’’پرواز خاک‘‘ کتاب دوستی دی شمع بلدی رہنی چاہیدی اے

طلعت عباس خان

اسیں لیفٹیننٹ جنرل (ر) سعد خٹک دی نویں جماعت تے کالم لکھن دا اعجاز حاصل کر چکے سی۔ جنرل صاحب نے اک کتاب ’’پرواز خاک‘‘ حال ای وچ لکھی اے جو سیاسی تے قومی تریخ دی نادر دستاویز اے۔ کتاب دی تقریب رونمائی پچھلے دیہاڑیاں اسلام آباد دے مقامی ہوٹل وچ بڑے دھوم دھڑکے نال ہوئی اوہ ہر خوشی تے یاد رکھدے نیں ایہو ادا مینوں پسند اے۔ میرے نیڑے سیاسی جماعت اوہ وی ملکی سطح تے بنانا تے رجسٹرڈ کرانا سوکھا کم نہیں سی۔ جنرل صاحب نے نویں جماعت عام آدمی موومنٹ بنائی تے کتاب وی لکھ دتی دوویں کم کارنامے توں گھٹ نہیں۔ پندراں فروری نوں ’’پروازخاک‘‘ دی رونمائی تقریب منعقد کیتی جہدے وچ اسیں وی بطور سپیکر موجود سی۔ مہمان خصوصی سینیٹر عرفان صدیقی مصروفیات دی وجہ نال آغاز وچ خطاب کیتا تے چلے گئے۔ دوجے سپیکرڈاکٹر انعام الحق جاوید نے وی مصروفیات پاروں خطاب کیتا تے ٹر گئے۔
یادش بخیر ساڈی ملاقات عرفان صدیقی نال ڈاکٹر اجمل نیازی مرحوم دے نال اوہناں دے گھر تے ہوئی سی۔ لمے عرصے دے باوجود اوہ پچھان گئے حال احوال پچھیا کالم لکھن دے سلسلے دی تعریف کیتی۔ ایس موقعے تے ڈاکٹر اجمل نیازی نوں یاد کیتا گیا ایس تقریب دی خوبصورتی سٹیج سیکرٹری ڈاکٹر عبدالودود قریشی دا ہونا سی۔ اوہناں نے ایسے چار چن لائے تے محفل وچ آئے ہوئے سپیکر حضرات نوں بولن دا موقع دتا تے آپ لوڑ دے مطابق ای بولے۔ سارے سپیکراں نے اپنا حق ادا کیتا۔ ایہناں وچ پاکستان انسٹیٹیوٹ فار کنفلکٹ اینڈ سکیورٹی سٹڈیز دے ایم ڈی عبداللہ خان‘ سابق وزیر مملکت میاں انوارالحق رامے‘ ڈاکٹر شازیہ ثوبہ پارلیمانی سیکرٹری برائے صحت‘ شگفتہ ملک سابق ممبر کے پی اسمبلی‘ جنرل طاہر محمود قاضی نے ایس کتاب تے اظہارخیال کیتا۔ جنرل قاضی صاحب نال ملاقات وی ہوئی۔ اوہناں نے دو خوبصورت کتاباں دا تحفہ گھلیا۔ جنرل صاحب بہت بہت شکری۔ ایہ کتاب تے مشہور شخصیت مجیب الرحمن شامی لکھدے نیں کہ ’’پرواز خاک‘‘ اک اجہے پاکستانی دی ہڈبیتی اے جو عام جہے گھر وچ اک عام بندے دے ہاں اک عام آدمی دے طور تے پیدا ہویا۔ سرکاری سکول وچ اک عام جہے طالب علم دے طور تے پڑھیا‘ فوج وچ بھرتی ہویا تے اگے ودھدا گیا ایتھوں تکہ میجر جنرل دے منصب تے فائز ہویا۔ اپنی محنت تے لگن تے اہلیت دی بنیاد تے اوہنے اپنی زمین نوں اسمان بنایا۔ اوہدے تے اک رکھ تے ستارے وانگوں چمکن لگا۔ پاک فوج وچ میرٹ دا جس طرح پاس کیتا جاندا اے اوہ ایہدی عملی تصویر اے۔
میجر جنرل خٹک دی زندگی دی کہانی خاص طور تے اوہناں نوجواناں نوں پڑھن دی ضرورت اے جو اپنی دنیا آپ پیدا کرن دی تڑپ رکھدے نیں جو ستاریاں تے کمند پانا چاہندے نیں۔ اوہناں نوں یقین رکھنا چاہیدا اے کہ رشوت تے سفارش دے بناں وی ترقی کیتی جا سکدی اے۔ پاکستانی معاشرے وچ ناں تے مقام پیدا کیتا جا سکدا اے۔ سانوں وی ایس کتاب نوں پڑھن دا اتفاق ہویا اے۔ ایس کتاب وچ آپ ای لکھدے نیں کہ کتاب لکھن داخیال کیویں آیا۔ لکھدے نیں انج میں نہ تے کوئی لکھاری‘ نہ تریخ دان تے نہ ای میرے کول علم دا کوئی ذخیرہ اے جہنوں میں ونڈ سکاں پر اک ریڑھی والے وانگوں‘ اک ٹیکسی ڈرائیور وانگوں سگوں کسے وی ماڑے طبقے دے اک فرد وانگوں میری زندگی دی وی اک کہانی اے‘ مشاہدات نیں‘ تجربے نیں۔ کجھ تلخ خوشگوار بس سوچیا کہ دوستاں دے نال ونڈ لواں اک توں چوی صفحہ تک کتاب پڑھ لئی جاوے تے ’’پرواز خاک‘‘ دے لکھاری بارے سمجھن وچ آسانی ہووے گی۔
جنرل صاحب دا کمال ایہہ وے کہ ساریاں نوں نال لے کے چلے تے کتاب نوں سامنے لیان وچ کامیاب ہوئے۔ آپ سب مبارکباد دے مستحق نیں۔ ہر اجہی شخصیت جو کدی وی اہم عہدے تے رہی ہووے اوہناں نوں چاہیدا اے کہ اپنے تجربیاں دی روشنی وچ کتاب لکھن۔ جو کہندے نیں کہ ہن الیکٹرانک دا دور اے پرنٹ میڈیا دا نہیں ہیا ایہ سوچ غلط اے‘ کتاب صدیاں تک شخصیات نوں زندہ رکھدی اے۔ سارے ترقی یافتہ ملکاں وچ پرنٹ میڈیا اج وی زندہ اے۔ دوستاں اگے گزارش اے کہ جے تہاڈے آل دوالے اجہی شخصیات ہے نیں تے اوہناں نوں لکھن دا مشورہ دیو۔ ابراہم لنکن نے کہیا سی جے میرے کول اک ڈالر اے تے تہاڈے کول وی اک ڈالر ہووے تے آپس وچ اک دوجے نال اک اک ڈالر تبدیل کر لوو تے فیر وی ساڈے دوہاں کول اک اک ڈالر ای ہووے گا پر جے اک خیال میرے کول ہووے تے اک خیال تہاڈے کول اے تے اوہ اسیں اک دوجے نال بدلیئے تے دوہاں دے کول دو خیال ہو جان گے۔ زندگی دے حوالے نال اپنے تجربے‘ مشاہدات تے خیالات شیئر کردے رہیا کرو ہو سکدا اے کہ تہاڈا آئیڈیا کسے انسان دی روح وچ جان پا دیوے۔٭