غیر مسلماںقرآن توںکیہ سکھیا؟

سعد اختر

دنیا وچ ایسے لوک وی گزرے نیں جہڑے ہین تے وَڈے لوک۔ ملحد وی تے خدا نوں اک نہ منن والے۔ لیکن اوہناں نے جدوں قرآن دا مطالعہ کیتا تے اوہدے وچ دتے گئے غیر معمولی علوم تے اسلامی تعلیمات دے حوالے نال جنا کجھ جانیا‘ اوہنے اوہناں دی زندگی ای بدل دتی تے اوہناں نے کفر دا دین چھڈ کے مذہب اسلام اپنان وچ ذرا وی دیر نہ کیتی۔
کیتھ ایل مور دا تعلق شعبۂ اناٹومی اینڈ بیالوجی‘ یونیورسٹی آف ٹورنٹو نال سی۔ اوہ ایس ڈیپارٹمنٹ وچ پروفیسر سن۔ اوہناں دا جنم ستویں صدی وچ ہویا جدوں قرآن دا مطالعہ کرن لگے تے ایس گل اتے حیران رہ گئے کہ لنگدی صدی وچ سائنس دے حوالے نال جو کجھ ہو رہیا سی نویں نویں حیران کن سائنسی ایجاداں عمل وچ آ رہیاں سن۔
قرآن نے چودہ سو سال پہلے ای اوہناں دے حوالے نال انکشافات کر دتے سن۔ اوہناں نوں یقین ہو چلیا سی کہ قران وچ صدیاں پہلے جو بیان کیتا گیا اوہ بالکل سچ اے تے ایہ کہ صرف خدا ای اے جہڑا ویلے توں پہلے ایسی حیران کن گلاں بیان کر سکدا اے۔ قرآن نے کیتھ ایل مور نوں بہت متاثر کیتا تے اوہ اللہ دی وحدانیت اتے یقین کردے ہوئے مسلمان ہو گئے۔
پروفیسر ای مارشل جانسن شعبۂ اناٹمی اینڈ ڈویلپمنٹل بیالوجی دے چیئرمین جدکہ تھامس جیفرسن ڈینٹل یونیورسٹی آف فلاڈیلشیا یو ایس اے دے ڈائریکٹر سن۔ اوہناں نے قرآن وچ ’’جینین‘‘ دے متعلق پڑھیا تے حیران دا اظہار کرن لگے کہ محمدؐ نوں کیویں چودہ سو سال پہلے ’’جینین‘‘ دے متعلق پتہ ہووے گا ۔ اوہناں نے تسلیم کیتا کہ صرف خدا ای ایس علم نوں محمدؐ تک پہنچان دا واحد ذریعہ اے۔ فیر اوہ خدا تے اوہدے آخری نبیؐ اتے ایمان لے آئے۔ کلمہ پڑھیا تے سچے دل نال مسلمان ہو گئے۔
جیرالڈ سی گولڈنگر میڈیکل ایمبریالوجی ڈیپارٹمنٹ آف بیالوجی‘ سکول آف میڈیسن‘ جارج ٹائون یونیورسٹی دے پروفیسر تے کوآرڈینیٹر سن۔ اوہناں دا آکھنا سی کہ قرآن نے ای آرگوجنیں دے ذریعے انسانی ترقی تے ’’گیمیٹس‘‘ دے ملاپ نوں بیان کیتا اے۔ اوہناں دا کہنا سی کہ محمدؐ نے چودہ سو سال پہلے سائنسی علوم دے حوالے نال جہڑا بیان کیتا اج دی سائنس اوہنوں صحیح تے درست ثابت کر رہی اے۔
یوشیدی کوسن ٹوکیو آبزرویٹری جاپان دے ڈائریکٹر نیں۔ فلکیات تے دوربیناں دے حوالے نال گل کردے ہوئے آکھدے نیں کہ قرآن وچ چودہ سو سال پہلے فلکیات بارے بالکل سچے حقائق بیان کیتے گئے۔ میں حیران آں محمدؐ نوں چودہ سو سال پہلے ایہناں حقائق دا علم کیویں ہویا؟
الفریڈ کورنر جیو سائنسز مینز یونیورسٹی آف جرمن دے پروفیسر سن۔ اوہناں نے کائنات دی ابتدا یا شروعات اتے گل کردے ہوئے آکھیا کہ ایہ کیویں ممکن اے کہ کائنات دے سارے پوشیدہ علوم تے رازاں بارے محمدؐ نے چودہ سو سال پہلے جو آکھیا سائنس اوہنوں اج سچ ثابت کر رہی اے۔
پروفیسر آرمسٹرانگ ناسا لئی کم کردے نیں۔ فلکیات دے معروف پروفیسر نیں۔ یونیورسٹی آف کنساس یو ایس اے نال جڑے نیں۔ اوہناں نے قران دا مطالعہ کیتاتے حیران رہ گئے کہ قرآن فلکیات بارے کیہ آکھدا اے۔ قرآن دی قدیم تحریر اوہناں نوں اج دی جدید سائنس دی عکاسی کردی نظر آندی اے۔ ایہ سب کجھ جان کے بالآخر اوہناں نوں آکھنا پیا کہ قرآن اک سچی تے اللہ ولوں دنیا وچ بھیجی گئی اک معتبر کتاب اے۔
کولوراڈو یونیورسٹی آف یو ایس اے دے ولیم بی شعبۂ سجرات دے پروفیسر نیں۔ اوہ آکھدے نیں مینوں بہت تعجب تے حیرانگی ہوندی جدوں میں قرآن دا مطالعہ کردا۔
قرآن وچ چودہ سو سال پہلے جہڑی گلاں آکھ دتیاں گئیاں سائنس اوہنوں اج سچ ثابت کررہی اے تے جہڑی گلاں قرآن وچ آکھ دتیاں گئیاں اوہ کوئی عام بندا نہیں آکھ سکدا۔ کوئی شک نہیں کہ قرآن اللہ ولوں بھیجی گئی اک سچی کتاب اے۔
دورجاراڈ کنگ عبدالعزیز یونیورسٹی جدہ سعودی عربیہ وچ جیالوجی دے پروفیسر نیں۔ اوہناں دا آکھنا اے کہ قرآن سدا انسانی علم نہیں ہو سکدا۔ ایہدے وچ اوہ شیواں نیں جہڑیاں مافوق الفطرت وکھائی دیندیاں نیں۔ جنہاں اتے یقین کرنا مشکل ہو جاندا اے لیکن اج دی سائنس اوہناں نوں سچ ثابت کر رہی اے۔
تھائی لینڈ نال تعلق رکھن والے اناٹومی ڈیپارٹمنٹ دے چیئرمین تیجات تیجاسن دا آکھنا اے کہ قرآن وچ بیان کیتے گئے سائنسی علوم موجودہ صدی وچ سچ ثابت ہو رہے نیں۔
سرجیکل کلینک پیرس یونیورسٹی دے سربراہ موریس بوکاٹیل دا آکھنا اے کہ ایس گل دی وضاحت کرنا قطعی ناممکن اے کہ محمدؐ دے زمانے دی کتاب قرآن مجید وچ ایسے خیالات کیویں شامل ہو سکدے نیں جہڑے صرف 21ویں تے 22 ویںصدی وچ دریافت ہوئے نیں۔ قرآن مجید واقعی اک حیرت انگیز کتاب اے۔
یورپی سائنسدان یوٹیوب نے قرآن مجید وچ سائنسی حقائق دے حوالے نال جانکاری مگروں ناصرف اسلام قبول کیتا بلکہ دین اسلام دے زبردست پیروکار تے مبلغ وی بن گئے۔
بلاشبہ قرآن پاک اک مکمل ضابطۂ حیات اے جہدے وچ ہزاراں ظاہر وپوشیدہ علوم دی گل کیتی گئی اے۔ دنیا وچ جنے وی وڈے سائنسدان گزرے نیں یا ہن وی موجود نیں اوہناں نے سائنس دے حوالے نال سارا علم قرآن مجید توں حاصل کیتا۔
لیکن دکھ دی گل ایہ اے کہ اسیں مسلمان ہوندے ہوئے وی قرآن توں بیگانے آں۔ جے قرآن نوں باترجمہ تفسیر دے نال پڑھیا تے لکھیا جاوے تے اسیں وی بے شمار سائنسی تے دنیاوی علوم کولوں آشنا ہو سکنے آں۔ ایہ ساڈی بدقسمتی اے کہ اسیں قرآن توں دور آں تے اسیں گھراںوچ قرآن نوں پڑھن تے سمجھن دے بجائے کسے اچی تھاں طاقاں وچ سجا رکھیا اے۔
پاکستان وچ دینی تعلیم دے ہزاراں مدرسے موجود نیں جتھے صرف قرآن دی تعلیم دتی جاندی اے۔ جے قرآنی تعلیم دا سلسلہ جدید دور توں ہم آہنگ ہو جاوے تے ساڈا دین تے دنیا دونویں ای سنور سکدے نیں۔ قرآن وچ بہت کجھ موجود اے۔ قرآن دے عالم چاہن تے ایہدے ذریعے نویں راہواں تے نویں سمتاں تلاش کر سکدے نیں۔