سماجی ارتقاء تے ابلاغ

Asad Mufty

اسد مفتی

میرے نزدیک کسے وی قسم دا واقعہ ‘ حادثہ یاں تخلیق دی اہم تے وڈی خوبی کوئی ہے تے اوہ ایہو کہ ایہ واقعہ یاں تخلیق پڑھن یاں سنن والے نوں متحرک کر دیوے کہ میرے ورگے بندے لئی ایہو زندہ رہن دا جواز اے۔ تے آئو اج تہانوں کجھ زندہ رہن والے واقعات سنانا واں۔
البرٹ آئن سٹائن اک یہودی سائنسدان سی۔ اسرائیل دے پہلے صدر وایزمین دے مرن مگروں 1952ء وچ آئن سٹائن نوں اسرائیل دی صدارت دا عہدہ پیش کیتا گیا پر اوہنے ایس عہدے نوں قبول کرن توں انکار کر دتا۔ اوہنے امریکہ وچ رہندے اسرائیلی سفیر ابابیان نوں کہیا: میں فطرت دے بارے بڑا گھٹ جاننا واں تے انسان دے بارے تے مشکل نال ای کسے چیز دا مینوں پتہ اے۔ میں اسرائیل ولوں ایس پیش کش توں بڑا متاثر آں تے ایہدے نال مینوں افسوس تے شرمندگی وی اے کہ میں ایہنوں قبول نہیں کر سکدا۔ میں زندگی بھر دوجیاں چیزاں تے کم کردا رہیا واں ایس لئی میں لوکاں نال ٹھیک طور تے معاملہ کرن تے سرکاری معاملیاں نوں چلان دی فطری استعداد تے تجربہ دوہاں توں محروم آں۔ میری ودھدی ہوئی عمر نے میری قوت نوں متاثر نہ کیتا ہوندا فیر وی میں ایس اعلیٰ عہدے دیاں ذمہ داریاں نبھان لئی مناسب نہیں سی۔
ابوظہبی دے حکمران اپنی دولت شروع شروع وچ اپنے محل دے اک کمرے وچ رکھدے سن۔ اوہناں نوں شکایت سی کہ چوہے اوہناں دے کرنسی نوٹ کتر جاندے نیں۔ اک برطانوی بینک منیجر نے بڑی مشکل نال اوہناں نوں راضی کیتا کہ اوہ اپنی دولت بینک وچ جمع کرا دین جہدے تے اوہ بڑی مشکل نال راضی ہوئے۔ اوہناں نوں بینکاں تے اعتبار نہیں سی۔ شروع وچ اوہناں نے تجرباتی طور تے صرف دس لکھ پونڈ بینک وچ جمع کرائے تے اوسے دن بینک بند ہون توں پہلاں ایہ ساری دولت کڈھ لئی۔ اوہناں نے ایہ عمل کئی واری دہرایا تے فیر اوہناں نوں یقین آیا کہ بینک وچ اوہناں دی رقم نہ صرف محفوظ اے سگوں جدوں چاہن اوہ اوہنوں نکلوا سکدے نیں۔ ایسے تجربے دے بعد ابوظہبی وچ بینکنگ دے نظام نے فروغ پایا۔
ابوالقاہیہ خلافت عاسیہ دے دور دا اک معروف شاعر ہویا اے اک دن اوہ کجھ اداس جیہا بیٹھا سی۔ کسے نے حال پچھیا تے بولیا بھائی گل ایہہ وے کہ میں کجھ عجیب جہی زندگی گزار رہیا واں ایہدے توں نہ تے میں خوش آں نہ میرا اللہ خوش اے تے نہ شیطان خوش اے۔ پچھن والے نے حیرت نال اوہنوں ویکھیا تے پچھیا حضرت گل سمجھ وچ نہیں آئی وضاحت فرمائو۔ القاہیہ نے کہیا ایہدے وچ ہر گل واضح اے میں دولت دے لالچ وچ گرفتار آں بہت سارا مال متاع چاہنا واں جو مینوں مل نہیں رہیا ایس لئی بڑا ناخوش رہنا واں۔ اودھر اللہ تعالیٰ میرے توں ناخوش اے کہ میں اوہدی اطاعت کاملہ اختیار نہیں کر ہیا ہن رہیا شیطان تے اوہ بدبخت وی میرے توں خوش نہیں کہ میں اینے وڈے وڈے گناہ وی کرن دی ہمت نہیں کردا جو اوہ میرے توں کروانا چاہندا اے۔
اک دن ابن سماک’ خلیفہ ہارون رشید دے کول بیٹھا سی خلیفہ نوں تریہہ لگی پانی لئی حکم ہویا۔ ہتھ وچ پانی دا گلاس لے کے ابن سماک نے پچھیا امیرالمومنین! پہلے ایہ دسو کہ جے تہانوں پانی نہ ملے تے شدت پیاس وچ تسیں اپنی دا اک پیالہ کس قیمت تے خریدو گے؟ ادھی سلطنت دے کے وی خرید لواں گا ہارون رشید نے کہیا۔ ابن سماک نے پانی دا گلاس دیندے ہوئے کیہا لوو ہن پانی پی لوو۔ جدوں خلیفہ وقت پانی پی چکے تے ابن سماک نے فیر پچھیا۔ امیرالمومنین! جے ایہ پانی تہاڈے پیٹ وچ رہ جاوے تے باہر نہ نکلے تے تسیں ایہنوں نکلوان لئی کنی رقم خرچ کر سکدے او’ خلیفہ نے جواب دتا باقی دی ادھی سلطنت دے دیواں گا۔ ابن سماک نے فوراً کہیا۔ بس ایہہ سمجھ لوو کہ ساری سلطنت دی قیمت اک گھٹ پانی اے۔ ایس لئی اپنی حکومت تے کدی تکبر نہیں کرنا چاہیدا تے جتھوں تک ہو سکے لوکاں نال نیک سلوک کرنا چاہیدا اے۔ ہارون رشید ایہہ سن کے دیر تک روندا رہندے۔
آخر وچ اک واقعہ تمثیل دی زبان وچ سنو’ کسے سیٹھ نے خواب وچ ویکھیا کہ دولت دی دیوی یعنی لکشمی دیوی کہہ رہی اے سیٹھ تیری نیک تے پارسا بھج نس تے جدوجہد ختم ہو رہی اے ایس لئی میں کجھ دناں وچ تیرے گھروں رخصت ہو جاواں گی۔ جو میرے توں منگنا چاہنا ایں منگ لے۔ سیٹھ نے کہیا کل سویرے اپنے گھر والیاں نال صلاح مشورہ کرکے جو منگنا ہووے گا منگ لواںگا۔ سویر ہوئی تے سیٹھ نے خواب دا ماجرا ساریاں دے سامنے رکھیا۔ ٹبر وچوں کسے نے ہیرے جواہرات منگن لئی کہیا کسے نے سونے دا ڈھیر’ کسے نے لمیاں چوڑیاں گڈیاں تے کسے نے کوٹھی بنگلے منگن دی صلاح دتی۔ آخر وچ سیٹھ دی چھوٹی بہو نے کہیا ابا! جدوں لکشمی دیوی نوں جانا ای اے تے ساریاں چلن ملن تے کیہ رہن گئیاں؟ تسیں صرف ایہ منگو کہ خاندان وچ پیار محبت رہوے ٹبر دے سارے لوکاں وچ بھائی چارہ’ محبت تے قربانی دا جذبہ رہوے گا تے مصیبت دے دن وی ارام نال کٹ جان گے۔ سیٹھ نوں ایہ تجویز پسند آئی تے جدوں رات نوں فیر خواب وچ لکشمی دیوی دے درشن ہوئے تے اوہنے کہیا بولو کیہ منگنا ایں؟ سیٹھ نے کہیا کہ دیوی جی توں جانا ای چاہنی ایں تے خوشی نال جا پر میں تیرے توں صرف اک وعدہ لینا چاہنا واں کہ ساڈے ٹبر دے لوکاں وچ ہمیشہ پیار محبت’ اتفاق رہوے۔ لکشمی بولی’ سیٹھ توں انج دا وعدہ منگیا اے کہ مینوں بنھ ای لیا اے بھلا جس ٹبر دے بندیاں وچ محبت’ پیار تے پریم ہووے گا اوتھوں میں کیویں جا سکنی آں۔٭

اپنا تبصرہ گھلو