ساڈا قصور کیہ

بلوِندر کور کھرانا

سارے ٹی.وی. چینلاں تے ایہہ خبر خصوصی طور تے دکھائی جا رہی سی ‘ویاہ توں پہلاں منڈے ولوں ویہہ لکھ روپیہ نقد منگن تے کڑی نے اوس منڈے نال ویاہ کروان توں کیتا انکار۔’ ایس دے نال ہی ایہہ وی خبراں آ رہیاں سن کہ ‘اوسے ہی منڈپ اتے اوسے ہی مہورت وچ سندیپ ناں دے منڈے نے بِناں داج توں ادِتی نال کیتا ویاہ۔’ داج دے لوبھی سرویش اتے اس دی ماں کملیش نوں پولیس ولوں کیتا گیا گرفتار۔ جتھے سبھ چینلاں والے ادِتی دی دلیری اتے سندیپ دے فیصلے دی تعریف کر رہے سن۔ اوتھے سرویش اتے اوس دی ماں نوں سبھ جی بھر کے کوس رہے سن۔ کجھ چینلاں والے ادِتی دے پیو نال ہوئی گل بات وی دکھا رہے سن۔ سبھ دے سوال اِکو جیہے سن پیسے دی منگ کدوں کیتی گئی تے کنے روپئے منگے گئے؟ چینل والیاں دے سوالاں دے جواباں وچ ادِتی دا پیو دس رہیا سی کہ پھیریاں توں پہلاں سرویش نے ادِتی نوں باہر بلا کے وِیہہ لکھ روپئے دی منگ کیتی، جس کارن ادِتی نے سرویش نال ویاہ کروان توں ہی منع کر دتا۔ سوشل میڈیا اتے وی ایہہ خبراں وائرل ہو رہیاں سن اتے اخباراں دیاں سرخیاں وی بن رہیاں سن۔
لوک طرحاں طرحاں دیاں گلاں بنا رہے سن۔ فیس بک، وٹس اپ لوکاں دیاں تنقیداں نال بھریا پیا سی۔ لوک کہہ رہے سن پتہ نہیں لوکاں نوں کیہ ہو گیا ہے، سبھ کجھ ہوندیاں سندیاں وی داج دا اینا لالچ؟اکھے دِھیاں والیاں نوں پریشان کرنا ہوندا ہے بس!
ایہو جیہے لوکاں نوں تاں اینی سخت سزا ملنی چاہیدی ہے جو داج دے لوبھیاں لئی اک سبق بن سکے۔
کئی منڈے والے وی بڑا سخت ردِعمل دے رہے سن۔ اوہناں نوں لگ رہیا سی کہ ایس گھٹنا نال سارے منڈے والیاں دی بدنامی ہو رہی ہے۔ ٹی.وی. رپورٹر دے پچھن تے اک بندہ کہہ رہیا سی، جی، سارے منڈے والے ایہو جیہے لالچی نہیں ہوندے، ایہو جیہے لوکاں کارن ہی تاں لوک شریفاں تے وی یقین نہیں کردے۔ اسیں تاں جی آپ کہندے ہاں کہ ایہو جیہے لوکاں نوں سخت توں سخت سزا دتی جاوے۔ دھی والیاں توں کسے نے کوئی ثبوت نہیں منگے تے نہ ہی اوہناں دے بیاناں ‘تے کوئی کنتو کیتا۔ سبھ نوں ایہی لگ رہیا سی کہ اوہناں نال دھوکھا ہویا ہے۔ جنے مونہہ اونیاں گلاں۔ سبھ دی ہمدردی دھی والیاں نال سی۔
پر سرویش دے دفتر والیاں نوں ایہہ گل ہضم نہیں سی ہو رہی کہ سرویش ایہو جیہی کوئی منگ کر سکدا ہے اتے نہ ہی اوس دی ماں کملیش دیاں ساتھی استانیاں نوں ایس گل دا یقین ہو رہیا سی۔ کملیش انگریزی دی منی ہوئی استانی سی۔ اوہ بچیاں نوں بڑی محنت تے لگن نال پڑھاندی سی۔ اوس نے کدی اپنے کم توں کوتاہی نہیں سی کیتی۔ سکول وچ اس دی بہت عزت سی۔ بہت سارے غریب بچیاں دی اوہ پیسے نال وی مدد کردی سی۔ اوہ تاں داج دے سخت خلاف سی۔ فیر اوہ یاں اوس دا پتر داج دی منگ کیویں کر سکدے سن پر میڈیا والے جس طرحاں خبر دکھا رہے سن، کملیش دے کئی جانکار وی کہن لگ پئے سن بئی لوکاں دے دوہرے کردار ہوندے ہن اج کل۔ کتھنی اتے کرنی وچ بڑا فرق ہوندا ہے، اوہناں دے رشتے داراں نے وی اوہناں توں دوری بنا لئی سی۔
میڈیا دا اینا دبا سی کہ تھانیدار ہرنیک سنگھ نوں سرویش اتے اوس دی ماں نوں گرفتار کرنا پیا۔ جدوں دوہاں نوں تھانے لجایا جا رہیا سی تاں کملیش دا رو رو کے برا حال سی۔ اوہ چیک چیک کے کہہ رہیا سی کہ اوہناں نے کوئی داج دی منگ نہیں کیتی، اوہناں نوں تاں کجھ نہیں چاہیدا۔ پر اوہناں دی گل دا کوئی یقین نہیں کر رہیا سی۔ چینلاں والے تاں اوہناں دے ہنجوآں نوں مگرمچھ دے ہنجو کہہ کے اوہناں دا مذاق اڈا رہے سن۔ (جاری اے)

سرویش اپنے آپ نوں اینا اپمانت محسوس کر رہیا سی کہ اس دا دل کردا سی، کجھ کھا کے مر جاوے۔ اوہ کسے نوں مونہہ وکھان جوگا نہیں سی رہیا۔ اودھر ادِتی اتے سندیپ دیاں روز نویاں نویاں تصویراں سوشل میڈیا تے وائرل ہو رہیاں سن۔ ویاہ دے جوڑے چ سجی ادِتی، اک دوجے نوں مالا پاندے ادِتی اتے سندیپ، اِک دوجے دیاں باہاں چ باہاں پائی گھمدے ہوئے ادِتی اتے سندیپ۔ ایہناں تصویراں وچ دوویں بہت خوش وکھائی دیندے سن۔ ایہہ تصویراں خوب سرخیاں بٹور رہیاں سی۔ ادِتی تاں اک ہیروین وانگوں ابھر کے ساہمنے آئی سی، جس نے داج دے لوبھیاں نوں کرارا جواب دتا سی تے اوہ انیکاں کڑیاں لئی پریرنا سروت بن چکی سی۔ سرویش اتے اوس دی ماں حوالات وچ رو رو کے وقت گزار رہے سن۔ تھانیدار ہرنیک سنگھ نوں پولیس دی نوکری کردیاں وِیہہ سال ہو گئے سن۔ اوس دا واہ روز غنڈیاں بدمعاشاں نال پیندا سی۔ اوس نوں اپنے کم دا اینا تجربہ سی کہ بے گناہ اتے گناہ گار دے فرق نوں اوہ چھیتی سمجھ جاندا سی۔ سرویش اتے اوس دی ماں دیاں اکھاں ول ویکھدیاں ہی اوس نوں ایس گل دا احساس ہو گیا سی کہ ایہہ گناہ گار نہیں ہو سکدے پر کسے وی فیصلے ‘تے پہنچن توں پہلاں اوہ کجھ ثبوت اکٹھے کرنا چاہندا سی۔ سبھ توں پہلاں اوس نے سرویش نوں بلایا تے پچھیا توں پھیریاں توں پہلاں ادِتی نوں باہر بلایا سی؟
نہیں، تھانیدار صاحب! میں نہیں، ادِتی نے مینوں بلایا سی۔
کیوں؟
اوہ چاہندی سی کہ میں ایس ویاہ توں انکار کر دیواں۔
پر کیوں؟
ایہہ تاں پتہ نہیں جی، بس اوہ کہندی سی کہ اوہ میرے ویاہ نہیں کروانا چاہندی؟
پھیر توں کیہ کیہا؟
جی میں منع کرکے واپس پنڈال وچ آ گیا تے پچھوں رولا پے گیا کہ میں وِیہہ لکھ روپئے دی منگ کیتی ہے۔
تھانیدار صاحب نے سرویش دے بیان درج کیتے۔ فیر اوس نے چپ چاپ اپنا کم شروع کیتا۔ اوس نے سائیبر کرائم دے ماہراں دی مدد لئی تے ادِتی اتے سندیپ دے فوناں اتے سوشل میڈیا تے اوہناں دے کھاتیاں نوں کھنگالیا۔ فیس بک، وٹس ایپ اتے انسٹاگرام وغیرہ نوں ویکھن توں پتہ چلیا کہ ادِتی اتے سندیپ اِک دوجے نوں بہت پہلاں توں جان دے ہن۔ اوہناں دیاں کئی فوٹواں سوشل میڈیا تے موجود سن۔ اوہناں دی فون ہسٹری توں پتہ چلیا کہ اوہ اکثر اِک دوجے نوں فون کردے سن اتے ویاہ والے دِن وی اوہناں دی دو وار گل بات ہوئی سی۔ ہن ہرنیک سنگھ دا شک یقین وچ بدل چکا سی کہ ادِتی اتے سندیپ نے ہی کوئی سکیم لڑا کرکے سرویش نوں پھسایا ہے۔
اوس نے ادِتی اتے سندیپ نوں تھانے بلایا۔ سارے ثبوت اوہناں دے ساہمنے رکھے۔ اوس نے دوہاں نوں مخاطب کردے ہوئے کیہا، جے تسیں ہن وی سچ نہ دسیا تاں میں تہاڈے سارے ثبوت میڈیا وچ لیک کرکے سرکار کولوں تہاڈے لئی سخت توں سخت سزا دی منگ کراں گا۔
تھانیدار دی سختی کارن ادِتی ٹٹ گئی تے اس نے اپنا جرم قبول کر لیا۔ تھانیدار نے اوس توں پچھیا، توں اجیہا کیوں کیتا؟
اوس نے کیہا، تھانیدار صاحب! میں سندیپ نوں پیار کردی سی پر حیثیت وچ ساڈے برابر نہ ہون کارن پاپا نے سندیپ نال میرا رشتہ کرن توں منع کر دتا تے زبردستی میر رشتہ سندیپ نال جوڑ دتا۔ تے توں ایہناں بے قصوراں نوں پھسا دتا؟
نہیں تھانیدار صاحب، میرا ایہو جیہا کوئی ارادہ نہیں سی، میں تاں سرویس نوں کیہا سی کہ اوہ ویاہ کرن توں منع کر دیوے پر اوہ اپنے خاندان دی عزت دی دہائی دین لگا۔ فیر میرے کول بس ایہی طریقہ سی، اپنے ماتا پتا نوں میرا ویاہ سندیپ نال کروان لئی منان دا۔
ہرنیک سنگھ حوالات توں باہر آئے سرویش اتے اس دی ماں کملیش نال اکھاں ملان دی ہمت نہ کر سکیا۔ اوہ کملیش دیاں اکھاں وچ تردے اوہناں سوالاں دا جواب نہیں سی دے سکدا، جیہناں دی بے بسی اس نوں وار وار پچھ رہی سی کہ دسو، ‘ساڈا کیہ قصور کیہ ہے؟٭