اگ لین آئی تے گھر والی بن بیٹھی

مطلوب وڑائچ

سیاست ای کیہ عام زندگی توں لے کے جنگاں تک مذاکرات دا آپشن موجود ہوندا اے۔ ساڈے ایتھے سیاست جس ڈگر تے چل رہی اے تے اج وی اے۔ مذاکرات توں گریزاں پالیسی جدوں وی تے جنہے وی اختیار کیتی اوہدے نال سیاست وچ تباہی تے بربادی ای آئی۔ پاکستان دی سیاست وچ 90ء دی دہائی نائٹ میئر دی حیثیت یعنی خوف دی علامت سی۔ اوس دور دے حریف جو کدی تے اک دوجے دے لہو دے پیاسے لگدے سن اج دوویں یک جان تے دو قالب نیں۔ جو اک دوجے لئی ناقابل قبول تے ناقابل برداشت سن۔ 2006ء وچ چارٹر آف ڈیموکریسی دی لڑی وچ پروئے ہوئے‘ واری واری اقتدار وچ آئے تے ہن تریجی واری انج دی لئی کہ عمران خان‘ مسلم لیگ ن ای نہیں پی پی پی سنے تیراں چوداں پارٹیاں دے دشمن قرار پائے۔ 90ء دی دہائی ورگی مخالفت‘ ذاتیات تے دشمنی‘ اک دوجے نوں برداشت کرن تے وی تیار نہیں پر ہن کجھ امکان نظر آیا۔ وزیراعظم شہبازشریف نے کہیا کہ اوہ ساریاں دے نال گل بات کرن تے تیار نیں۔ عمران خان نے وی گل بات تے آمادگی ظاہر کیتی۔ پر ہن وی مخالفت وچ کمی نظر آ رہی اے نہ ای مذاکرات ول حالات ودھ رہے نیں۔ اک پاسے وزیراعظم نے گل بات دی گل کیتی‘ دوجے پاسے ایہہ وی کہہ رہے نیں کہ اک بندے نے ملک نوں تباہ کر دتا۔ ایہدے باوجود جے مذاکرات دی کوئی رمق موجود سی تے مریم نوازشریف صاحبہ دی اوس کانفرنس دوران عمران خان نوں دہشت گرد قرار دیندے ہوئے تحریک انصاف نوں شدت پسند تے عسکریتی جماعت دے طور تے ڈیل کرن دا مطالبہ کر دتا جو پارٹی حکومت وچ ہووے اوہدی لیڈرشپ دا دل وڈا ہوندا اے۔ اپوزیشن نوں ساہ لین دتا جاندا اے‘ مدھیا نہیں جاندا پر ساڈے ایتھے اپوزیشن نوں کندھ نال لان دی روایت ہور پکی ہو رہی اے۔ سابق وزیراعظم عمران خان دے خلاف 94 مقدمے درج کرا دتے گئے نیں۔ عمران خان نے عدالت وچ کہیا کہ اوہناں نوں لگدا اے کہ اگلے کجھ دیہاڑیاں وچ مقدمیاں دی سنچری بن جاوے گی۔ فیر اک وارنٹ گرفتاری دی تعمیل لئی طاقت دا جو استعمال ہویا پوری دنیا وچ پاکستان تے پاکستانیاں دی سبکی دا کارن بنیا۔
عمران خان نوں اقتدار توں وکھ کرن دے بعد اج اک ورھا ہون والا اے پر ایس حکومت دے کنٹرول وچ کجھ وی نہیں۔ پٹرولیم دیاں قیمتاں جس طریقے نال دونیاں ہو گئیاں‘ ڈالر وی اوسے طرح بہت زیادہ روپے دے مقابلے وچ مضبوط ہویا۔ مہنگائی دا طوفان سر چڑھ کے بول رہیا اے۔ اپوزیشن نے ایس حوالے نال اپنا کردار ادا کرنا ہوندا اے پر ایس حکومت نے اپوزیشن نوں ایس طرح کندھ نال لایا اے کہ عمران تے اینے مقدمے‘ باقی لیڈراں تے وی اوسے طرح مقدمے‘ عمران نوں کسے وی طرح پھڑ کے جیل وچ پان دی کوشش‘ پی ٹی آئی نوں اپنے لیڈراں دی گرفتاری دی پریشانی اے۔ اوہناں دی پوری کوشش اے کہ عمران خان نوں گرفتار نہ کیتا جا سکے۔ عمران دے خلاف اینے مقدمے بن چکے نیں ایہ سارا کجھ ایس لئی ہو رہیا اے کہ حکومت دے کنٹرول وچ نہ مہنگائی اے نہ امن امان دی صورتحال اے۔ تے ہر دوجے تریجے دن عمران دی گرفتاری دے حوالے نال کوششاں شروع ہو جاندیاں نیں۔ ایہ سارا کجھ انج لگدا اے کہ اپنیاں نکامیاں توں اپوزیشن نوں لاتعلق رکھیا جاوے۔ مہنگائی دے حوالے نال تحریک انصاف یاں اپوزیشن کسے قسم دی کوئی تحریک نہ چلا سکے۔ اوہنوں موقع ای نہیں مل رہیا کہ اوہ تحریک چلاوے‘ اوہنوں اپنی پئی ہوئی اے پر ایہ سارا کجھ پاکستان وچ جمہوریت نوں تباہی ول لے جا رہیا اے تے حکومت نے لوکاں نوں اک بتی دے پچھے لایا ہویا اے کہ آئی ایم ایف دے نال ساڈی ڈیل ہو رہی اے۔ دوست ملکاں توں اسیں پیسے لے رہے آں۔ ایہ سارا کجھ ہو جاوے گا تے لوکاں نوں فیر اسیں ریلیف دین دے قابل ہو جاواں گے۔ آئی ایم ایف ولوں واضح طور تے ایہ پہلے وی کہیا گیا سی کہ جدوں تک عمران خان معاہدے نوں سپورٹ نہیں کردے اسیں ڈیل کرن لئی تیار نہیں پر ایہدے باوجود وی ایہ حکومت عمران خان دے نال کسے قسم دا نہ رابطہ کرنا چاہندی‘ نہ مذاکرات اوہدے نال کرنا چاہندے نیں۔ آئی ایم ایف ولوں امداد ملدی اے یاں نہیں ملدی‘ اودھر چین نے پنجاہ کروڑ ڈالر پاکستان نوںدے دتے نیں۔ ایس چیز نوںلے کے وزیرخزانہ ولوں بڑی خوشی دا اظہار کیتا جا رہیا اے پر چین نے ایہ جو پیسے دتے نیں ایہ صرف اوہناں منصوبیاں لئی نیں جو پہلے توں جاری نیں۔ امریکہ ایس حکومت دا بڑا پشت پناہ بنیا سی امریکہ نوں چاہیدا اے کہ اوہ اگے آوے تے پاکستان دے مسئلے حل کرن دی کوشش کرے پر فی الحال اجے انج ہوندا نظر نہیں آ رہیا۔
باقی مہنگائی دے حوالے نال جے گل کریئے تے میں جدوں وی پاکستان آنا واں تے جو بجٹ میں اپنے واسطے رکھنا واں ایس واری انج لگا کہ اوہ چار گنا اپنی وقعت کھو چکیا اے کہ جتھے میرا اک مہینے دا ٹور ایہناں پیسیاں وچ ہوندا سی اوہ ہن اک ہفتے لئی وی کافی نہیں تے میرے ورگا بندہ اوہ وی پاکستان آ کے مہنگائی دے ہتھوں بڑا پریشان اے۔ عام پاکستانی دا فیر کیہ حال ہووے گا‘ ایہدا اندازہ ای کیتا جا سکدا اے۔ آخر وچ میں ایہ کہنا چاہنا واں کہ ایہ حکومت تھوڑا جیہا اعتدال ول آوے‘ اپنیاں نکامیاں چھپان لئی عمران خان دا عرصہ حیات تنگ نہ کرے۔ مذاکرات تے دشمناں دے وچکار جنگاں دے وچکار وی ہوندے رہندے نیں۔ ہن وی عمران خان نے جے گل بات تے آمادگی ظاہر کیتی اے تے اوہنوں موقع غنیمت سمجھدے ہوئے عمران خان دے نال حکومت نوں گل بات ضرور کر لینی چاہیدی اے تے پنجاب دی نگران حکومت نوں جس مقصد لئی نگران بنایا گیا اے اوہ اپنا کم چنگے طریقے نال کرے نہ کہ لانگ ٹرم پالیسیاں بنانا تے نویں کیس رجسٹرڈ تے فائل کرنا ایہ نگراناں دے کم نہیں ہوندے سگوں ایہ مہرباناں دے کم لگدے نیں۔ تے میری مخلصانہ رائے وچ پنجاب دی نگران کابینہ دا حساب ایس ویلے ایہہ وے کہ گوانڈھی دے گھر اگ لین آئی تے گھر والی بن بیٹھی۔