آسانیاںوَنڈن والے باباجی

ایہہ ساڈی یونیورسٹی دے دناں دا واقعہ اے۔ اوہ ساڈی کلاس فیلو سی۔ قابل تے محنتی۔ ہر واری چنگے نمبر لیندی مگر ایس واری پتہ نہیں کیہ ہویا کہ محنت تے بھرویں تیاری دے باوجود وی اوہدے نمبر بہت گھٹ آگئے تے اوہ فیل ہو گئی۔ کسے ہور دے نال انج ہوندا تے شاید اوہ اوہنوں نظرانداز کر دیندا لیکن اوہدے لئی ایہہ بہت وڈا صدمہ بن گیا۔ ایس صدمے دا اوہنے ایس قدر گہرا اثر لیا کہ پڑھائی چھڈ دتی’ کھانا پینا چھڈ دتا تے یونیورسٹی آنا وی چھڈ دتا۔ اوہ زندگی توں دور ہون لگی تے ڈپریشن وچ رہندے رہندے اوہ بستر تے آ پہنچی۔ اوہدے والدین تے باقی گھر والے ایس حالت دی وجہ توں بہت پریشان سن۔
جدوں سانوںپتہ چلیا تے اسیں اوہدے گھر جا پہنچے تے اوہنوں نال لے کے اوس ویلے دے باباجی اشفاق احمد دے کول لے آئے۔ اشفاق صاحب نے مسئلے بارے پچھیا۔ اسیں دسیا کہ محنت دے باوجود اوہنوں 10وچوں 2نمبر ملے نیں تے ایس وجہ نال ایہہ شدید مایوسی وچ اے۔ اشفاق صاحب نے آکھیا:
پتر!باقی دے 8نمبر کدھرے ہو رجمع ہو گئے۔
ایہہ سننا سی کہ اوہدے چہرے اتے بشاشت آ گئی۔ اک ای لمحے وچ اوہدی مایوسی تے پریشانی ختم ہو گئی تے فیر لگ ای نہیں رہیا سی کہ کجھ لمحے پہلاں اوہ شدید ڈپریشن دی وجہ نال زندگی توں بے زار ہو گئی سی۔ کئی سالاں مگروں اوہ محترمہ مینوں ائیرپورٹ اتے ملی۔ فوراً ای کہن لگی:
قاسم بھائی! اشفاق صاحب نے ٹھیک آکھیا سی’ مینوں اللہ نے اوہ 8نمبر’ میری زندگی وچ سیکڑاں واری واپس لوٹائے نیں تے میرے اتے ایس قدر فضل کیتا اے کہ میں اوہدا شکر دی وی ادا نہیں کر سکاں گی۔ اوہدی اکھاں توں اتھرو ڈگ رہے سن۔
مایوس دلاں وچ امید دے چراغ بالنا’ ٹُٹے دِلاں نوں جوڑنا’ لوکاں دے پھٹاں اتے پیار تے محبت دا مرہم رکھنا’ اپنے دستر خوان توں کھوانا پیانا تے جان ویلے آسانی دی دعا دینا’ ایہہ اوس انسان دا خاصہ سی جہنوں دنیا اشفاق احمد دے نام توں جان دی اے۔ اشفاق صاحب نوں اج دی نسل اک رائٹر دے طور تے جاندی اے۔ اج توں 20ورھے پہلاںدی نسل اوہناں نوں مقبول زمانہ پروگرام زاویہ دے میزبان دی حیثیت نال جاندی اے۔ 40ورھے پہلاں دے لوک اوہناں نوں اک عظیم افسانہ نگار دے طور تے جاندے نیں جہناں نے ”اک محبت سو افسانے” تے ”گڈریا” جئے لازوال افسانے لکھے۔ لیکن اوہدے نال نال اشفاق صاحب دی اک پہچان ہور وی اے تے دراصل اوہو اوہناں دی بنیادی شناخت اے۔ اوہ امید ونڈن والے باباجی نیں۔ اوہ اک ایسے داستان گو نیں جہڑے اپنے انداز بیاں دے سحر وچ ہر خاص و عام نوں گھیر لیندے نیں۔ اوہ صرف کہانیاں ای نہیں سناندے بلکہ چپکے چپکے سنن والے دے ضمیر نوں بیدار کردے نیں۔ اوہنوں اخلاق تے کردار سکھاندے نیں۔ اوہدے دل نوں وطن دی محبت دی خشبو نال معطر کردے نیں۔ اوہ اوہدے اندر ہمدردی’ احساس تے دُوجیاں لئی آسانیاں پیدا کرن دا جذبہ پیدا کردے نیں تے جدوں سنن والا اوہناں دی مجلس توں اُٹھدا اے تے اوہ خود نوں بدلیا ہویا محسوس کردا اے۔
اشفاق صاحب دا تعلق پٹھان قبیلے مہمند نال سی جو کہ افغانستان وچ آباد سی۔ پتہ نہیں کیہ گل ہوئی کہ اوہناں دے آبائو اجداد نے ہجرت دا فیصلہ کیتا۔ اپنا سامان سمیٹیا تے پنجاب دے علاقے ہوشیار پور نوں اپنا ٹھکانہ بنا لیا۔ ایتھے اوہناںنے کھیتی بھاڑی شروع کیتی تے اک معیاری زندگی گزارن لگے۔ بچپن ای توں اشفاق صاحب دا رشتہ قلم تے قرطاس نال جڑ گیا سی۔ اوہناں دی وڈی بھین فرخندہ آپا نوں لکھن دا بہت شوق سی۔ اوہ معاشرتی مسائل دے متعلق لکھیا کردی تے اوہناں نے اشفاق صاحب نوں وی افسانہ نگاری ول مائل کیتا تے فیر اشفاق صاحب نے قلم دے نال ایس قدر گہرا رشتہ بنا لیا کہ لکھنا ای اوہناں دا اوڑھنا بچھونا بن گیا۔ اشفاق صاحب دا گھرانہ شروع ای توں علم نال محبت تے سیاست نال جڑیا سی۔ اوہ جوانی دی عمر وچ سن جدوں تحریک آزادی نے زور پھڑیا۔ اوہناں دناں اوہ وی اپنے ہم منڈیاں نوں لے کے نکلدے’ نعرے لاندے تے فیرا وہناں دے سامنے اک آزاد ملک دے متعلق شاندار تقریر کردے۔
جدوں پاکستان آزاد ہویا تے دُوجے لٹے پٹے مہاجراں دے نال اوہناں دا خاندان وی پاکستان آ گیا۔ اشفاق صاحب دی ذات اتے قائداعظم محمد علی جناح دی تعلیمات تے اوہناں دی فکر دا گہرا اثر سی۔ ایہو وجہ سی کہ اوہناں دے دل وچ اپنے ملک پاکستان نال بے حد محبت سی تے ایسے محبت دے زیرا ثر اوہناں نے 40ورھے تک تلقین شاہ دے نام توں اک ایسا ریڈیو پروگرام کیتا جہنوں سنن والیاں دے دِلاں نوں وطن دی محبت توں سرشار کیتا۔ اوہناں نوں معاشرتی کمزوریاں توں باخبر کیتا تے اوہناں نوں اک بہترین انسان بنن دی ترغیب دتی۔
اشفاق صاحب دی افسانہ نگاری دے چرچے ہر پاسے ہون لگے سن۔ اوہناں ای دناں اوہناں نے ریڈیو اتے کم شروع کیتا۔ شروع وچ اوہ ”ہم آ گئے” دے نام توں پروگرام کردے۔ ایس پروگرام دی خوبی ایہہ سی کہ پندرہ منٹ پہلاں جو پروگرام بھارت توں ہوندا’ اشفاق صاحب اوس پروگرام دے ذریعے اوہناں نوں اک دندان سکن جواب دیندے۔ ایہو سلسلہ اگے چل کے تلقین شاہ وچ بدل گیا۔ ایہہ ایسا پروگرام سی جہدے رائٹر وی اشفاق صاحب سن تے اوہدے وچ تلقین شاہ دے نام توں کردار وی ادا کردے سن۔ ایس پروگرام دا موضوع پاکستان سی۔ پاکستان دی سیاست’ خارجہ پالیسی’ معیشت’ معاشرتی ترقی’ ادب ‘ تریخ تے اخلاقیات’ الغرض ایتھے دے رہن والے لوکاں توں متعلق ہر پہلو نوں اوہناں نے ایس قدر دلکش تے ڈرامائی انداز وچ پیش کیتا کہ اج تک اوہدے اثرات سنن والیاں دے دل وچ محفوظ نیں۔ ایہہ اپنی نوعیت دا اوہ منفرد پروگرام سی جہنوں گینز بک آف انفارمیشن وچ دوجا نمبر ملیا۔ ایس پروگرام دے نال اشفاق صاحب دی ایس قدر دلی وابستگی سی کہ اپنی ساری توانائیاں اوہدے لئی وقف کردتیاں سن حتیٰ کہ جس دن اوہناں دے والد صاحب فوت ہو گئے تے اجے جنازہ وی نہیں پڑھیا گیا سی کہ اشفاق صاحب ساریاں کولوں لک کے اک نکڑ وچ گئے تے تلقین شاہ لئی سکرپٹ لکھن لگے۔
ایہہ اوہ زمانہ سی جدوں لوک ریڈیو نوں بڑے شوق نال سنیا کردے سن جد کہ ٹی وی کسی کسی گھر وچ ہوندا۔ ریڈیو اتے ساندار خدمات دین مگروں اشفاق صاحب نے پاکستان ٹیلی ویژن لئی وی بے مثال کم کیتا۔ اشفاق صاحب نوں اللہ نے اوہ بصیرت عطا کردتی سی کہ اوہناں دی نظر آن اولے 30,25 ورھیاں مگروں دے حالات اتے سی۔ ایہو وجہ سی کہا وہناں نے الیکٹرونک میڈیا نوں بھرواں وقت دینا شروع کیتا تے مسلسل ڈرامے لکھن لگے۔ اگرچہ اوہناں دے قریبی دوست ممتاز مفتی تے اے حمید ایس گل تے اوہناں کولوں ناخوش سن کیوں جے اوہ سمجھدے سن کہ اشفاق احمد بنیادی طور تے اک افسانہ نگار اے جہڑے اپنی صلاحیتاں نوں الیکٹرانک میڈیا وچ ضائع کر رہیا اے لیکن اشفاق صاحب جاندے سن کہ آن والے ویلے وچ الیکٹرونک میڈیا تیزی نال ترقی کرے گا تے کتاب ول لوکاں دا رجحان گھٹ ہو جائے گا تے فیر ویلے نے ثابت وی کیتا کہ ایس مرد دانا دا خیال ٹھیک سی۔ اوہناں نے ہر قومی موقع تے حب الوطنی تے مبنی بہترین ڈرامے پیش کیتے۔”برگ آرزو”تے ”ننگے پائوں” ایسے ڈرامہ سیریل سن جہڑے وطن نال محبت دے جذبات پیدا کرن وچ کمال رکھدے سن۔ ایہدے نال نال توتاکہانی’ ایک محبت سو افسانے’ حیرت کدہ تے من چلے دا سودا دا جادو اج وی لوکاں اتے طاری اے۔
زاویہ پروگرام توں اج تک لوک فیض یاب ہو رہے نیں۔ پی ٹی وی اتے کئی رسالاں تک نشر ہون والے ایس پروگرام وچ داستان گو دا کمال اپنے عروج اتے پہنچدا’ اوہ کہانی دے رنگ وچ معاشرتی موضوعات نوں ایس قدر دلنشین انداز وچ پیش کردے کہ سنن والا پوری طرحاں اوہناں دے سحر وچ گرفتار ہو جاندا۔ ایہو وجہ سی کہ ایہہ پروگرام اپنے ویلے دا مقبول ترین پروگرام بن چکیا سی۔
اشفاق صاحب دی ذات وچ عاجزی کٹ کٹ کے بھری ہوئی سی۔ پٹھان ہون دے باوجود اوہناں نے اپنے نام دے نال خان دا لاحقہ نہیں لایا۔ اردو بورڈ دے ڈائریکٹر بنن دے باوجود اوہ اپنے نام دی تختی اتے عہدہ لکھوانا نہیں چاہندے سن تے نہ ای ایس عہدے دے زعم وچ کسی اتے رعب جھاڑن دی کوشش کیتی۔ ایس مرد درویش نوں دو واری وزیر بنن دی آفر وی ہوئی لیکن مال تے عہدے دی محبت تے گویا اوہناں دی فطرت وچ ای نہیں سی’ ایس لئی صاف انکار کردتا۔ کسی نے اوہناں کولوں پچھیا کہ وزارت وچ تے بڑا چسکا اے’ فیر تسیں کیوں نہیں لیندے؟ کہن لگے:
”میں تے تیری آپا (بانو قدسیہ) کدی کدی شاہ عالمی جاندے نیں۔ اوتھے اک بڈھی سردیاں وج سرسوں دا ساگ پا کے لاندی اے۔ اسیں اوہ ساگ اوس بڈھی دے کول پیڑھیاں اتے بیٹھ کے مکئی دی روٹی دے نال کھاندے نیں جو چسکا اوس بڈھی دے پکائے ہوئے سرساں دے ساگ دا اے’ اوہ زارتاں یا امارتاں وچ نہیں اے۔
اشفاق صاحب اک خدا ترس تے ہمدرد انسان سن۔ اوہ حقیقی معنیاں وچ آسانیاں تقسیم کرن والے سن۔ اوہناں دے ماتحت کئی سارے ایسے ملازمین سن جہڑے انتہائی غربت وچ وقت گزار رہے سن۔ اشفاق صاحب ذاتی حیثیت وچ اوہناں دے نال بھرواں تعاون کردے۔ ایہہ کم اوہ ایس قدر رازداری نال کردے کہ اوہناں دے نال کم کرن والیاں تے حتیٰ کہ اوہناں دے گھر والیاں نوں وی علم نہ ہوندا۔ کہن والے کہندے نیں کہ اشفاق صاحب دے کول کوئی وی شخص جدوں اپنی کوئی پریشانی لے کے آندا تے فیر اوہ پریشانی اوہدی نہ رہندی۔ خان صاحب دی ہو جاندی تے اوہ اوہنوں حل کرن لئی کمربستہ ہو جاندے تے جدوں اوہناں دامسئلہ حل ہو جاندا تے فیر وی انج ای ظاہر کردے گویا اوہدے وچ میرا کوئی کمال نہیں’ایہہ تے بس اتفاقی طور تے ہو گیا۔
اشفاق صاحب دا ساڈے اتے اک احسان ایہہ وی اے کہ اوہناں نے سانوں بابا دی اصطلاح توں متعارف کرایا۔ اوہناں دے کول بابا اوہ نہیں اے جہڑا لمی داڑھی رکھے’ چغہ تے گلے وچ مالا پائے بلکہ ہر بابا اوہ شخص اے جہڑا دوجیاں لئی آسانیاں پیدا کردا تے اوہناں دی مشکلاں دور کردا اے۔ ایسے وجہ نال اوہ زاویہ پروگرام دے اختتام اتے ساریاں لئی ایہہ دعا ضرور کردے کہ اللہ تہانوں ساریاں نوں آسانیاں عطا فرماوے تے آسانیاں تقسیم کرن دا شرف عطا فرماوے۔
اشفاق احمد دا نام جدوں وی لیتا جاندا اے تے اوہناں دے نال بانو قدسیہ دا نام وی آندا اے۔ بانو آپا وی کمال دی مصنفہ سن۔ اوہناں نے وی ادبی دنیا وچ بے شمار ناول لکھے تے قارئین کولوں خوب داد سمیٹی۔ اشفاق صاحب تے بانو قدسیہ دی ملاقات گورنمنٹ کالج لہور وچ ہوئی۔ اوہناں دناں اشفاق صاحب دا ناول ”اک محبت سو افسانے” چھپ رہیا سی تے اوہناں نوں ایم اے اردو کرن دی بظاہر لوڑ وی نہیں سی لیکن جو تقدیر وچ لکھیا ہووے اوہ ہو کے رہندا اے۔ اشفاق احمد فیس جمع کران آئے سن تے اتفاق نال اوس ویلے بانو قدسیہ وی کلرک دے دفتر وچ ایم اے اردو دی فیس جمع کران آئی۔ایتھوں دونواں دی شناسائی ہوئی۔ خیالات آپس وچ ملے’ محبت دا جذبہ پروان چڑھیا تے ناہماور حالات دے باوجود دونواں نے ہم سفر بنن دا فیصلہ کر لیتا۔
اشفاق احمد تے بانو قدسیہ دی شکل وچ دنیا نوں اک ایسی بے مثال جوڑی ملی جہڑے صرف میاں بیوی ای نہیں سی بلکہ اوہناں نے محبت’ خلوص’ اک دوجے دا خیال رکھنا تے عزت دین دی ایسی روایت پائی جو ماضی وچ گھٹ ای ملدی اے۔ بانو آپا’ اشفاق صاحب نوں سوہر دے نال نال اپنا محسن تے استاد وی مندی سی۔ اوہ لکھدیاں نیں:
اشفاق احمد جاہندے سن کہ میرے سارے عیوب’ کمزوریاں’ غفلتاں تے Shortcomings لوکاں دی نظراں توں لکھے رہن تے میری خوبیاں نوں ہیرے وانگوں تراش کے مینوں معاشرے وچ پیش کیتا جاوے۔ میاں بیوی جے اک ای پروفیشن وچ ہون تے اوہناں نوں اپنے پروفشن وچ نمایاں مقام حاصل کرنا تے نال ای نال ازواجی زندگی نوں وی کامیابی دے نال گزارنا بڑا اوکھا ہوندا اے۔ ایسی صورت وچ یا تے بیوی اپنا پروفیشن چھڈ دیندی اے تے جے اوہ ایسے پروفیشن وچ شوہر توں اگے ودھنا چاہے تے فیر اوہناں دے ازواجی تعلقات خراب ہونا شرو ع ہو جاندے نیں لیکن اشفاق صاحب دا کمال ایہہ سی کہ اوہناں نے نہ صرف خود لکھیا بلکہ اپنی شریک حیات کولوں وی لکھوایا۔ اوہناں دی رہنمائی کیتی تے قدم قدم تے اوہناں دی حوصلہ افزائی وی کیتی جہدے پاروں بانو آپا نے بے شمار ناولاں تے افسانیاں دے نال نال راجہ گدھا جیا شاہکار ناول وی لکھیا جہنے معاشرے نوں حلال حرام دے ایسے نظریے توں متعارف کرایا جہڑا پہلاں کسے دے گمان وچ وی نہیں سی۔
اشفاق صاحب کافی عرصے تون لبلبے دے کینسر وچ مبتلا سن’ شدید تکلیف دے باوجود اوہناں نے کدی اپنے درد دا بھرواں اظہار نہیں کیتا۔ اوہ اخیر تک صابرتے شاکر رہے۔ اک رات اوہناں دا مرض شدت اختیار کر گیا۔ اوہناں نوں ہسپتال لے جایا گیا’ بھرواں علاج معالجہ ہویا لیکن ہن فیصلہ ہو چکیا سی کہ امید دین والے باباجی تھک چکے نیں تے اوہناں نوں ابدی آرام دی لوڑ اے۔ چنانچہ 7ستمبر 2004 نوں اوہناں دی روح ایس جہان فانی توں پرواز کر گئی تے اوہ اپنے خالق حقیقی نال جا ملے۔
اوہناں دی وفات مگروں بانو آپا لکھدیاں نیں:
اشفاق احمد دے جان مگروں مینوں کئی گلاں سمجھ آئیاں نیں۔ ہن میرے سامنے ہٹو بچو کہندا ہویا’ ہوشیار باادب ملاحظہ کہندا ہویا تے میرے توں ڈھائی قدم اگے چلن والا بندا نہیں اے۔ ہن میںٹھوکر کھا جواں’ ڈگ جاواں’ کسی دے موہنڈھے نال بھڑ جاواں’ ہن اوہ شخص نہیں اے… ایس چار دیواری وچ رہن مگروں ہن میرے لئی زندگی بہت اوکھی ہو گئی اے۔ ہن مینوں ایہناں چیزاں نوں ویکھنا تے اوہناں دا مقابلہ کرنا پیندا اے کہ جہناں دی مینوں سمجھ تک نہیں۔ جے غلطی نال کوئی باری کھلی رہ جاوے تے اوہدے وچوں ہلکا جیا ہوا دا جھونکا آوے تے مینوں محسوس ہوندا اے کہ کوئی طوفان داخل ہون والا اے۔