس ہوندا اے کہ جیویں اتحادی حکومت عوام دی ترجمانی تے اوہناں نوں تحفظ فراہم کرن دے بجائے آئی ایم ایف دے ایجنڈے دی تکمیل لئی کم کر رہی اے۔ اج ملک و قوم جہڑے نہج اتے پہنچ چکی اے اوہدے وچ تنوں جماعتاں دا برابر دا کردار اے۔ اسیں جدوں تک اپنے حقیقی نمائندیاں نوں اقتدار وچ نہیں لیاواں گے اوس ویلے تک ایہہ بہروپیے مختلف شکلاں تے لبادے بدل کے آندے رہن گے۔ پاکستان دے وزیر خزانہ اسحاق ڈار دا روس نال تیل خریدن
توں پہلاں امریکہ نوں آگاہ کرن دا بیان شرمناک اے۔ حکمراناں نے ملک و قوم دی عزت’ وقار’ سلامتی نوں مجروح تے خودمختاری امریکی غلامی وچ دے دتا اے۔ واضح ہو گیا اے کہ پاکستان دے وزیر خزانہ دی سوچ غلامانہ اے تے ایسی سوچ دے حامل لوکاں کولوں ملک و قوم نوں خیر دی توقع نہیں۔ فیول ایڈجسٹمنٹ دی مد وچ آئے دن بجلی دے بلاں وچ وادھا کیتا جا رہیا اے۔ بھاری بھرکم بلاں نے عوام دیاں چیخاں کڈوا دتیاں نیں۔ آف پیک آور فی یونٹ دا ریٹ 16 روپے توں ودھ کے 26 تے پیک آور دا ریٹ 29روپے ہو گیا اے۔ بلاں وچ آئے دن بے تحاشا وادھے دی صورت وچ حکومت نے عوام اتے مسلسل قہر برسان دا سلسلہ جاری رکھیا ہویا اے۔ عوام کولوں وصول کیتے جان والے بجلی دے بلاں اتے سارے ٹیکس دی شرح تقریباً 22فیصد تک سی جد کہ حالیہ وادھے
نال عام صارفین لئی ایہہ شرح 30فیصد فی یونٹ تک پہنچ گئی اے۔ عوام اپنے گھراں داراشن خریدن دے بجائے بجلی دے بل ادا کرن تے مجبور نیں۔سرکاری اداریاں دی نجکاری دی خواہش رکھن والے غریب عوام نوں دو وقت دی روٹی تے روزگار توں وی محروم کرنا چاہندے نیں۔ جے حکمران ادارے ٹھیک نہیں کر سکدے’ اداریاں توں کرپشن دا قلع قمع نہیں کر سکدے تے اوہناں نوں منافع بخش نہیں بنا سکدے تے اوہناں کولوں ملک چلان دی امید کیویں کیتی جا سکدی اے؟۔ ملک وچ معاشی استحکام لئی سودی معاشی نظام دا خاتمہ کرنا ہووے گا۔سودی نظام سارے مسائل دی بنیادی جڑ اے۔ پاکستان دا ٹیکسٹائل سیکٹر ملکی معیشت وچ ریڑھ دی ہڈی دی حیثیت رکھدا اے جہدا ملک دی مجموعی ایکسپورٹ وچ 60 فیصد’ مینو فیکچرنگ سیکٹر وچ ملازمتاں وچ 40فیصد
تے ملکی جی ڈی پی وچ 8.5 فیصد حصہ اے۔ ایہہ صنعت 15ملین افراد نوں ملازماتاں فراہم کردی اے مگر حکمراناں دے عاقبت نا اندیش فیصلیاں دے کارن ہر سیکٹر تباہی وَل گامزن اے۔ 45فیصد عوام سطح غربت توں تھلے زندگی گزارن اتے مجبورنیں۔ آئی ایم ایف دی غلامی نوں قبول کرن وچ تحریک انصاف تے اتحادی حکومت دونویں برابر دے مجرم نیں۔ دونواں نے عوام دی مشکلان وچ وادھے دے سوا کجھ نہیں کیتا۔ اک غیر سرکاری ادارے دی تحقیقاتی رپورٹ دے مطابق بجلی تے گیس دی مسلسل لوڈشیڈنگ دے کارن ملک وچ 300توں ودھ ٹیکسٹائل یونٹس بند ہون دے کول نیں جہدے توں 300ملین ڈالرز ماہانہ ٹیکسٹائل دی ایکسپورٹ وچ کمی ہووے گی۔
اداریاں نوں سیاسی دبائو دے ذریعے
انتقامی سیاست لئی استعمال کرن دی روش ٹھیک نہیں۔ اپنی منشا دے برخلاف فیصلیاں اتے اداریاں نوں تنقید دا نشانہ بنانا تے چڑھائی کرنا قابل مذمت اے۔ ساری سیاسی جماعتاں نوں سیاسی بالغ نظری دا مظاہرہ کرنا چاہیدا اے۔ بیک ڈور مذاکرات دے اعتراف توں ثابت ہو گیا اے کہ چیئرمین تحریک انصاف اک واری فیر اقتدار وچ آن لئی چور دروازہ استعمال کر رہے نیں۔ ایہہ بوہا ساریاں لئی تے ہمیشہ لئی بند ہونا چاہیدا اے۔ اگرچہ خبراں موصول ہو رہیاں نیں کہ بیک ڈور مذاکرات وچ ڈیڈلاک آ چکیا اے تے خان صاحب دبائو ودھان لئی لانگ مارچ دا اعلان وی کر چکے نیں جہڑا شروع ہو گیا اے۔ عمران خان نے اپنا آخری پتہ وی ہن سٹ دتا اے۔ ویکھنا ایہہ اے کہ حکومت ایس لانگ مارچ دے نال کیہ سلوک کردی اے۔