گورنمنٹ اسلامیہ گریجوایٹ کالج لہور دے چھتر چھاویں پنجاب ثقافت دیہاڑ

ڈاکٹر فوزیہ حنیف

14مارچ 2023ء منگل دے دیہاڑ گورنمنٹ اسلامیہ گریجوایٹ کالج ریلوے روڈ لاہور وچ پرنسپل پروفیسر ڈاکٹر عباد نیبل شاد ہوراں دی آگوائی ہیٹھ شعبہ پنجابی ولوں ’’پنجاب ثقافت دیہاڑ‘‘منایا گیا۔ میزبانی دے فرائض شعبہ پنجابی دیاں چیئر پرسن ڈاکٹر فوزیہ حنیف نے سرانجام دِتے۔
تقریب دا باقاعدہ آغاز تلاوت کلام پاک تے نعت رسول مقبول ﷺ توں کیتا گیا۔ ڈاکٹر فوزیہ حنیف نے پنجابی ثقافت دے پچھوکڑ بارے گل کتھ کردیاں ہوئیاںآکھیا پئی دُنیا دی کوئی وی ثقافت تے وسیبی رہتل اپنی ماں بولی توں بغیر نئیں جی سکدی ۔
جے کر اسیں اپنی ماں بولی نوں سانبھنا چاہنے آں تے سانوں پنجاب دے پورے کلچر دی سانبھ کرنی پوے گی۔اوہناں پنجابی لوک ادب دے نال نال شاہ حسین ؒ تے وارث شاہؒ دی شاعری راہیں زنانی تے مرد دے پنجابی رہتل وچ رل کے کردار ادا کرن بارے وی جانکاری دِتی۔

بی ایس انگریزی دے پڑھیا ر محمد زین اختر ہوراں خواجہ غلام فرید دا صوفیانہ کلام گا یا ۔پری میڈیکل دوجے سال دے پڑھیار سیّد اسد علی نے ساڈے اجوکے وسیبی جیون وچوں بالاں دے ماں دی محبت دی قدر نہ کرن بارے Solo Performanceپیش کیتی جیہدے اُتے ویکھن ہاراں نے اوہناں نوں بھرپور داد دِتی۔ ایسوسی ایٹ ڈگری پروگرام دوجے ورھے دے پنجابی پڑھیار محمد سفیان نے ’’وسردا ہویا پنجابی سماج تے ثقافت‘‘ بارے وچار سانجھے کردیاں ہوئیاں آکھیا پئی ماضی دے جھروکے وچوں نظریندا پنجاب جیندا جاگدا تے ٹھاکدا پنجاب سی جیہدے وچ بندہ تے زنانی دونویں اپنی اپنی ہوند نال بھرپور کردار ادا کردے رہے۔
پنجاب جیہڑا زراعت دے شعبے نال جڑیااے اوہدے وچ فصلاں دی بیجائی توں لے کے کٹائی تیک بندہ تے زنانی رل کے کم کردے ‘اک دوجے نال کھلوتے حیاتی نوں جیون جوگا بنائوندے رہے۔
وساکھ دے مہینے کنک دی کٹائی ویلے ڈھول وجنے‘حلوے پکنے تے چاٹی دی لسّی دا پربندھ لوکائی دا اکٹھ تے سوہنے رنگ محبتاں دے ہر پاسے کھنڈے ہوندے سن۔ ایسے طرحاں پنجاب دیاں سوانیاں گھراں وچ نکے پیمانے تے صنعت کاری کردیاں سن۔
پر زمانے دے بدلا نال پنجابی سماج تے ثقافت وچ بدلا آئوندا گیا۔اجوکے دور اندر تعلیم تے سہولتاں ہون دے باجود لوکاں اندر خوشی دی گھاٹ اے ۔ ساڈا سماج کُراہے پے گیااے ۔
کیوں جے ساڈیاں خوشیاں دے معیار مادیت پرستی‘تعیش تے دولت بن گئے نیں ۔پر حقیقت ایہہ وے پئی دُنیا اندر اوہو قوماں کامیاب ہوندیاںنیں جیہڑیاں اپنی زبان تے ثقافت نال جُڑیاں ہوندیاں نیںکیتی۔
پروفیسر ڈاکٹر ناہید شاہد ہوراں دا تخلیق کیتا ہویا ڈرامہ ’’کوک‘‘ پروجیکٹر اُتے اُستاداں‘پڑھیاراں تے حاضرین نوں وکھایا گیا۔ ڈرامے وچ مادھو لال شاہ حسین ‘سیّد بُلھے شاہ تے وارث شاہ دے کرداراںدی گل کتھ نے حاضرین نوںزندگی دی اصل حقیقت ول پریریا۔ڈاکٹر فوزیہ حنیف نے اپنی نظم’’سوہنی رُت وساکھ دی‘‘ پڑھی۔پنجابی پڑھیاراں تے کالج دے Prefactsنے رل کے ابرار الحق دے گانے ’’پنج دریاواں دی مٹی تینوں آجا آجا آکھدی‘‘اُتے مختلف کرداراں راہیں بھنگڑا پایا۔
جیہدے وچ پڑھیاراں دیاں چاہتاں‘سدھراں ‘خشیاں تے امنگاں دا بھرپور اظہار نظر آیا۔ جد کہ بی ایس انگریزی ‘ریاضی ‘اسلامیات تے سیاسیات دیاں پڑھیارناں نے حدیقہ کیانی دے گانے ’’من دی موج وچ‘‘اُتے پنجابی سوانی دے ترنجن سجان تے چرخہ کتن‘کھیتیاں چُگن تے نکے پیمانے تے صنعت کاری نوں performance راہیں ساہمنے لیائوندا۔ ایہدے نال نال اوہناں ککلی تے لوک کھیڈاں وی پیش کیتاں۔
پڑھیارناں نے دیسی کھانیاں دے سٹال وی لائے۔ پڑھیاراں نے کبڈی میچ وی کھیڈیا۔ آخیر اُتے مان جوگ پرنسپل گورنمنٹ اسلامیہ کالج ریلوے روڈ لاہور پروفیسر ڈاکٹر عباد نبیل شاد ہوراں پنجاب ثقافت دیہاڑ بارے گل کیتی تے مان جوگ اُستاداں تے پڑھیاراں دا شکریہ ادا کیا۔