سلیم خان گِمی ہوراں دِیاں دو کتاباں دا مُکھ وکھالی اکٹھ

معروف براڈکاسٹر، پنجابی شاعر تے ادیب سلیم خان گِمی دِیاں دو کتاباں ”چن عربوں چڑھیا ” تے ”تین مشن(بال ادب)”دی مکھ وکھالی گمی ٹی وی یوکے تے نجم فیلوز دی سانجھ نال نجم فیلوز سٹوڈیوز اندر ہوئی۔ ایس مکھ وکھالی دِیاں آہری برطانیہ وچ مقیم شگفتہ گِمی لودھی سن جِناںایہ تقریب اپنے کینیڈا وچ وَسن والے بھرا توصیف سلیم خان دے لہور پنجاب آون دے اعزاز وچ کیتی۔توصیف سلیم خان پیشے دے اعتبار نال مکینیکل انجینئر نیں ،لہور انجنئیرنگ یونیورسٹی دے ڈگری یافتہ تے پچھلے 25 سال توں ٹورنٹو وچ وَسدے پئے نیں ۔اونہاں دیاں دو کنیڈین سپتریاں ماہم توصیف تے دعا توصیف نیں ہی تقریب دے پردھان مدثر اقبال بٹ جی نوں گلدستے دے کے جی آیاں نوں آکھیا ۔توصیف ہوراں دی شریک حیات اور سلیم خان گمی جی دی چھوٹی بہو فاطمہ توصیف نے وی تقریب وچ شرکت کیتی۔ پروفیسر توقیر سلیم خان سابق پرنسپل گورنمنٹ سائنس کالج تے نفسیات دان سلیم خان گمی ہوراں دے وَڈے پُتر تے شگفتہ گمی لودھی ہوراں دے بھرا نے وی ایس تقریب وچ رلت کیتی ۔او آجکل لہور دِیاں نمایاں یونیورسٹیاں وچ پروفیسر دے فرائض ادا کر رہے نیں ۔ اونہاں دی شریک حیات نازیہ توقیر ،سابق پرنسپل گورنمنٹ گرلز کالج ٹھو کر نیاز بیگ تے اجکل پروفیسر اردو دے فرائض سرانجام دے رہیاں نیں ۔سلیم خان گمی دے بھانجے پروفیسر اعظم خان جیڑے جی سی یونیورسٹی وچ پروفیسر آف فلاسفی نیں اوہناں وی رَلت کیتی تے اپنے خیالات دا اظہار کردے ہوئے سلیم خان گِمی ہوراں نوں خراج عقیدت پیش کیتا۔
سلیم خان گِمی ہوراں دے وَڈے پُتر پروفیسر توقیر خان گِمی ہوراں اپنے والد دِیاں یاداں سانجھیاں کردیاں آکھیا ساڈے والد صاحب دی حیاتی دا مشن ای پنجابی رہتل، روایات تے بولی دا فروغ سی۔ اوہناں نے پنجابی ادب وچ وکھو وَکھ پکھاں وچ لکھیا تے اوہناں دا سب توں وَڈا کم سیرت دی کتاب ” چن عربوں چڑھیا” اے۔ اوہناں دا مزید کہنا سی کہ جدوں پروفیشنل لائف وچ آئے تے اوہناں دا دِتا سبق ہمیشہ یاد رہیا۔ اوہناں دا کہنا سی کہ میرے واسطے ایس توں وَڈی خوش قسمتی ہور کوئی نہیں کہ مینوں آخری ویلے تیکر اپنے والد صاحب دی خدمت کرن دا موقع ملیا۔
سلیم خان گمی ہوراں دے نِکے پُتر توصیف سلیم خان ہوراں آکھیا کہ ابا جی نال لنگھیا اک اک لمحہ میرے لئی اَنمُلا اے۔ سارے بھین بھراواں وِچوں شگفتہ گِمی ساڈے توں سبقت لے گئی تے ابا جی دے ادبی کم نوں اکٹھیاں کر کے دوبارہ پرنٹ وی کروا رہی اے تے آپ وی اوہناں دے نقش قدم اُتے چلدے ہوئے پنجابی زبان و ادب دے ودھا لئی بھرواں کم کر رہی اے۔سلیم خان گِمی ہوراں دی وَڈی نونہہ نازیہ توقیر ہوراں آکھیا کہ اوہناںمینوں ہمیشہ اپنیاں دِھیاں وانگر ای پیار دتا تے کدی ساڈے وچ کوئی فرق نہیں کیتا۔
ایناں توں اَڈ ہور مقررین وچ جھنگ یونیورسٹی دی وائس چانسلر ڈاکٹر نبیلہ رحمان، نامور شاعر استاد نصیر احمد، نوجوان شاعر مرلی چوہان، ٹی وی پروڈیوسر سروش عزیز، سندھی سیوک چانڈیو انور عزیز ، مسز فردوس نذیر(سلیم خان گمی دی بھتیجی)، صفدر ہمدانی، گرچرن سنگھ سِگو، حفیظ اللہ خان تے جی اے انجم شامل سَن۔ گل بات کرن والیاں کتاباں دے مواد تے صاحب کتاب دی حیاتی تے شخصیت اُتے بھرویں جھات پائی۔
تقریب نال آن لائن خطاب کردے ہوئے برطانیہ وچ وَسن والے محترم صفدر ہمدانی جیڑے مصطفی ہمدانی دے نشریاتی تے ادبی وارث ہو ون توں اَڈ خود وی ادب دی جانی پہچانی قد آور اور سچ دی آواز آکھن والی وڈی شخصیت نیں ،اپنیاں یاداں تے احساسات سلیم خان گِمی ہوراں بارے سانجھے کردیاں آکھیا کہ پنجابی زبان تے ادب لئی اوہناں دی خدمات بے مثال نیں۔
گر چرن سنگھ سگو جی اک شاعر ،فلم میکر ،تے چڑھدے پنجاب دے ناول کار ہن کئی ورھیاں توں برطانیہ وچ مقیم نیں،سلیم خان گمی جی نال اپنی 45 ورھیاں دیاں محبتاں تے اپنی ماتا جی تے مسز گمی جی ہوراں دِیاں یاداں اَکھاں وچ اَتھروواں نال اپنے لندن توں وڈیو پیغام راہیں کیتا۔
پنجابی سیوک تے ٹی وی پروڈیوسر سروش عزیز نے گل بات کردیاں سلیم خان گمی ہوراں دیاں کتاباں نوں سراہیا تے آکھیا کہ ساڈا مشن اے کہ پنجابی نوں پرائمری لیول توں نصاب دا حصہ بنایا جائے جس لئی ضروری اے کہ ساڈے کول زیادہ توں زیادہ پنجابی کتاباں موجود ہون، ایس لئی ساریاں نوں چاہیدا کہ ایس کم وچ اپنا حصہ ضرور پان۔
سندھی سیوک چانڈیو انور عزیز ایس تقریب وچ رلت کرن توں بعد سوشل میڈیا اتے اپنے احساسات دا اظہار ایس طرح کردے نیں
” نامور ادیب تے دانشور سلیم خان گِمی پنجابی بولی، ادب تے ثقافت نال جڑے اہم لوکاں وچ شامل نیں، اوہناں دا شمار پاکستان دے اعلیٰ براڈکاسٹرز وچ ہُندا اے۔ ایس توں زیاد ہ اہم گل ایہہ کہ اوہناں ساری عمر اپنی پنجاب دھرتی تے ایہدی رہتل، بولی تے ادب نوں اُجاگ کرن لئی وقف کیتی۔ اوہناں توں بعد اوہناں دی سپتری شگفتہ لودھی گِمی ایہہ کم اَگے ودھا رہیاں نیں۔ سلیم خان گمی نے سب توں زیادہ
پنجابی لوک ادب، لوک شاعری، لوک موسیقی، لوک دانش ، لوک کہانیاں تے لوک داستاناں نوں ریڈیو راہیں پنجاب دے کونے کونے توں اکٹھا کیتا تے فیر ادبی انداز وچ پورے پنجاب اندر پہنچایا۔ نال ای اہم کم ایہہ کیتا کہ اینوں کتابی شکل دے کے ہمیشہ لئی امر کر دِتا۔
اسلام آباد توں حفیظ اللہ خان جی جیڑے اک بہت وڈے ڈرامہ کار ،شاعر ،صداکار اور پروفیشنل انصاف کرنے والے اداریاں دے ٹرینر تے consultant نیں ،اپنیاں یاداں گمی صاحب نال وڈیو پیغام راہیں سانجھیاں کیتیاں۔
ڈاکٹر نبیلہ رحمان نے وڈیو میسج راہیں رلت کردیاں ہوئیاں آکھیا پئی پنجابی زبان وچ نبی پاک صلی اللہ علیہ وسلم دی سیرت اتے سب توں ودھیا کتاب سلیم خان گمی ہوراں نے لکھی اے ۔اسیں اینوں پنجاب یونیورسٹی دے نصاب وچ وی شامل کر لیا اے۔
استاد نصیر احمد ہوراں گل بات کردیاں آکھیا کہ شگفتہ گمی ہوراں ورگیاں دھیاں ہی اصل وچ رب دی رحمت ہوندیاں نیں جیہڑیاں ماں پیو دے جان مگروں وی اوہناں نوں زندہ رکھدیاں نیں ۔نجم فیلوز دے چیف ایگزیکٹو جی اے نجم ہوراں رَلت کرن اتے سارے پروہنیاں دا دھنوا کیتا تے آکھیا کہ اجیہاں تقریباں نجم فیلوز سٹوڈیوز وچ جاری رہن گِیاں۔
سی ای او گِمی ٹی وی یوکے تے ایس پروگرام دی آہری شگفتہ گِمی لودھی ہوراں ویڈیو پیغام وچ آکھیا کہ میرے لئی ایس توں وَڈا کوئی اعزاز نہیں کہ میں سلیم خان گِمی ہوراں دی دھی آں تے ایس توں وَدھ ایہہ کہ مینوں اوہناں دے نقشے قدم اُتے چلدے ہوئے پنجابی زبان و ادب دے ودھا لئی کم کرن دا موقع ملیا۔ سلیم خان گمی جی دی کتاب پنجاب یونیورسٹی دے نصاب وچ شامل کرن اتے اوہناں پروفیسر نبیلہ رحمان ہوراں دا شکریہ ادا کیتا۔ایس موقعے اتے چیئرمین پنجابی میڈیا گروپ مدثر اقبال بٹ ہوراں بارے اوہناں آکھیا کہ ”صحافت، پرچہ کاری، پترکاری اِک اجیہا کم اے جیہدے وچ صحافی نوں معاشرے دی نبض اتے ہتھ رکھ کے چلنا پیندا اے۔ یعنی صحافی دراصل معاشرے دا ڈاکٹر ہوندا اے جنھے نہ صرف معاشرے نوں لگے روگاں نوں سامنے لیانا ہوندا اے سگوں اوہناں دا علاج وی تجویر کرنا ہوندا اے یعنی صحافی دا کم معاشرے نوں مختلف بیماریاں تے روگاں توں بچانا ہوندا اے۔ مدثر اقبال بٹ ہوریں نہ صرف اِک صحافی نیں، معاشرے دے نباض نیں سگوں اوہ پنجاب دی رہتل، ثقافت، تہذیب دا استعارہ وی نیں۔ اوہ پنجاب ہائوس دے سرپرست ہی نہیں سگوں اوہ میرے وَرگیاں سیکڑاںہزاراں نمانیاں دے سرپرست وی نیں ۔ اوہناں دی موجودگی میری وَرگیاں نوں حوصلہ دیندی اے کہ اوہ جانوراں دے معاشرے وچ سر چک کے اپنا تخلیقی تے تحقیقی سفر جاری رکھ سکن۔ اوہناں دی موجودگی وچ ادیب دا بھیس وٹائے ٹکے مارو تے وارداتیاں نوں ہمت نہیں ہوندی کہ اوہ اپنی واردات کر سکن۔ میرے واسطے مدثر اقبال بٹ جی اِک باپ، وڈے بھرا وَرگے نیں جنھاں میری ہر موقعے تے حوصلہ افزائی کیتی تے اج میں اپنے باپ سلیم خان گمی ہوراں توں بعد اپنا تخلیقی سفر جاری رکھے ہوئی آں۔”
تقریب دے اخیر اتے پردھان مدثر اقبال بٹ ہوراں آکھیا کہ سلیم خان گِمی ہوراں کلیاں جو کم کیتا او کئی ادارے رَل کے وی نہیں کر سکدے۔ اوہناں لوکائی نوں پنجابی نال جوڑن دی کوشش کیتی تے ایہو ساڈا وی مشن اے۔ کیوں کہ جے لوکائی پنجابی نال جُڑ گئی، ساڈے بال پنجابی پڑھن لگ پئے تے او پنجابی صوفی شاعراں د ے کلام نوں سمجھ سکن گے۔ اگر اِنج ہو گیا تے فیر ایس معاشرے وچ محبت، امن تے بھائی چارے دی فضا ہوئے گی کیوں کہ ساڈے صوفی شاعراں اپنے کلام وچ امن دا ہی پرچار کیتا اے۔
تقریب توں بعد تمام مہماناں نوں سلیم خان گِمی ہوراں دیاں کتاباں پیش کیتیاں گئیاں تے اک قریبی نجی ہوٹل وچ پر تکلف کھانے دا اہتمام وی کیتا گیا۔