بہار دا درویشانہ رنگ

ڈاکٹر صغرا صدف

بہار دا موسم اپنے عروج اُتے اے۔ آل دوالے کھلریاں جبر دیاں زنجیراں تے محلاتی سازشاں توں بے خبر پھُل پوری طاقت نال ماحول وچ خوبصورتی تے خشبو نچھاور کر رہے نیں۔ چیتر دا دلفریب مہینہ شروع ہو چکیا اے جدوں فطرت دی ہر شے دلکشی دا پیرہن اوڑھتی‘ زندگی دے حسین تے تعمیری رنگ اجاگر کردی اے۔ فضا وچ پھیلیا ایہ سارا حسن تے بانکپن زمین دی وصل رت دی انگڑائی اے۔ جدوں اوہ سردی دی منجمد لہر توں نکلدی اے تے نیلے اسمان نوں ویکھ کے خوشی دا گیت الاپدی اے تے اوہدے سارے رنگ سطح تے نمودار ہون لگدے نیں۔ ظاہری دنیا نوں رنگین بنان والے ایہ رنگ احساسات وچ چٹکی بھر کے کھلکھلان دی ترغیب دیندے نیں۔ مٹی دے بت دا زمین توں گہرا بندھن ہوندا اے۔ دوہاں دے وچکار باطنی رابطہ استوار رہنا ضروری ہوندا اے کہ دوہاں نوں اک دوجے دی محبت دی لوڑ رہندی اے۔ جدوں مصنوعی بندشاں اوہناں دے رابطے مسدود کر دیندیاں نیں تے طوفان برپا ہوندے نیں۔ انسان چاہے وی تے دھرتی توں دور نہیں کیتا جا سکدا۔ ایس لئی زمین دے اندر ہون والی ساری کاروائی توں باطنی طور تے باخبر رہندا اے۔ بہار موسم وچ زمین دی الڑ انگڑائی انسان دے جذبات تے احساسات نوں مہکا دیندی اے۔ اوہ وکھووکھ حوالیاں نال خوشی دا اظہار کردا اے۔ کلچر تے فطرت دا گہرا تعلق اے۔ کلچر فطرت دے رنگاں نال ہم آہنگی دی عملی جستجو دا ناں۔
فطرت‘ محبت‘ رواداری تے مل جل کے رہن دے پیغام نال بھریا اے۔ کلچر ایس رنگ نوں اوڑھ کے فطرت دے حسن تے خیر پھیلان دے کھلے مقصد دی معاونت کردا اے جس طرح ہوا چلے تے پھول لہراندا اے ایسے طرح ڈھول وجے تے روح جھومن لگدی اے تے جسم فضا دے نال رقص وچ شامل ہو جاندا اے۔ موسیقی دے سر روحانی اسرار نیں۔ جہناں نوں صوفیاء نے سمجھیا تے انسان دی شخصیت دی تعمیروترقی لئی وسیلا کیتا۔ جدوں توں ایہ کائنات وجود وچ آئی اے بہار رت دا صیاد توں کدی ڈھکیا چھپیا تے کدی علانیہ تصادم ہوندا رہیا اے۔ ایس لئی کہ کجھ قوتاں دوجیاں نوں خوش نہیں ویکھ سکدیاں۔ اوہناں نوں تعمیر تے حسن نال وَیر ہوندا اے۔ نفرت دے سوداگر جلائوگھیرائو تے ٹٹ بھن دے راہیں دوجیاں نوں ناشاد کرن دی کوشش کردے نیں۔ دیسی مہینے چیتر دی پہلی تریخ یعنی 14 مارچ نوں جس دن پنجاب دا کلچر دے سی۔ لہور وچ عجیب صورتحال رہی۔ پاکستان دے شہر بے مثال وچ رستے مسدود رہے۔ اک صوبے دی پولیس نوں دوجے صوبے دی پولیس تے اک صوبے دے مسلح دستیاں دا سامنا دل دکھان والا عمل لگا۔ ہن پاکستان تے مسلماناں دے خلاف کم کرن والی عالمی متنازعہ شخصیات دے حکومت وقت تے دفاعی اداریاں دے خلاف بیانات اہل فکر نوں فکرمند کر رہے نیں پر کجھ وی واضح نہیں ہو پا رہیا۔ کون کہدے سکرپٹ تے چل رہیا اے یاں شاید ساریاں نوں اک مصنف نے وکھووکھ کردار عنایت کر رکھے نیں۔ اسیں سارے کٹھ پتلیاں بن چکے آں۔ سڑکاں تھیٹر دا روپ دھاردیاں جا رہیاں نیں‘ قنون تے عدل دا تماشا پوری دنیا ویکھ رہی اے۔ حکومت دی عجیب بے بس شکل ساریاں دے حوصلے کمزور کر رہی اے۔ شہبازشریف نے وزیراعلیٰ دے طور تے جو پچھان بنائی سی اوہ وزیراعظم بنن دے بعد معدوم ہوندی جا رہی اے۔
شہبازشریف صاحب نوں چاہیدا اے اوہ دبائو تے لمے چوڑے مشاورتی بورڈ چوں نکل کے اپنی شخصیت وچ چھپے خادم پنجاب والے جذبے نوں خادم پاکستان وچ ڈھال کے زیادہ توانائی دے نال اگے ودھدے نظر آن۔ بے رحم مخالفتاں دا سامنا کرکے سرخرو ہون لئی بہار توں سبق حاصل کرن۔ ساڈا ایمان اے کہ ایہ صبح کاذب اے جو ایس ویلے ساڈے ملک تے طاری اے اوہنوں ڈھلنا اے۔ خوشحالی تے امن دے سورج نے طلوع ہو کے گہری تریکی نوں رخصت کرنا اے پر ایہدے بعد اجالا اے۔ اصلاح اے‘ قنون دی عملداری ا ے‘ عدل دا معیاری نظام اے۔ سانوں یقین اے کہ سیاستداناں دا جمہوری نظام تے ایمان اوہناں نوں کسے وقتی سمجھوتتے تے نہیں اکسائے گا۔ مولانا روم دے مطابق ہر شے اپنی اصل ول پرتدی اے۔ سانوں وی اپنے اصل ول پرتنا اے۔ اپنی شاندار قدراں تے کلچر دے دلکش رنگاں نوں نال لے کے اپنی شخصیت تے ملک نوں خوبصورت بنانا اے۔ مصنوعی رویے پورے منظر نوں اجنبی بنا دیندے نیں۔ بہار رت وچ بہار دی روش ویکھو‘ بہار تے فطرت درویشانہ مزاج رکھدی اے۔ جو اوہدے وجود نوں ناپسند کردے نیں‘ اوہناں نوں وی اپنی خشبو تے نعمتاں توں محروم نہیں کردی۔ آئو ایس مختصر جہی زندگی وچ بہار دا مزاج اپنا کے سماج وچ خشبو تے خوشی بکھیریئے۔٭