سیاست‘ سیاستدان تے اسٹیبلشمنٹ

اج پاکستان ایس موڑ تے کھڑا اے کہ ایہدے سیاسی حالات نوں ویکھیا جاوے تے
لگدا اے کہ شاید ایہدے وجود وچ آن دی بنیاد ای غلط سی

یاسر الطاف

اج پاکستان ایس موڑ تے کھڑا اے کہ ایہدے سیاسی حالات نوں ویکھیا جاوے تے لگدا اے کہ شاید ایہدے وجود وچ آن دی بنیاد ای غلط سی۔ جدوں ہندوستان دی تقسیم قریب سی تے گاندھی نے اعلان کیتا کہ اوہ ہندوستان بنن مگروں زرعی اصلاحات کرن گے یعنی وڈی جاگیراں کھو لیتیاں جان گئیاں تے جاگیراں نوں حکومت اپنے قبضہ وچ لے لووے گی۔ ایس اعلان مگروں ہندوستان وچ موجود مسلمان جاگیرداراں نے ہندوستان وچ موجود دوجی جماعتاں نوں خیرآباد کہہ کے مسلم لیگ وچ شمولیت اختیار کرنا شروع کردتی کیوں جے اوہ سمجھدے سن کہ ایتھے موجود اوہناں دے ہزاراں یا سینکڑاں ایکڑ زمین جدوں اوہ نویں ملک پاکستان وچ جان گے تے اوتھے اوہناں نوں کلیم مگروں واپس مل جان گئیاں تے اوہ اوتھے جا کے وی جاگیراں دے ای مالک رہن گے تے من و عن انج ای ہویا تے تقریباً بندے نوں اوہدے ریکارڈ دے مطابق زمین جائیداداں کلیم وچ متبالد دے طور واپس کردتی گئیاں۔
پاکستان بنن مگروں کجھ عرصہ تے معاملات ٹھیک چلدے رہے فیر ہولی ہولی اسٹیبلشمنٹ نے وی اپنا رنگ وکھانا شروع کردتا تے حکومتی معاملیاں وچ اپنی گرفت کافی مضبوط بنانا شروع کردتی کیوں جے ساڈے خطہ وچ اونچ نیچ تے غریب امیر یعنی طبقاتی نظام بہت مضبوط سی ایس لئی جدوں ریاست پاکستان بنی تے ایتھے فیر اوہو لوک اقتدار اتے قابض ہو گئے جو مشترکہ ہندوستان وچ جاگیراں جائیداداں دے مالک سن تے انگریز بہادر دے مفادات لئی کم کردے سن تے ہن وی 75 ورھیاں توں اسٹیبلشمنٹ دی خوشنودی لئی کم کر رہے نیں تے سدا اقتدار وچ رہندے نیں کیوں جے اسٹیبلشمنٹ نے حکومتی معاملیاں وچ ایس قدر اپنی جڑاں مضبوط کر لیتیاں سن کہ کوئی وی حکومت اوہناں دی آشیرباد دے بغیر نہ تے قائم ہو سکدی سی تے نہ ای چل سکدی سی جو اج تک ایسا ای اے۔
اج وی جو جنگ پاکستان وچ لڑی جا رہی اے اوہ نہ تے عوام دی فلاح و بہبود دی اے تے نہ ای کوئی جمہوریت دی ایہہ صرف تے صرف اقتدار دی جنگ اے تے ایس اقتدار دی جنگ وچ ہر سیاستدان ہر نام نہاد سیاسی جماعت اسٹیبلشمنٹ دی گود وچ بیٹھ کے اقتدار دے مزے لوٹنا چاہندی اے۔
جتھوں تک عمران خان دی گل اے اوہ ہر گز ہرگز وی اسٹیبلشمنٹ دے خلاف یا اوہدی سیاست وچ بے جا مداخلت دے خلاف چیچخ و پکار نہیں کر رہیا اوہدا رونا دھونا صرف ایس ضدی بچہ والا اے جو اپنے پیو دی گود توں اک دوجے بچہ نوں ہٹا کے خود بیٹھنا چاہندا اے تے ایہہ گل کہنا کہ اج عمران خان اینٹی اسٹیبلشمنٹ اے تے ایہہ گل کسی طرحاں وی درست نہیں اے اوہدی ضد صرف تے صرف ایہہ کہ ایس شہباز شریف حکومت دا ساتھ چھڈ دیو تے خدا لئی اک واری دوبارہ مینوں آزما کے ویکھو جے تہاڈی خوشنودی نال تھوڑا وی ہٹ جاواں تے فیر گل کرنا۔
شہباز شریف دے پہلے دن توں کوشش سی کہ مینوں وزیراعظم بنا دیو چاہے بوٹاںاتے بیٹھ کے حلف چکنا پووے۔باقی نواز شریف توں لے کے عمران خان تک ساری قوم نوں بیوقوف بنا رہے نیں۔ اوہناں دی ہر گز ایہہ کوشش نہیں کہ ایس ملک نوں اک فلاح جمہوری ریاست بنایا جاوے بلکہ ایہہ سب ایس حمام وچ ننگے نیں تے اسٹیبلشمنٹ وی جاندی اے کہ ایہہ سب ناتے قوم دے نال مخلص نیں تے نہ ای اوہناں دی کوشش اے کہ اسٹیبلشمنٹ دا سیاست وچ اوہ رول ختم ہووے۔
ایہہ گل اج روز روشن وانگوں عیاں اے کہ پی پی پی مسلم مولانا فضل الرحمن ق لیگ تے خاص طور تے عمران خان دی پی ٹی آئی اسٹیبلشمنٹ دے تابع ای اوہ اقدام کرناچاہندے نیں جہدے توں اوہناں نوں اقتدار نال چمٹے رہن دا موقع میسر رہے۔
ہر وارداتیے دا سٹیٹس ہوندا اے کوئی چور اپنی گینگ بنا کے بنک لوٹدا اے تے کوئی کسی دی جیب وڈدا اے تے کوئی کسی ریڑھی والے دے پیسے چورا لیندا اے۔ عمران خان ہر دن چور لٹیریاں دی رٹ لائے رکھدا اے لیکن خان صاحب نے وی اپنی حیثیت دے مطابق چوریاں تے کیتیاں نیں لیکن اوہناں نوں چوریاں صرف سیاستداناں وچ ای کیوں نظر آندیاں نیں۔
جے خان صاحب وچ جرات اے تے کیوں نہیں کہندے کہ فلاں فوجی جنرل نے اینے ارب لوٹ کے کہڑے ملک وچ جزیرے خریدے نیں اوہ ایہہ کیوں نہیں دسدے کہ فلاں آئی ایس آئی سربراہ ارباں ڈالر دا مالک کیویں بن گیا اوہ لوکاں نوں ایہہ کیوں نہیں دسدے کہ فلاں کرنل دے اینے پلاٹ اینے ایکڑ زمین تے اینے پلازہ کتھوں آئے نیں۔ ایہہ ہر گز نہیں کہواں گا کہ سیاستداناں نے کرپشن نہیں کیتی ساریاں نے کیتی اے تے ملک و قوم دا خزانہ لوٹا اے لیکن عمران خان قوم نوں پاگل نہ بناوے۔
اقتدار لئی ایس قوم دے بالاں دے مستقبل دے نال نہ کھیڈے۔ جے اوہ چاہندا اے کہ ایہنوں واقع ای وچ حقیقی جمہوریت چاہیدی اے تے فیر اوہنوں دوغلہ پالیسی توں باہرآنا ہووے گا لیکن میرا ذاتی خیال اے بلکہ مینوں یقین دی حد تک پتہ اے کہ ایہہ سارا ڈرامہ رچا کے قوم نوں بیوقوف بنایا جا رہیا اے۔
باقی جتھوں تک رہی ایس موجودہ حکومت دی گل ایہدے وچ خاص کر ن لیگ تے پی پی پی وچ سمجھدا ہون کہ اوہ ایس ویلے مکمل طور تے اسٹیبلشمنٹ پالیسی تے گامزن نیں نہ اوہناں دے کول کوئی قومی نظریہ اے تے نہ ای قوم دی بہتری لئی کوئی پلان اے۔
شہباز شریف دے پہلے دن توں کوشش سی کہ مینوں وزیراعظم بنا دیو چاہے بوٹاںاتے بیٹھ کے حلف چکنا پووے۔باقی نواز شریف توں لے کے عمران خان تک ساری قوم نوں بیوقوف بنا رہے نیں۔ اوہناں دی ہر گز ایہہ کوشش نہیں کہ ایس ملک نوں اک فلاح جمہوری ریاست بنایا جاوے بلکہ ایہہ سب ایس حمام وچ ننگے نیں تے اسٹیبلشمنٹ وی جاندی اے کہ ایہہ سب ناتے قوم دے نال مخلص نیں تے نہ ای اوہناں دی کوشش اے کہ اسٹیبلشمنٹ دا سیاست وچ اوہ رول ختم ہووے۔
عمران خان جلسیاں وچ لکھاں لوک جمع کر لووے لیکن اوہ وی بڑی چنگی طرحاں جاندا اے کہ جدوں تک بڑے بھیا اوہناں اتے نظر کرم نہیں فرمان گے۔ اوہ حکومت وچ آنا تے کیہ اوہدے کول وی نہیں آ سکدے ایس لئی اج وی اسیں 75 ورھیاں پہلے والے دور وچ ای کھڑے نیں تے اسٹیبلشمنٹ دی ای خوشنودی اتے تکیہ کیتے بیٹھے نیں۔ کیہ مسلم لیگ کیہ پی پی پی کیہ مولانا سب ای دی نظراں اسٹیبلشمنٹ دی منظوری اتے نیں تے عمران خان اپنی پوری کوشش وچ اے کہ کسی طرحاں اوہناں دی نظر کرم اک واری فیر میرے اتے ہو جاوے تے مینوں فیضیاب کردتا جاوے لیکن ایسا کدوں تک چلے گا اج وی ویلا اے کہ سارے سیاسی و نام نہاد سیاسی جماعتاں ایس گل تے متفق ہون کہ ملک نوں سیاستداناں نے چلانا اے بیورو کریسی نے نہیں چلانا تے شاید کجھ بہتری دی امید پیدا ہو جاوے لیکن ایسا اوہدوں ای ممکن ہووے گا جدوں جماعتاں تے عوام وچ نظریہ جنم لووے گا تے شخصیت پرستی دی موت ہووے گی۔