بیداریِ امت لئی علامہ اقبال دے کجھ خط

حضرت اقبال مسلم نوجوان نوں شاہین کہہ کے پکاردے نیں تے کدی اوہنوں دسدے نیں کہ سستی تے کاہلی نوں چھڈ کے کائنات نوں تسخیر کرن دی کوشش کر۔ اوہ اپنے کلام راہیں اک پاسے مسلماناں نوں اوہناں دے تابناک ماضی نال روشناس کران دی کوشش کردے نیں تے دُوجے پاسے مسلم قوم نوں دنیا دے شانہ بشانہ چلن دی ترغیب دیندے نیں۔ اقبال دی نمایاں ترین خصوصیات جہڑیاں اوہناں دے خطوط توں نظر آندیاں نیں اوہدے وچ سب توں پہلے نمبر اتے علم دوستی اے۔ اقبال دی تصنیفاں دا مطالعہ کرو تے اوہناں دا کلام اک علم دوست تے علم پرور انسان دے طور تے نظر آندا اے۔ اک بہتر تے متوازن معاشرے دی تخلیق لئی اوہ ہر ویلے فکر مند رہندے سن۔ اقبال مسلمانان عالم دی زبوں حالی اتے بہت دکھی رہندے سن۔ بیداری امت لئی مختلف سیاسی تے مذہبی رہنماواں نوں اوہناں اکثر خط لکھے ۔ اج اوہناں دے خطاں وچوں کجھ پیش خدمت نیں۔
ہندوستان وچ علامہ نوں اسلام تے مسلماناں دے مستقبل توں متعلق بہت وڈا خطرہ نظر آندا سی۔ جہدے انسداد لئی اوہناں بہت ساریاں تحریراں لکھیاں۔ اوہناں نوں مسلماناں دی بے حسی’ بے بسی تے تعلیم توں دوری بہت پریشان کردی سی۔اپنے اک مکتوب وچ غلام بھیک صاحب نیرنگ نوں لکھدے نیں۔ ”میرے نزدیک تبلیغ اسلام دا کم ایس ویلے سارے کماں اتے مقدم اے۔جے ہندوستان وچ مسلماناں دا مقصد سیاست توں محض آزادی تے اقتصادی بہبود اے جیویں کہ اج کل دے قوم پرست رہنماواں دے رویہ توں پتہ چلدا اے تے مسلمان اپنے مقصد وچ کدی کامیاب نہیں ہون گے۔” اگے چل کے لکھدے نیں۔” میں علی وجہ البصیرت کہنا واں تے سیاسیاست حاضرہ دے تھوڑے جئے تجربے مگروں ہندوستان دی سیاسی روش وچ جتھوں تک مسلماناں دا تعلق اے خود مذہب اسلام لئی خطرہ عظیم اے۔”
مخدوم میراں شاہ نوں لکھدے نیں”دعا کرنا واں کہ اللہ تعالیٰ تہانوں ایس امر دی توفیق دیوے کہ تسیں اپنی قوت’ ہمت ‘ اثرو رسوخ تے دولت و عظمت نوں حقائق اسلام دی نشرو اشاعت وچ صرف کرو۔ عالم اسلام دے ایس پستی دے دور وچ حضورۖ دی سب توں وڈی خدمت ایہو اے۔ افسوس شمال مغربی ہندوستان وچ جہناں لوکاں نے علم اسلام نوں اُچا کیتا اوہناں دی اولاداں دنیاوی جاہ و منصب دے پچھے پے کے تباہ ہو گئیاںتے اج اوہناں توں ودھ جاہل مسلمان کوئی ہور مشکل نال ملے گا۔”
مستقبل دے حالات نوں ویکھدے ہوئے اپنی فکر دا انج اظہار کردے نیں۔ ”میں سمجھنا واں کہ بہت سارے مسلماناں نوں اجے تک ایہدا احساس نہیں کہ ہندوستان وچ مستقبل بارے کیہ سوچیا جا رہیا اے تے جے ویلے اتے ایس اہم مسئلہ اتے توجہ نہیں دتی گئی تے مسلماناں تے اسلام دا مستقبل ایس ملک وچ بہت بھیانک ہووے گا۔ آن والیاں نسلاں دی فکر کرنا ساڈا فرص اے انج نہ ہووے کہ اوہناں دی زندگی گونڈ تے بھیل قوماں وانگوں ہو جاوے تے ہولی ہولی اوہناں دا دین تے کلچر ایس ملک وچ فنا ہو جاوے۔”
مسلماناں دی حالت بہتر کرن لئی اک جگہ لکھدے نیں۔ ”اصلاح امت تے مسلماناں دی بیداری مہم دی تکمیل لئی مینوں اپنے سارے کم چھڈنے پئے تے انشاء اللہ چھڈاں گا تے اپنی زندگی دے باقی دن ایس مقصد جلیل لئی وقف کر دیاں گا ۔ اسیں لوک قیامت والے دن خدا تے رسولۖ دے سامنے جواب دہ ہوواں گے۔
منشی صالح نوں لکھدے نیں کہ” اسلام اتے بڑا نازک ویلا ہندوستان وچ آ رہیا اے۔ سیاسی حقوق تے ملی تمدن دا تحفظ تے اک پاسے’ خود اسلام دی ہستی معرض خطر وچ اے۔ میں بہت مدت توں ایس مسئلے اتے غور کر رہیا واں کہ اسیں اک بہت وڈا نیشنل فنڈ قائم کریے جہڑا کہ اک ٹرسٹ دی صورت وچ ہووے تے اوہدا پیسہ مسلماناں دے تمدن تے اوہناں دے سیاسی حقوق دی حفاظت تے دینی علوم دی اشاعت وغیرہ اتے خرچ کیتا جاوے۔ مسلماناں دی دینی تے سیاسی اعتبار نال تنظیم کیتی جاوے۔ قومی عساکر بنائے جان تے ایہناں سارے وسائل توں اسلام دی منتشر قوتاں نوں جمع کر کے اوہناں دے مستقبل نوں محفوظ کیتا جاوے۔ہم آہنگی ای اک ایسی چیز اے جہڑی ساری سیاسی تے تمدنی مشکلاں دا علاج اے۔ ہندی مسلماناں دے کم ہن تک محض ایس وجہ توں وگڑے رہے کہ ایہہ قوم ہم آہنگ نہیں ہو سکی۔ا وہدے افراد بالخصوص علما دُوجیاں دے ہتھی کٹھ پتلی بنے رہے بلکہ اج وی کجھ انج ای اے”۔
اقبال اک سچے عاشق رسولۖ سن۔زمانے دی نبض اتے شاید ایسے لئی اوہناں دا ہتھ سی۔ علامہ مرحوم ساری زندگی ہندوستانی مسلماناں دی حالت وچ بہتری لیان لئی فکرمند رہے جدوں کدی تے جتھے اوہناں نوں ایسی تحریکاں یا اعمال نال واسطہ پیندا سی جہڑی مسلماناں نوں اوہناں دے مقصد عالیہ توں منحرف کرن لئی جاری کیتی جاندیاں سن۔ علامہ دی نگاہ دوربیں اوہناں خطریاں نوں دوروں ای بھانپ لیتا کردی سی تے فیر علامہ اوہناں دی مخالفت وچ بھرویں آواز بلند کردے سن۔
اک مکتوب وچ فرماندے نیںکہ” مسلماناں دا ہندوواں دے ہتھوں وِک جانا کسی صورت گوارا نہیں کیتا جا سکدا۔ ت”اوہ کہیا کردے سن کہ ایس ویلے اسلام دا دشمن سائنسی تعلیمات نہیں نیںبلکہ اسلام دا اصل دشمن یورپ دا جغرافیائی جذبہ قومیت اے۔ قائداعظم نوں اک خط وچ علامہ لکھدے نیں کہ ”شریعت اسلامیہ دے طویل و عمیق مطالعہ مگروں ایس نتیجہ اتے پہنچیا واں کہ ا سلامی قنون نوں معقول طریق اتے سمجھیا تے نافذ کیتا جاوے تے ہر شخض نوں گھٹ توں گھٹ معمولی معاش ولوں اطمینان ہو سکدا اے۔ سالہا سال توں میرا ایہو عقیدہ رہیا اے تے میں ہن وی ایہنوں ای مسلماناں دی ترقی تے ہندوستان دے امن دا حصول سمجھنا واں۔”
ہور لکھدے نیں کہ” ڈیئر جناح’ ہندوستان وچ قیام امن تے مسلماناں نوں غیر مسلماں دے غلبہ تے تسلط توں بچان دی واحد ترکیب اوہناں دا جداگانہ وطن ای اے۔ فیرلکھدے نیں کہ ایس امر وچ وی تہاڈے نال متفق آں کہ ساڈی قوم اجے تک نظم و ضبط توں محروم اے تے اوہناں نوں اک پلیٹ فارم اتے اکٹھا کرنا اک اوکھا کم اے۔ ہندوستان وچ اج جو کجھ ہو رہیا اے۔ علامہ اقبال نے اوس خطرہ نوں اپنی دوراندیشی نال ویکھ لیتا سی۔ الیکٹرانک تے پرنٹ میڈیا دا وی فرض اے کہ سارا سال فکر اقبال اتے مشتمل مخصوص پروگرام ترتیب دیندے رہن۔