پِلاک ولوں مَنے پرمنے شاعرتے ادیب توقیر چغتائی دی کتاب دھریکاں نے پھل دی مکھ وکھالی

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربند ھ ہیٹھ منے پرمنے شاعر’ ادیب توقیر چغتائی دی کتاب ”دھریکاں نے پھل” دی تقریب رونمائی ہوئی جہدی صدارت نامور دانشور مشتاق صوفی نے کیتی۔ اظہار خیال کرن والیاں وچ پروین ملک، الیاس گھمن، راجا صادق اللہ، ثروت محی الدین، عائشہ اسلم تے ڈائریکٹر جنرل پِلاک ڈاکٹر صغرا صدف شامل سن۔
مقررین نے آکھیا کہ توقیر چغتائی دی شاعری ساڈی ثقافت دی جیندی جاگدی تصویر اے۔ منظر نگاری وچ اوہناں نوں خاص ملکہ حاصل اے۔ اوہناں دی شاعری پڑھدے ہوئے پورے ماحول دی تصویر اکھاں دے سامنے گھمن لگدی اے۔ اوہناں نے اپنی شاعری دے اندر چھاچھی لہجے دے ٹھیٹھ لفظ استعمال کیتے نیں جہڑے اج کل ساڈی روزمرہ استعمال ہون والی زبان توں متروک ہوندے جا رہے نیں۔ اوہناں دی چھوٹی نظماں دے اندر بہت وڈی وڈی گلاں لکیاں نیں۔ پنجابی شاعراں وچوں توقیر چغتائی نوں ایہہ اعزاز حاصل اے کہ اوہناں دا کلام امریتا پریتم دے رسالے ”ناگ منی” وچ تسلسل نال چھپدا رہیا اے۔ اوہناں دی شاعری پنجابی زبان لئی اک انمول وادھا اے۔
مشتاق صوفی نے آکھیا کہ اوہناں دی شاعری دے اندر لوک گیتاں دا رنگ بہت نمایاں اے۔ خواجہ غلام فرید وانگوں اوہناں نوںوی منظر نگاری وچ کمال حاصل اے۔ صنف نازک دے جذبات تے احساسات دی عکاسی بہت خوبصورت تے منفرد انداز وچ کیتی اے۔ اوہناں دی شاعری توں ذاتی طور تے مینوں کجھ سکھن نوں ملیا اے۔ ڈاکٹر صغرا صدف نے آکھیا کہ توقیر چغتائی دی شاعری پڑھ کے مینوں ایس گل اتے انتہائی خوشی محسوس ہوئی کہ اوہناں نے اپنی شاعری دے اندر ٹھیٹھ پنجابی دے لفظ استعمال کیتے نیں جہڑے ساڈے ہاں متروک ہوندے جا رہے نیں۔ ساڈی پنجابی دن بدن اردو دے کول ہوندی جا رہی اے۔ کسے وی زبان دی انفرادیت اوہدی خوبصورتی وچ وادھا کردی اے۔
گلوکار عمران شوکت علی تے علی بخش نے توقیر چغتائی دے کلام نوں ترنم دے نال پیش کر کے سامعین کولوں بھرویں داد وصول کیتی۔ ڈی جی پلاک تے مداحواں ولوں توقیر چغتائی نوں پھلاں دے تحفے وی پیش کیتے گئے۔ نظامت دے فرائض منے پرمنے شاعر افضل ساحر نے سرانجام دتے۔