تماشے‘ لطیفے تے حقائق

مظہر برلاس

بنگالیاں نوں شیخ مجیب الرحمن نال عشق سی تے پاکستانیاں نوں عمران خان نال عشق اے۔ 1971ء وچ اقتدار تے نااہل ٹولہ مسلط سی بدقسمتی نال اج وی انج ای اے۔ پچھلے دیہاڑیاں توں تماشے نوں ویکھ کے کئی پرانے واقعات یاد آ گئے نیں۔ اوس ویلے پاکستان دو حصیاں تے مشتمل سی۔ مشرقی حصے وچ شیخ مجیب بڑے مقبول سن جد کہ مغربی حصے وچ وی اوہدی پارٹی بڑی حد تک سرگرم سی پر اقتدار تے براجمان ٹولہ شیخ مجیب الرحمن دی نفی چاہندا سی۔ ایس مقصد لئی اوہناں نے شیخ مجیب تے کئی مقدمے قائم کیتے۔ ہن صورتحال ایہہ سی کہ شیخ مجیب الرحمن نوں پولیس پھڑن جاندی تے بنگالی لوک پولیس نوں نسا دیندے۔ ایہ سلسلہ کئی مہینیاں تک جاری رہیا۔ گرفتاری لئی آخر فوجی دستے میدان وچ اتارے گئے۔ ایئرفورس دے کجھ لوک وی نال سن۔ یاد رہوے کہ ارشد شریف شہید دے والد محمدشریف اعوان وی اوہناں بندیاں وچ شامل سن۔ شیخ مجیب الرحمن گرفتار ہو گیا۔ گرفتار کرن والیاں دا منصوبہ ایہ سی کہ ایہنوں راہ وچ مار دتا جاوے تے کہیا جاوے کہ ایہ قتل پستہ قد بنگالیاں نے کیتا اے۔ عوامی پریشر دے ڈر توں منصوبے تے عمل نہ ہو سکیا تے دوران حراست شیخ مجیب الرحمن نوں چنڈاں ماریاں گئیاں۔
تسیں ویکھیا نہیں پچھلے کجھ دیہاڑیاں توں لہور وچ کیہ ہو رہیا اے۔ لہور کیوں میدان جنگ بنیا رہیا‘ کیوں کئی شہراں دی پولیس تے رینجرز لوکاں تے تشدد کردی رہی۔ فضاواں وچ اتھرو گیس گھولدی رہی‘ ہن سوال ایہ پیدا ہوندا اے کہ انج کیوں کیتا گیا حالاں کہ ایہ روٹین دے وارنٹ سن۔ پنجاب وچ سٹھ ہزار بندے اشتہاری نیں‘ اوہناں دے گھراں تے دھاوے نہیں بولے گئے۔ رانا ثناء اللہ دے وی وارنٹ جاری ہوئے نیں‘ اوہناں نوں تے گرفتار کرن لئی انج دا میلہ نہیں سجایا گیا۔ اوتھے تے صرف ڈی ایس پی نے لکھ دتا اے کہ اوہ ملے نہیں۔ جہڑے لوک حاضری وارنٹ نوں جاندے نیں اوہ ایہ وی جان دے نیں کہ ایہ تے مدعی دے وی نکل آندے نیں تے آ خر عمران خان دے وارنٹ وچ اوہ کہڑی چیز سی جنہے حکومت نوں اینے وڈے اپریشن تے مجبور کر رکھیا اے؟ اک دو ٹی وی اینکراں دے مطابق عمران خان نوں مارنا مقصود سی یاں اوہنوں مچھ جیل لے جا کے زہر دین دا پروگرام سی۔ ایہناں سارے منصوبیاں تے عوامی طاقت نے پانی پھیر دتا اے۔
مینوں ایہ صورتحال ویکھ کے کجھ سجرے سیاسی لطیفے یاد آ گئے نیں مثلاً عمران خان دی گرفتاری مقصد ہووے تے کہیا جاندا اے کہ اسیں قنونی ذمہ داری پوری کراں گے تے جے الیکشن کروان دا کہیا جاوے تے کہندے نیں قنونی ذمہ داری پوری کرنی اوکھی اے۔ عمران خان نوں گرفتار کرنا ہوندا تے ساریاں سکیورٹی فوجاں حاضر تے جے الیکشن دی گل ہووے تے کہیا جاندا اے اسیں سکیورٹی نہیں دے سکدے۔ تے مزے دی گل اے کہ جے رانا ثناء اللہ دا وارنٹ ہووے تے ڈی ایس پی رپورٹ جمع کرواندا اے کہ اوہ گھر تے نہیں ملے تے جے واری عمران خان دی ہووے تے کہیا جاندا اے کہ اسیں اوہناں نوں گرفتار کر کے پیش کراں گے۔ اک ہور لطیفہ سن لوو اک خاتون جہدے والد بیماری دا بہانہ بنا کے لندن وچ رہائش پذیر نیں اوہ وکھووکھ تقریباں نال خطاب کردے ہوئے کہندیاں نیں میرے والد نے کدی بیماری دا بہانہ بنایا‘ اوہناں نے کدی بزدلی وکھائی؟ ہن ایہدے وچ ایہو کہیا جا سکدا اے کہ اوہ لندن وچ مشکل ترین حالات نال لڑ رہے نیں تے بہادری وکھا رہے نیں۔ ایہ وکھری گل اے کہ اوہناں دی گلی وچ شور شرابا ہوندا اے تے اوہ شور شرابے دے ڈر توں باہر نہیں نکلدے۔ توشہ خانہ دا تماشا ویکھ کے بڑا افسوس ہویا کہ پاکستان وچ کنے کم ظرف لوک حکومتاں کردے رہے نیں۔ اجے تے توشہ خان دا اصل قصہ سامنے نہیں آیا جس دن 1985ء توں لے کے 2000ء تک حقائق سامنے آئے تے فیر ویکھنا ہووے گا کیوں جے اصل لٹ مار تے 90ء دی دہائی وچ ہوئی اے۔
ہن آ جائو حقائق ول‘ ساڈے سوچن سمجھن والے لوکاں نوں مقبول ترین سیاسی قوت دا احترام کرنا چاہیدا اے۔ ریاستی اداریاں نوں اپنے لوکاں دی یعنی پاکستانیاں دی گل سننی چاہیدی اے کیوں جے ہن زندگی دے وکھووکھ طبقے مقبول ترین سیاستدان دے نال جڑدے جا رہے نیں۔ لہور ہائیکورٹ بار دے خصوصی اجلاس وچ خطاب کردے ہوئے لہور ہائیکورٹ بار دے صدر اشتیاق احمد خان کہندے نیں کہ حکومت وقت تے اوہدے آلہ کار‘ پولیس سنے فورسز دا استعمال کرکے سانحہ ماڈل ٹائون دی تریخ دہرانا چاہ رہے نیں۔ ملک دے ہر شہری نوں آئین تے قنون دے تحت احتجاج دا حق حاصل اے۔ لوکاں توں اوہناں دی آزادی رائے دے اظہار دا حق کسے صورت نہیں کھوہیا جا سکدا۔ لوکاں دیاں زباناں بند کیتیاں جا رہیاں نیں۔ جے کسے اک وکیل نوں زخمی کیتا گیا یاں کسے اک وکیل دا مڈھلا حق کھوہیا گیا تے لہور ہائیکورٹ بار ایسوسی ایشن نہیں سگوں پورے پاکستان دی بار ایسوسی ایشناں تے بار کونسلاں سراپا احتجاج ہون گئیاں۔ ملک دی عدلیہ نوں اپنی آئینی ذمہ داریاں پوریاں کرنیاں چاہیدیاں نیں کسے وی بندے نال کسے قسم دا امتیازی سلوک نہ کیتا جاوے۔ ہن وقت دے دھارے نے لوکاں نوں اوس مقام تے کھڑا کر دتا اے کہ اوہ اپنے تے شرافیہ دے وچکار آخری جنگ لڑن نوں تیار نیں۔ سگوں اوہناں دے لباں تے نوشی گیلانی دا شعر اے کہ:
کشت ِجاں تو بھنور میں ہے کئی برسوں سے
اے خدا اب تو ڈبو دے یا کنارا لا دے